ماتېرىيال سۈرەت: ئافغانىستاننىڭ ۋەزىيىتى يەنىلا ئىنتايىن قالايمىقان

   شىنخۇا تورى ، كابۇل ، 26–دېكابىر تېلېگراممىسى: 26–دېكابىر ، ئافغانىستاننىڭ شەرقىدىكى پاكتىۋا ئۆلكىسىنىڭ ئەمەلدارى تۆت نەپەر تۈركىيەلىك ئىنژېنېرنىڭ شۇ كۈنى بۇ ئۆلكە چېگرىسىدا سالاھىيىتى ئېنىق بولمىغان قوراللىق كىشىلەر تەرىپىدىن تۇتقۇن قىلىنغانلىقىنى ئېيتتى .
   پاكتىۋا ئۆلكىسىنىڭ مۇئاۋىن باشلىقى ئابدۇللا مانگال شىنخۇا ئاگېنتلىقى مۇخبىرىغا تۆت نەپەر تۈركىيەلىك ئىنژېنېرنىڭ شۇ كۈنى سەھەردە دۇندىپاتان رايونىدا سالاھىيىتى ئېنىق بولمىغان بىر توپ قوراللىق كىشىلەر تەرىپىدىن تۇتقۇن قىلىنىپ ، نامەلۇم جايغا ئېلىپ كېتىلگەنلىكىنى دەلىللىدى .
   مانگال مۇنداق دېدى: بۇ تۆت نەپەر ئىنژېنېر ئەسلىدە شۇ كۈنى دۇندىپاتان رايونىدا يەرلىك ساقچىلارغا گازارما قۇرۇپ بېرىشنى پىلانلىغان . نۆۋەتتە ، تۇتقۇن قىلىنغانلارنى ئىزدەش ھەرىكىتى قانات يايدۇرۇلدى .
   بۇ ، ئافغانىستاندا يېقىنقى ئون كۈندىن بۇيان يۈز بەرگەن 2–قېتىملىق چەت ئەللىكلەرنى تۇتقۇن قىلىش ۋەقەسى. مۇشۇ ئاينىڭ 17–كۈنى ، كورىيەنىڭ بىر يول ياساش شىركىتىگە خىزمەت قىلىدىغان يەتتە نەپەر بېنگاللىق قۇرۇلۇش ئىشچىسى ئافغانىستاننىڭ شىمالىدىكى بەلىخ ئۆلكىسىدە تۇتقۇن قىلىنغان بولۇپ ، بۇلارنىڭ ئىچىدىكى ئىككى تۇتقۇن بىر قانچە كۈن ئىلگىرى قويۇۋېتىلگەن .