يۇنۇسنىڭ بېلىقى

toethogul

	يۇنۇسنىڭ بېلىقى     تۆتھوگۇل     سېنىڭ بېلىقىڭ،  يىراق-يىراقلاردا سېنى ساقلاپ تۇرۋاتقان سەن ئۈچۈن قارنىغا ھىچ نېمە كىرگۈزمەستىن سېغىنىشنىڭ ئۇيۇغان قانلىرىدىن باشقا؛ سېنىڭ بېلىقىڭ ئۇزاق-ئۇزاقلاردىن پاراخوتلارنىڭ ئاۋازى كېلىۋاتقاندا ناخشا ئېيتىۋاتقان زەبۇردىن سېغىنىشنىڭ ناخشىسى پۇشايمان ئارلاشقان؛   مانا، يىراقلارغا سۈرگۈن بولغان ئاشىق قۇم پۇراپ تۇرغان تەنلىرىڭگە قىياسەن قۇپقۇرۇق ساھىللارنى قۇچاقلاپ يېتىۋاتىدۇ...   ئامرىقىم! ياشلىرىمدا ئۈزىۋاتىسەن... بىلىمەن قارنىڭ تېخى ئوچۇق پەريادلىرىمغا تەۋبىلىرىمگە؛ رەببىم بىلگەن بىر مەزگىلگىچە ياتتىم قوينۇڭدا ئاندىن، مېنى ئالدى ئېگىسىز ئاراللار ئارىسىغا سېغىنىشنىڭ قەسىمىنى ئويۇپ تىلىمغا ئاراللار ئارا نامىڭنى زىكرى قىلدىم ھۆسنۈڭگە تەڭداش بىر مەنزىل تاپالمىدىم دىلىمغا؛ ... مانا، سېغىنىشلىق ياشلىرىم بىلەن كۆز ئالدىمدىكى دېڭىزلار بىلەن تەڭلەشكىنىمدە قوينۇمدا شۇيغۇيسەن ئوماق بېلىقىم؛ ئايسىز كېچە ھىچكىم بىلمەس سۈرئەتتە ئۈزىۋاتقان قوينۇڭدا خوتەن بىر مەخپىيەتلىك قەشقەر تىپىرلايدۇ چولپان يۇلتۇزىغا قاراپ ئاقسۇنى بويلاپ ئاقىدۇ يېشىم ھەمىشە كورلىدا تەنھا بېشىم تۇرپاندا دانە، دانە قاسراقلىرىڭ بىر دانىسى غۇلجىدا، ئاچچىق كۈلكىدە بىر دانىسى ئۈرۈمچىدە خارلىق ئىچىدە قۇمۇل ھامان غېرىپ خانەمدە؛   ئامرىقىم! ئۆلۈم چۈشەيمەن بۇ كۈنلەردە سېنى قۇچاقلىرىمدا بوغۇزلاپ ۋاقتىدا ئۆدىيەلمىگەن قۇربانلىقنىڭ ئورنىدا... مانا بۈگۈن قوللىرىم قىپقىزىل قان كەلگۈسىگە ئۇزاۋاتقان خانقىزنىڭ توي كۈنىدە...   ئامرىقىم! بىر تىنىقىم قالدى ئارتۇق ۋەدىمىز تۈپەيلى كەچتىم ئۇنىڭدىن كىم ياشىسا ياشىسۇن ئۇندا... مېنى كەلمەسكە كەتتى دەپ بىل ساڭا يازغان بۇ قۇرلىرىمدا...     2011.02.19 ئېلاستىكىلىق     تۆتھوگۇل   كۈنلەرنىڭ سوزىلىشى بىر ئېھتىمال چوكىلاردا ئۇزىرايدۇ بەلكىم؛ بەلكىم سەن ھىچ كۆرۈپ باقمىغان ئۈچەيلىرىڭدەك ئۇزۇن بۇ ئىشلار ھەزىمىنى ھىچكىمگە تارتقۇزمىغان؛ بېشىنى، پۇت-قوللىرىنى ۋە ئاشقىزىنىنى باشقىلارغا ئۆتنە بېرىپ تۇرۇش ئاپئاق تامدەك تاتىرىپ كەتكەن بۇ تۇرمۇشتا بىر  ئېھتىمال چىرايىڭدىكى تەبەسسۇمغا ئۆت كەتكەندە ئاشۇ ئوتتا كۆيىۋاتقان ھەسرەتلىرىمنى كۆردۈم بەلكى سەن ئادەملەرنى كىچىك كۆرەلەيسەن ئۇلارنىڭ قورساقلىرى ساڭا تاقىشىپ تۇرسىمۇ پۇت-قوللىرى بېقىنلىرىڭغا پېتىپ تۇرسىمۇ... سەن ئاڭلا! پېتىۋاتقان قۇياشنىڭ كەينىدىن قوغلا ۋە پادىلىرىڭنى تاپ تاغدا... يۇلتۇزلار كېچىنىڭ باراڭلىرىدا پىشىۋاتىدۇ كۆرۈنمەس باراڭلار؛ نەپەسلىرىڭگە بىر پاكىزە جاي سېنىڭ پاكىزە تىنىقلىرىڭ بىلەن مەيدانغا كېلىدۇ...   قۇياشنى سوزۇلغان چەمدەك كۆرىمىز بىر كۈن بەلكىم بۇلارنىڭ ھەممىسى كەينىمدىلا؛ بۇ پەردىنى يىرتساملا كۆرەلىشىم مۇمكىن نېمىلەرنى يىغلاپ، نېمىلەرنى كۆيۈپ، كۆيدۈرۈپ يەنە نېمىلەرنى ئارزۇ قىلىپ يۈرگىنىمنى...   قارا... بىر تامچە سۇدىن ھازىرغىچە ھىچكىمنىڭكىڭگە ئوخشىمايدىغان بىر دۇنيا يارىتىلدى ماڭا چەكسىز دۇنيالار ئارىسىدا؛ بوش-بوش پىچىرلار شاماللار تەرلىگەنچە تەۋرەپ تۇرىۋاتقان زېمىننى يەلپۈپ نۇھ نېمىنى چۈشىدى؟! ئىچىدىكى ئىنساننى كۆيدۈرمىگەن ئوت نەلەرگىچە ئۇزاۋاتىدۇ؟! غار دوستلىرىنىڭ ئۇيقۇلىرى كىملەرنى ئۇخلىتىۋاتىدۇ...؟!   ئاھ، كەرىمىڭ يۈكسەك رەببىم! مەڭگۈلۈك داۋامىمنى ياراتقان زاتسەن كېچىلەرنى ئۆچۈرۈپ قاراڭغۇ قىلغان كۈندۈزنى كۆزۈمگە ھۈركىگەك قىلغان ئاچچىق، ئاچچىق كۈنلەرگە ئۇلاپ ھالاۋەتلىك كۈننى، قوغۇشۇندەك قاتقان چىرايلارنى قاھ، قاھ كۈلدۈرگەن زاتسەن؛   سۇلايماننىڭ جىنلىرىغا تەكلىپ ئېتىلدىم قاغىلارغا يازدىم جاۋاب خېتىمنى؛ شېئىر يېزىش بەلكىم بىر قىش بويى باھار تىلاۋەت قىلىنىۋاتقاندا يېغىۋاتقان قارلارنىڭ جىملىقىدا ھاياتنىڭ نامىزىنى چۈشۈرۈش ياكى يارىتىلغان ئۆلۈمنىڭ... ئىككىسىنىڭ ئارىسىدا ئۆسكەن بىر قاراڭغۇلۇق دۈمبىلىرىمىزگىچە يامراپ كەلسە يەجۈجى بىلەن مەجۇجى ناغرا-سۇنايلىرىنى چېلىپ بايرام قىلسا بابىلنىڭ چوقىسىدا تىلىمىزنىڭ ئۇچىدا بىز تاشلاپ ماڭغان يول بىلەن تەنتەنە قىلسا كونا بايراملار كۈنىمىزدە شېئىر بايرىمى: خائىنلىق نېمىشقا شۇنچە تاتلىق؟! ۋە نېمىشقا، نېمىشقا شۇنچە ئازابلىق...؟!     2011.02.12

jahanarkisi

	ئالجىغان

rumman

	ئۈستىدىكى جاھان ئەركىسى: كىمنى دەۋاتىسىز ئالجىغان دەپ، شېئرنى چۈشەنمىگىنىڭىز بىلەنلا ئالجىغان بوپ قالامدا؟  شئېرنى چۈشەنمىگەن ئادەم ئالجىغانمۇ ياكى يازغان ئادەم؟ ئەسسالامۇ ئەلەيكۇم! تۆتھوگۇل : شېئىرىڭىز تولىمۇ ياخشى چىقىپتۇ.، بولۇپمۇ يۇنۇسنىڭ بېلىقى نى ئوقىغىنىمدا يۈرىكىمنىڭ ئېچىشىپ كېتىۋاتقانلىقىنى سەزدىم ھەم ھەل خىل ھېسلارغا چۆمۈلدۈم ، نۇرغۇن ئىشلار كۆز ئالدىمغا كەلدى........ قەلىمىڭىزگە ئاللاھتىن تېخىمۇ كۆپ قۇۋۋەت تىلەيمەن!

巴哈

	ئەدبىياتنىڭ بەك يۇقىرى پەللىسىگە يېتىپسىز!!!!!!!! لېكىن بۇنى مەن پەقەت چۈشەنمىدىم توۋا!!!!!!!!!!!!!!

jmarzu

	يۈكسەك دەرىجىدىكى ئازاپ~~~ئۈمۈدسىزلىك~~~جەمىيەتتىن زىرىكىش~~~ ياخشى ئىش ئەمەس~~~

wall

	داڭلىق يازغۇچى شائىرە تۆتھوگۇل گە: سىزنىڭ نەچچە كۈننىڭ ئالدىدا ئىلان قىلغان «شەلۋەرەش»دىگەن «شىئىر»ىڭىزنى كۆرۈپ (ئەلۋەتتە،يوللانغان ئىنكاسلارمۇ بار) چۈشىنەلمەي ،ئاخىرى چۈشەنمەسلىك قارارىغا كەلسەم ،بۇيەردە يەنە بىراقلا بىر نەچچىنى ئىلان قىلىۋىتىپسىز؟؟؟ بۇ نوبىل مۇكاپاتىغا لايىق نادىر ئەسەرلىرىڭىزنى مەندەك ئادەتتىكى تورداشلار چۈشىنەلمىسەك؟؟!سىزنىڭ ياكى ئاشۇ «شىئىر»لاردىن ھوزۇرلىنىپ مەستخۇش بولۇپ ،تەسىرلىنىپ كۆزلىرى ئىششىپ ، ماختاپ ئېغىزلىرىدىن كۆپۈك قايناپ كەتكەنلەردىن بىرەرىمۇ بىرەر ئىغىز بولسىمۇ ئادەمنى قايىل قىلغىدەك چۈشەنچە بىرەلمىسە؟؟؟! چۈشەنمىدۇق دىسەك ئاددىي كىشىلەر بىر ئوقۇپ چۈشىنەلمەيدۇ قايتا –قايتا ئوقۇڭلار دەپ پەتىۋا توقۇيدىكەنسىلەر،سىلەرچە ،بىزدەك ئادەتتىكى كىشىلەرنىڭ قايتا ئوقۇشى زۆرۈرمۇ؟!!! بۇ شىئىرنىڭ قايسى تۈرىگە تەۋە،قايسى ۋەزىندە يىزىلغان دىسە ،بۇ شىئىردىكى تۇراق،ۋەزىن، قاپىيەلەرنى دەپ بىرەلمىسەممۇ ئىشقىلىپ بۇ دىگەن كاتتا شىئىر دەيدىكەنسىز؟؟؟!ئۆزىڭىزنىڭ ئىجادىيەتلىرىمۇ ياكى... ؟!!! ياكى، ئەدەبىياتىمىزدىكى شىئىرغا قويۇلىدىغان تەلەپلەر شۇنچىلىك دەرىجىدە تۆۋەنلەپ كەتتىمۇ؟؟؟ سىز ۋە سىزنىڭ ئەسەرلىرىڭىزنى تازا چۈشەنگەنلەرنىڭ بىرەر ئىغىزمۇ ئورۇنلۇق چۈشەنچە بىرەلمەسلىكى نەتىجىسىدە، بۇ ئەسەرلەر بىر تەرەپتە قىلىپ،مۇنبەردە ئىككى قۇتۇپقا بۆلۈنۈپ ،بىر-بىرىگە ھۇجۇم قىلىشلار باشلىنىپ كىتىپ،مۇنبەر مۇقىملىقىغا تەسىر كۆرسىتىدىكەن. شۇڭا،مەن سىزنىڭ ئوتتۇرىغا چىقىپ ئاشۇ ئەسەرلىرىڭىز توغرىسىدا كەڭ تورداشلارغا چۈشەنچە بىرىشىڭىزنى سورايمەن.

sat喜欢

	مەزمونىنى ئوقۇرمەنلەر ئۆزى چۇشۇنۋالسۇن  دىگەن ئوخشايدۇ مۇھەببەت بىلەن نەپرەت ،ئۇمۇت  بىلەن ئۇمۇتسىزلىككە تولۇپتۇ! ئاھ، كەرىمىڭ يۈكسەك رەببىم! مەڭگۈلۈك داۋامىمنى ياراتقان زاتسەن كېچىلەرنى ئۆچۈرۈپ قاراڭغۇ قىلغان كۈندۈزنى كۆزۈمگە ھۈركىگەك قىلغان ئاچچىق، ئاچچىق كۈنلەرگە ئۇلاپ ھالاۋەتلىك كۈننى، قوغۇشۇندەك قاتقان چىرايلارنى قاھ، قاھ كۈلدۈرگەن زاتسەن؛ سۇلايماننىڭ جىنلىرىغا تەكلىپ ئېتىلدىم قاغىلارغا يازدىم جاۋاب خېتىمنى؛ شېئىر يېزىش بەلكىم بىر قىش بويى باھار تىلاۋەت قىلىنىۋاتقاندا يېغىۋاتقان قارلارنىڭ جىملىقىدا ھاياتنىڭ نامىزىنى چۈشۈرۈش ياكى يارىتىلغان ئۆلۈمنىڭ... ئىككىسىنىڭ ئارىسىدا ئۆسكەن بىر قاراڭغۇلۇق دۈمبىلىرىمىزگىچە يامراپ كەلسە يەجۈجى بىلەن مەجۇجى ناغرا-سۇنايلىرىنى چېلىپ بايرام قىلسا بابىلنىڭ چوقىسىدا تىلىمىزنىڭ ئۇچىدا بىز تاشلاپ ماڭغان يول بىلەن تەنتەنە قىلسا كونا بايراملار كۈنىمىزدە شېئىر بايرىمى: خائىنلىق نېمىشقا شۇنچە تاتلىق؟! ۋە نېمىشقا، نېمىشقا شۇنچە ئازابلىق يوقۇردىكى قۇرلارنى بەكمۇ  ياقتۇردۇم!

toethogul

	يۇنۇسنىڭ تويى(1)     تۆتھوگۇل   بىر توپ ئادەملەر يىغلايدۇ ئاپئاق كىيىملەرگە پۈركىنىپ ئۇسۇل ئوينايدۇ ئاراللار ئارىسىغا بۆلىنىپ كەتكەن يۇنۇسنىڭ تويىدا؛ قىپ يالىڭاچ بولۇپ قەتلىئام قىلىنغان بېلىقىنى كاۋاپ تارتىپ يەيدۇ يۇنۇسنىڭ تويىدا؛   بىر توپ ئادەملەر قارا كىيىم كىيىشىدۇ كېچىدىنمۇ قارا مازارلارغا ياتقۇزۇلغان جەسەتلىرىنى ئىزدەيدۇ يۇنۇسنىڭ تويىدا؛ كۆكسىلىرى يوق قىزلار خېنە قويىدۇ سوغۇق قىشىغا ئاق-سېرىق ياشلىرى ئارا قارىۋالىدۇ دېڭىزلىرىغا؛ شاماللىرى يوق دېڭىزلار تاقىر دېڭىزلار يامغۇر تىلەيدۇ باشلىرىغا يۇنۇسنىڭ تويىدا؛   بىر توپ ئادەملەر ئۈزۈپ كېلىدۇ يىراقلاردىن كېمىلىرىنى پاچاقلاپ يالاڭ ئاياق كۆز ياشلىرىدا؛ شالاڭ قەدەملىرىدە ئەسلەيدۇ سۇ يۈزىدىكى يۇنۇسنىڭ تويىدا جان تالىشىلىرىنى...     سۇدىن يۇمشاق ئاقىدۇ كىشىلەر يۇنۇسنىڭ تويىدا؛ ياشلىرى بىلەن تولدۇرۇپ ئۆزىنى ياتىدۇ تىللىرىنىڭ ئۇچلىرىدا ئاللىقاچان ئېتىلگەن ئىشىكلىرىنى چېكىپ كېچىكىپ تامغان بىرقانچە تامچە سۆزى بىلەن يۇنۇسنىڭ تويىدا...     10.06.2011

jahanarkisi

	راس ئالجىپتۇ!!!

toethogul

	توشۇغۇچى     تۆتھوگۇل     تالاي ۋاراقلىرىم بار ئالتە بىلەن يەتتىنىڭ ئارىسىدا تاشلىنىپ قالغان ماكانىمدا؛ ئۇ، چوڭقۇر بىر ھاڭ يولۋاس تېرىلىك كۆرۈنىدۇ گاھىدا تەرلىرىمدە كېڭىيىدۇ يانچۇقلىرىمنى ئۆرۈپ ساڭا ئېلىۋالغان نەرسىلىرىمنى ئەسلىگىنىمدە ئۆلۈپ كېتىدۇ ئۈستىمىزدە؛   ئامرىقىم! ئۆزۈمنى تەتۈر قىلىپ كۆرسەتسەم ساڭا خەتلەر دۆۋىسىدىن باشقا ھىچنېمىنى كۆرەلمەيسەن ئالدىڭدا چۈنكى مەن بىرلا سۆز ئۇ تامچە ئەمەس بۇ قېتىم پەقەت، ئۇبىرلا سۆز ئەبەدىل ئەبەد . . «كۇن»     12.04.2011