ئالدىنقى تېماكىيىنكى تېما
مەزكۇر يازما قېتىم كۆرۈلدى
«12»Pages: 1/2     Go
تېما: ئۇيغۇر تىلى ئەلۋىدا (شېئىر)
ۋاقتى ئۆتكەن قېلىچنى پوققا چاپ.
دەرىجە: پەرىشتە

ئارخىپ ئۇچۇر يوللاش QQ ئالاقە
ئەزا ئۇچۇرى ئەزا نومۇرى: 60
نادىر تېمىسى: 19
ئومۇمىي يازما: 481
ئۇنۋان:دوستانە ھازىرغىچە481دانە
شۆھرىتى: 1002191
پۇلى: 1014690 تەڭگە
تۆھپىسى: 10012
توردا: 264(سائەت)
ھازىر:
تىزىملاش: 2009-05-12
ئاخىرقى: 2010-09-24
0  يوللانغان ۋاقت: 2010-07-14 19:10
ئاپتۇرنىڭكىنىلا | كىچىك ئوتتۇرا چوڭ

ئۇيغۇر تىلى ئەلۋىدا (شېئىر)

ئەسكەرتىش: بۇ يازما bayawan تەرىپىدىن نادىرلاندى(2010-07-15)
ئۇيغۇر تىلى ئەلۋىدا


ماسلاشمىدىڭ زامانغا ،
ئۇيغۇر تىلىم ئەلۋىدا .
يېتەلمىدىم ئارمانغا ،
ئۇيغۇر تىلىم ئەلۋىدا .

"لۇفاڭ"دېدۇق بىنانى ،
"خابا "دېدۇق دەريانى .
"مىينۈ"دېدۇق رەنانى ،
ئۇيغۇر تىلىم ئەلۋىدا .

"لۇفاڭ "ئالدۇق "دەيكۈەن"گە ،
"جۇاڭشىيۇۋ "قىلدۇق "يىۋەن"گە ،
ئامال يوقمۇ دەتمەنگە ،
ئۇيغۇر تىلىم ئەلۋىدا .

توڭلاتقۇنى "بىڭشىياڭ "دەپ ،
ياڭراتقۇنى "يىڭشىياڭ "دەپ ،
گۈرجەكنىمۇ "تىشىياڭ "دەپ ،
ئۇيغۇر تىلىم ئەلۋىدا .

"گۇڭۋۇيۈەن"دەپ مەمۇرنى ،
"چىيەنزە"دېدۇق ئامبۇرنى ،
نېمە دەرمىز تەمبۈرنى ؟
ئۇيغۇر تىلىم ئەلۋىدا .

كۆمۈرگازنى "مىيچى "دەپ ،
ئاكورىتنى "پىچى "دەپ ،
17نى "ياۋچى "دەپ ،
ئۇيغۇر تىلىم ئەلۋىدا .

"ۋوشى "دېدۇق ياتاقنى ،
"شېزى "دېدۇق ئاياقنى ،
"لىيۇۋلاڭخەن "دەپ ساياقنى ،
ئۇيغۇر تىلىم ئەلۋىدا .

كەرەپشىنى "چىڭسەي "دەپ ،
كۈدە دېمەي "جۈسەي "دەپ ،
پالەكنىمۇ "بوسەي "دەپ ،
ئۇيغۇر تىلىم ئەلۋىدا .

"خاڭگا "ئەمەس تەرخەمەك ،
"بەسەي "ئەمەس يېسىۋىلەك ،
بىر پىلەكتىن مىڭ خەمەك ،
ئۇيغۇر تىلىم ئەلۋىدا .

"شۇۋجى"دېدۇق يانفوننى ،
"شىياڭزاۋ"دېدۇق سوپۇننى ،
"لاۋپو"دەرمىز خوتۇننى ،
ئۇيغۇر تىلىم ئەلۋىدا .

كارتا دېمەي كا دېدۇق ،
ياپما خىشنى ۋا دېدۇق ،
بىلەلمىسەك سا دېدۇق ،
ئۇيغۇر تىلىم ئەلۋىدا .

ئۈستەلنىمۇ "جوزا "دەپ ،
ئورۇندۇقنى "يىزا "دەپ ،
كومپىيۇتۇر -"جىزا "دەپ ،
ئۇيغۇر تىلىم ئەلۋىدا .

بۇس تارتقۇنى "چۇۋيەنجى "،
شامالچىنى "گۇپۇڭجى "،
دەرىجىمىز "فۇكىجى "،
ئۇيغۇر تىلىم ئەلۋىدا .

ئېرى ماڭدى "جىيۇۋباغا "،
خوتۇن چايغا "دىباغا"،
بالا كۆندى "ۋاڭباغا "،
ئۇيغۇر تىلىم ئەلۋىدا .

ئۇچرىشىشنى "يۆخۈي"دەپ ،
يىغىن دېمەي "كەيخۈي"دەپ ،
ئېتىبارنى "يۇۋخۈي"دەپ ،
ئۇيغۇر تىلىم ئەلۋىدا .

"داجى"دېدۇق ئەرزاننى ،
"نۈەنپىڭ "دېدۇق چايداننى ،
"شۇجۈكۇ"دەپ سانداننى ،
ئۇيغۇر تىلىم ئەلۋىدا .

شاۋقۇن-سۈرەن "زايىن"دەپ ،
خەت باسقاننى "دايىن"دەپ ،
تەلەپپۇزنى "فايىن"دەپ ،
ئۇيغۇر تىلىم ئەلۋىدا .

"شىگۈەن"دېدۇق كۆنگەننى ،
"گۈەنجۈن"دېدۇق يەڭگەننى ،
نېمە دەيمىز مەڭگەننى ؟
ئۇيغۇر تىلىم ئەلۋىدا .

ئىلغار بولسا "يۇۋشىيۇۋ"دەپ ،
رىمونىتنى "داشىيۇۋ"دەپ ،
75نى "چىشيۇۋ"دەپ ،
ئۇيغۇر تىلىم ئەلۋىدا .

ئەينەك ئېدىش "گاڭزا "دەپ ،
يېزىلارنى "جاڭزا "دەپ ،
شۇم ئوچاقنى "لىڭزا" دەپ ،
ئۇيغۇر تىلىم ئەلۋىدا .

دابازادا زاسۈي يەپ ،
كىندىجىدا جىتۈي دەپ ،
چاڭزا ئۈچەي خوتۈي يەپ ،
ئۇيغۇر تىلىم ئەلۋىدا .

"گازىر" بولدى شىمىشكە ،
"نەيپىڭ "بولدى ئىمزىگە ،
ئويلانمايمىز نىمىشكە ؟
ئۇيغۇر تىلىم ئەلۋىدا .

"خوگو" بولدى يەلقازان ،
"گولۇ" بولدى پارقازان ،
"دىيەنفەنگو"بوپ توك قازان ،
ئۇيغۇر تىلىم ئەلۋىدا .

"دىڭپاۋ"دىگەن چىراقنى ،
"تۇڭكۇ "دەيدۇ پىراقنى ،
"ياۋيۈەن "دەيمىز يىراقنى ،
ئۇيغۇر تىلىم ئەلۋىدا .

ئىچكىرى دېمەي "كۇلى"دەپ ،
تۈلكە دېمەي "خۇلى "دەپ ،
ياردەمچىنى "جۇلى"دەپ ،
ئۇيغۇر تىلىم ئەلۋىدا .


جەرىمانە "فاكوەن "دەپ ،
سوتخانىنى "فايۈەن "دەپ ،
كورپۇس دېمەي "دەنيۈەن "دەپ ،
ئۇيغۇر تىلىم ئەلۋىدا .

كۈتۈپخانا "تۇشۇگۈەن "،
مۇلازىملار "فۇۋۇيۈەن "،
"ساۋمىي "بولدى بۆلجۈرگەن ،
ئۇيغۇر تىلىم ئەلۋىدا .

"پىڭزا"بولدى بوتۇلكا ،
"شىجۇاڭ"كاستىيۇم-بۇرۇلكا ،
"گۇڭگاۋ" بولدى لوزۇنكا ،
ئۇيغۇر تىلىم ئەلۋىدا .

تىككۈچىنى "سەيپۇڭ"دەپ ،
"خۇڭمىيەن كاۋرۇ لەڭپۇڭ دەپ ،
سۇ ئۈزۈشنى "يۇۋيۇڭ"دەپ ،
ئۇيغۇر تىلىم ئەلۋىدا .

مامۇق چاپان "يۈرۈڭفۇ "،
راﻫەت ئىشتان "شىيۇۋشىيەنكۇ"،
ئىچ ئىشتاننى دەپ "شەنكۇ" ،
ئۇيغۇر تىلىم ئەلۋىدا .

ئىچ كىيىمنى "نىييى"دەپ ،
ئۇيقۇ كىيمى-"شۈييى"دەپ ،
ئىچىملىكنى "شۆبىي"دەپ ،
ئۇيغۇر تىلىم ئەلۋىدا .

توك پۇلىنى "دىيەنفىي"دەپ ،
قەرز تېلىفون "چىيەنفىي"دەپ ،
خوشە دېمەي "گەنبىي"دەپ ،
ئۇيغۇر تىلىم ئەلۋىدا .

"مابۇ"دېدۇق جامبىنى ،
"دەيزى "دېدۇق خالتىنى ،
"كاۋباۋزى "دەڭ سامسىنى ؟
ئۇيغۇر تىلىم ئەلۋىدا .

"تىڭجى"بولدى توختىغان ،
"داباۋ"بولدى ئەپ ماڭغان ،
"لىيۇۋجى"بولدى قەپ قالغان ،
ئۇيغۇر تىلىم ئەلۋىدا .

"گۇڭگاۋ"دېدۇق ئېلاننى ،
"خۇڭزاۋ"دەيدۇ چىلاننى ،
نېمە دەيمىز يىلاننى !
ئۇيغۇر تىلىم ئەلۋىدا .

لېنتىچىنى "دەيچى "دەپ ،
ۋېلسىپىتنى "سەيچى "دەپ ،
دەرس تاشلاش "كۇڭكى "دەپ ،
ئۇيغۇر تىلىم ئەلۋىدا .

"توشەي "بولدى ساپما كەش ،
"لۇزا "بولدى پىلتە مەش ،
بۇ مودىدىن كۆڭۈل غەش ،
ئۇيغۇر تىلىم ئەلۋىدا .

"جىياڭتەي"دېدۇق مۇنبەرنى ،
"شىياڭشۈي"دېدۇق ئەنبەرنى ،
"كاشى "دەيلى قەشقەرنى ؟
ئۇيغۇر تىلىم ئەلۋىدا .

"ساڭنا "دېدۇق مۇنچىنى ،
"مىيەنجاڭ" دېدۇق ئۇنچىنى ،
"شىياۋخۇا "دەيمىز غۇنچىنى ،
ئۇيغۇر تىلىم ئەلۋىدا .

يېيىشىمىز "خەنباۋباۋ "،
ئۇچىمىزدا "مىڭتىجىياۋ "،
چولپىنىمىز "ر. باچىياۋ "،
ئۇيغۇر تىلىم ئەلۋىدا .

توخۇ قورداق- داپەنجى ،
خۈيمىيەن ،بەنمىيەن ،لازىجى ،
دىڭ دىڭ سومىيەن جوۋماجى ،
ئۇيغۇر تىلىم ئەلۋىدا .

سۇ مانتىنى "جۇۋاۋا" ،
كاۋا دېمەي" خۇلۇگۇا" ،
يەر يۇيغۇچنى دەپ "توۋبا" ،
ئۇيغۇر تىلىم ئەلۋىدا .

بەرەنجىنى ياڭيۇ دەپ ،
تېتىتقۇسۇ -جىياڭيۇ دەپ ،
تورداش دېمەي ۋاڭيۇۋ دەپ ،
ئۇيغۇر تىلىم ئەلۋىدا .

قىزىل كالا -"خۇڭنىيۇۋ"دەپ ،
دوسىتنى تاپتۇق "پىڭيۇۋ"دەپ ،
قوقاپ كەتسەك ئەييۇ ! دەپ ،
ئۇيغۇر تىلىم ئەلۋىدا .

"لاجى"دېدۇق ئەخلەتنى ،
"ۋاڭجەن "دېدۇق تور بەتنى ،
"يۇۋجىيەن "دېدۇق ئېل-خەتنى ،
ئۇيغۇر تىلىم ئەلۋىدا .

"داچىياۋ"دېدۇق كۆۋرۈكنى ،
"جۇزى "دېدۇق تۈۋرۈكنى ،
"شىتى "دەيمىز ئۆلۈكنى ،
ئۇيغۇر تىلىم ئەلۋىدا .

"فاپىياۋ"دېدۇق تالوننى ،
"ۋەيدەي "دېدۇق بالوننى ،
نېمە دەيمىز قالۇننى ؟
ئۇيغۇر تىلىم ئەلۋىدا .

"داشۆ"بولدى ئۇنىۋىرېستېت ،
"زۇڭتۇڭ "بولدى پىرىزدىنىت ،
"داشۆسىڭدۇر "سىتۇدىنىت ،
ئۇيغۇر تىلىم ئەلۋىدا .

باتارىيە"دىيەنچى"دەپ ،
بۇغدا كۆلنى -تىيەنچى دەپ ،
مۆﻫلەت ئاشسا "يەنچى "دەپ ،
ئۇيغۇر تىلىم ئەلۋىدا .

"گۇاڭچاڭ"دېدۇق مەيداننى ،
"چىيەنباۋ"دېدۇق پۇلداننى ،
"شۆۋىي"دېدۇق ئۇنۋاننى ،
ئۇيغۇر تىلىم ئەلۋىدا .

دىلﻬوزۇرنى "دىيەنشى "دەپ ،
قۇرۇق يۇيسا "گەنشى "دەپ ،
ئويۇن دىمەي "يۇۋشى "دەپ ،
ئۇيغۇر تىلىم ئەلۋىدا .

تېزگىنەكنى "ياۋكۇڭ "دەپ ،
سىيىت نوچى گاڭگۇڭ دەپ ،
يېتىپ تەپسە "داۋگۇڭ "دەپ ،
ئۇيغۇر تىلىم ئەلۋىدا .

ئال تۆك دەيلى" شازىنى "،
ئىشكاپ دەيلى "جازىنى "،
پايپاق دەيلى "ۋازىنى "،
ئۇيغۇر تىلىم ئەلۋىدا .

ئۈزچات دەيلى "كەيگۈن"نى ،
سامساق دەيلى "داسۈەن"نى ،
ئىنىستۇت دەپ "شۆيۈەن"نى ،
ئۇيغۇر تىلىم ئەلۋىدا .

"دۇبو"دېدۇق قىمانى ،
ئۇنتۇپ قالدۇق "مىما"نى ،
ئىزلەپ ئۇيغۇر سىمانى !!!
ئۇيغۇر تىلىم ئەلۋىدا .

مودا بولدى شالغۇت تىل ،
ئويلانمىدى ئۇيغۇر دىل ،
خاراپ بولدى ئانا تىل ،
ئۇيغۇر تىلىم ئەلۋىدا .

شالغۇتلاشتى تىلىمىز ،
قاينىمايدۇ دىلىمىز ،
"ۋىيزۇ "بولسۇن نامىمىز ،
ئۇيغۇر تىلىم ئەلۋىدا .

ئانا تىلنى قوغدايلى ،
ئەنئەنىنى قوغدايلى ،
شالغۇت تىلنى تۈزەيلى ،
ئۇيغۇر تىلىم ئەلۋىدا .

ئەلدە ئىدى ئەر غېمى ،
ئەلگە كۆيگەن ئەر قېنى ؟
ئەل دەپ ئاققان تەر قېنى؟
ئۇيغۇر تىلىم ئەلۋىدا .

كۆپ تىل بىلىش شەرەپ ئىش ،
تىلدىن كېلەر يۈكسىلىش ،
ئانا تىلسىز يېزىم ،قىش !!!!
ئۇيغۇر تىلىم يىغلىما !

دەرەخ بولماس يىلتىزسىز ،
مىللەت بولماس ئۆز تىلسىز ،
ئۆلەي، قالسام سېنىڭسىز !
ئۇيغۇر تىلىم يىغلىما !


2008-يىلى 21-مايدىن 23-مايغىچە شەھرى بورتالادا يېزىلدى


مەنبە: ئانا تىلىم بىلوگى.
باھالاش خاتىرىسى:
  • پۇلى:+2(bahader) ھەقىقى ئۇيغۇ ..
  • پۇلى:+3(bayawan) ئەھمىيەتلىك
    • دوستلار زىنداندا ئەسقاتىدۇ،داستىخان ئۈستىدە ھەممە ئادەم دوست كۆرىنىدۇ.
    كەلگەن جايى: چوققا
    ئىنكاس نەقىل ھەمبەھىر
    ۋاقتى ئۆتكەن قېلىچنى پوققا چاپ.
    دەرىجە: پەرىشتە

    ئارخىپ ئۇچۇر يوللاش QQ ئالاقە
    ئەزا ئۇچۇرى ئەزا نومۇرى: 60
    نادىر تېمىسى: 19
    ئومۇمىي يازما: 481
    ئۇنۋان:دوستانە ھازىرغىچە481دانە
    شۆھرىتى: 1002191
    پۇلى: 1014690 تەڭگە
    تۆھپىسى: 10012
    توردا: 264(سائەت)
    ھازىر:
    تىزىملاش: 2009-05-12
    ئاخىرقى: 2010-09-24
    1  يوللانغان ۋاقت: 2010-07-14 19:13
    ئاپتۇرنىڭلا ئىنكاسى | كىچىك ئوتتۇرا چوڭ

    ئاھ، ئانا تىلىم
    بېلىقىز ئەمەت پاك


    ئېچىپ بەردىڭ تىلىمىزنىڭ دەردىنى،
    تېپىپ بەردىڭ تىلىمىزنىڭ مېزىنى،
    قانداق چىداي تىلغا ئەخلەت ئارىلاشسا،
    يوقىتارمۇ ئانا تىلىم ئىزىنى...

    يوقاپ كەتسە ئانا تىلىم يېنىمدىن،
    چىدالامدىم تىلسىز بولسام تېگىمدىن،
    چىدىمايدۇ دوستلار بەلكىم مېنىڭدەك،
    قانداق چىداي گاچا بولسام تىلىمدىن.

    ئېتى ئۇيغۇر، تىلى يوقكەن دەپ يۈرسە،
    مەندەك ئۇيغۇر قېنى سىزلار چىدارمۇ؟
    ياكى مودا قوغلاپ تىلدىن چانارمۇ؟
    قانداق چىداي «مەتو» كۆرسە تېگىدىن.

    كۆرۈپ قالدىم بىر نەچچە قىز ئىچىدە،
    شۇنداق گۈلدەك بىرى تۇرغان كۆزىدە،
    خەنزۇ تىلىغا تىلى كەلمەس بەزىدە،
    ئۇيغۇر تىلىنى دەيدۇ تېخى «مەتو» دەپ.

    توۋا دىدىم بىلمەي ئۆزىنى قالدىمۇ؟
    ئۆزى باشقا پىلانىتتىن كەلدىمۇ؟
    ھەي، ئۇيغۇر قىز، ئۇيغۇرىڭدىن تاندىڭمۇ؟
    مەڭگۈلۈككە ئانا تىلدىن چاندىڭمۇ؟

    مېنىڭ نەسلىم بۇ بېسىمغا چىدارمۇ؟
    ئۇنتۇپ ئۆزىنى ئانا تىلدىن چانارمۇ؟
    قانداق قىلاي گۈزەل تىلىم يوقالسا،
    تىلسىزلىققا بىز بېقىنساق بولارمۇ؟

    ئەجدادىمىز يوقالمىغان تىل ئىدى،
    ئەمدى مەندە شۇنداق قىلىپ قۇرامۇ؟
    قۇرۇپ قالسا پەرزەنتىمگە بىم دەرمەن،
    قېنى جاۋاب بېرىپ باقسام بولارمۇ؟

    دىققەت قىلسام سۆزلىگەندە ھەر قاچان،
    ئۆي– ئىدارە، جەمئىيەتتە تىلىمدىن.
    تىلغا تىلنى ئارىلاشتۇرماي سۆزلىسەم،
    قەرىزدارمۇ قېنى دوستلار ئەسلىمدىن.

    پاكلايمەن تىلىمنى ئەمدى ھەر قاچان،
    ئەلۋىدا دەپ يوقالمىسۇن جان تىلىم،
    ئەگەر ئانا تىلىم يوقالسا ئەتە،
    جۇدا بولسۇن شۇ كۈندە ئېزىز تېنىم.
    دوستلار زىنداندا ئەسقاتىدۇ،داستىخان ئۈستىدە ھەممە ئادەم دوست كۆرىنىدۇ.
    كەلگەن جايى: چوققا
    ئىنكاس نەقىل ھەمبەھىر
    ۋاقتى ئۆتكەن قېلىچنى پوققا چاپ.
    دەرىجە: پەرىشتە

    ئارخىپ ئۇچۇر يوللاش QQ ئالاقە
    ئەزا ئۇچۇرى ئەزا نومۇرى: 60
    نادىر تېمىسى: 19
    ئومۇمىي يازما: 481
    ئۇنۋان:دوستانە ھازىرغىچە481دانە
    شۆھرىتى: 1002191
    پۇلى: 1014690 تەڭگە
    تۆھپىسى: 10012
    توردا: 264(سائەت)
    ھازىر:
    تىزىملاش: 2009-05-12
    ئاخىرقى: 2010-09-24
    2  يوللانغان ۋاقت: 2010-07-14 19:15
    ئاپتۇرنىڭلا ئىنكاسى | كىچىك ئوتتۇرا چوڭ

    ئۈرۈمچىدە ئۇيغۇر تىلى يىغلايدۇ


    ئۆزگە تىللار ئۇلۇغلىنىپ شاخلايدۇ،
    يىلتىزىدىن ئورۇن ئېلىپ بىخلايدۇ.
    تۇيدۇرماستىن سىڭەر-ئىچەر سۈيىدەك...
    ئۈرۈمچىدە ئۇيغۇر تىلى يىغلايدۇ

    سۆزلەنسە ئۇ ھېچ قۇلاققا ياقمايدۇ،
    بەزى ئۆز-ئۆزىگىمۇ ئاقمايدۇ.
    ئۆزقەۋمىمۇ ئىكرام بىلەن باقمايدۇ...
    ئۈرۈمچىدە ئۇيغۇر تىلى يىغلايدۇ.

    «بابا» دەيدۇ تىلى چىققان بوۋاقمۇ،
    «گەيزى» دېيىلۇر ۋاقتى كەلسە تۇۋاقمۇ.
    دەڭلار قېنى ساقمۇ بىز يا چولاقمۇ؟
    ئۈرۈمچىدە ئۇيغۇر تىلى يىغلايدۇ

    «بەنمىيەن زوۋ»دەپ لەغمەننى ماڭدۇرار،
    زۇۋانىنى ئۆزگە تىلغا قايدۇرار،
    شۇنداق تۇرسا بىزگە كىممۇ ئار تۇرار،
    ئۈرۈمچىدە ئۇيغۇر تىلى يىغلايدۇ

    مېھمان كىرسە«جاۋخو»دەيدۇ خوجايىن،
    «چۆپ قوش»دېسە «جامىيەن»دەيدۇ ئاتايىن.
    بىلىپ كېتىشى ئۆزگە تىلنى ناتايىن،
    ئۈرۈمچىدە ئۇيغۇر تىلى يىغلايدۇ.

    مىڭكوخانە شەھرى مەركەز ئادىمى،
    شىركەت،ھۆكۈمەت،بانكا،پوچتا خادىمى.
    بولسا شۇنداق بولمىغىيدى ماتىمى،
    ئۈرۈمچىدە ئۇيغۇر تىلى يىغلايدۇ

    بىرى دەيدۇ روس تىلى بەك ياخشىكەن،
    بىرى دەيدۇ ياپۇن تىلى ياخشىكەن.
    ئۆز تىلىدەك سۆيۈملۈك تىل نەدىكەن؟
    ئۈرۈمچىدە ئۇيغۇر تىلى يىغلايدۇ.

    مەھمۇد بوۋام ساپلاشتۇرغان بىر چاغدا،
    ئەرەب-پارس تىلنى قويغان مىڭ داغدا.
    دەر شۇ ھېكمەت پاساھىتىم نە قايدا؟
    ئۈرۈمچىدە ئۇيغۇر تىلى يىغلايدۇ.

    مېنى قوغدار ئەۋلادلىرىم بارمۇ؟دەپ،
    دىلدىن سۆيەر پاك زاتلىرىم بارمۇ؟دەپ،
    لەيلاسىمەن پەرھاتلىرىم ئارمۇ؟دەپ...
    ئۈرۈمچىدە ئۇيغۇر تىلى يىغلايدۇ

    ئاپتونومىيە ھوقۇقلىرىم قايدا؟دەپ،
    باغدا ئىدىم بولۇپ قالدىم سايدا دەپ.
    ئەركىنلىكىم زادى قانداق جايدا دەپ،
    ئۈرۈمچىدە ئۇيغۇر تىلى يىغلايدۇ.

    پاكلىنارمەن دەيدۇ قاچان تەلمۈرۈپ،
    گۈللەنگىنىنى كۆزئالدىغا كەلتۈرۈپ.
    دەيدۇ مېنى قوغداڭلارچۇ بەل تۈرۈپ،
    ئۈرۈمچىدە ئۇيغۇر تىلى يىغلايدۇ.  
    يالغۇز تورى
    دوستلار زىنداندا ئەسقاتىدۇ،داستىخان ئۈستىدە ھەممە ئادەم دوست كۆرىنىدۇ.
    كەلگەن جايى: چوققا
    ئىنكاس نەقىل ھەمبەھىر
    ۋاقتى ئۆتكەن قېلىچنى پوققا چاپ.
    دەرىجە: پەرىشتە

    ئارخىپ ئۇچۇر يوللاش QQ ئالاقە
    ئەزا ئۇچۇرى ئەزا نومۇرى: 60
    نادىر تېمىسى: 19
    ئومۇمىي يازما: 481
    ئۇنۋان:دوستانە ھازىرغىچە481دانە
    شۆھرىتى: 1002191
    پۇلى: 1014690 تەڭگە
    تۆھپىسى: 10012
    توردا: 264(سائەت)
    ھازىر:
    تىزىملاش: 2009-05-12
    ئاخىرقى: 2010-09-24
    3  يوللانغان ۋاقت: 2010-07-14 19:26
    ئاپتۇرنىڭلا ئىنكاسى | كىچىك ئوتتۇرا چوڭ

    ئانا تىلىم!
    ئابدۇلخەمىد يۈسۈپ ھاجىم



    ئەي تىلىم --- ئۇيغۇر تىلى، سەن ئانا تىل ئەلنىڭ تىلى،

    سەن بۈيۈك تىل، سەن يېتۈك تىل --- بارچە تىللار سەرخىلى.

    سەن گۈزەل تىل، سەن سۈزۈك تىل، سەن ھوزۇرۇم، تاتلىقىم،

    سەن ياۋاش تىل ھەم ئاسان تىل، سەندە نۇسرەت، شاتلىقىم.



    ئەۋۋەلى "ئىڭڭە"دە سىڭدىڭ جانغا، دىلنى لال قىلىپ،

    كەينىدىن بۇلبۇلغا ئوخشاتتىڭ زۇۋاننى بال قىلىپ.

    سەندە چىقتى پۇشتى ئۇيغۇرنىڭ تىلى ئۇيغۇرچىلاپ،

    سەن بىلەن تارقالدى ئۇيغۇر لەۋزىدىن خۇشبۇي گۇلاب.



    سەندە ھازىرلاندى، "مىللەت" شەرتىنىڭ بىر ماددىسى،

    سەن بىلەن بىخ سۈردى "مىللەت" شاھلىرىنىڭ قالدىسى.

    مىللەت مەۋجۇت "ياران"، مىللىتىڭ يوق بولمىسا،

    نەدە ئۇ مىللىي شەرەپ، ئىززەت تىلىڭ "توق" بولمىسا.



    تىل دېگەن ئەجداد بىلەن ئەۋلادنى باغلار --- رىشتە --- بىل،

    رىشتە چىڭلىقتا توقۇلغاي نە ئېسىل ئۇز كەشتە، بىل.

    ئانا تىل --- مىللىي تىلىڭ بولغاچقا ئۇيغۇرلۇق سېنىڭ،

    ئانا تىل بىرلە جاھان ئىچرە يۈزۈڭ نۇرلۇق سېنىڭ.



    ئانا تىل --- تىل خەزىنىسىدە قىپتۇ باي بىلسەم مېنى،

    ئەرەب، پارس ھەم --- ئۆگەندىم --- ئوردۇچە، خەنزۇچىنى.

    ئەي ياران! مەن "ھاجى" لىقتا قايسى يۇرتنى كەزمىدىم،

    ئانا تىل --- ئۇيغۇر تىلىدەك تەمدە بالنى سەزمىدىم.


    مەنبە: ئانا تىلىم بىلوگى.
    دوستلار زىنداندا ئەسقاتىدۇ،داستىخان ئۈستىدە ھەممە ئادەم دوست كۆرىنىدۇ.
    كەلگەن جايى: چوققا
    ئىنكاس نەقىل ھەمبەھىر
    ۋاقتى ئۆتكەن قېلىچنى پوققا چاپ.
    دەرىجە: پەرىشتە

    ئارخىپ ئۇچۇر يوللاش QQ ئالاقە
    ئەزا ئۇچۇرى ئەزا نومۇرى: 60
    نادىر تېمىسى: 19
    ئومۇمىي يازما: 481
    ئۇنۋان:دوستانە ھازىرغىچە481دانە
    شۆھرىتى: 1002191
    پۇلى: 1014690 تەڭگە
    تۆھپىسى: 10012
    توردا: 264(سائەت)
    ھازىر:
    تىزىملاش: 2009-05-12
    ئاخىرقى: 2010-09-24
    4  يوللانغان ۋاقت: 2010-07-14 19:29
    ئاپتۇرنىڭلا ئىنكاسى | كىچىك ئوتتۇرا چوڭ

    ئۇيغۇر تىلى (مۇخەممەس)

    ئابدۇرېھىم زۇنۇن



    بىل شۇنى، ئۇيغۇر ئۈچۈن پۈتمەس گۆھەر ئۇيغۇر تىلى،
    مەڭگۈ پاتماس زەر قۇياش، نۇرلۇق قەمەر ئۇيغۇر تىلى،
    بىپايان تىل كۆكىدە چولپان، ئۈكەر ئۇيغۇر تىلى،
    مەنىلەرگە باي، تېرەندۇر شۇ قەدەر ئۇيغۇر تىلى،
    بولدى تارىختىن بېرى بىزگە پەدەر ئۇيغۇر تىلى.

    ئانا تىل ھەردەم قوۋۇم - مىللەت ئۈچۈن روھ تۈۋرۈكى،
    ئانا تىل پەن - مەرىپەت ئالماشتۇرۇشنىڭ كۆۋرۈكى،
    ئانا تىل چوڭكىچىكنىڭ يۈرىكى، تاغ يۆلىكى،
    ئانا تىل ۋاستە - قۇرال ئالاقىدە قەلىب ئەينىكى،
    بىزنى قۇچتۇرغان جىمى ئىشتا زەپەر ئۇيغۇر تىلى.

    پەنگە ئاشىق - بىقارار قىلدى مېنى دىلبەر تىلىم،
    تارتتى رايىمنى ئۆزىگە ھەرقاچان ئەنبەر تىلىم،
    ئەلگە دىل رىشتىمنى چاتتى بال - شېكەر، كەۋسەر تىلىم،
    بولدى ئەل دۈشمەنلىرگە تىغ - تەبەر، نەشتەر تىلىم،
    ھەممىمىزنى قىلدى دائىم بەھرىۋەر ئۇيغۇر تىلى.

    «ئا» بىلەن كىردى ئېغىزغا، تىل - زۇۋانغا مەڭگۈ تەم،
    قىلدى تىل ئاقىل، نادانلارغا بېرىپ ئىدراكۇم پەم،
    تىل چېچىلغاننى يىغىپ قىلدى ھامان بىر يەرگە جەم،
    تىل بىمار، ئاجىز - ئورۇققا ئەم - داۋا، ئاچلارغا يەم،
    خاسىيەتلىك تىلتۇمار، قالقان - سىپەر ئۇيغۇر تىلى.

    يۈرۈكۈمگە كەلدى سۆزلەپ مۇشۇ تىلدا جان بوۋام،
    مەن ئىجاد ئەتتىم مۇشۇ تىلدا، قىلىپ پەرۋاز داۋام،
    مۇشۇ تىلدا سايرىدى بۇلبۇل كەبى ھەقدار بالام،
    مۇشۇ تىل بەردى چىدام، مەردلىك، ۋاپادارلىق مۇدام،
    قان قېرىنداشلارغا رىشتە، جانجىگەر ئۇيغۇر تىلى.

    سۇ بېرىپ ياشناتتى بىزنى ئانا تىل - ئالتۇن بۇلاق،
    ئۇ - چىراغ، پەرۋانە بىز، ھەرگىزمۇ كەتمەيمىز يىراق،
    ئانا تىل يىلتىز، ئوزۇق ئالغۇچى بىز - نوتا - ئۇلاق،
    ئانا تىلدا دەرىس ئېلىپ، تاپتۇق ئەقىل، سەمرىپ قۇلاق،
    بىزگە پۈتمەس كان، خەزىنە شام - سەھەر ئۇيغۇر تىلى.

    قويدى تاڭ دۇنيانى شۇ تىلدا قىلىپ بۇلبۇل ناۋا،
    تاپتى شۇ تىلدا پۈتۈلگەن كۈي - غەزەل يۈكسەك باھا،
    ھەر تەرپتىن ياغدى ئالقىش، «مىڭ ياشا!» دېگەن سادا،
    مۇشۇ تىل شۆھرەتكە نائىل ئەيلىدى، سالدۇق ساما،
    ئىپتىخارغا پۈركىدى ئۇيغۇرنى زەر ئۇيغۇر تىلى.

    شاھ مۇقامنى مۇشۇ تىلدا ئاڭلىدى ئەھلى جاھان،
    مۇشۇ تىل دىللارنى دىلغا ئۇلىغان رىشتە ھامان،
    مۇشۇ تىل بىرلە يۈسۈپ، ھەزرەت نەۋائىي تاپتى شان،
    مۇشۇ تىلغا جان بېرىپ مەھمۇد بوۋام تۈزدى دىۋان،
    مەڭگۈ ئەڭگۈشتەر، يېزىشتا شاھ ئەسەر ئۇيغۇر تىلى.

    مۇشۇ تىل بىزگە جاھاندا تەڭدىشى يوق، بىباھا،
    مۇشۇ تىل بىرلە بىلىپ يەتتۇق نېمە توغرا، خاتا،
    مۇشۇ تىل مەڭگۈ قەدىردان، مېھرى ئاتەش جان ئانا،
    مۇشۇ تىلنىڭ شۆھرىتىنى قىل ھىمات، جاننى ئاتا،
    پىر بولۇپ بىرگە ئۆگەتتى كەسىپ - ھۈنەر ئۇيغۇر تىلى.

    ئانا تىل قالغان ئانامنىڭ ئانىسىدىن يادىكار،
    ئانا تىلغا يۇغۇرۇلغان چىن غورۇر ۋە ئىپتىخار،
    ئانا تىلىنى ئاڭلىسام جۇتنى سېزەرمەن گۈلباھار،
    ئانا تىل بار - ئەلمۇ بار، ھېكمەت، مۇھەببەت... ھەممە بار،
    بىزگە ئاش - ناندەك زۆرۈردۇر، ھەمسەپەر ئۇيغۇر تىلى.

    بولغۇسى قەدرىم پاخال - خەس، بولمىسا گەر ئۆز تىلىم،
    ئۆز تىلىم بار، ئاي، قۇياشتەك تۇرىدۇ پارلاپ دىلىم،
    بارمۇ مەندەك باي جاھاندا، ئۆتتى شاد ھەر ھاي، يىلىم،
    ئۆز تىلىمدا بۇ ھايات دەرياسىدىن سۈزدۈم بىلىم،
    ماڭا ئۇستاز، رەھنەما چىن ئىچ كۆيەر، ئۇيغۇر تىلى.

    خىسلىتى يازغانغا پۈتمەس، تىل ھايات، بىزمۇ ھايات،
    مۇشۇ تىل بەركاتىدىن تاپتۇق روناق، ئەل يۇرت ئاۋات،
    كۈنسېرى ئۆرلەشكە بولدى مۇشۇ تىل تالماس قانات،
    مەن بۇڭا دىل بەرگىنىمچۈن، ئارمىنىم بىخ ياردى شاد،
    ئۆتتى مەيلىمنى، بېرىپ دىل ھۆددىگەر ئۇيغۇر تىلى.

    تىزگىنىن چىڭ تۇت ۋاقىت تۇلپارنىڭ، باش قاشلىما،
    بولسا بىل كۆپ تىل، ئەقىل، كۈچ تاپ ھامان، يانپاشلىما،
    بۇ قۇرالدىن پايدىلان ياخشى، كېيىن كۆز ياشلىما،
    شاھ بولۇپ كەتسەڭمۇ، ئەمما ئۆز تىلىڭنى تاشلىما،
    قىلغىنى بىزنى مۇزەپپەر، مۆتىۋەر ئۇيغۇر تىلى.

    ھەر كىشى كۆپ زوق ئالار سۆز سۆزلىسە ئۆز تىلىدا،
    شۇڭا مەن ئانا تىلىمغا قىلىمەن چىن ئىقتىدا،
    ئانا تىلسىز گال، كېكەچ مەن، بولىمەن جاندىن جۇدا،
    چىن يۈرەكتىن ئەيلىدى ئابدۇرېھىم مۇنداق نىدا :
    سۈيىدە ئاق، ئوتىدا كۆي ! دۇر - گۆھەر ئۇيغۇر تىلى !....


    جۇڭگو مىللەتلىرىدىن ئېلىندى. ( ئاپتور خوتەن پېداگوگىكا تېخنىكومىدا)

    مەنبە : ئانا تىلىم بىلوگى.
    دوستلار زىنداندا ئەسقاتىدۇ،داستىخان ئۈستىدە ھەممە ئادەم دوست كۆرىنىدۇ.
    كەلگەن جايى: چوققا
    ئىنكاس نەقىل ھەمبەھىر
    ۋاقتى ئۆتكەن قېلىچنى پوققا چاپ.
    دەرىجە: پەرىشتە

    ئارخىپ ئۇچۇر يوللاش QQ ئالاقە
    ئەزا ئۇچۇرى ئەزا نومۇرى: 60
    نادىر تېمىسى: 19
    ئومۇمىي يازما: 481
    ئۇنۋان:دوستانە ھازىرغىچە481دانە
    شۆھرىتى: 1002191
    پۇلى: 1014690 تەڭگە
    تۆھپىسى: 10012
    توردا: 264(سائەت)
    ھازىر:
    تىزىملاش: 2009-05-12
    ئاخىرقى: 2010-09-24
    5  يوللانغان ۋاقت: 2010-07-14 19:32
    ئاپتۇرنىڭلا ئىنكاسى | كىچىك ئوتتۇرا چوڭ

    ئۇيغۇرتىلى يوقالسۇن
    (ساتىرا)
    ئاپتورى: نامەلۇم



    ئەسقاتىمىغان بىزلەرگە ئۇيغۇرتىلى يوقالسۇن،
    نەگە بارساق قەدىرسىز بىچارە تىل يوقالسۇن.
    كىم كايىدى بىزلەرگە قەدىرلە دەپ تىلىڭنى،
    يولىمىزغا پۇتلاشقان ئۇيغۇرتىلى يوقالسۇن.

    نۇمۇس قىلىپ بۇنىڭدىن سۆزلىمەيلى ئۇيغۇرچە،
    جىسمىي قۇرۇق ناكسە تىل ئېڭىمىزدىن يوقالسۇن.
    پەخىرلەنمە تارىختىن مەھمۇد مېنىڭ بوۋام دەپ،
    كىم قېزىپتۇ تارىخنى؟ ئۇيغۇرتىلى يوقالسۇن.

    بىزگە كېرەك خىزمەتلا، كېرەك ئەمەس يېزىقمۇ،
    ئويۇنلارغا پۇتلاشقان ئۇيغۇرتىلى يوقالسۇن.
    بولدى ئەمدى تەمتىرىمەي باشقا تىلدا سۆزلەيلى،
    تىلىم بىلەن ئىلىممۇ، ئۇيغۇرمۇ ھەم يوقالسۇن ...


    ئالاھىيدە ئەسكەرتىش: جېنىم قېرىندىشىم، شېئىرنى چۈشەنسىڭىز كۆرۈڭ، بولمىسا قالايمىقان ئىنكاس يازماڭ!
    دوستلار زىنداندا ئەسقاتىدۇ،داستىخان ئۈستىدە ھەممە ئادەم دوست كۆرىنىدۇ.
    كەلگەن جايى: چوققا
    ئىنكاس نەقىل ھەمبەھىر
    ياغاچ قازاندا ئاش پىشماس .
    دەرىجە: ئالي ئەزا

    ئارخىپ ئۇچۇر يوللاش QQ ئالاقە
    ئەزا ئۇچۇرى ئەزا نومۇرى: 79
    نادىر تېمىسى: 9
    ئومۇمىي يازما: 676
    ئۇنۋان:كۆيۈمچان ھازىرغىچە676دانە
    شۆھرىتى: 2566
    پۇلى: 13204 تەڭگە
    تۆھپىسى: 91
    توردا: 2(سائەت)
    ھازىر:
    تىزىملاش: 2009-05-13
    ئاخىرقى: 2010-10-20
    6  يوللانغان ۋاقت: 2010-07-14 19:39
    ئاپتۇرنىڭلا ئىنكاسى | كىچىك ئوتتۇرا چوڭ

    ئانا  تىلىمىزنى قەدىرلەيلى !

                                       تىلىمىزنى قەدىرلەيلى 

                                شالغۇت قىپ سۆزلەشلەر ئانا تىلىمنى ،
                                بۇ جۇشقۇن يۈرەكنى مىسكىن ئەيلىدى .
                                كۆز يۇمسام خىيالنى ئۇيقۇغا زورلاپ ،
                                ۋە  بىراق ئۇيقۇغا نۆۋەت تەگمىدى . 
                                                                     
                                          «يۈرەك»نى «جۈرەك»دەپ ئېيتقان ناخشىنى ،
                                               ئاڭلىدۇق ئولتۇرۇپ مىسكىن مۇڭ يۇتۇپ .
                                               ساقلىماي ئەجداتتىن مىراس قالغاننى ،
                                               شالغۇت قىپ ئېيتتۇق ھەم ئەسلىنى بۇزۇپ . 

                                               «ئانا تىل»دەپسەندە بۇلۇپ كەتتى دەپ ،
                                               يازغۇچى شائىرلار داتلاپ يۈرۈيدۇ .
                                               دەۋىرگە ماسلاشقان ئوت يۈرەك ياشلار ،
                                               بۇزغاننى «نوچى» دەپ ماختاپ يۈرۈيدۇ . 

                                               كۆردۇق بىز يەرلىكنىڭ تىلىنى دوراپ ،
                                                ئۆزىنى قىزىقچى ساناپ يۈرگەننى .
                                               «ئۆز تىل»غا «يات تىل»نى قۇشۇپ لېيىتىپ ،
                                               ئۆزىنى بىلىملىك ئاتاپ يۈرگەننى . 

                                               كۆپ تىللىق بۇلسا ئۇ ئۆزىنىڭ ئىشى ،
                                               ھەر تىلنى جايىدا سۆزلەش كېرەكقۇ .
                                               ئاكىدىن « نىمە گەپ » دەپ سوراش بىلەن ،
                                               باشقىغا «شو سا » دەپ سۆزلەش بېلەكقۇ . 

                                              قەدىرلەپ ياشايلى ئۆز تىلىمىزنى ،
                                               ھەر ئىشنىڭ مۇۋاپىق بولغىنى تۈزۈك .
                                               بۇلاقنىڭ سۈيىنى ماختايدۇ ھەممە ،
                                               سۇلىرى تاتلىق ھەم بولغاچقا سۈزۈك . 
                                                                                                         
                                                ئارزۇيۇم شۇ مېنىڭ چۈشىنىڭ دوستلار ،
                                               «تىل» دىگەن «مىللەت» تۇر بۇنى ئويلايلى .
                                               ئەۋلاتقا بىرىشكە بولمىسا مىراس .
                                                قالىدۇ مۇشۇ « تىل » ،ئوبدان ساقلايلى !     

                                                               2009.يىل20.ماي  
                                                         مەنبە: ئىجادىيەت          
    قىيىن ئش يوق ئالەمدە ،
    كۆڭۈل قويغان ئادەمگە .
    كەلگەن جايى: چوققا
    ئىنكاس نەقىل ھەمبەھىر
    ياغاچ قازاندا ئاش پىشماس .
    دەرىجە: ئالي ئەزا

    ئارخىپ ئۇچۇر يوللاش QQ ئالاقە
    ئەزا ئۇچۇرى ئەزا نومۇرى: 79
    نادىر تېمىسى: 9
    ئومۇمىي يازما: 676
    ئۇنۋان:كۆيۈمچان ھازىرغىچە676دانە
    شۆھرىتى: 2566
    پۇلى: 13204 تەڭگە
    تۆھپىسى: 91
    توردا: 2(سائەت)
    ھازىر:
    تىزىملاش: 2009-05-13
    ئاخىرقى: 2010-10-20
    7  يوللانغان ۋاقت: 2010-07-14 19:43
    ئاپتۇرنىڭلا ئىنكاسى | كىچىك ئوتتۇرا چوڭ

    ئانا تىلىم جان تىلىم


    جەنابىي ھەق ياراتقاندا تەڭ يارالغان تىلىم سەن ،
    ھەمدە جانۇ ــ جىسمىمگە قاندەك تارالغان تىلىم سەن .

    زۇۋانىمنى ئوغۇز سۈتى بىرلە ئاچتىم ئۇيغۇر بوپ ،
    ئۆمۈرلۈككە ساداقەتكە خاس قارالغان تىلىم سەن .

    نامىم ئۇيغۇر !
                 ۋە شۇڭىمۇ تىلىم مەڭگۇ ئۇيغۇرچە !!
    ئەلمىساقتىن مۇقەددەس ۋە ئۆز ئاتالغان تىلىم سەن !!!

    ھىچ كىمنىڭ يوق ھەققى شۇڭا قوللانمايسەن دېيىشكە ،
    كەلسىمۇ باشىمغا قىلىچ قاچمايدىغان تىلم سەن .
      
    گەر چېپىلسام شېھىتتۇرمەن جەنابىي ھەق ئەمرىچۈن ،
    ماڭا شۇنچە ئالىي شەرەپ نىشانلىغان تىلىم سەن .

    سېنىڭسىز جىسمىممۇ جانسىز ، روھىممۇ مۇتلەق جانسىز ،
    سەنسىز كۈنۈم جانغا زۇلۇم !
                         كۈيلەيدىغان تىلم سەن !

    بايرىغىم سەن !
                بارلىغىم سەن !
                         يارىغىم سەن !!
                                      ئانامسەن !!!
    سېنى تاشلاش مۇناپىقلىق !!!
                           قوغدايدىغان تىلىم سەن !!!


    تىل دېمەك ــ مىللەت دېمەك ، گەر تىل يۇقالسا مىللەتمۇ ... !
    يىمىرىلمەس بۇ ھەقىقەت !
                        ياشايدىغان تىلىم سەن !!!  

    تىل دېمەك _ مىللەت دېمەك  ، گەر تىل يۇقالسا مىللەتمۇ .....!
    جاننى تىكىپ قانلار كىچىپ قوغدايدىغان تىلىم سەن !!!    

    غەيرى تىلغا خۇشتار بولماق ــ قاغا يانتاق سۆيگىنى ،
    سەن گۈلۈمسەن بۇلبۇل كەبى سايرايدىغان تىلىم سەن !

    سەن گۈزەلسەن ، سەن شىرىن سەن ، ــ قىممىتىڭگە سۆز يەتمەس !
    نامىڭ بىرلە تا ئەبىدى يايرايدىغان تىلىم سەن .

    نەچچە مىڭ خىل تىل بىلىشتە كامالەتكە يەتسەممۇ ،
    پەخىرلىنىپ چاڭ چاڭ چاڭ چاڭ سۆزلەيدىغان تىلىم سەن !

    شۇنچىۋالا قەدىرلىكسەن جاندىن ئېزىز ئانامدەك ،
    جەنابىي ھەق رىزاسىنى كۆزلەيدىغان تىلىم سەن .

    نىمە ئۇ گاھ ئىنگىلىزچە گاھى رۇس ۋە باشقىچە ... !
    تا ئەبىدى پاكلىغىڭنى ساقلايدىغان تىلىم سەن !

    نومۇسسىزلىق ، ۋىجدانسىزلىق ئانا تىلدىن چەتنىمەك ،
    دۇنيا ئالتۇن تارتۇق قىلسا ئازمايدىغان تىلىم سەن .

    ھەيرانىمەن ، ۋەيرانىمەن بىچارە نادانلارغا ،
    بۇ دۇنيادا نەدە بۇلاي ئارزۇلايدىغان تىلىم سەن !

    شۇم رەزىللەر جۆيلىشىدۇ ، ــ كارغا كەلمەس ، يوق قىلىپ ،
    نى نى قىسمەت ۋە ھىكمەتلەر تولۇپ ــ تاشقان تىلىم سەن !

    نىمە دىگەن ناھەقچىلىق ! ــ دەرس مۈنبىرى ساڭا تار !
    چۈشەنسىچۇ ! ـــ مەرىپەتتە ئۇستاز بولغان تىلىم سەن !

    سېنى چەكلەش ، سېنى يەكلەش ــ پىر ــ ئۇستازغا ھاقارەت !
    نادانلىقنىڭ زەربىسىدىن ساقلايدىغان تىلم سەن .

    تارىخ ئۆلمەس ، بەلكى شاھىت ! ــ مىسلى شەرەپ - شانىڭغا ،
    ئالەمگە نۇر ، پاسىۋان بوپ داڭ چىقارغان تىلىم سەن !

    ــ ئەۋۋەلى ئىڭڭە بىلەن دۇنياغا كەلگەندىن بېرى ،
    ئىنسانچە ياشاش يۇلىنى خىتاپ قىلغان تىلىم سەن !

    سەن بىلەن ئىلىم ــ بىلىمدە دىلى يۇرۇپ ئالەمچە ،
    قانچىلاپ ئالىم ، زىيالى داۋان ئاشقان تىلىم سەن .

    ئەنە مەھمۇت ، يۇسۇپ ھەمدە لۇتفى ناۋايى ، ... لارنىڭ ،
    كىتابىغا جان ، گۈزەللىك بېغىشلىغان تىلىم سەن .

    مۇندا گۇننار يارىڭ ( شۋىت ) ، گابائىن خان ( نېمىس ) مۇ ،
    ھەيران بولۇپ ھىكمىتىڭدىن ئالقىشلىغان تىلىم سەن .

    تېخى گابائىن ساڭا زەپ ئاشىقلىقتا ، خوشلۇقتا ،
    ئۆمۈر بۇيى ساڭا ئاتاپ كىتاپ يازغان تىلىم سەن .

    بەلكى پۈتكۈل ھاياتىنى بېغىشلاپ بىرلا ساڭا ،
    توي قىلماستىن كۆز يۇمۇشقا ئىلھام بولغان تىلىم سەن .

    شۇنداق !
            ئالىم سېنى سۆزلەر ، تارىخ بىلگەن نوچىمۇ !
    كۈيلىمەككە ، سۆزلىمەككە زەپ ياراشقان تىلىم سەن !

    بۇ ھەقىقەت ! ــ بىلگەن بىلۈر قەدىرىڭنى جان تىلىم !
    بىلمىگەن شۇم نائەھلىلەر تۆھمەت قىلغان تىلىم سەن !

    ۋەلىكىن كارۋان كېتىدۇ ، ئىتلار قاۋاپ قالىدۇ ،
    ئىلىم سۆيگەن ھەقىقەتچى ھۆرمەت قىلغان تىلم سەن !

    چۈشەنگەچ مەن بۇ مۇبارەك قىسمىتىڭنى جان تىلىم ،
    بۇرچۇم بىلىپ تۇنۇتۇشنى قەلەم ئالغان تىلىم سەن .

    شۇڭىمۇ يىل يەتتى ئونغا يىراق قىرلاردا ھامان ،
    قىنالساممۇ بۇشاشمىدىم ، ئوتنى سالغان تىلىم سەن .

    ــ « ئوتقا مەپتۇندۇر سەمەندەر ، لاۋا ئوت بەختىدۇر بىلسەڭ ! » ،
    شۇنچە تارتتىڭ مىھرىمنى سەن !
                         ياشنايدىغان تىلىم سەن !

    ياشا !
       ياشا !!
           مىڭلاپ ياشا !!!
                     پاياندازىڭ مەن سېنىڭ !
    كۆزۈمنىڭ گەۋھىرى كەبى ئاسرايدىغان تىلىم سەن !

    بۇ ئاللاھىم بېغىشلغان پاك ئەقىدەم ، ۋەزىپەم ،
    زەررىچىلىك تەتۈر باقسام بولمايدىغان تىلم سەن .


    يازىمەن شۇڭا كىتابىم ، ۋەلىكىن كۆپ خىجىلمەن ،
    تەسۋىرىڭنى مىڭ يىل يازسا پۈتمەيدىغان تىلىم سەن !

    خەيرىيەت ، كۆپ سۆيۈنۈشتىن تۇتالمىدىم ئۆزۈمنى ،
    شۇڭا جاننى مەرت ــ مەردانە پىدا قىلغان تىلىم سەن .

    كۆرۈپ باققاي ئېزىز خەلقىم ، ئىلھامىمۇ بوپ قالار ،
    شۇ ئارماندا ئاللاھقا كۆپ نىدا قىلغان تىلىم سەن .

    سېنى شۇنچە سۆيىمەن ئەي ئانا تىلىم جان تىلىم !
    سۆيگۈ گۈلزارىدا بۇلبۇل خەندان ئۇرغان تىلىم سەن !!!

    ــــ ئابدۇل قۇددۇس ئابدۇل ھافىز      

    تۈركىيە ـــ ئىستانبۇل
    قىيىن ئش يوق ئالەمدە ،
    كۆڭۈل قويغان ئادەمگە .
    كەلگەن جايى: چوققا
    ئىنكاس نەقىل ھەمبەھىر
    ياغاچ قازاندا ئاش پىشماس .
    دەرىجە: ئالي ئەزا

    ئارخىپ ئۇچۇر يوللاش QQ ئالاقە
    ئەزا ئۇچۇرى ئەزا نومۇرى: 79
    نادىر تېمىسى: 9
    ئومۇمىي يازما: 676
    ئۇنۋان:كۆيۈمچان ھازىرغىچە676دانە
    شۆھرىتى: 2566
    پۇلى: 13204 تەڭگە
    تۆھپىسى: 91
    توردا: 2(سائەت)
    ھازىر:
    تىزىملاش: 2009-05-13
    ئاخىرقى: 2010-10-20
    8  يوللانغان ۋاقت: 2010-07-14 19:47
    ئاپتۇرنىڭلا ئىنكاسى | كىچىك ئوتتۇرا چوڭ

    بەك ياخشى شېئىرلارنى يوللاپسىز  مۇش ئەپەندىم . مەنمۇ ساخلىۋالغانلىرىمنى يوللاپ قويدۇم ، قېرىنداشلار ! ئانا تىلىمىزنى قەدىرلەيلى !!!
    قىيىن ئش يوق ئالەمدە ،
    كۆڭۈل قويغان ئادەمگە .
    كەلگەن جايى: چوققا
    ئىنكاس نەقىل ھەمبەھىر
    ۋاقتى ئۆتكەن قېلىچنى پوققا چاپ.
    دەرىجە: پەرىشتە

    ئارخىپ ئۇچۇر يوللاش QQ ئالاقە
    ئەزا ئۇچۇرى ئەزا نومۇرى: 60
    نادىر تېمىسى: 19
    ئومۇمىي يازما: 481
    ئۇنۋان:دوستانە ھازىرغىچە481دانە
    شۆھرىتى: 1002191
    پۇلى: 1014690 تەڭگە
    تۆھپىسى: 10012
    توردا: 264(سائەت)
    ھازىر:
    تىزىملاش: 2009-05-12
    ئاخىرقى: 2010-09-24
    9  يوللانغان ۋاقت: 2010-07-14 19:52
    ئاپتۇرنىڭلا ئىنكاسى | كىچىك ئوتتۇرا چوڭ

    ئۇيغۇرۇم تانمايمەن سەندىن
    ئاپتورى: نامەلۇم


    قول ئۇزارتىپ باشقىغا تىلەپ جاننى باقساڭمۇ،
    يانچۇق كولاپ ھېيىقماي نامىمىزنى ساتساڭمۇ،
    نادانلارچە پاتقاققا بېشىڭغىچە پاتساڭمۇ،
    ھەي ئۇيغۇرۇم نەپرەت ... ... ... ... ... ... ...
                               لېكىن تانمايمەن سەندىن.

    بايۋەتچىگە خوش كۈلۈپ ئوچۇق چىراي ئاچساڭمۇ،
    نامراتلاردىن سەسكىنىپ يىراقلارغا قاچساڭمۇ،
    بوسۇغىدا باشلىقنىڭ يۇندا يالاپ ياتساڭمۇ،
    يالغان ماختاپ بىراۋنى نەزمە– قوشاق قاتساڭمۇ،
    ھەي ئۇيغۇرۇم لەنەت ... ... ... ... ... ... ...
                               لېكىن تانمايمەن سەندىن.

    ئاداۋەتنىڭ كۈلىنى بېشىمىزغا چاچساڭمۇ،
    ياڭاق ئېلىپ تاش بىلەن بېشىمىزغا چاقساڭمۇ،
    چېقىمچىنىڭ سۈيىدە دولقۇن ياساپ ئاقساڭمۇ،
    زەنجىرىدە قىلتاقنىڭ پۇتىمىزنى چاتساڭمۇ،
    ھەي ئۇيغۇرۇم ئىچىم ئاچچىق ... ... ... ... ... ...
                               لېكىن تانمايمەن سەندىن.


    مەنبە: ئانا تىلىم بىلوگى.
    دوستلار زىنداندا ئەسقاتىدۇ،داستىخان ئۈستىدە ھەممە ئادەم دوست كۆرىنىدۇ.
    كەلگەن جايى: چوققا
    ئىنكاس نەقىل ھەمبەھىر
    ئالدىنقى تېماكىيىنكى تېما
    «12»Pages: 1/2     Go
     ئانادىيارمۇنبىرى » شېئىرىيەت ھىكايە سەھنىسى