مەلۇماتنامە (فېليەتون)

dinara

	مەلۇماتنامە (فېليەتون) جېلىل ئاۋۇت ⅹⅹⅹ  ناھىيىلىك پارتىكۇم ۋە ھۆكىمەتكە:      شۇنى ئالاھىدە مەلۇم كىلىمىزكى، يېزىلىق پارتىكۇم رەھپەرلىرى مۇزاكىرە قىلىش ئارقىلىق، بۇ يىل يېزىمىز تەۋەلىكىدىكى بارلىق تېرىلغۇ يەرلەرگە كېۋەز تېرىپ، دېھقانلارنىڭ كىرىمىنى ئاشۇرماقچى بولغان ئىدۇق. بىراق، يېزىغا يېڭىدىن شاڭجاڭلىققا سايلانغان مامۇت نۇر بىزنىڭ بۇ پىلانىمىزنى ئىجرا قىلىشىمىزغا ماسلىشىشنىڭ ئورنىغا، ئەكسىچە پۇتلىكاشاڭ بولدى. شۇ سەۋەپتىن يېزا بويىچە مىڭ موچە يەرگە دېھقانلار ئۆزلىرى خالىغان زىرائەت ۋە كۆكتاتلارنى تېرىۋالدى.       ئالدىنقى يىللىرى بىز كېۋەز تېرىش ۋە پەرۋىش قىلىش جەھەتتە تەلەپكە يەتمىگەن ھەر بىر ھالقا ئۈچۈن، بىر مو يەرگە 30 يۈئەندىن جەرىمانە ئېلىش ئارقىلىق پاختىنىڭ بىرلىك مەھسۇلاتىنى 300 كىلوگىرامدىن ئاشۇرۇپ، ناھايىتى ئوبدان بىر تەجرىبە-ساۋاق يەكۈنلىگەن ئىدۇق. بۇ يىل مامۇت نۇر بىزنىڭ بۇ ياخشى تەجرىبىنى يولغا قويىشىمىزغا ئىزچىل ھالدا قوشۇلماي كەلگەنلىكتىن، كېۋەز تېرىشتىن باشلاپ پەرۋىش قىلىش ئاخىرلاشقىچە بولغان ھالقىلارنىڭ ھېچقايسىسىدا دېھقانلاردىن بىر يۈئەنمۇ جەرىمانە ئالالمىدۇق. نەتىجىدە، كېۋەز تېرىش ۋە پەرۋىش قىلىش خىزمىتىنىڭ ھېچقايسىسى بىزنىڭ كۆڭلىمىزدىكىدەك بولماي قالدى.      بىز ئورۇنلاشتۇرغان نۇرغۇن ئىشلاردا مامۇت نۇر توسالغۇ بولۇپ قالغانلىقتىن، بىز ئۇنى كۆزىمىزدىن يىراق تۇرسۇن، دەپ روشەن بۇلاى كەنتىگە مەسئول كادىرلىققا ئاجراتقان ئىدۇق. بىراق، ئۇ يەنىلا 4-5 كۈندە بىر قېتىم يېزا ئورگىنىغا كېلىۋېلىپ، بىزگە ئارام بەرمىدى. چىرايلىق گەپ قىلساق، ‹مەن كەنت باشلىقى ئەمەس، يېزا باشلىقى، مېنىڭ ئاساسلىق خىزمىتىم يېزىدا....› دەپ بىز بىلەن تەڭمۇ تەڭ تۇردى.      بىز بۇ يىلمۇ ئالدىنقى يىللاردىكىدەك 4-ئايدىن 8-ئايغىچە بولغان دېھقانچىلىقنىڭ ئالدىراش مەزگىلىدە يېزا ئورگەن كادىرلىرىنىڭ دەم ئېلىش كۈنلىرىنى ئەمەلدىن قالدۇرغان ئىدۇق. بۇ يەكشەنبە كۈنى يېزىدىكى كادىرلارنى كەنت، ئەترەتلەرگە بېرىپ دېھقانلارنى بازارغا بېرىشتىن توسۇشقا ئورۇنلاشتۇرساق، مامۇت نۇر بۇ ئورۇنلاشتۇرۇشقا قارشى چىقىپ، ‹يېزا كادىرلىرى ۋە دېھقانلار تۆمۈر كالا ئەمەس، ئۇلارمۇ ئادەم. دەم ئالماي ئىشلىگىلى تۆت ئاي بولدى. مەن بۈگۈن قەتئىي دەم ئالىمەن....› دەپ، باشقا كادىرلارغا ئوت قويرۇقلۇق قىلدى.       قىسقىسى، مامۇت نۇر ئىزچىل تۈردە يېزىدىكى كادىرلار ۋە دېھقانلارغا قالقان بولۇپ، بىز ئورۇنلاشتۇرغان نۇرمال خىزمەت تەرتىپىنى بۇزۇپ كەلدى. شۇ سەۋەپتىن بۈگۈن بىز مامۇت نۇرنىڭ شاڭجاڭلىق ۋەزىپىسىنى ئېلىپ تاشلاپ، ئۇنى ئىشتىن بوشاتتۇق.      يېزا پارتىكۇم رەھپەرلىرىنىڭ پىكىرى: مامۇت نۇرنى دەرھال بۇ يېزىدىن ئېلىپ كېتىپ، ئۇنىڭ ئورنىغا تەرجىمان مۆمىن موللەكنى  شاڭجاڭلىق ۋەزىپىسىگە قويۇش. مۆمىن موللەك ھەممە جەھەتلەردىن تەلەپكە لايىق. ئۇ يېزا ۋە ناھىيىدىكى رەھپەرلەرنىڭ سۆزىنى ئەستايىدىل ئاڭلايدۇ. يېزا ۋە ناھىيە ئوتۇرغا قويغان تۈرلۈك سىياسەتلەرنى ھەقدادىغا يەتكۈزۈپ ئىجرا قىلىدۇ. ئۇ ئەزەلدىن پۇقرالاردىن قورقۇپ ئولتۇرمايدۇ، بەلكى ھەر قاچان قورقىتالايدۇ.       قىسقىسى، بۇ يېزىدىكى پارتىيە رەھپەرلىرى پەقەت مۆمىن موللەك بىلەنلا ئوبدان كېلىشىپ ئىشلەپ، بۇ يېزىنىڭ تۈرلۈك خىزمەتلىرىنى قەدەممۇ قەدەم ئالغا سىلجىتالايمىز. شۇڭا، ناھىيە رەھپەرلىرىنىڭ مامۇت نۇرنىڭ ئورنىغا مۆمىن موللەكنى بۇ يېزىغا شاڭجاڭلىق ۋەزىپىسىگە قويۇشۇڭلارنى تەلەپ قىلىمىز.                                                            دۈمچەك يېزىلىق پارتىكۇم (تامغا)                                                        ⅹⅹⅹ-يىلى 8-ئاينىڭ 3-كۈنى

taranqi

	ئەمەلىيەتتە كۆپ كۆرۈلىدىغان ئىشلار كەن بۇ ... تېما ئىگىسىگە رەھمەت ... !

imkan

	بىلىشمچە جەنۇپتىكى كۆپ قىسىم ناھىيە، يېزىلاردىكى خىزمەتنى مەسئۇلىيەت دەپ بىلىپ، قانۇن-نىزاملارنى توغرا ئىجرا قىلىشقا تىرىشىدىغان، ئەلنىڭ غېمىنى يەيدىغان كادىرلار، ئوقۇتقۇچىلار ۋە باشقا مەمۇرىي-كەسپىي ئورۇندىكىلەر كۆپىنچە ھاللاردا چەتكە قېقىلىدىكەن، خىزمەتنى ئۆز ئىرادىسى بويىچە دادىل ئىشلىيەلمەيدىكەن... ئاخىرىدا يا خىزمەتنى تاشلايدىكەن، يا ئەتراپىدىكى خىزمەتداشلىرىغا ماسلىشىپ، سىڭىشىپ كېتىدىكەن. يالغان دوكلات، ياسالما تەكشۈرۈش دېگەندەك كىشىنىڭ زەردىسىنى قاينىتىدىغان ساختىلىقلار نورمال ئىشلارغا ئايلىنىدىكەن.  بۇ خىل يەرلىك تۈزۈلمىنىڭ ئاخىرقى زىياندارلىرى يەنە شۇ بىچارە دېھقانلار، ئىگىسىز مائارىپىمىز بولىدىكەن.      بىزدىكى ھەممە نەرسىنىڭ بۇنچە كۆتۈرۈشلۈك بوپكەتكىنىگە ئادەمنىڭ ئىچى سىقىلىدۇ.

dinara

	مەنبەسىنى ئەسكەرتىشنى ئۇنتۇپتىمەن، كەچۇرۇڭلار. مەنبە: كروران ژورنىلى 1-سان

xaptul

	ھەممە نەرسىگە يول قويۇلىۋەرسە ئادەتكە ئايلىنىپ كېتىدۇ.پۈتۈن دۇنيا تەۋەسىدە ئۇيغۇر دىھقانلىرىدەك يۇۋاش -يۇمشاق دېھقانلارنى تاپقىلى بولماس بەلكىم ،يۇۋاش دىيىش كېرەكمۇ ياكى جۈرئەتسىز ،يوللۇق پىكرىنى  دىيەلمەيدىغان  ،يىغىنچاقلىغاندا  دۆت(ئاچچىغىڭلار كەلمىسۇن )دىيىش كېرەكمۇ؟

arman03

	ئەسەردە ئىشىلتىلگەن ئىىسم تۇلۇمۇ جايىدا بوپتۇ.

11282

	دۈمچەك يېزىلىق پارتىكومىنىڭ تەكلىپى، ناھىيىنىڭ تەستىقىدىن ئۆتكەندىن كىين، ۋىلايەتلىك پارتكوم  مامۇت نۇرنى ناھىيلىك پىشقەدەم كادىرلار ئىدارىسى ياكى ناھىيلىك مەدەنىيەت ئىدارىسىگە مۇئاۋىن ئىدارە باشلقى قىلىپ <ئۆستۈرىدۇ>. ھىچ قاچان ھىچ بىر ئۇرۇندا مامۇت نۇردەك كادىر ئىشلىيەلىگەن ئەمەس ياكى ئشىلىيەلىسمۇ ئۇزۇن دەۋىر سۈرەلىگەن ئەمەس. چۈنكى ھازىر <مامۇت نۇر>لار  ئەمەس <مۆمىن موللەك>لەر ئەڭ ئەتۋارلىق، ساپالىق كادىر ھىساپلىنىدۇ.

sat喜欢

	كارامەرەت مەلوماتكەن. قانداق بىر تەرەپ قىلار بۇنى،ئەقىلغا ئىشارە ....

adiyat

	<بىكاچىلىقتا تەپەككۈر قىلىپ بىزنى بابلاشنىڭ يولىنى تىپپامىسۇن >دەپ مامۇت نۇرنى ۋىلايەتلىك سىياسى كىڭەشنىڭ توختىماي يىغىن ئىچىش بۆلىمىگە ئەۋەتتۇق،  ئەنسىرمەڭلا  ھازىر يىغىندىن باشقا ۋاقىتلاردا تاماق يىيىش ، ئۇخلاش دىگەندەك ئۇلۇغۋار ئىشلار بىلەن شۇغۇللىنىۋاتىدۇ.   <دۈمچەك يىزا پارتىكوم>

aypare ھەقىي سالاھىيەتلىك ئەزا

	ناھىيلىك پارتكومنىڭ مامۇت نۇرنى بىرتەرەپ قىلىش پىكرى دۈمچەك يىزىلىق پارتكوم سۇنغان مامۇت نۇرنىڭ خىزمەتتە سۇسلۇق قىلىش،يۇقىرى بىلەن يۈكسەك بىرلىكنى ساقلىماسلىق،دىھقانلارغا يان بىسىش،باشقا كادىرلارغا گەپ ئۆگىتىپ قۇتراتقۇلۇق قىلىش قاتارلىق قىلمىشلىرىغا ئاساسەن ناھىيىلىك پارتكوم كىڭىشىش ئارقىلىق مامۇت نۇرنى تۆۋەندىكىدەك بىر تەرەپ قىلىشنى قارار قىلدۇق: 1.مامۇت نۇر يىزىنىڭ << بىر تۇتاش پىلانلاپ ،تەڭ ئىتىبار بىرىش >> سىياسىتىگە خىلاپلىق قىلىپ يىزىنىڭ بىر تۇتاش كىۋەز تىرىش ئىشىغا پۇتلىكاشاڭ بولغان،تەڭ جەرىمانە ئىلىش ئىشلىرىنى توساپ قويغان،شۇ تۈپەيلى يىزىنىڭ دىھقانلارنىڭ كىرىمىنى ئۆستۈرۈش ئىشلىرىغا تەسىر يەتكەن،يۇقارقى ئەمىلىي ئەھۋالنى نەزەردە تۇتۇپ مامۇت نۇر يۇقىرى بىلەن بىردەكلىكنى ساقلاشقا ئەھمىيەت بەرمىگەنلىك خاتالىقى سادىر قىلغان دەپ قارالدى.شۇڭا يىزىنىڭ يىزا باشلىقلىق ئورنىدىن يىزىنىڭ تەشۋىقات خىزمىتىگە مەسئۇل خادىملىق ئورنىغا چۈشۈرىلىدۇ. 2.مامۇت نۇر ئاستىرتىن كادىرلارنى كۈشكۈرتۈپ ئۇلارنى پارتىيە ھۆكۈمەتكە قارشى چىقىپ دەم ئىلىشقا كۈشكۈرتكەن،بۇنداق چوڭ ھەق چوڭ ناھەق ئىشلاردا پارتىيەلىك كادىرلاردا بولۇشقا تىگىشلىك مەيدانى ئىنتايىن مۇستەھكەم،بايرىقى ئىنتايىن روشەن بولۇش چاقىرىقىغا خىلاپلىق قىلغان،مامۇت نۇرنىڭ بۇ قىلمىشىنىڭ خاراكتىرى ناھايىتى ئىغىر بولۇپ << خىزمەت قانۇنى>>نىڭ 0000-ماددىسىدىكى ئالاقىدار  بەلگىلىمىلەر بويىچە باشقىلارنى ئىش تاشلاشقا قۇترىتىش جىنايىتى بىلەن ئەيىبلىنىدۇ ۋە مۇناسىۋەتلىك ماددىلار بويىچە شۇكۈنى ئۇنىڭغا ئەگىشىپ دەم ئالغانلارنىڭ شۇ بىركۈنلۈك ئىش ھەققىنىڭ 200% ى بويىچە جەرىمانە تۆلەيدۇ. 3. مامۇت نۇر ناھىيە بويىچە ئومۇمى ئۇقتۇرۇش چىقىرىپ ئىسمى ئاتاپ تەنقىدلىنىدۇ،باشقىلارنىڭ ئۇنىڭ قىلمىشىدىن ئىبرەت ئىلىپ خىزمەتلەرنى يۇقىرى بىلەن بىردەكلىنى ساقلاپ ئەستايىدىل  ئىشلىشىنى ،يۇقىرى بىلەن يۇقىرى-تۆۋەنلىك تالاشماي ناھىيىمىزنىڭ تىزرەك كوممونىزىمنى ئىشقا ئاشۇرۇشى ئۈچۈن بارلىق تۆھپىسىنى قالدۇرماي قوشۇشىنى ئۈمىد قىلىمىز. *****ناھىيىلىك پارتكوم،خەلق ھۆكۈمىتى( تامغا) 200000-يىلى  13-ئاينىڭ 44-كۈنى ( كەچۈرۈڭلار ،گەرچە يىزا خىزمىتىدىن ئانچە خەۋىرىم بولمىسىمۇ بىراق ئاقساقاللىق قىلغۇم كىلىپ قالدى،قاملاشمىغان جايلىرى بولسا پىكىر بىرىشىڭلارنى ئۈمىد قىلىمەن.)