روبائىيلار

ayqut

چۈش ئەمەستۇر سەپرىمىز تەرك ئەتكىلى،
مەنزىلگە  بىرلا سەكرەپ بولماس يەتكىلى .
يۈك ئېغىر يول مۈشكۈل پارلاقتۇر غايە ،
مەردلەرنى سىنايدۇ داۋان ئۆتكىلى .

گەر بولسا قەلبىڭدە پىنھان بىر ئازاپ ،
شۇقەدەر ئاچچىق ھەم ئېيتقىلى بولماس.
كۆم ئۇنى سۈكۈتنىڭ چوڭقۇر تەكتىگە ،
سۈكۈتىڭ سۆزلەيدۇ بىر كۈن ساڭا خاس.

غەمگە بولدۇم مۇپتۇلا دەپ غەم يېمە،
جاننى قەستلەر غەم دېگەن يامان نېمە.
ھەر كىشىنىڭ ئۆزىگە خاس غېمى بار ،
مەنلا غەمكىن باشقىلار غەمسىز دېمە.

گۈل ئۈزەي دېگەنتىم سانچىلدى تىكەن،
بىلدىممەن گۈل دىگەن تىكەنلىك ئىكەن .
ئارقىغا يانغانتىم گۈل دېدى كۈلۈپ ،
تىكەندىن قورققانغا گۈل نەدە ئىكەن .

قومۇش ئۆز بويىغا قىلغاچ تەمەننا ،
ئاخىرى يانچىلىپ بولىدۇ بورا.
يار قىلماق بولساڭ گەر كەمتەرلىكنى سەن ،
شاخلىرى ئىگىلگەن مىۋىنى دورا.

مەجنۇنتال قەددىنى ئىگىپ مۇلايىم ،
سۇ بەرگەن ئۆستەڭگە قىلىدۇ تازىم .
سۈت بىرىپ ئۆستۈرگەن ئانا ئالدىدا ،
قەرزىمىز قانچىلىك ئويلايلى دائىم .

ayqut

ئۆگەن ئوغلۇم داداڭغا ئوخشاش،
ئىشەك بولما نادانغا ئوخشاش .
ئايانماي بەر ھۇسۇلۇڭنى ،
ئانار ئەنجۈر بادامغا ئوخشاش.

ساقايماس كېسەللەر داۋا بولمىسا،
ياشالماس ھاياتلىق ھاۋا بولمىسا .
ئادەم ۋە ھايۋاننىڭ پەرقى قانچىلىك ،
ۋىجدان ھەم ئار نۇمۇس ھايا بولمىسا.

يالغان ئېيتماس كائىنات پەقەت،
نۆۋىتىدە كېلەر باھار كۈز.
يالغان ئېيتار ئادەملەر پەقەت،
بىر-بىرىگە قاراپ يۈزمۇ-يۈز.

كۈنمۇ گاھ ئېچىلىپ گاھ تۇتۇلغاندەك،
گاھ يىغلاپ گاھ كۈلۈپ ياشايدۇ ئادەم.
مەڭگۈلۈك بولمايدۇ قايغۇ ھەم شاتلىق ،
قايغۇ ھەم شاتلىققا تولغان بۇ ئالەم.


يامغۇرنىڭ تامچىسى تاشنىمۇ تىشەر،
سۈركەلسە ئارغامچا پولاتنى كىسەر.
تىرشچان ئادەملەر بولىدۇ ئالىم ،
ئۆگەنسە يىڭنىدە قۇدۇق قېزىپ گەر.

بىز كەلدۇق كېتەرمىز يوقتۇر يالغىنى،
دەقىقە ئۆتسىمۇ يوقتۇر يانغىنى .
ھەرقەدەم كۆپ پۇرسەت كۈتىدۇ سېنى،
ئويلانغىن ئۆزەڭگە باغلىق قالغىنى .