|
Google Play دىكى چۈشۈرۈش مىقدارى App Store دىن %60 يۇقىرى
ئەرقال تاراتقۇسى تەرجىمە قىلدى
تېخنىكا بىلوگى AppleInsider نىڭ خەۋىرىگە ئاساسلانغاندا، كۆچمە ئانالىز شىركىتى App Annie نىڭ 1-ئاينىڭ 28-كۈنى ئېلان قىلغان ئەڭ يېڭى خەۋىرىدە دېيىلىشىچە، 2014-يىلى دۇنيادا Google Play دىن ئەپ چۈشۈرۈش مىقدارى App Store دىن %60 يۇقىرى بولغان، لېكىن تىجارەت كىرىمى App Store دىن %70 ئاز بولغان.
ئاندىرويىد ئەپ ئىجادكارلىرىغا نىسبەتەن، چۈشۈرۈش مىقدارى ئىزچىل كۆلەملىك كىرىم يارىتىشقا ئايلانمىغان. ئالما iOS ئەپ بازىرى كىرىم يارىتىش جەھەتتە يەنىلا ئالدىنقى ئورۇندا تۇرغان.
ئالما شىركىتى بۇ يىل ئېلان قىلغان دوكلاتىدا كۆرسىتىلىشىچە، App Store بۇلتۇر ئەپ ئىجادكارلىرى ئۈچۈن 10 مىليارد ئامېرىكا دوللىرىلىق كىرىم يارىتىپ بەرگەن بولۇپ، بۇ سان ئالما شىركىتىنىڭ 25 مىليارد ئامېرىكا دوللىرىلىق ئومۇمىي كىرىمنىڭ يېرىمىغا توغرا كەلگەن. بۇنىڭدىن كۆرۈۋېلىشقا بولىدۇكى، ئالما iOS ئەپ بازىرىنىڭ تىجارەت كىرىمى ئىزچىل ئېشىۋېتىپتۇ.
دوكلاتتا كۆرسىتىلىشىچە، ئەر ئىشلەتكۈچىلەر ئويۇن ئەپلىرىنى چۈشۈرۈپ ئىشلىتىشكە ئامراق بولۇپ، ئايال ئىشلەتكۈچىلەر ئىجتىمائىي ئالاقە تورى، رەسىم ۋە سىن ئەپلىرىگە بەكرەك قىزىقىدىكەن. ئالما ۋە گۇگىل ئەپ بازىرىدىكى كۆپ قىسىم تىجارەت كىرىمى ياپونىيە، كورىيە ۋە ئامېرىكا قاتارلىق «ئەپ بازىرىدىكى ئۈچ چوڭ كۈچلۈك دۆلەت» دىن كىرىدىغان بولۇپ، بۇ ئۈچ دۆلەتنىڭ بۇلتۇر ئەپ بازارلىرىغا يارىتىپ بەرگەن تىجارەت كىرىمى دۇنيادىكى باشقا دۆلەتلەر ئەپ بازارلىرى ئۈچۈن يارىتىپ بەرگەن كىرىم يىغىندىسىدىن ئارتۇق بولغان.
مەنبە : سۇمۇرغ تورى | 
دېۋان تالىشىش
