كومپيۇتېر تور كارتىسىنىڭ MAC ئادرىسىغا ئىرىشىش ئۇسۇلى

kokkaptar

تۈنۈگۈنكى يازمىمىزدا MAC ئادرېسى بىلەن تونۇشۇپ ئۆتكەن ئىدۇق، بۈگۈن كومپيۇتېر تور كارتىسىنىڭ MAC ئادرىسىغا ئىرىشىش ھەققىدە سۆزلەيمىز.

تورغا مۇناسىۋەتلىك ئۈسكۈنىلەرنىڭ ھەممىسنىڭ MAC ئادرېس بولىدىغانلىقىنى بىلدۇق، بۇنداق بولغان ئىكەن، كومپىيۇتېردا تورغا مۇناسىۋەتلىك ئۈسكۈنىدىن قانچىسى بولسا، شۇنچە دانە MAC ئادرېس بولىدۇ دېگەن سۆز، مەسىلەن، سىملىق تور كارتىسى (RJ45 ئېغىزى، سىملىق تور كارتىسىدىن بىر قانچىسى بولسا، ئەلۋەتتە ھەممىسىنىڭ مۇستەقىل MAC ئادرېسى بولىدۇ.)، سىمسىز تور كارتىسى، 1394 ئېغىزى، كۆكچىش سىگنال قوبۇللىغۇچ قاتارلىقلارنىڭ ھەممىسىنىڭ مۇستەقىل MAC ئادرېسى بولىدۇ.

Windows سىستېمىسىدا MAC ئادىرىسنى كۆرۈشنىڭ نۇرغۇن ئۇسۇلى تەمىنلەنگەن بولۇپ، بىز بۇ يەردە كۆپ ئىشلىتىلىدىغان بىر قانچە خىلىنى سۆزلەيمىز.

1. خىل ئۇسۇل:
بۇنىڭدا «باشلاش» (开始) تىزىملىكىگە كىرىپ، «ئىجرا قىلىش» (运行) كۆزنىكىنى ئاچىمىز.

    چىققان كۆزنەكتە DOS بۇيرۇق پىروگراممىسىنى قوزغىتىش بۇيرۇقى cmd نى كىرگۈزۈپ ئىجرا قىلىمىز.

    دىققەت: Windows7 مەشغۇلات سىستېمىسىنىڭ سۈكۈتتىكى ھالىتىدە (默认) ۋە Windows8 مەشغۇلات سىستېمىسىدا مەزكۇر «ئىجرا قىلىش» كۆزنىكى يوشۇرۋىتىلگەن بولۇپ، كۇنۇپكا تاختىسىدىكى Windows كۇنۇپكىسى بىلەن R كۇنۇپكىسىنى بېسىش ئارقىلىق بۇ كۆزنەكنى ئوخشاشلا ئاچالايمىز.

    ئېچىلغان كۆزنەكتە ipconfig/all بۇيرۇقىنى كىرگۈزۈپ، ئىجرا قىلساق، تۆۋەندىكى رەسىمدىكىدەك ئۇچۇرلار كۆرۈنىدۇ. بۇ ئۇچۇرلار كومپيۇتېردىكى تورغا مۇناسىۋەتلىك بارلىق ئۈسكۈنە ئۇچۇرلىرى بولۇپ، سىمسىز، سىملىق تور كارتىلىرىنىڭ ئۇچۇرلىرىنى ئۆز ئىچىگە ئالىدۇ، ناۋادا سىزنىڭ كومپيۇتېرىڭىزدا vmware قاتارلىق مەۋھۇم كومپيۇتېر دىتاللىرى بولسا، ئەلۋەتتە ئۇلارنى تور بىلەن تەمىنلەيدىغان مەۋھۇم تور كارتىلىرىنىڭ ئۇچۇرلىرىمۇ بولىدۇ.

    سىز بەلكىم بۇ رەسىمدىكى ئۇچۇرلارغا قاراپ ئالدىنقى يازمىدا دىيىلگەن «بىر ئۈسكۈنىدىكى تور ئۈسكۈنىلىرىنىڭ MAC ئادرېس ئوخشىشىپ كىتىدۇ» دېگەن سۆزلەرنى يادىڭىزغا ئىلىشىڭىز مۇمكىن. بۇ رەسىمدىكى جەمئىي ئىككى دانە سىملىق تور كارتىسى، بىر دانە سىمسىز تور كارتىسىنىڭ ئۇچۇرلىرى بولۇپ، بۇنىڭ ئىچىدە پەقەت بىرسىلا مۇشۇ كومپيۇتېر بىلەن بىللە چىققان، توپلاشتۇرۇلغان تور كارتىسى، قالغان ئىككىسى بولسا سىرىتتىن قوشقان تور كارتىسى شۇڭا MAC ئادرېسى ئوخشىشىپ كەتمەيدۇ. بىز بۇ ئۇچۇردىكى تور كارتىسىنىڭ 本地连接، 无线网络连接 دىگەندەك ئىسىملارغا قاراپ قايسى تور كارتىسىنىڭ ئۇچۇرى ئىكەنلىكىنى بىلىۋالساقلا بولىدۇ.

Linux سىستېمىلىرىدا بولسا تېرمىنال (终端) گە كىرىپ ifconfig (دىققەت: Windows تىكى بۇيرۇق بىلەن بىر ھەرپ پەرق قىلىدۇ.) بۇيرۇقىنى بەرسەك تور ئۇچۇرلىرى كۆرۈنىدۇ، مۇشۇ ئۇچۇرلار ئارىسىدىن MAC ئادىرىسىنى تاپالايمىز.

2. خىل ئۇسۇل:
بۇ ئۇسۇل كۇنۇپكا تاختىسىغا قارىغاندا مائۇسنى كۆپرەك ئىشلىتىدىغان دوستلارغا تەمىنلەنگەن، ئۇنىڭدا باشقا كومپيۇتېر ۋىرۇس بىلەن يۇقۇملانغاندا DOS بۇيرۇق ھالىتى ئېچىلسىلا، كومپيۇتېر قايتا قوزغىلىپ كىتىدىغان ئەھۋاللاردا ئەسقاتىدۇ.

Windows7 ۋە Windows8 ھالىتىدە ئىكراننىڭ ئوڭ بۇرجىكىدىكى تور بەلگىسىنىڭ ئۈستىدە مائۇسنىڭ ئوڭ كۇنۇپكىسىنى چەكسەك، تۆۋەندىكىچە بۇيرۇق ئېچىلىدۇ. بۇنىڭدىن «تور ۋە ھەمبەھىرلەش مەركىزىنى ئېچىش» (打开网络和共享中心) نى چىكىمىز.

    ئەگەر مەشغۇلات سىستېمىڭىز Windows7 بولسا، ئېچىلغان كۆزنەكتىن تۆۋەندىكى رەسىمدە كۆرسىتىلگەن بويىچە نورمال خىزمەت قىلۋاتقان تور كارتىسىنىڭ ئىسمى «يەرلىك ئۇلانما» (本地连接)نى چەكسەك، شۇ تور كارتىسى تەمىنلەۋاتقان تورنىڭ ھالىتى كۆرۈنىدۇ. چىققان كۆزنەكتە «تەپسىلى ئۇچۇر» (详细信息)نى شۇ تور كارتىسىنىڭ MAC ئادرېسى ۋە IP ئادرېسى قاتارلىق ئۇچۇرلار كۆرۈنىدۇ. (دىققەت: «本地连接» دېگەن ئاتالغۇ مىكروسوفت سۆزلۈك ئامبىرىدا «تار دائىرىلىك ئۇلىنىش» دەپ ئېلىنغان.)

    ئەگەر مەشغۇلات سىستېمىڭىز Windows8 بولسا، ئېچىلغان كۆزنەكتىن تۆۋەندىكى رەسىمدە كۆرسىتىلگەن بويىچە نورمال خىزمەت قىلۋاتقان تور كارتىسىنىڭ ئىسمى «ئىسېرنېت» (以太网)نى چەكسەك (بۇ ئاتالغۇ ئېنگىلىزچە Ethernet تىن كەلگەن بولۇپ، بۇرۇنقى لۇغەتلەردە «ئېفېر تورى» دەپ ئېلىنغان، بۇ يازمىدا مىكروسوفت سۆزلۈك ئامبىرىدىكى ئاتالغۇ بويىچە ئېلىندى)، شۇ تور كارتىسى تەمىنلەۋاتقان تورنىڭ ھالىتى كۆرۈنىدۇ. چىققان كۆزنەكتە «تەپسىلى ئۇچۇر» (详细信息)نى شۇ تور كارتىسىنىڭ MAC ئادرېسى ۋە IP ئادرېسى قاتارلىق ئۇچۇرلار كۆرۈنىدۇ.

    WindowsXP دا بولسا، ئېكران يۈزىدىكى «تور قوشنام» (网上邻居) نىڭ ئۈستىدە، مائۇسنىڭ ئوڭ كۇنۇپكىسىدىن بېسىپ «خاسلىق» (属性) غا كىرسەك، كومپيۇتېردىكى تور ئۈسكۈنىلىرى كۆرۈنىدۇ. ئېچىلغان كۆزنەكتە «يەرلىك ئۇلانما» (本地连接) نىڭ ئۈستىدە مائۇسنىڭ ئوڭ كۇنۇپكىسىنى بېسىپ، «ھالەت» (状态)كە كىرىپ ئىچىلغان كۆزنەكتە «قوللاش» (支持) تىن «تەپسىلى ئۇچۇر» (详细信息) گە كىرسەك شۇ تور كارتىسىنىڭ MAC ئادرېسى ۋە IP ئادىرسى قاتارلىق ئۇچۇرلار كۆرۈنىدۇ.

    يانفون ۋە تاختا كومپيۇتېر قاتارلىق ئۈسكۈنىلەردە كۆپىنچە ئەھۋالدا يانفون تىپى قاتارلىق ئۇچۇرلار چىقىدىغان «يانفون ھەققىدە» (关于手机) دېگەن كۆزنەكتە ۋە ئۇنىڭ ئىچىدىكى «ھالەت ئۇچۇرى» (状态信息)، «قاتتىق دېتال ئۇچۇرى» (硬件信息) قاتارلىق تىزىملىكلەردە «Wi-Fi ئادرېسى» (Wi-Fi地址) ياكى «WLAN ئادرېسى» (WLAN地址) دىگەندەك ئىسىملاردا كۆرۈنىدۇ. (يانفون تىپلىرى كۆپ بولغاچقا تەپسىلىي يېزىلمىدى، ئادەتتە يانفوننىڭكىنى تۆۋەندىكى ئۇسۇل ئارقىلىق كۆرسەك تېخىمۇ قولايلىق.)
كومپيۇتېر، يانفون، تاختا كومپيۇتېر قاتارلىق ئۈسكۈنىلەر، تورغا ئۇلىنىپ يېتەكلىگۈچ (路由器)تىن ئاپتوماتىك IP ئادرېس ئالغان بولسا، يىتەكلىگۈچنىڭ باشقۇرۇش كۆزنىدىدىنمۇ كۆرگىلى بولىدۇ.

ئاپتور ئىلاۋىسى:
بەلكىم سىز «كۆك كەپتەر نىمانداق MAC ھەققىدە ئارقىمۇ-ئارقا ماقالە يوللايدىغاندۇ؟» دەپ ئويلىشىڭىز مۇمكىن، ئالدىنقى «MAC ئادرېسى ھەققىدە چۈشەنچە» ۋە بۇ يازما، MAC ئادرېسى ھەققىدىكى ئاساسى بىلىملەر بولۇپ، كېيىن يوللىنىدىغان تور بىخەتەرلىكىگە مۇناسىۋەتلىك يازمىلاردا ئىنتايىن مۇھىم رولى بار، چۈنكى MAC ئادرېسى تور بىخەتەرلىكىدىكى ئەڭ مۇھىم ئامىللارنىڭ بىرى. ناۋادا MAC ئادرېسى ھەققىدىكى چۈشەنچىڭىز تولۇق بولمىسا، كىيىنكى يازمىلارنى چۈشىنىشىڭىز قىيىنغا توختىشى مۇمكىن.

تېخىمۇ كۆپ تور ساۋاتلىرى «كۆك كەپتەر تور تېخنىكىسى»دا...

uystar

رەھمەت دوستۇم
......... بىلىۋېلىشقا تىگىشلىك مەزمۇنلاركەن...

alip

نۆۋەتتە تور ئۈسكۈنلىرى ئىنتايىن كۆپ، mac ئادېرسى 12 خانىلىق بولىدىكەن. ئىككى ئۈسكۈنىنىڭ mac ئادېرسى ئوخشاپ قالدىغان ئەھۋالمۇ بولارمۇ؟

kokkaptar

alip يوللىغان ۋاقتى  2013-7-26 11:51
نۆۋەتتە تور ئۈسكۈنلىرى ئىنتايىن كۆپ، mac ئادېرسى 12 خانى ...

ئۇنداق بولمايدۇ. mac ئادىرىس 16لىك ساندا يىزىلغان. ھەر بىر گۇرۇپپا ئادرىسىنى 10لۇق سىستىمىغا ئايلاندۇرۇپ كۆرۈپ بېقىڭ.

Alip-biz

مەن ئانچە چۈشۈنەلمىدىم. ئۆيۈمدە تورغا ئۇلاقلىق ئۈستەل كومپىيوتۇرى بار. تېلېفۇنۇمدا مۇشۇ تورنى ئىشلىتىپ ھەقىسىز تورغا چىققىلى بولامدۇ؟