ئەسسالامۇ ئەلەيكۇم ئاشپەز تورىدىكى تورداشلار:
ئاشپەز تورىغا كىرىۋاتقىلى ئۇزۇن بوپتۇ، ئىنكاس يېزىپ باقمىغان بولساممۇ جىق پايدىسىنى كۆرۈپتىمەن. توردىكى ئاشپەز ئۇستاملار ۋە تورداشلارغا رەھمەت ئېيتىش يۈزىسىدىن ئۆزەم بىلىدىغان بىر نەچچە خىل چەت ئەلنىڭ ۋە ئۆزىمىزنىڭ تامىقىنى تونۇشتۇرماقچىمەن.
بۈگۈن تونۇشتۇرىدىغىنىم، ئامېرىكا ئالما بەلىچى. ئىنگلىزچىسى Apple pie, خەنزۇچىسى 苹果派
ئامېرىكا ئالما بەلىچى ئامېرىكىنىڭ ۋەكىللىك خارەكتېرگە ئىگە تامىقى بولۇپ، ياۋروپادىن كىرگەن بىر نەچچە خىل يېمەكنى ئۆزگەرتىش ئاساسىدا بارلىققا كەلگەن. شۇڭا كىشىلەر ئامېرىكا تىلغا ئېلىنسا كىشىلەرنىڭ يادىغا ئەڭ ئاۋۋال بۈركۈت، ئەركىنلىك ھەيكىلى ۋە ئالما بەلىچى كېلىدۇ، دېيىشىپ قويىدۇ. بۇنىڭ ئىسمىنى نېمە دەپ ئاتاشنى بىلمەي، بىزدىكى بەلىچلەرگە ئازراق ئوخشىتىپ ئالما بەلىچى دەپ ئاتاپ قويدۇم.
ئامېرىكا ئالما بەلىچى:
ئالما بەلىچى مۇشۇ رەسىمدىكىرەك بولىدۇ، لېكىن دەل مۇشۇنىڭدەك بولۇپ كېتىشنىڭ ھاجىتى يوق. قېنى ئەمدى قول سېلىپ ئىشلەپ باقايلى.
دىققەت: غەرب تائاملىرىنىڭ ھەممىسى سۈت مەھسۇلاتلىرىغا ئالاھىدە ئەھمىيەت بېرىدۇ، مەسىلەن سارماي، ئىرىمچىك (چىز) دېگەندەك. شۇڭا غەرب تائاملىرىنى ئېتىشنى ئۆگىنىشتىن بۇرۇن ئۆيىڭىزگە مۇشۇنداق نەرسىلەرنى تەييار قىلىپ قويۇڭ.
خېمىرى: ئەسلى كلاسسىك رېتسىپ بويىچە ئالما بەلىچىنىڭ خېمىرى مارگىرىن بىلەن يۇغۇرۇلىدىكەن. لېكىن مەن مارگىرىننىڭ ئىشەنچلىكىنى تاپالمىغاچقا، سېرىق ماي بىلەن تەييار قىلىدىغان ئامال تاپتىم، ئۇسۇلى مۇنداق: توڭلاتقۇنىڭ ئۈستىدە مۇزلىغان سېرىق مايدىن يېرىم پىيالە ئېلىپ ئۇششاق توغرايسىز، ئاندىن بىر پىيالە ئۇن بىلەن ئارىلاشتۇرۇپ مىجىيسىز، ئۇن مونچاق-مونچاق ھالەتكە كەلگەندە، ئازراق مۇزدەل سۇ قۇيۇپ خېمىر قىلىمىز، مۇزدەك سۇ قۇيۇشتىكى مەقسەت سارماينىڭ ئېرىپ، خېمىرنى بەك مىلىچ-مىلىچ ھالغا كەلتۈرۈپ قويماسلىقى ئۈچۈن. بۇ تەييارلىغان خېمىرىمىز چوقۇم بىزنىڭ ئۇن تاماقلىرىمىزنىڭ خېمىرىدەك بولۇپ كەتمىسىمۇ بولىدۇ، پەقەت بىر-بىرىگە يېپىشىپ تۇرسىلا بولدى.
تەييار بولغان خېمىرنى ئىككىگە بۆلۈپ يۇمىلاق پوملاپ ئېلىپ قويىسىز، ھەم بۇ جەرياندا تېز سۈرئەتتە ئالمىنى تەييار قىلىسىز.
بەلىچنىڭ ئىچى:
ئاقلاپ قويغان ئالمىدىن تۆت-بەش تالنى ئوتتۇرىدىن ئىككى پارچە قىلىپ، ئۇرۇقلىرىنى ئېلىۋېتىپ، نىپىز قىلىپ يالپاقلايمىز، داستەك بىر قاچىغا ئېلىپ، تەييار بولغان ئالمىغا پەسرەك بىر پىيالە شېكەر--ئۆزىمىزنىڭ ياقتۇرۇشىمىزغا قاراپ تەڭشىسەك بولىدۇ،--بىر چىمدىم تۇز (تۇز ئالمىنى تېز يۇمشىتىدۇ، مېزىلىك پۇرىقىنى چىقىرىدۇ)، بىر بال قوشۇق قوۋزاقدارچىن ئۇنى ۋە بىر بال قوشۇق 肉寇 بۇنىڭ ئۇيغۇرچىسىنى بىلمىدىم، ئىنگلىزچە nutmeg دەيدۇ--سېلىپ ئارىلاشتۇرۇپ، تەملىرىنىڭ سىڭىشىشى ئۈچۈن ئېلىپ قويىمىز.
دەسلەپكى خېمىرىمىزنى نوغۇچ بىلەن يېيىپ يۇمىلاق لېسقا توغرا كەلگۈدەك قىلىمىز، چۆرىسى لېسنىڭ سىرتىغىراق چىقىپ تۇرسا بولىدۇ، ئەگەر يۇمىلاق لېس تاپالمىسىڭىز كېچىكرەك چاسا لېسمۇ بولۇۋېرىدۇ دەپ ئويلايمەن. ئىچىگە تەييار قىلىنغان ئالما قىيمىسىنى سېلىپ ئۈستىگە ئىككىنچى جىلىتنى ياپىمىز، چۆرىسىنى چىڭ بېسىپ يېپىشتۇرۇپ، لېسنىڭ سىرتىغا چىقىپ قالغان قىسمىنى لېسنى بويلاپ پىچاق بىلەن كېسىۋېتىپ، قوشۇقنىڭ بىسى ياكى بارمىقىمىز بىلەن ئازراق گۈل چىقىرىپ قويىمىز. جىلىتنىڭ يۈزىنى پىچاق بىلەن بىر نەچچە يەردىن كېسىپ گۈل چىقىرىمىز. ياكى ئاۋارىچىلىق كۆرمىسىڭىز بىرىنچى رەسىمدىكىدەك جىلىت ياسىسىڭىزمۇ بولىدۇ.
ئالدىن قىزىتىلغان دوخوپكىدا 375-400گرادۇستا 45 مىنۇتتىن 1 سائەتكىچە پىشىدۇ. يۈزى ئالتۇن رەڭگە كىرگەندە پىشىپتۇ دەپ ئالسىڭىز بولىدۇ.
خەتنى بەكلا جىق يېزىۋېتىپتىمەن، بۇنىڭغا قاراپ تەسمىكىن دەپ قالماڭ، تەييارلىقنى 15 مىنۇتتىلا قىلىپ بولالايسىز. ئەگەر كىچىك بالىلىرىڭىز بولسا قىلىپ بەرسىڭىز ناھايىتى ياخشى كۆرىدۇ.
| تەۋسىيە
| ئىزدەش رايۇنى
| مۇلازىمەتلىرىمىز
| بانكا
| مىدال مەركىرى
