شائىر مۇھەممەتجان راشىدىن 1940-يىلى 6-ئاينىڭ 15-كۈنى غۇلجا ناھىيىسىنىڭ ئونيار يۈزى يېزىسىدا دېھقان ئائىلىسىدە تۇغۇلغان .
باشلانغۇچ ۋە ئوتتۇرا مەكتەپلەرنى غۇلجىدا ئوقۇپ تاماملاپ ، 1955-يىلىدىن 1958-يىلى 3-ئايغىچە سابىق شىنجاڭ يېزا ئىگىلىك تېخنىكومىدا ئوقۇغان . ئوقۇش پۈتۈرگەندىن كېيىن ، 1959-يىلى 5-ئايغىچە پىچان ناھىيىسىدە قايتا تەربىيە ئالغان . 1960-يىلىدىن 1968-يىلىغىچە چاپچال ناھىيىسى ۋە غۇلجا ناھىيىلىرىدە مەمۇرىي خادىم ، تېخنىك ، كاتىپ ، ئوقۇتقۇچى بولۇپ ئىشلىگەن . 1968-يىلى " مەدەنىيەت زور ئىنقىلابى " نىڭ زىيانكەشلىكىگە ئۇچراپ ناھەق جازالانغان ، 1983-يىلى ئاقلىنىپ ، غۇلجا ناھىيىلىك 1-ئوتتۇرا مەكتەپكە خىزمەتكە ئورۇنلاشقان . 1989-يىلى غۇلجا ناھىيىسىنىڭ كەسپىي يازغۇچىلىقىغا تەكلىپ قىلىنغانغا قەدەر شۇ مەكتەپتە تىل -ئەدەبىيات ئوقۇتقۇچىسى ۋە ئىلمىي مۇدىر بولۇپ ئىشلىگەن .
مۇھەممەتجان راشىدىننىڭ ئەدەبىي ئىجادىيەت پائالىيىتى 1958-يىلى " ئىلى گېزىتى " دە ئېلان قىلىنغان " ئىلى دەرياسى  "ناملىق شېئىرى بىلەن باشلانغان . ئۇ شۇنىڭدىن ئېتىبارەن شېئىر ئىجادىيىتىگە رەسمىي كىرىشكەن . بولۇپمۇ 1980-يىللاردىن كېيىن ئىجادىيەتتە كۆرۈنەرلىك ئۇتۇقلارغا ئېرىشكەن . ئۇ ھازىرغىچە " بۇدۇنيا " ، " بەزىلەر " ، " سەن يوق " ، " كۈت " ، " مەشرەپ ھەققىدە مۇخەممەس " ، " يىللار ئىزى " ، " مەن سەۋدايى بولۇپ قاپتىمەن " قاتارلىق مىڭ پارچىدىن ئارتۇق شېئىر ئېلان قىلغان . مۇھەممەتجان راشىدىننىڭ بۇ شېئىرلىرى " كاككۇك گۈلى " ، " يىللار ئىزى " ، " كۈنلەر ئالبومى " ، "ئانا يەر قەسىدىسى " ،"ئۆمۈر ئىلھاملىرى " ، " ھايات دېگەن مانا شۇ " دېەەن ناملاردا توپلام قىلىنىپ نەشىر قىلىنغان .
مۇھەممەتجان راشىدىن شېئىر ئىجادىيىتى بىلەن بىرگە يەنە پروزا ئىجادىيىتى بىلەنمۇ شۇغۇللىنىپ ، 20 پارچىدىن ئارتۇق ھېكايە ، پوۋېسىت ۋە ئەسلىمىسىنى ئېلان قىلغان ، بۇلار " تېنىگەن كۆڭۈل " دېەەن نامدا 2001-يىلى شىنجاڭ خەلق نەشرىياتى تەرىپىدىن نەشىر قىلىنغان .
مۇھەممەتجان راشىدىننىڭ شېئىر-غەزەللىرى ئاممىباپ ، خەلققە يېقىشلىق بولغاچقا ، كۆپلىگەن ئەسەرلىرى ناخشا قىلىپ ئوقۇلۇپ خەلق ئارىسىغا تارقالغان ، كۆپلىگەن شېئىرلىرى تۈرلۈك مۇكاپاتلارغا ئېرىشكەن .




" ئانا تاغلار " دىن ئېلىندى .

...........ھەقىقەتەن ياختۇرىمەن بۇ ئاپتورنىڭ شىئرلىرىنى........باياۋان قىرىندىشىم،سىزنىڭ شئرلىرىڭىزدا مۇنۇ ئاپتورنىڭ شىئىرلىرىدىكى پۇراق بار ...سىزنىڭمۇ ئۆز ئىجادىيتىڭىزنى كۈتىمىز جۇمۇ.

مۇھەممەدجان راشىدىننىڭ شىئېرلىرىنى بەلكىم ھەممە كىشى ياقتۇرسا كېرەك ماڭىمۇ بەك يارايدۇ

مۇھەممەتجان راشىدىن توغۇرلۇق بۇرۇن ئانچە-مۇنچە ئۇقساممۇ لىكىن چوڭقۇر ئەمەستى،بۇگۇن خىلى چوڭقۇر تونۇشقا ئىگە بولىۋالدىم،شىئىرلىرىنىمۇ بەك ياقتۇراتتىم،رەھمەت~!!!