دېڭىز قوشنام بولدى

toethogul

	دېڭىز قوشنام بولدى     تۆتھوگۇل   1 بىلمەيسەن ئامرىقىم ھەر كېچە ياتقىنىمدا يوتقىنىمنىڭ بىر پېشىنىڭ دېڭىزلارغا چىنىلىنىپ قالىدىغانلىقىنى ۋە قورقۇنۇچلۇق چۈشلەرنىڭ دېڭىزلاردىن بېشىمغا كېلىۋاتقىنىنى كۈندۈزلەرنى نەقەدەر سېغىنىدىغانلىقىمنى...   شۇنداق...ياشىتىۋاتقان بىر كۈچ ئايان بولاتتى بەزىدە دېڭىز كېچىنىڭ رەڭگىنى ئىچكەندە...   دېڭىز ئاستا ئېقىپ كىرىپ مېنى لاي ئەتكەندە ئاشۇ لاينىڭ ئۈستىدە لەيلەپ قالغان بىر-ئىككى تامچە سۆزنى مېنىڭ روھىمكەن دەپ بىلىپتىمەن چۈشۈمدە...   2 دېڭىزغا قوشنا بولدۇم كارۋاتىمنىڭ ئاستىدىن بىر بۆلۈك يەرنى كېسىپ بەردىم دېڭىزغا ئۇ ھەر ئاخشىمى ماڭا ھېكايە ئېيتىپ بېرىدىغان بولغان ئاپا! ئەللەي تۈگىمەيدىكەن... دېڭىزنىڭ ئاڭلىتىۋاتقان ھېكايىلىرى بىلەن ئۇخلاۋاتىمەن سېنى بارماقلىرىمغا چىڭ يۇمۇپ ئەللەيلىرىڭنى چۈشەۋاتىمەن...   3 دېڭىزغا قوشنا بولدۇم بىز ئىشىك ئالدىدىكى ئۆستەڭگە ياساپ ئوينىغان قەغەز كېمىلەر لەيلەر كۆز چاناقلىرىمدا ھەر ساباھ دېرىزىدىن دېڭىزغا قارىغىنىمدا؛ ئاتا! ئۆگۈتلەر تۈگىمەيدىكەن دېڭىزلار چايقىلىۋاتىدۇ ھاياجان بىلەن مېنى نەمدەۋاتىدۇ ئالدىمدىكى ئەينەكلەر بىلەن بىرگە بىر نەرسىلەرنى سۆزلەۋاتىدۇ...   ئاتا! بىلمەپتىمەن قۇياشنىڭمۇ يىغلايدىغىنىنى دېڭىز نەمدەۋاتقاندا ئۇنىڭ نۇرىنى... بىزگە قارشى كېتىپ قالغان زاماننىمۇ ھەم ئۇ قەيەرگە بارىدىغاندۇ يىغلىغانچە يامغۇر بولۇپ دېرىزىلەرگە ئۈسىيدىغانمىدۇ؟ ياكى بېلىقلارغا بايرام قىلىپ بېرىدىغانمىدۇ بىزگە قارشى كېتىپ قالغان زامان نەلەرگە بارىدىغاندۇ يىغلىغانچە... دېڭىزلار نەلەرگىچە بارىدىغاندۇ چايقالغانچە...؟!   *** *** ***   دېڭىزغا قوشنا بولدۇم دېڭىز كۆز چاناقلىرىمغا يۆتكىلىۋاتقاندا...   04.06.2011

zilnur

	بۇ شېئىر خېلى مەنىلىك يېزىلىپتۇ. ئىشقىلىپ ماڭا  ياختى.

nokar

	قاچانلاردىن باشلاپ دېڭىز بىلەن قوشنا بولۇپ قالغانسىز . دېڭىزنى ئويلىساملا سەپىرايىم ئۆرلەپ قارا باسىدۇ مېنى

taldi

	تۇيغۇ تىزملىرىنى ياخشى تىزىپىسز ،دېڭىز بويىدا ياشاپ باققان ئوخشايسىز ھە .ئەپسۇس ،مەن تېخى دېڭىزنى كۆرۈپ باقمدىم .دېڭىزغا ئەڭ يىراق شەھەردە تۇرۇپ دېڭىزغا تەلپۈنۈپ تۇرىمەن .ئاشۇ دېڭىز ئېلىپ كەلگەن پۇراقلارنى ،نەمخۇش ھاۋانى ،ئۇنىڭ بويىدىكى قۇياشنى ،ئۇنىڭ قېشىدىكى جىمجىت كېچىلەرنى تۇيغۇلىرىمىغا ئېلىپ باقىمەن .ئۆز تەنھالىقىمنى پارچىلاپ بوتۇلكىغا سېلىپ دېڭىزغا تاشلاپ ،دېڭىزلار چايقالغىنچە يېتىپ بارىدىغان ئاشۇ يەرگىچە ئەۋەتىپ ،ئۆزۈم قىرغاق بويىدا پارچىلانغان تەنھالىقتا  تىترەپ تۇرغۇم بار .ئاھ،قانچىلىغان تەنھالىقنى شامالغا قارشى دولقۇنلار سۆزلەيدىغاندۇ . قانچىلىغان ناتونۇشلار ئۇزىتشار (بوتۇلكا) ئۇزىتىپ ئۆزىنى . تەنھالىقنى ئىككىگە پارچىلاپ كىم ئۇ ؟ (قىرغاقتا )پارچىلانغان تەنھالىقتا تىترەۋاتقان . ئېلىپ كەتمەس مېنى ، شامالغا قارشى دولقۇنلار .   راستىنلا ،راستىنلا ئاشۇ دېڭىز بويىدىكى كۈچلۈك دولقۇن بىلەن بىرگە كەلگەن نۇرغۇن-نۇرغۇن سۇ تامچىلىرى ئارسىدا تۇزلانغان كۆز ياشلارغا ئايلىنىپ كەتسەم دەيمەن . يىغلىغانچە... دېڭىزلار نەلەرگىچە بارىدىغاندۇ چايقالغانچە...؟! بەلكىم تەنھالىقىمىز تۇتاشقان ئاشۇ يەرگە باردىغاندۇ دەيمەن .ئاشۇ ،كوكوس دەرەخلىرى دېڭىزنى كېچە بىلەن يالغۇز قويارمۇ ؟

yoruq

	دېڭىز بىلەن تۆتھوغۇلنىڭ " ئەل كۈيدە'' ئىلا ن قىلىنغان ئۆزگىچە شېئىرلىرى مۇنبەرگە يېڭىدىن رەڭ بەردى. ئەجرىڭلارغا رەھمەت ! ھارمىغايسىلەر ئىنىلەر .

gulhana

	مەن دېڭىز بويىدا ياشاۋېتىپ بۇ تاتلىق تۇيغۇلارنى ھىس قىلىپ باقماپتىمەن ، بەلكىم يۇرتۇمنى تولىمۇ سېغىنغانلىقىمدىن ھسلىرىم ئېزىپ قالغان چېغى ..........

hamxohla

	ئەركەشتام دىكى قىرغىزىستاندىن كىلىدىغان قىزىل دەريا ۋادىلىردا ئولتۇرۇپمۇ ھېس قىلىمەن كۈندە بىر بىرىگە ئوخشىمايدىغان ھېسلارنى.

مۇبارەك

	دېڭىزدا چايقىلىشمۇ تېنچ ئەمەس. ئۇنىڭ ئىچىدىكى گۆشخور بېلىقلارچۇ؟ ئۇلارمۇ دۈشمەن بولىدۇ. ياشلىرىڭ دېڭىزنىڭ تۇزلۇق سۈيى بىلەن قوشۇلۇپ، تېخىمۇ ئاچچىق بولۇپ كېتىدۇ. تېنىڭ بېلىقلارغا يەم بولۇپ تىتما-تىتما بولۇپ كەتسە... سېنى قانداق تونار يېققىنلىرىڭ؟! بەلكىم بوتۇلكا ئىچىگە چىرايلىق قاتلىنىپ قالدۇرغان ئاق قەغەز يۈزىدىكى تونۇش مىسرالىرىڭ سەن ئىكەنلىكىڭدىن شەپە بېرىپ تۇرسا كېرەك... دېڭىز ئەجەپ بولىدىكەن. شامال چىققاندىكى كېمىگە زەرب ئۇرۇلغان دۇلقۇنلىرى...خۇددى ئىنسانلاردا ئۆچى باردەكلا.

narazi

	چەكسىز دېڭىزدا سۇ ئۈزۈپ باقسام دەپ ئارزۇيۇم  بار

toethogul

	بىر ئىستاكان قەھۋەنىڭ ھېكايىسى   تۆتھوگۇل   بىر ھازا بولسىمۇ تىنچلىق ئەكېلىدىغان كېچىدىن ئۇنىڭ زادى قەيەرلەرگىچە كېتىدىغانلىقىنى بىلەلمىسەممۇ ئەمما كېچە رەڭلىرىگە ئوخشاپ پىشىۋاتقان قەھۋەلەرنىڭ پۇرىقىدىن تولىمۇ ئۇزاقتا ئېيتىلىپ قېلىۋاتقان قىزىق پاراڭلىرىمنى تىڭشاۋاتىمەن شۇنداق... قەھۋە پىشىۋاتقان مەزگىلدە يېرىم كېچە ئىختىيارى كىرىپ كەلدى ھىچكىم توسۇپ قالالماس بىر ئىش يۈز بېرىۋاتاتتى كېچە قەھۋەگە قۇيىلىۋاتاتتى؛ قەھۋە پىشىۋاتقان مەزگىلدە مەن ئۆزۈمنى ئۇزۇندىن بېرى ئاچ قالغان خىياللىرىمغا ئۆلۈشتۈرۈپ بەردىم ئۇلار تويماستىن مېنى تالاۋاتاتتى قەھۋە پىشىۋاتقان مەزگىلدە نەپەسنىڭ ئۇزاق-ئۇزاق توختاپ قېلىشى ۋە ئۆلۈمنىڭ قىرلىرىغىچە سۆرۈلۈپ بېرىش يۈز بېرىۋاتاتتى، تەنلىرىم قورىنىۋاتاتتى ... كىملىكىمنى چىلاپ قويدۇم ئىستاكانغا؛ قەھۋە دەملەنمەكتە بىر ئاز قورقۇنچ، ئاجىزلىق، ئاچكۆزلۈك بىلەن زەڭگەررەڭ ئىستاكاندا... ئاسماننى يوق ئەتتىم شۇئان بۇ ئورۇندۇقتا ئۇزۇن ئولتۇرغىنىمنى بىلدىم ئەمما قەھۋەنىڭ ئىسسىقى تېخى كەتمىگەن ئىدى ... كوچىدىكى ئەخلەت تەرگۈچىلەرگە، قاسساپ ئالدىدىن ئاشقان سۆڭەكلەرنى قاينىپ ئىچىدىغان قېرىنداشلارغا قەھۋە رەڭگى ۋە قەھۋە تەملىك تېتىپ قالدىم مۇڭغۇل مۇئەللىم ناسانىڭ قەھۋە خۇمارى تېخى بېسىقمىدى جوڭگۇەنسۈندىكى قىزىق پاراڭلار ئىز قوغلاپ كېلىۋاتىدۇ قەھۋە پىشىۋاتقان مەزگىلدە...   قەھۋە پىشۇرۇش ماشىنىسى توشۇپ كەتتى چۈشلىرىمنى تەڭ كېسىپ تەنلىرىمنىڭ كەينىنى دېڭىزغا شۇنچە يېقىن قەھۋەسىز... ئۇيقۇ ھۆكۈمران كېچەمگە ئامالىم يوق قەھۋە خۇمارى بىلەن باسماقچى بولدۇم ئاغرىقلىرىمنى قەھۋە پىشىۋاتقان بۇ مەزگىلدە ساڭا بۇلارنى ئاڭلاتقۇم كەلدى...   قەھۋە پىشتى قەھۋە ئاڭلاتسۇن ساڭا ئەمدى دەرتلىرىمنى...   27.05.2011