پەخىرلەن ئەي ئايال ئاياللىقىڭدىن
گۈزەلدۇر تەبىئەت بەرنالىقىڭدىن،
رەڭ ئالغان گۈللەرمۇ زىبالىقىڭدىن،
ھاياتلىق ياشنايدۇ شەيدالىقىڭدىن،
پەخىرلەن ئاي ئايال ئاياللىقىڭدىن.
تەۋرەتسەڭ بۈشۈكنى تەۋرەيدۇ دۇنيا،
جاسارەت بەرگەندەك ئەللىيىڭ گويا،
مېھرىڭدىن دىللارغا تارىلار زىيا،
پەخىرلەن ئەي ئايال ئاياللىقىڭدىن.
بىر تېمىم سۈتۈڭدە ئالەمچە مېھىر،
ئەجرىڭدىن يېشىلەر مىڭلارچە سېھىر،
شەنىڭگە پۈتۈلەر داستان ھەم شېئىر،
پەخىرلەن ئەي ئايال ئاياللىقىڭدىن.
ئۇلۇغلۇق بۈيۈكلۈك پەقەت ساڭا خاس،
مېھنىتىڭ بولىدۇ قۇياشقا تەققاس،
سېنىڭسىز بۇ دۇنيا بەئەينى قاقاس،
پەخىرلەن ئەي ئايال ئاياللىقىڭدىن.
نامىڭدا ئاتىلار ئەل-يۇرت ،ۋەتىنىم،
تاغ-دەريا،قۇرۇقلۇق دالا ھەم ئىقلىم،
بەڭباشلىق بولىدۇ سەن بىلەن تەسلىم،
پەخىرلەن ئەي ئايال ئاياللىقىڭدىن.
ئانىلار يىغلىسا يىغلايدۇ ئالەم،
ئانىلار ئەجرىدىن ئادەمدۇر ئادەم،
كۆز يۇمسا ئانىلار دۇنيادا ماتەم،
پەخىرلەن ئەي ئايال ئاياللىقىڭدىن.
ۋاپا ۋە ھايانىڭ سىماسى سەندە،
مېھىر ۋە كۆيۈشنىڭ قۇياشى سەندە،
ئەجىر ۋە مېھنەتنىڭ ساباسى سەندە،
پەخىرلەن ئەي ئايال ئاياللىقىڭدىن.
ئايالسىز ئائىلە بەئەينى مازار،
ئايالسىز ئەرلەرنىڭ دىلىدا ئازار،
ئانىسىز پەرزەنتمۇ يىغلايدۇ زار-زار،
پەخىرلەن ئەي ئايال ئاياللىقىڭدىن.
تەرىڭدىن گۈل ئۈنۈپ بولار گۈلىستان،
مېھرىڭدىن باھاردەك كۈلەر زىمىستان،
ياشنايدۇ سەن بىلەن كائىنات- ئىنسان ،
پەخىرلەن ئەي ئايال ئاياللىقىڭدىن.
