سېمىزلىك، ئانا ۋە ئەۋلاد

bilgejan

سېمىزلىك، ئانا ۋە ئەۋلاد

ھەر قىتىم توردا كۆرۈشكىنىمىزدە ئانام ماڭا «بالام سەمېرىپ قاپسەن، كۆرۈپ خۇش بولدۇم، كىلەر قېتىم كۆرۈشكەندە تېخىمۇ سەمىرگىنىڭنى كۆرگۈم بار» دەپ تاپىلايدۇ. بۇ ناھايتى ئومۇملاشقان بىر ئەھۋال بولۇپ،  ئەمەلىيەتتە، نۇرغۇن ئاتا-ئانىلار ۋە جەمئىيتىمىزدىكى نۇرغۇن كىشىلەر سېمىزلىكنى راھەت تۇرمۇشنىڭ بەلگىسى دەپ قارايدۇ ۋە نۇرمال ئېغىرلىقنى ساقلاشنىڭ نەقەدەر مۇھىم ئىكەنلىكىنى ئويلۇشۇپمۇ ئولتۇرمايدۇ. مەن ئانامنىڭ ماڭا كۆيۈنۈپ تۇرۇپ دەۋاتقان مۇشۇ گىپىدىن سۆزىدىن خۇشال بولاي دىسەممۇ زادىخۇشال بولالمايمەن، چۈنكىئۆزەم قىلىدىغان تەتقىقاتىم دەل سېمىزلىك كېسىلى بىلەن باغلىنىشلىق بولغاچقا، سېمىزلىكنىڭ ئاقىۋەتلىرىنىڭ يامان بولىدىغانلىغىنى بىلسەڭچۇ ئانا، دەپ ئۇنىڭغا ئىچىمدە خىتاب قىلىمەن، شۇنداقتىمۇ ئۇنىڭ كۆڭلى ئۈچۈن بولسىمۇ ئۇنىڭغا ئۆيگە قايتىدىغان ۋاقىتقىچە جىق سەمىرىپ بارىدىغانلىغىمنى چاندۇرمايلا ئېيتىپ خوشلىشىمەن. ئەلۋەتتە ئۇمۇ مۇشۇ توغۇرلۇق ماڭا ئوخشاش يۈزلىگەن ئىلمىي ماقالىلارنى ئوقۇپ، ئۆزى بىۋاستە قول سېلىپ تەجرىبە ئىشلەپ باققان بولسا، چوقۇم ماڭا زىيان ئىلىپ كىلىدىغان ئىشقا مىنى زورلىمىغان بولاتتى، ئەلۋەتتە.(ئۇنىڭ مەن ئۈچۈن پەقەت ياخشىلىققا تولغان قەلبى، تىلەكلىرى، دۇئالىرى ۋە سېڭدۈرگەن ئەجرىگە ئۇلۇغ ئاللاھ تۈگىمەس ساۋابلارنى ۋە ياخشىلىقلارنى بەرسۇن!) ھازىر چاندۇرماي ئۇنى ھەر كۈنى 30 مىنۇتتىن ھەرىكەت قىلىدىغان ئادەتكە يىتەكلەپ پۈتۈنلەي كۆنۈپمۇ بولدى. شۇنداقتىمۇ بۇ ئىشلار مىنى ئويغا سالىدۇ ۋە ئۇيغۇر جەمىئيىتىدىكى بۇ خىل تارىخى ئامىللار تۈپەيلى شەكىللەنگەن سېمىزلىكنى ياخشى ئىش ھەتتا گۈزەللىك ياكى سۆلەت دەپ قارايدىغان خاتا ئىددىيەنىڭ ھەرۋاقىت يامراپ كىتىۋاتقانلىقىنى ۋە كىشىلەرنىڭ ئېڭىنىڭ چوڭقۇر قاتلاملىرىغا ئاللىقاچان سېىڭىپ بولغانلىغىنى ئويلىغىنىمدا كەلگۈسىدە بۇنىڭ ئىلىپ كىلىدىغان خەتىرىدىن تىنىپ شۈركەنمەي تۇرالمايدۇ. بولۇپمۇ ئەڭ يامىنى، ئۆرىپ ئادىتىمىز بويىچە تۇغۇتلۇق ۋە تۇغۇتتىن كىيىنكى ئانىلارنىڭ سېمىز بولۇشىنى ئۈمۈد قىلىدۇ، ھەتتا تۇغۇتتىن يىشىنگەن ئاياللار سەمىرىپ تۇرمىسا بۇنى ياخشى كۈتۈنەلمەسلىكتىن دەپ قاراپ ئانىلارغا بىر خىل روھىي بىېسىم ئىلىپ كىلىدۇ. شۇ سەۋەپتىن تۇغۇتلۇق ئاياللار سەمىرىشكە تېرىشىدۇ. سىز بۇنىڭ قانداق يامان ئاقىۋەتلەرنى ئىلىپ كىلىدىغانلىقىنى بىلەمسىز؟

ھازىر دۇنيادا سېمىزلىك كېسىلى ئەڭ ئومۇملاشقان، نۇرغۇن يامان ئاقىۋەتلەرنى ئىلىپ كىلىدىغان ۋە داۋالاش قىيىن بولغان كېسەللەرنىڭ بېرى بولۇپ، يېقىنقى 20 يىلدىن بۇيان دۇنيادا بۇ خىل كېسەلگە گېرىپتار بولغان كىشىلەرنىڭ سانى 2 ھەسسە ئاشقان. ئامرىكا، ئەنگىلىيە، كانادا قاتارلىق تەرەققىي تاپقان دۆلەتلەردە سېمىزلىك كېسىلى ئەڭ كۆپ بولۇپ، سېمىزلىك كېسىلىنىڭ يامان ئاقىۋەتلىرى نۇرغۇن كىشىلەرنىڭ جېنىغا زامىن بولغان. ھەتتا سېمىزلىكتىن كىلىپ چىققان ئىككى تىپلىق دېئابىت كېسىلى ۋە يۈرەك قان-تومۇر كېسەللىكلىرى سەۋەبىدىن ئۆلۈپ كىتىدىغانلارنىڭ سانى ئامرىكىدا كېسەل بىلەن ئۆلىدىغانلارنىڭ سانى ئىچىدە ئالتىنچى چوڭ سەۋەپكە ئايلانغان. ئادەتتە، سېمىزلىك تۇرمۇش سەۋىيەسى تۆۋەنرەك، بىر قەدەر ئاز تەربىيە كۆرگەن كىشىلەر توپىدا كۆپرەك كۆرۈلىدىغان بولۇپ، شۇنداق بولغانلىقى ئۈچۈن، تەرەققى تاپقان ئەللەردە نورمال بەدەن ئېغىرلىقىنى ساقلاش تەربىيە كۆرگەنلىكنىڭ ۋە ساغلام تۇرمۇش ئۇسۇلىنىڭ بەلگىسى دەپ قارىلىدۇ.
يېقىنقى يىللاردىن بۇيان سېمىزلىك كېسىلىگە گېرىپتار بولغانلارنىڭ سانى تەرەققىي قىلىۋاتقان دۆلەت خەلقلىرىدىمۇ تىزدىن ئومۇملىشىشقا يۈزلەنگەن بولۇپ، دۇنيا سەھىيە تەشكىلاتى تەرىپىدىن سېمىزلىك كىسىلىنى دۇنيا مىقياسىدا كونتىرول قىلىش چاقرىقى ئوتتۇرغا قويۇلدى ۋە بۇ ھەقتىكى ئىلمىي تەتقىقاتلار ئۈچۈن غايەت زور مىقداردىكى مەبلەغ ئاجرىتىلدى. تۆۋەندە سېمىزلىكنىڭ خەلقئارادا ئورتاق ئېتراپ قىلىنغان ئېنىقلقمىسى، سېمىزلىكنىڭ سالامەتلىككە بولغان تەسىرى ۋە ئانا سېمىزلىكىنىڭ تۆرەلمە ۋە ئەۋلاد سالامەتلىكىگە ئىلىپ كىلىدىغان تەسىرلىرى بىلەن تونۇشۇپ ئۆتىمىز.

دۇنيا سەھىيە تەشكىلاتى تەرىپىدىن ئوتتۇرغا قويۇلغان سېمىزلىكنىڭ ئۆلچىمى «بەدەن ئېغىرلىق ئىندىكىسى» ئارقىلىق بەلگىلىنىدۇ.  بەدەن ئېغىرلىق ئىندىكىسى بىر فورمۇلا ئارقىلىق ھېساپلىنىدىغان بولۇپ، بەدەن ئېغىرلىقىنىڭ كىلوگرام سانى ئېگىزلىك مىتىر سانىنىڭ كۋادراتىغا بۆلۈنىدۇ. مەسلەن: بىر كىشىنىڭ بەدەن ئېغىرلىقى 50 كىلوگرام، ئېگىزلىكى 1.5 مىتىر بولسا، بۇ ھالدا بۇ كىشىنىڭ بەدەن ئېغىرلىق ئىندىكىسى 22.2 بولىدۇ. ئادەتتە، بەدەن ئېغىرلىق ئىندىكىسى 18.5 تىن 25 كىچە بولسا نورمال ھېساپلىنىدۇ؛ 25 تىن 30 غىچە بولسا «ئېغىرلىقى ئىشىپ كەتكەن» ھېساپلىنىدۇ؛ 30 دىن ئىشىپ كەتكەن بولسا سېمىزلىك كېسىلىگە گېرىپتار بولغان بولىدۇ؛ ئەگەر 18.5 تىن تۆۋەن بولسا «ئېغىرلىقى تۆۋەن» بولۇپ ھېساپلىنىدۇ. مۇشۇ ئۆلچەم بويىچە ھېسابلىغاندا، پۈتۈن ئامرىكا نوپۇسىنىڭ 20 ياشتىن ئاشقانلار ئىچىدىكى 65% ئەرلەر ۋە 67% ئاياللار ئېغىرلىقى ئېشىپ كەتكەن (BMI>25) ۋە 34% ئەر ۋە ئاياللار سېمىزلىك كېسىلىگە گېرىپتار بولغان ھېسابلىنىدۇ. كانادا، ئاۋىستىرالىيە ۋە ئەنگىلىيە كىشىلىرىدە بۇ سانلىق مەلۇماتلار ئامرىكىدىن سەللا تۆۋەن بولۇپ ئومۇمىي نوپۇسنىڭ 25% تىن كۆپرەكى سېمىزلىك كېسىلىگە گېرىپتار بولغانلار ھېسابلىنىدۇ ۋە 60% ئەتراپىدىكىلەر ئېغىرلىقى ئېشىپ كەتكەن بولۇپ ھېسابلىنىدۇ. بۇ دۆلەتلەردىكى بالىلارنىڭ سېمىزلىك كېسىلىگە گېرىپتار بولۇش نىسبتىمۇ ئاللىقاچان 20%تىن ئېشىپ كەتكەن. تەرەققىي تاپقان ياۋروپا ئەللىرى، ئوتتۇرا شەرقتىكى ئەرەب دۆلەتلىرى، تۈركىيە، قازاقىستان قاتارلىق دۆلەتلەردىمۇ سېمىزلىك كېسىلىگە گېرىپتار بولغان چوڭلار ۋە بالىلار سانى ئالدىنقى قاتاردا تۇرىدىغان بولۇپ، پەقەت ياپونيەلا سېمىزلىك كېسىلى نىسبىتى ئەڭ تۆۋەن بىردىنبىر تەرەققىي تاپقان دۆلەت ھېسابلىنىدۇ. جۇڭگودا بۇ نىسبەت بىر قەدەر تۆۋەن بولسىمۇ، لىكىن يىقىنقى يىللاردىن بۇيان سېمىزلىك ۋە ئېغىرلىقى ئېشىپ كەتكەنلەر ئۆزلۈكسىز كۆپىيىشكە باشلىغان، ۋە سېمىزلىككە گېرىپتار بولغان ئەر ۋە ئاياللارنىڭ سانى 90-يىللاردىكى 10% دىن تۆۋەن تۇرۇشتىن 2009 يىلدىكى ئەرلەردىكى 16% ۋە ئاياللاردىكى 14% گە يەتكەن ۋە بالىلاردىكى سېمىزلىكمۇ توختىماي ئېشىپ بارغان.

بۇ يەردە توختالماقچى بولغىنىمىز ئېشىپ كەتكەن بەدەن ئېغىرلىقىنىڭ سالامەتلىككە بولغان تەسىرى بولۇپ، كۆزدە تۇتىدىغىنىمىز بەدەن ئېغىرلىق ئىندىكىسى 25 تىن يۇقىرى بولغان كىشىلەر توپى، ئەلۋەتتە  بەدەن ئېغىرلىق ئىندىكىسى 30 تىن يۇقىرى بولغان كىشىلەر توپى تېخىمۇ چوڭ تەسىرگە ئۇچرايدۇ. ئالدى بىلەن سېمىزلىكنىڭ بىۋاستە تەسىرىنى ناھايتى قىسقىچە بايان قىلىمىز. سېمىز كىشىلەردە قاندىكى گلۇكوزىنىڭ مىقدارى نورمال كىشىلەردىن يۇقىرى بولىدۇ؛ بەدەندىكى ياغنىڭ مىقدارىمۇ يۇقىرى بولۇپ، ئېشىپ كەتكەن ياغ مىقدارى بەدەندىكى ئەزالارنىڭ ياللۇغلىنىشىنى كەلتۈرۈپ چىقىرىدۇ. ئۇنىڭدىن باشقا كۆپىنچە سېمىز كىشىلەرنىڭ ئىشتىھاسى ئادەتتىن تاشقىرى زور بولۇپ، سېمىزلىكنى تېخىمۇ يامانلاشتۇرىدۇ. تەتقىقاتلاردىن بايقىلىشىچە، 40 ياشتا سېمىزلىك كېسىلىگە گېرىپتار بولغان كىشىلەرنىڭ ئۆمرى نۇرمال ئېغىرلىقتىكى كىشىلەردىن ئاز دىگەندە يەتتە يىل تۆۋەن بولغان. سېمىزلىك كېسىلىنىڭ ۋاستىلىك تەسىرلىرى تېخىمۇ ئېغىر بولۇپ، قاندىكى ئېشىپ كەتكەن گلۇكوزا مىقدارى ئاشقازان ئاستى بىزىنىڭ كۆپلەپ ئىنسۇلىن ئىشلەپچىقىرىشىنى زۆرۆرىيەتكە ئايلاندۇرىدۇ. سېمىز كىشىلەردە ئىنسۇلىننىڭ گلۇكوزىغا بولغان سەزگۈرلۈكى تۆۋەنلەپ، ئىنسۇلىن قارشىلىقىنى كەلتۈرۈپ چىقىرىدۇ-دە، ئىككى تىپلىق دىئابىت كېسىلىنىڭ تەرەققىياتىنى ئىلگىرى سۈرىدۇ. سىتاتىستىكىلىق مەلۇماتلارغا ئاساسلانغاندا، سېمىزلىك كېسىلىگە گېرىپتار بولغان كىشىلەرنىڭ مۇتلەق كۆپ قىسمىي مەلۇم مەزگىلدىن كىيىن دىئابىت كېسىلىگە گېرىپتار بولىدۇ. شۇمۇ مەلۇمكى، يۇقىرى قان بىسىمى بىمارلىرىنىڭ 70 پىرسەنتى سېمىز كىشىلەردۇر. سېمىزلىك كېسىلى يەنە يۈرەك قان-تومۇر كىسەللىكلىرى، راك كېسىلى، سۆڭەك شالاڭلىشىش كېسىلى، جېگەرنى ماي قاپلاش كېسىلى ۋە تۇغماسلىق كېسىلى قاتارلىق ئېغىر كېسەللىكلەر بىلەن باغلىنىشى بار، دەپ قارالماقتا.
ئانىلاردىكى سېمىزلىك كېسىلى تېخىمۇ مۇرەككەپ ۋە ئېغىر مەسىلىلەرنى كەلتۈرۈپ چىقىرىدۇ، يەنى ئانىدىكى سېمىزلىك تۆرەلمىنىڭ ئۆسۈپ يىتىلىشى ۋە كىيىنكى سالامەتلىكىگە مەڭگۈ ئورنىنى تولدۇرغۇسىز زىيانلارنى ئىلىپ كىلىدۇ. نۇرغۇنلىغان تەتقىقات نەتىجىلىرى شۇنى كۆرسىتىپ بىرىدۇكى، ئانىلاردىكى سېمىزلىك تۇغۇتنىڭ دەسلەپكى مەزگىللىرىدىلا تۆرەلمىنىڭ نورمال مېڭە تەرەققىياتىغا توسقۇنلۇق قىلىدۇ؛ تۆرەلمىنىڭ يۈرەك، ئاشقازان ئاستى بىزى، ياغ قاتارلىق قىسىملىرىنىڭ بىنورمال تەرەققىي قىلىشىنى ۋە تۇغۇلغاندىن كىيىنكى ھاياتىدا سېمىزلىك كېسىلى، ئىككى تىپلىق دىئابىت كېسىلى ۋە يۈرەك قان-تومۇر كېسەللىكلىرىگە يۇقىرى نىسبەتتە گېرىپتار بولۇشىنى پروگراممىلايدۇ. بۇ خېل ھادىسە بىئولوگىيە تەتقىقاتىدا «تۆرەلمىنىڭ پروگراممىلىنىشى» دەپ ئاتىلىدىغان بولۇپ، تۆرەلمە بالىياتقۇ مۇھېتىدىكى ھەرخىل پاسسىپ ئامىللارنىڭ تەسىرىدە تۆرەلمىنىڭ بىنورماللىقىنى ۋە كىيىنكى ھاياتىدىكى سالامەتلىكىنىڭ ناچار بولۇشىنى بەلگىلەيدىغانلىقىنى كۆرسىتىدۇ. مۇشۇ خىل تۆرەلمىنىڭ سېمىزلىك ۋە ھەددىن ئارتۇق ئوزۇقلۇقلار تەرىپىدىن تۆرەلمە مەزگىلىدە ئەزالارنىڭ يىتىلىشىدە نورمالسىزلىق كۆرۈلۈپ كەلگۈسىدە سىمىز ئانىلاردىن ياكى تۇغۇت مەزگىلىدىكى دىئابىت كېسىلىگە گېرىپتار بولغان ئانىلاردىن توغۇلغان بالىلار ئاسانلا سەمىرىپ كېتىش ئېھتىماللىقى يۇقىرى بولۇپ، بۇ بالىلاردىمۇ ئوخشاشلا ئىنسۇلىنغا قارشىلىق شەكىللىنىپ 2 تىپلىق دىئابىت كېسىلىگە گېرىپتا بولۇش نىسبىتى بىر قەدەر يۇقىرى بولىدۇ ھەم يۇقىرى قان بېسىمى، يۇقىرى خولىستىرول سەۋەبى يۈرەككە قان توشۇيدىغان تومۇرلارنىڭ توسۇلۇپ قىلىشىدىن كىلىپ چىقىدىغان خىلمۇ-خىل يۈرەك كېسەللىكلىرىگە گىرىپتار بولۇش نىسبىتىمۇ يۇقىرى بولىدۇ. ئەلۋەتتە سېمىزلىككە گېرىپتار بولغان ئانىلار ۋە دادىلاردىن تۇغۇلغان بالىلار كەلگۈسىدە ساغلام يىمەك-ئىچمەك ۋە بەدەن چىنقتۇرۇشىنى ئۆزىگە ئادەت قىلسا بۇ كېسەللىكلەرگە گېرىپتار بولىدىغان ئېھتىماللىق زور دەرىجىدە كىچىكلىشى مۇمكىن. ئەگەر دىققەتلا قىلمىسا يۇقىرىدا تىلغا ئېلىنغان كېسەللىكلەرگە گېرىپتار بولۇش نىسبىتى نورمال بەدەن ئېغىرلىقتىكى ئانىلاردىن تۇغۇلغان بالىلاردىن كۆپ يۇقىرى بولىدۇ.

خۇلاسىلىغاندا، سېمىزلىك مەيلى ئەر مەيلى ئايال بولسۇن سالامەتلىككە زور ناچار تەسىرلەرنى ئېلىپ كىلىدۇ. بولۇپمۇ، پەرزەنتلىك بولۇش ئالدىدىكى ئاياللارنىڭ  نورمال ئېغىرلىقتا بولۇشى ئۆزى ھەم كەلگۈسى ئەۋلادلارنىڭ ساغلام بولۇشى ئۈچۈن ناھايتى مۇھىم. بىز ئۇيغۇر جەمئىيتىدىمۇ نۇرمال ئېغىرلىقنى ساقلاشنىڭ مۇھىملىقىنى تەشۋىق قىلىشىمىز ھەم ساغلام تۇرمۇش ئادىتى يىتىلدۈرۈپ، ساغلام يېمەكلىك ۋە بەدەن چېنىقتۇرۇش ئارقىلىق ئۆزىمىز ۋە كەلگۈسى ئەۋلادلارنىڭ بەختىنى كاپالەتلەندۈرىشىمىز تولىمۇ زۆرۈر. ساغلاملىق ھەقىقىي بەخىتتۇر!

ئاخىرىدا مۇشۇ يازمامنى ئوقۇغان ھەر بىر ئوقۇرمەننىڭ سېمىزلىككە بولغان قارىشىدا ئازراق بولسىمۇ ئۆزگىرىش بولغان بولسا، ياكى ھىچبولمىغاندا بىر ئويلىنىش بولغان بولسا، مەن شۇنىڭدىن خۇرسەنمەن. ئاخىرىدا ۋەتەندىكى ھەر بىر ئەزىزلەرنىڭ ساغلام بولۇشىنى، تۇرمۇشتىكى يىمەك-ئىچمەك، بەدەن چېنىقتۇرۇشقا ئەھمىيەت بىرىشلىرىنى ۋە شۇ ئارقىلىق كەلگۈسى ئەۋلادلارنىڭ ساغلاملىقى ئۈچۈن تۆھپە قوشۇشلىرىنى چىن دىلىمدىن تىلەيمەن.

ئاپتۇر: بىلگەجان (2013-يىلى قەھرىتان ئېيى، ئامرىكا)

ئالۋۇن

جۇڭگۇدا ئورۇق ئادەملەر كوپ ھەم ئوزۇقلۇق يتىشمەسلىك سەۋەبىدىن ساقيماس كىسەلگە گىرىپتار بولغانلارمۇ كۆپ ئۇزۇقلۇق يىتشمەسلىك سەۋەبدىن ئممۇنىت كۇچى ئاجىزلاپ تىبىركىليۇز بولۇپ قالغان كشلەردىيارىمىزدا قەدەمدە بىرسى ئۇچىرايدۇ....

bilgejan

ھامىلدارلىق مەزگىلىدە ئانىلارغا ئوزۇقلۇق يىتىشمىسە تۆرەلمە ۋە بالىدا يۇقىرىدىكىگە ئوخشاش ئاقىۋەتلەر كىلىپ چىقىدىغانلىقى ھەم ئېنىق.

uqkun2008

بۇرۇن ئادەملەر قوسىقى تويغۇدەك تاماق يىيەلمەي ئۆتۈپ كېتەتتى، كۈنى ئاچ زارلىقتا ئۆتەتتى. تۈزۈك تاماق يىيەلمىگەندىكىن ئورۇقلاپ كىتەتتى.  ئاتا-ئانىلىرىمىزنىڭ ئۇنداق دېيىشىمۇ بىزگە كۆيۈگەنلىكىدۇر. لېكىن بىز سېمىزلىكنىڭ قانداق ئاقىۋەتلەرنى ئېلىپ كىلىدىغانلىقىنى بىلگەندىن كېيىن، چوقۇم بۇنىڭغا ئالاھىدە دىققەت قىلىشمىز لازىم ۋە ئامال بار چوڭلارغا توغرا چۈشەندۈرۈپ قويىشىمىز كېرەك. نۇرغۇن كېسەللىكلەر سېمىزلىكتىن كېلىپ چىقىۋاتىدۇ. بىزنىڭ ئوتتۇرىچە يېشىمىز بارغانچە تۆۋەنلاۋاتىدۇ. بۇرۇنقىدەك ئاتا-ئانىلىرىمىز 90، 100 ياشنىڭ قارىسىنى ئالمىقى تەسلىشىپ كەتتى.

guzalyurtum

مەن ئەڭ كۆڭۈل بىلىدىغان مەسىلىنى ئوتتۇرغا قويۇپسىز. مەن ‹ئېغىرلىقى ئېشىپ كەتكەن› سىمىزلار تىپىغا كىرىمەن. بارلىق ئاماللارنى(دورا ئىچىش ۋە سىرتىدىن سۈركەش،تاماقنى ئازلىتىش،ھەركەت قىلىش) سىناپ باقتىم،لىكىن ئۈنىمى كۆڭۈلدىكىدەك بولمىدى. ھەتتا يىڭنە سانجىپ ئورۇقلىتىش مەركىزى(خوجايىن بىلەن بىر خەنزۇ خىزمەتدېشىمنىڭ كۆڭلۈم خېلىلى يېقىن ئىكەن،شۇ خىزمەتدېشىم باشلاپ بارغان)گىمۇ باردىم، ئۇلار مەندىن بىر قاتار سۇئال سورىغاندىن كىيىن، بولدى  ئاۋارە بولما يىڭنە سانجىشنى توختاتساق يەنە سەمرىپ قالىسەن دەپ مىنى داۋالىغىلى ئۇنىمىدى.  سىمىزلىكىمدىن يارىشىملىق، چىرايلىق كىيىممۇ كېيەلمەيمەن، بۇنىمۇ مەيلى دەي، ياش چوڭايغانسىرى(يېشىم بەكمۇ كىچىك ئەمەس) يۇقۇرىدا دىيىلگەندەك كىسەللىك بېسىۋالارمۇ دەپ غەم يەيمەن.
2011-يىلى 12-ئايدىن باشلاپ 2012-يىلى 4-ئايغاچە ھەر كۈنى ئەتتىگەندە 1سائەت يۈگۈردۇم . نەتىجىدە 5 ئايدا ئاران 4 جىڭ ئورۇقلاپتىمەن. كېيىن مەلەم سەۋەبلەر تۈپەيلى يۈگىرەشنى داۋاملاشتۇرالمىدىم،ئاندىن تېخىمۇ سەمرىپ كەتتىم.
ھەي..............قانداق قىلسام بولار؟

bilgejan

guzalyurtum يوللىغان ۋاقتى  2013-4-21 14:03
مەن ئەڭ كۆڭۈل بىلىدىغان مەسىلىنى ئوتتۇرغا قويۇپسىز. مە ...

ئورۇقلاشتا ئاساسلىقى ھەرىكەت ۋە يىمەك-ئىچمەكنى تەڭشەش ئۇسۇلى قوللىنىلىدۇ. ئۇنىڭدىن باشقا، دورىمۇ يەنە بىر تاللاش بولۇپ، 90-يىللاردا بازراغا سېلىنغان ئامرىكىنىڭ بىر قىسىم ئورۇقلاش دورىلىرى ئەكىس تەسىرىنىڭ ئېغىرلىقى تۈپەيلى بازاردىن قايتۇرۋىلىنغان. ئۆتكەن يىل بىرلا ۋاقىتتا ئىككى خىل ئورۇقلاش دورىسى ئامرىكا يىمەكلىك ۋە دورا باشقۇرۇش ئىدارىسى (FDA)  تەرىپىدىن بازراغا سېلىشقا تەستىقلانغان بولۇپ، Belviq ۋە Qsymia دەپ ئاتىلىدۇ. بۇ دورىلارنىڭ ھەر ئىككىسى ئىشتىھانى تۆۋەنلىتىپ تاماق مىقدرىنى ئازايتىش ئۈنۈمىگە ئىگە بولۇپ، بىمارنىڭ ئازاپسىز ھالدا تاماق مىقدارىنى كونتىرول قىلىشىغا ياردەم بىرىدۇ. بۇ دورىلارنىڭ ئەكىس تەسىرى بىر قەدەر تۆۋەن بولۇپ، بولۇپمۇ بۇرۇنقى دورىلاردەك يۈردك كىسەللىكلىرىنى كەلتۈرۈپ چىقىرىش ئېھتىماللىقى يوق دىيەرلىك. بۇ دورىلار سىناق قىلىنغاندا بىمارلار %15~ ئەتراپىدا ئېغىرلىق يوقۇتۇش ئۈنۈمىگە ئېرىشكەن. نۆۋەتتە دۇنيادا كۆرۈنەرلىك ئورۇقلاشنىڭ تېخى ئۈنۈملۈك ئۇسۇلى تىپىلغىنى يوق. شۇڭا، ھازىرچە ئورۇقلاشنىڭ بىخەتەر لىكىن ئۈنۈمى سەل تۆۋەنرەك چارىسى يەنىلا ئېنىرگىيەنى يوقۇتۇش، يەنى تاماقتىن كىلىدىغان ئېنىرگىيەنى ئازايتىپ، ھەرىكەت ئارقىلىق ئېنىرگىيە سەرپىياتىنى يۇقىرلىتىشتىن ئىبارەت. ھازىر سىمىزلىك كېسىلى تەتقىقاتى ئىنتايىن يۇقىرى مەبلەغ سېلىنغان تەتقىقات تۈرلىرىنىڭ بىرى بولۇپ، بەلكىم كەلگۈسى 5-10 يىل ئىچىدە ئۈنۈملۈك ئورۇقلىتىش دورىسىنىڭ مەيدانغا كىلىشىدە ئۈمىد بار.

karmanshah

رەھمەت تېمىڭىزغا،،،،،چەتئەلدىكى ئوقۇشىڭىزغا كۆڭۈلدىكىدەك نەتىجە يار بولغاي !!!

behzad

بىر-بىرىدىن نادىر تېمىلارنى يوللاۋاتىسىز، قولىڭىزغا دەرت كەلمىسۇن، ئوقۇشىڭىز غەلىبىلىك بولسۇن! تېخىمۇ نادىر تېمىلىرىڭىزغا تەقەززامىز

aktuqi

ئىندىكىسى  دىگەن نىمدىگەن گەپ ئۇستازلار .؟

رەھمەت قېرىندىشىم.

guzalyurtum

ئشتاھانى تۇتۇش دورىسىنى مەن تۇنجى قېتىم سىناپ كۆرگەن ئىدىم. تۇلىمۇ ئەپسۇس ،17 كۈندە زورلاپ يۈرۈپ جىق بولسا 3 پىيالە تاماق يىگەندىمەن. شۇ مەزگىلدە مىنى كىم كۆرسە نەچچە كۈن كۆرمىسەم ئوبدانلا  سەمرىپ قاپسەن دىگىلى تۇردى.ئاچچىقىمدا 18-كۈنى جىڭغا چۈشتۈم(ئۇ دورىنىڭ بىر داۋالاش كۇرسى 3ئاي بولۇپ مەن ھەر 1 ئايدا ئېغىرلىقىمنى ئۆلچەپ باقماقچى ئىدىم)-يۇ، تاس قالىتىم ئايلىنىپ كەتكىلى. دورا ئىچمەستە 118جىڭ كىلەتتىم، 17 كۈندە 3 پىيەلە تاماق يەپ 121جىڭ كەلدىم، ئۇ تارازىغا ئىشەنمەي باشقا تارازىغا چۈشۈپ باقتىم، نەتىجە ئوخشاش.
ئاناممۇ 24 ياش ئەتراپىدا سەمرىشكە باشلىغان ئىكەن. ئاناممۇ شۇنداق سىمىز، بۇ يىل 60ياشقا كىردى، رىيەكسىيە خاراكتىرلىك زىققا كىسىلى بار،3 يىل بولدى قاندا ماي سەل ئۆرلىۋالغىلى، شۇنىڭغا قاراپ مەندىكى ئېرسىيەت خاراكتىرلىك سىمىزلىكمىكى دەپ قالىمەن.