ئامېرىكىلىق داڭلىق پىسخىلوگ مورلى ئىنسانلارنىڭ پىسخىك ئېھتىياجىنى يەكۈنلەش ئارقىلىق ئەر- خوتۇنلارنى ماسلاشتۇرۇپ ئىناق قىلىدىغان بەش خىل مەنىۋى ئېھتىياجنى تېپىپ چىققان.
1. ھۆرمەتكە ئېرىشىش ئېھتىياجى: ئادەمدە كىچىكىدىن باشلاپلا قەدىر- قىممەت قارىشى يېتىلىشكە باشلايدۇ، شۇڭا ھەرقانداق ئادەم قەدىر- قىممىتى زىيانكەشلىككە ئۇچرىسا، ئازاپلىنىدۇ. ئەر- خوتۇنلار ئوتتۇرىسىدىكى ئۆزئارا ھۆرمەت، ئىشىنىش مۇھەببەتنى كۈچەيتىپ، كەسپتە مۇۋەپپىقىيەت قازىنىشنىڭ ئاساسىي كاپالىتى. ھەرقانداق تەنبىھ ۋە كەمسىتىش قىلمىشلىرى قارشى تەرەپنىڭ ئىززەت -ھۆرمىتىنى دەپسەندە قىلىپ، كۆڭلىنى غەش قىلىدۇ.
2 . مۇستەقىل ۋە ئۆزىنى ئىپادىلەش ئېھتىياجى: ھەر قانداق ئادەم ئۆز قارىشى ۋە ئىرادىسى بويىچە ئىش قىلىشنى ئارزۇ قىلىدۇ. شۇنداقلا ھەر بىر ئادەم باشقىلار ئالدىدا ئۆزىنىڭ قابىلىيىتىنى نامايەن قىلىپ، ئۆزىنى كۆرسىتىشنى تېخىمۇ ئارزۇ قىلىدۇ. ئەر- خوتۇنلار ئوتتۇرىسىدىمۇ ھەمىشە تىل ۋە ھەرىكەت ئارقىلىق قارشى تەرەپنى ھەيران قالدۇرىدىغان، ئۆزىگە جەلپ قىلىدىغان ۋە ماختاشقا ئېرىشىدىغان جەريانلار بولۇشى كېرەك .
3. ئالاقە قىلىش ئېھتىياجى: جەمئىيەت ئادەملەر تۇرمۇش كەچۈرۈپ، شادلىققا ئېرىشىدىغان ماكان. جورىسى ياكى سۆيگىنىنى باشقىلار بىلەن ئارىلاشتۇرمايدىغان ھەرىكەت مۇھەببەتنىڭ چوڭقۇر ئەمەسلىكىنىڭ ئىپادىسى بولۇپلا قالماي، يەنە قارشى تەرەپتە روھىي تەڭپۇڭسىزلىق پەيدا قىلىدىغان ناچار ئۇسۇل.
4 . ھەۋەس ۋە ھېسسىيات ئېھتىياجى: ھەر قانداق ئادەمنىڭ ھەۋىسى، قىزىقىشى ئوخشىمايدۇ. شۇڭا ئامال بار قارشى تەرەپنىڭ ئېھتىياجىنى قاندۇرۇپ قولايلىق شارائىتلارنى يارىتىپ بېرىش كېرەك. ھېسسىياتتا مۇھەببەت مەركەز بولۇپ، بۇزۇلماس چوڭقۇر مۇھەببەت قارشى تەرەپنىڭ ئېھتىياجىنى قاندۇرىدۇ. بولمىسا ئۈمىدسىزلىنىش، نارازىلىق، تىركىشىش، ئۆچمەنلىك پەيدا بولۇپ، ھېسسىيات بۇزۇلىدۇ.
5 . دەرت- ئەلىمىنى چىقىرىش ئېھتىياجى: جۆرىڭىز ياكى سۆيگىنىڭىزنىڭ كەيپىياتى ناچار چاغدا ھەمىشە دەردىنى ئېيتىپ ئىچىنى بوشىتىدىغان ئادەمگە مۇھتاج بولىدۇ. بۇ چاغدا دەردىنى چىقىرىدىغان تاللاش ئوبيېكتى ئاساسەن سىز، يەنى ئۆز يېقىنى، سۆيگىنى بولىدۇ. بولۇپمۇ ئەر- خوتۇنلار ھەمىشە قارشى تەرەپنىڭ دەردىنى تۆكىدىغان ئوبيېكتى ھېساپلىنىدۇ. شۇڭلاشقا ھەر قانداق بىر تەرەپ ئاكتىپلىق بىلەن قارشى تەرەپنىڭ دەرت- ئەلىمىنى قوبۇل قىلىشى، ئاڭلىشى ھەمدە تەسەللى بېرىپ، مۇۋاپىق ئۇسۇللار ئارقىلىق ئۇنىڭ كۆڭلىدىكى ئازابىنى يېنىكلىتىشىگە ياردەم بېرىشى كېرەك.

مەنبە :  « قانۇنچىلىق گېزىتى »

بۇلار راسلا مۇھىمكەن .