دېمەككى بۇ يوللار ئۈزۈلمەس يوللار،
چۈنكى بار ئۇنىڭدا ئەجدات ئىزلىرى.
ياشىغان،ياشناتقان بۇ يول قوينىنى،
خەلقىمنىڭ ئوت يۈرەك ئوغۇل-قىزلىرى.
دۇنيانىڭ باغرىدا ياتار سوزۇلۇپ،
ئېچىشنى ساقلىغان نۇرغۇن تىلسىمات.
بىزلەرمۇ ئۆزگىدەك ئەجىر قىلايلى،
تىرىشىپ بوشاشماي قىلىپ ئىجتىھات.
قاقشىما دۇنيانى تەڭشەلمىگەن دەپ،
كۈلكىنىڭ قايغۇسى بارلىقى مەلۇم.
قەيسەرلىك روھىدا ئەتراپىڭغا باق،
نوزۇگۇم ئىدىغۇ ئەسلى بىر مەزلۇم.
ياخشىلىق ھېچقاچان قالمايدۇ يەردە،
يامانلىق قىلساڭمۇ باردۇر نېسىۋەڭ.
مەيلى سەن پۇقرا بول ۋە ياكى رەھبەر،
يېتىلگىن مۇلايىم، بولمىغىن كۆرەڭ.
تارىخلار بېتىنى باققىن ۋاراقلاپ،
ئەجداتلار روھىغا سېلىپ باق نەزەر.
سەن ئوغلان ئالقىشقا لايىق ھەرقاچان،
تەبەسسۇم پارلىسا چېھرىڭدە ئەگەر.
 |
