جياڭسۇ كوماندىسى 2005 – ۋە 2006 – يىللىق CBA نىڭ ھەل قىلغۇچ باسقۇچتىكى مۇسابىقىدە ئۇدا ئىككى قېتىم شىنجاڭ گۇاڭخۇي كوماندىسىنى شاللىۋەتكەنىدى. بۇ قېتىم كونا رەقىبلەر يەنە ‹‹تار يول››دا دوقۇرۇشۇپ قالدى. شىنجاڭ كوماندىسىنىڭ چېمپىيونلۇق لوڭقىسىنى تالىشىش سالاھىيىتىگە ئېرىشىش – ئېرىشەلمەسلىكى جياڭسۇ كوماندىسىدىن ‹‹ئۆچ››ىنى ئېلىش – ئالالماسلىقىغا باغلىق بولۇپ قالدى.
شىنجاڭ گۇاڭخۇي كوماندىسى ھەل قىلغۇچ باسقۇچتىكى تۇنجى مەيدان مۇسابىقىدە ئۆز مەيدانىدا 79: 99 نەتىجە بىلەن جيېجياڭ گۇاڭشا كوماندىسىنى يېڭىپ، تۇنجى قەدەمنى غەلىبىلىك باسقاندىن كېيىن، 3 – ۋە 5 – ئاپرېل رەقىبىنىڭ مەيدانىدا 84: 96 ۋە 107: 128 نەتىجە بىلەن يەنە ئىككى مەيدان غەلىبە قىلىپ، 0: 3 نەتىجە بىلەن جيېجياڭ گۇاڭشا كوماندىسىنى شاللىۋەتتى. گۇاڭخۇي كوماندىسى بۇ قېتىمقى غەلىبىسى بىلەن CBA غا قاتنىشىۋاتقان توققۇز يىلدىن بۇيان، ھەل قىلغۇچ باسقۇچتىكى مۇسابىقىنىڭ تۇنجى ئۆتكىلىدىن ئۆتەلمەسلىك تارىخىنى ئاخىرلاشتۇرۇپلا قالماي، ئەڭ ئاخىرقى مەيدان مۇسابىقىدە 128 نومۇر ئېلىپ، بۇ مۇسابىقە پەسلىدە بىر مەيدان مۇسابىقىدە ئەڭ يۇقىرى نومۇر ئېلىش رېكورتىنى ياراتتى. تېخىمۇ مۇھىمى، ئۈچ نومۇرلۇق توپتىن 21 نى كىرگۈزۈپ، CBA تارىخىدا بىر مەيدان مۇسابىقىدە ئۈچ نومۇرلۇق توپنى ئەڭ كۆپ كىرگۈزگەن كوماندا بولۇپ
قالدى. ئۇنىڭدىن باشقا، گۇاڭدۇڭ، جياڭسۇ، دۇڭگۇەن كوماندىلىرىمۇ ئوخشاشلا 0: 3 نەتىجە بىلەن رەقىبلىرىنى شاللىۋېتىپ، يېرىم ھەل قىلغۇچ مۇسابىقىگە قاتنىشىش سالاھىيىتىگە ئېرىشتى. يېرىم ھەل قىلغۇچ مۇسابىقە 12 – ئاپرېل باشلىنىدۇ. جياڭسۇ كوماندىسى بىلەن شىنجاڭ كوماندىسى ئاۋۋال شىنجاڭ كوماندىسىنىڭ مەيدانىدا بىر مەيدان، ئاندىن جياڭسۇ كوماندىسىنىڭ مەيدانىدا ئىككى مەيداندىن، ئاخىرىدا يەنە شىنجاڭ كوماندىسىنىڭ مەيدانىدا بىر مەيدان بولۇپ، جەمئىي بەش مەيدان مۇسابىقە ئوينايدۇ، ئۈچ مەيدان يەڭگەن كوماندا گۇاڭدۇڭ كوماندىسى بىلەن دۇڭگۇەن كوماندىسى ئارىسىدىكى يەڭگەن كوماندا بىلەن ھەل قىلغۇچ مۇسابىقىگە چۈشۈپ، چېمپىيونلۇقنى تالىشىدۇ.
تۇرسۇنجان ھامۇت
272794174 
بۇ تۇغنى ئۇلاپ باس - باس تورىنى ئۇلىنىش قىلىۋېلىڭ !
