سىنىپ مەسئۇلىنىڭ بۇرچى ۋە ۋەزىپىسى
بايقاش مۇنبىرىمىزدىكى دوستلارنىڭ كۆپىنچىسى ئوقۇتقۇچىلىق خىزمىتى بىلەن شۇغۇللىنىدىغان كەسىپداشلار بولغانلىقى،يەنە كېلىپ، سىنىپ مودىرلىق خىزمىتىنىڭ ئوقۇتقۇچىلىق خىزمىتىدە ئاساسلىق ئورۇندا تۇرىدىغان بولغانلىقى ئۈچۈن،كەڭ كەسىپداشلارنىڭ پايدىلىنىشى ئۈچۈن بۇ تېمىنى يېزىپ يوللىدىم.كەسىپداشلارنىڭ پايدىلىنىش قىممىتى بار دەپ قارىسا،پايدىلىنىشىنى سورايمەن.
سىنىپ مەسئۇلىنىڭ بۇرچىنى قانداق چۈشىنىش كېرەك؟ نۇرغۇنلىغان ئوقۇتقۇچىلار سىنىپ مەسئۇلىنىڭ بۇرچى ئاساسەن، ئوقۇغۇچىلارنىڭ ئۆگىنىشىنى چىڭ تۇتۇش،ياكى ئوقۇغۇچىلارنىڭ ھەرىكەت ئۆلچىمى مەشىقىنى چىڭ تۇتۇش ۋە ياكى سىنىپنى كۈندىلىك باشقۇرۇشنى چىڭ تۇتۇش قاتارلىقلاردىن ئىبارەت دەپ ھېسابلايدۇ.مېنىڭچە بۇ قاراشلار دېگەندەك يېتەرلىك ئەمەس. ئۇنداقتا، سىنىپ مەسئۇلىنىڭ بۇرچىنى زادى قانداق چۈشىنىش كېرەك؟
مېنىڭچە،سىنىپ مەسئۇلىنىڭ ئاساسلىق بۇرچى ياخشى سىنىپ كوللىكتىپىنى يېتىشتۈرۈش ۋە تەشكىللەش،سىنىپتىكى ئوقۇغۇچىلارنىڭ ھەر بىرىنى ئەخلاقىي،ئەقلىي،جىسمانىي جەھەتلەردىن ئەتراپلىق تەرەققىي قىلدۇرۇشقا مەسئۇل بولۇشتىن ئىبارەت.كونكىرىت قىلىپ ئېيىتقاندا،مەكتەپ مودىرىنىڭ رەھبەرلىكىدە،ئەخلاقىي،ئەقلىي،جىسمانىي ۋە گۈزەللىك جەھەتلەردىن ئەتراپلىق تەرەققىي قىلدۇرۇش تەلىپى ۋە مەكتەپنىڭ تەلىم-تەربىيە ئوقۇتۇش پىلانى بويىچە ئۆز سىنىپىنىڭ ئەھۋالىغا بىرلەشتۈرۈپ سىنىپ خىزمىتىنى قانات يايدۇرۇش،ياخشى سىنىپ كوللىكتىپىنى تەشكىللەش ۋە يېتىلدۈرۈش،بارلىق ئوقۇغۇچىلارغا ئومۇمىيۈزلۈك كۆڭۈل بۆلۈش،ئۇلارنى تەربىيلەش ۋە باشقۇرۇش ئارقىلىق،ئۇلارنىڭ جىسمانىي ۋە روھىي جەھەتتىن ئەتراپلىق ساغلام تەرەققىي قىلىشىنى ئىلگىرى سۈرۈپ، ئۇلارنى سوتسىيالىزىمنىڭ يېڭى بىر ئەۋلاد كىشىلىرىگە ئايلاندۇرۇشتىن ئىبارەت.
يوقىرقى بۇرچقا ئاساسەن سىنىپ مەسئۇلىنىڭ خىزمىتىنى تۆۋەندىكىدەك كونكىرىت ۋەزىپىلەرگە ئايرىشقا بولىدۇ:
1. سىنىپنى كۈندىلىك باشقۇرۇشنى ياخشى ئىشلەش،سىنىپ كوللىكىتىپى قۇرۇش ۋە تەشكىللەش.سىنىپ مەسئۇلى سىنىپنىڭ كۈندىلىك ئىشلىرىنى ئىلمىي تۈردە باشقۇرۇشى،سىنىپ قائىدىلىرىنى ئورنىتىشى،سىنىپ ھەيئەتلىرىگە ۋە سىنىپتىكى پىئونېرلار ئەترىتى خىزمىتىگە يېتەكچىلىك قىلىپ،سىنىپ كادىرلىرىنى يېتىشتۈرۈشى،ئۇلارنىڭ مۇستەقىل ۋە ئىجادىي ئىشلەش روھىنى جارىي قىلدۇرۇپ،ياخشى سىنىپ ئىستىلىنى شەكىللەندۈرۈشى،سىنىپ كوللىكتىپىنى ئىتتىپاقلاشقان ئىناق،ئاكتىپ يوقىرى ئۆرلەيدىغان سىنىپ كوللىكتىپى قىلىپ قۇرۇپ چىقىشى كېرەك.
2. ئوقۇغۇچىلارغا قارىتا ئىددىيە-ئەخلاق تەلىم-تەربىيىسى ئېلىپ بېرىش. سىنىپ مەسئۇلى ئوقۇغۇچىلارنى پارتىيىنى،سوتسىيالىستىك ۋەتەننى،يۇرت-ماكانىنى،ھەممىدىن موھىمى ئۆزىنى قىزغىن سۆيىدىغان قىلىپ تەربىيلەشنى ئەمەلگە ئاشۇرۇپ،ئۇلاردا كىچىكىدىن باشلاپلا ۋەتەننى سوتسىيالىستىك زامانىۋىيلاشتۇرۇش ئۈچۈن كۆرەش قىلىدىغان ئىرادىنى تۇرغۇزۇش كېرەك.ئوقۇغۇچىلارنى «ئوتتۇرا -باشلانغۇچ مەكتەپ ئوقۇغۇچىلار قائىدىسى»،«ئوتتۇرا -باشلانغۇچ مەكتەپ ئوقۇغۇچىلىرىنىڭ كۈندىلىك ھەرىكەت ئۆلچىمى»گە رىئايە قىلىدىغان قىلىپ تەربىيلەپ،ياخشى ئەخلاق-پەزىلەت ۋە مەدەنىيەتلىك ھەرىكەت ئادىتىنى يېتىلدۈرۈش كېرەك.
3. ئوقۇغۇچىلارنى تىرىشىپ ئۆگىنىدىغان قىلىپ تەربىيلەش. سىنىپ مەسئۇلى ھەر قايسى پەن ئوقۇتقۇچىلىرى بىلەن ھەمكارلىشىپ ئوقۇغۇچىلارنىڭ ئۆگىنىش مەقسىدىنى ئايدىڭلاشتۇرۇپ بېرىشى،ئۆگىنىش قىزغىنلىقىغا ئىلھام بېرىشى،ئۆگىنىش ئادىتىنى يېتىلدۈرۈشى،توغرا ئۆگىنىش ئۇسۇلىنى ئىگىلىتىشى،ئۆگىنىش نەتىجىسىنى ئۈزلۈكسىز يوقىرى كۆتۈرۈشى كېرەك.
4. ئوقۇغۇچىلارنىڭ بەدەن ساغلاملىقىغا كۆڭۈل بۆلۈش. سىنىپ مەسئۇلى ئوقۇغۇچىلارنى بەدەن چېنىقتۇرۇشنى داۋاملاشتۇرىدىغان،ساقلىقنى ساقلاپ،سالامەتلىكنى ئاسراشقا دىققەت قىلىدىغان قىلىپ تەربىيلەپ،ئۇلارنىڭ بەدەن سۈپىتىنى يوقىرى كۆتۈرۈشى لازىم.
بۇنىڭدىن باشقا،سىنىپ مەسئۇلى يەنە ئوقۇغۇچىلارنىڭ دەرستىن سىرىتقى تۇرمۇشىغىمۇ كۆڭۈل بۆلۈپ،ئوقۇغۇچىلارنىڭ خىلمۇ-خىل جىسمانىي ۋە روھىي ساغلاملىقىغا پايدىلىق بولغان دەرستىن سىرىتقى پائالىيەتلەرگە ۋە ئىجتىمائىي پائالىيەتلەرگە قاتنىشىشىغا يېتەكچىلىك قىلىشى ۋە تەشكىللىشى،ئوقۇغۇچىلارنىڭ قىزىقىشى،ھەۋىسى ۋە خاس ئالاھىدىلىكلىرىنى تەرەققىي قىلدۇرۇشى؛ئوقۇغۇچىلارنى مەكتەپ سىرتىدىكى ھەر خىل ئەمگەك ۋە ئىجتىمائىي ئەمەلىيەت پائالىيەتلىرىگە قاتنىشىشقا تەشكىللەپ،ئۇلارنىڭ ئەمگەك كۆز قارىشىنى ۋە ئەمگەك ماھارىتىنى يېتىلدۈرۈپ،ئىجتىمائىي ئەمەلىيەت قابىليىتىنى كۈچەيتىشى؛شۇ سىنىپنىڭ دەرس ئوقۇتقۇچىلىرى ۋە ئوقۇغۇچىلارنىڭ ئاتا-ئانىلىرى بىلەن بولغان مۇناسىۋەتنى قويۇقلاشتۇرۇپ،جەمئىيەتنىڭ قوللىشىنى قولغا كەلتۈرۈپ،ئۇلار بىلەن بىرلىكتە ئوقۇغۇچىلارنى تەربىيلەش خىزمىتىنى ياخشى ئىشلىشى كېرەك.سىنىپ مەسئۇلى يوقىرىقى بىر قانچە تەرەپلەر ئارقىلىق ھەر بىر ئوقۇغۇچىنىڭ ساغلام ئۆسۈپ يېتىلىشىگە ئومۇميۈزلۈك مەسئۇل بولۇشى كېرەك.
مەنبە: بىر قانچە يىللىق سىنىپ مودىرلىق خىزمىتى جەريانىدا توپلىغان خىزمەت ئەمەلىيىتىم. | 
قىزغىنلىق
تىللا
تۆھپە
شۆھرەت
يوللىغان ۋاقتى 2013-2-24 14:51:01
يوللىغان ۋاقتى 2013-2-24 15:51:29
