ۋەتەن ۋە ئىمان(ئابدۇقادىر جالالىدىن)

بەختىيار(بايقاش

ۋەتەن ۋە ئىمان

ئابدۇقادىر جالالىدىن

ۋەتەن دەپ توۋلىدىڭ، ئىمانىڭ قېنى؟
قەلەملەر تەۋرەتتىڭ، ۋىجدانىڭ قېنى؟
تاڭلارنىڭ ئىشقىدا گۈلخانمەن دېدىڭ،
كۆڭلۈڭ ئاسمانىدا چولپانىڭ قېنى؟
قەلەمنى مەشئەل دەپ مۆدۈرۈپ ئۆتتۈڭ،
ئۆپكەڭمۇ يوغىناپ، يۆتۈلۈپ ئۆتتۈڭ.
ۋەتەنگە ئىخلاستا باقساڭ ئېڭىشىپ،
قەۋمىڭنىڭ يىلتىزى ياتار چىرمىشىپ.
چاقنايدۇ مازاردا ئارزۇ يالقۇنى،
كۆكتىكى يۇلتۇزلار بىلەن سىردىشىپ.
بۇ يەردە بۇغرا ھەم ئوغۇز ياتىدۇ،
قوقاسقا ئايلانغان يۇلتۇز ياتىدۇ.
سەپ تۈزۈپ ھەر رەڭدە پەسىللەر ئۆتتى،
«ۋەتەن» دەپ باھادىر نەسىللەر ئۆتتى.
ئەۋلادقا پەقەتلا ۋەتەن قالىدۇ،
باشلاردىن نى ئەقىل، نەقىللەر ئۆتتى.
ۋەتەن چۆچەك ئەمەس، سەجدىگاھىڭدۇر،
ۋە يا ئەرمەك ئەمەس، باشپاناھىڭدۇر.
«ۋەتەن - جانان» دېدىڭ، جانان تېپىلار،
ۋەتىنىڭ بولسىلا ھامان تېپىلار.
غۇربەتتە تېنىگەن ساياقلارغىمۇ،
شاھانە قەسىر ھەم ئايۋان تېپىلار.
بەزىدە ۋەتەنسىز سۇلتان بولىدۇ،
ئۆزىنىڭ گۆشىگە ئوتان بولىدۇ.
ۋەتەن ئەسقاتىدۇ ئۆلگەنلەرگىمۇ،
نەپسىنىڭ ئوتىدا كۆيگەنلەرگىمۇ.
ھەتتا ئوسمىسىنى سېتىپ خوتۇنىنىڭ،
بىر ئۆمۈر تاماشا كۆرگەنلەرگىمۇ.
لېكىن ھاقارەتتە قالدى قەبرىسى،
تالاي ئاھانەتتە قالدى نەۋرىسى.
ۋەتەن ئىمان بىلەن بىر تەن ئەمەسمۇ؟
ۋەتەن ئىمانسىزغا ماتەم ئەمەسمۇ؟

مەنبە: خەلق تورى

Qol~Ogli

     مېنىڭ ھەرىمىم ئانا ۋەتەندە

          ئازات ئابدۇللا

بېرىپ كەل بالام، ھەرەمگە-ھەجگە،
دېدىڭ كۆپ قېتىم، قىلىشچۈن سەجدە.
بولساممۇ ئەگەر گۇناھكار بەندە،
بارغىم يوق مېنىڭ يىراق، يات ئەلگە!
زورلىما بوۋا، مېنى ھەرەمگە،
مېنىڭ ھەرىمىم ئانا ۋەتەندە!

كەتمەيمەن يىراق، دىيارىمدىن مەن،
باغۇ ئېرەمدەك گۈلزارىمدىن مەن.
ئەجدادىم ياتقان مازارىمدىن مەن،
ئاقكۆڭۈل خەلقىم، دوست-يارىمدىن مەن.
زورلىما بوۋا، مېنى ھەرەمگە،
مېنىڭ ھەرىمىم ئانا ۋەتەندە!

ساۋاپىلىق ئىزدەپ يۈرمەيمەن قاتراپ،
تاشمۇ ئاتمايمەن شەيتانغا ئاتاپ،
بىلسەڭ يېنىڭدا ئەسلى كۆپ ساۋاپ،
شۇڭا يۇرتۇمغا قىلىمەن تاۋاپ،
زورلىما بوۋا، مېنى ھەرەمگە،
مېنىڭ ھەرىمىم ئانا ۋەتەندە!

ھالال ئەجرىمدىن يىغقان پۇلۇمغا،
سالىمەن مەكتەپ، ئانا يۇرتۇمغا،
بېرىمەن بىلىم سەبى بوغۇنغا،
سۆيىدۇ خىزىر شۇندا قولۇمغا،
زورلىما بوۋا، مېنى ھەرەمگە،
مېنىڭ ھەرىمىم ئانا ۋەتەندە!

مۇشۇ تۇپراقتا تۆرەلگەن جېنىم،
مۇشۇ تۇپراققا تۆكۈلگەن قېنىم،
مۇشۇ تۇپراققا كۆمۈلەر تېنىم،
ھەرەمدىن ئۇلۇغ شۇڭا بۇ ئېلىم،
زورلىما بوۋا، مېنى ھەرەمگە،
مېنىڭ ھەرىمىم ئانا ۋەتەندە!

pari

مۇنبەرداشلارنىڭ ياخشى شېئىرلار بىلەن ئۇچراشتۇرغىنىغا كۆپ رەھمەت

ئىلغار

Qol~Ogli يوللىغان ۋاقتى  2013-6-23 11:53
مېنىڭ ھەرىمىم ئانا ۋەتەندە

          ئازات ئابدۇللا

شېئىر ياخشى يېزىلىپتۇ ۋەتىنىمىز خەلقىنىڭ پەرزەنتلىرنى ئويلاپ مەكتەپ سېلىشتەك ئۇلۇغۋار  غايىڭىز مىنى بەك تەسىرلەندۈردى، مانا مۇشۇنداق ۋەتەن سۈيەرلەردىن قانچىكى كۆپ بولسا، مىللىتىمىز ۋە تىنىمىز شۇنچە قۇدرەت تاپىدۇ ۋە شۇنچە ساۋابلىق ئىش قىلغان بولىمىز  تېمىڭىغا رەخمەت نادىر شېئىرلىرىڭىز ئۈزۈلمىگەي

يۈسۈف

نىمىدگەن ياخشى يىزىلغان شىئىرلار بۇ ۋاھ!!!

بايقاش

ئابدۇقادىر جالالىدىن ئاكىمىزنىڭ شىئېرلىرى ئادەمگە بەدىئي  زوق بەرسە، ئۇنىڭ لىكسىيەلىرى چوڭقۇر ئويغا سالىدۇ.