ئاھاڭ ئۆزگىرىش ئۇسۇلىنى ئۇيغۇر مۇقام مۇزىكىلىرىدا دائىم ئۇچراتقىلى بولىدۇ . ئۆزگىرىش شەكلى يېقىندىن ئالغاندا ، ئالمىشىش ( ‹‹ ئاھاڭدىن چەتنەش ›› كە يېقىن كېلىدۇ . مۇنداقچە ئېيتقاندا ئەسلىي ئاھاڭدىن يېڭىئاھاڭغا ئۆتىدۇ . ئاندىن يەنە ئەسلىي ئاھاڭغا قايتىپ ، كۈيىنى تاماملايدۇ ) ، يۆتكىلىش ( ‹‹ ئاھاڭدىن يۆتكىلىش ›› كە يېقىن كېلىدۇ . يەنى ئەسلىي ئاھاڭدىن يېڭى ئاھاڭغا يۆتكىلدۇ ھەمدە كۈينى يېڭى ئاھاڭ بىلەن تاماملايدۇ ، دەستىلەش ( ئارلىقىدا ئوكتاۋا بولغان ، ئۆز – ئارا ئوخشىمايدىغان ئىككى ئاۋاز رايونىدا ئوخشىمايدىغان ئىككى ئاھاڭنىڭ ئۈستى – ئۈستىگە دەستىلنىشى ئارقىلىق مىلودىيە بارلىققا كېلىدۇ ) تىن ئىبارەت ئۈچ خىل ئەھۋال بولىدۇ . ئۆزگىرىش ئۇسۇلى يېقىندىن ئالغاندا ، ئۇ ئوخشاش ئاخىرلىشىىدىغان ئاھاڭلاردىكى ئۆزگىرىش ( ئالدى – كەينىدىكى ئاھاڭنىڭ ئاخىرلىشىش ئاۋازىدىكى مۇتلەق يۇقىرى تاۋۇش ئۆزگەرمەيدۇ . ئاھاڭدىكى تون تەرتىپىنىڭ قۇرۇلمىسى ئۆزگىرىدۇ . ئۇ ‹‹ ئوخشاش ئاساسىي تون ›› ياكى ‹‹ ئوخشاش نامدىكى ئاھاڭ ›› نىڭ ئۆزگىرىشىگە يېقىن كېلىدۇ ) ئوخشاش تون تەرتىپىدىكى ئاھاڭئۆزگىرىشى ( ئالدى – كەينىىدىكى ئاھاڭلارنىڭ تون تەرتىپ قۇرۇلمىسى ئۆزگەرمەيدۇ . ئاخىرلىشىش ئاۋازىنىڭ ئورنىدا ئۆزگىرىش يۈز بېرىدۇ . ئۇ ‹‹ ئوخشاش ئاھاڭلىق كۈي شەكلىنىڭ ئۆزگىرىشى ›› ياكى ‹‹ ئوخشاش تونلۇق كۈي شەكلىنىڭ ئۆزگىرىشى ›› گە يېقىن كېلىدۇ ) ، ئوخشاش ئاھاڭلارنىڭ ئورۇن ئالماشتۇرۇشى ( ئالدى – كەينىدىكى مېلودىيە ئوخشاش بولىدۇ . تون رايونىنىڭ ئورنىدا قىسمەن ئۆزگىرىش بولىدۇ ) قاتارلىق كۆپ خىلغا ئايرىلىدۇ . بۇلارنىڭ ئىچىدە بىرىنچى خىلى ئەڭ كۆپ ئىشلىتىلىدۇ . ‹‹ ئون ئىككى مۇقام ›› دا باشقا ھەر خىل ئۇيغۇر مۇقاملىرى ھەتتا باشقا مىللەتلەرنىڭ ئەنئەنۋى مۇزىكا مەدەنىيتىنىڭ تەسىرى تۈپەيلى مۇزىكىلىق ئاھاڭلار تېخىمۇ رەڭدار بولۇپ كېتىدىغان بۆلەكلەرنى كۆرگىلى بولىدۇ . مەسلەن : ‹‹ مۇشاۋىرەك مۇقامى ›› ۋە ‹‹ پەنجىگاھ مۇقامى ›› قاتارلىق مۇقاملاردا تىپىك ‹‹ دولان مۇقامى ›› ئۇسلۇبىدىكى كۈي ئاھاڭلىرىنى ئۇچراتقىلى بولىدۇ . ‹‹ مۇشاۋىرەك مۇقامى ›› نىڭ بىرىنچى، ئىككىنچى داستان مەرغۇلىدا تاجىك ئەنئەنۋى موزىكا ئۇسلۇبىغا ئىگە كۈيلەر نامايەن بولىدۇ . بۇ ، شىنجاڭدىكى ھەر قايسى مىللەتلەرنىڭ ئەنئەنىۋى موزىكىلىرىنىڭ تارىخىي جەريانلاردا مۇقەررەر رەۋىشتە ئۆز ئارا تەسىر كۆرسەتكەنلىكىنى ئۆز ئارا بىرىكىش ھاسىل قىلغانلىقىنى ئىسپاتلاپ بېرىدۇ .