( مەسەل )
بىر ئېغىلدا ياشايدىكەن ئېشەك بىلەن قوي،
قۇترىسىمۇ كاللىسىدا ھەر خىل يامان ئوي.
ياۋاش قوينىڭ ئېشەكۋايغا ئىخلاسى چىڭكەن،
لېكىن ئېشەك ياتسا-قوپسا قۇلىقى دىڭكەن.
ئېشەكۋاينىڭ ئېغىز-پۇتى تۇرمايدىكەن بوش،
شۇم نىيەتتە كۆڭلى ئەسلا بولمايدىكەن خۇش.
تېپەر ئىكەن توخۇ، توشقان، غازنى كۆرگەندە،
چىشلەيدىكەن خۇشامىتى ئازنى كۆرگەندە.
كۈندىن-كۈنگە يامان بوپتۇ ئېشەكنىڭ ھالى،
چاغلايدىكەن ئۆزىنى ئۇ يولۋاستىن ئالىي.
چۈش كۆرەركەن ئېشەك ئالتۇن ئېگەر-توقۇمنى،
ھاڭرايدىكەن شۇڭا ھەر كۈن بىر خىل مۇقامنى:
" ئەي، خۇدايا، مۈڭگۈز بەرسەڭ ئۈسسىسەم قوينى،
جۈپۈم بىلەن ئويناپ-كۈلۈپ ئۆتكۈزسەم توينى.
خۇشامەتنى بىلمەيدىكەن قوي دېگەن ساراڭ،
بېشىنى تىقىپ ئوتلا يەيدۇ، سالمايدۇ پاراڭ .
كېلىشمىدى قوي بىلەن ھېچ مىجەز-خۇلقۇم،
ئوخشاشمىدى رەڭگى-رۇخسار، شەكىل-تۇرقۇم.
توخۇ-توشقان، ئۆردەك-غازنى يەكلىمەيدىكەن،
ھويلىرامغا كىرسە-چىقسا چەكلىمەيدىكەن.
قويغا قىلغان ئەقىدەممۇ كەتتى بىكارغا،
ئەسقاتمىدى بىر قېتىممۇ چىقسام شىكارغا.
ئەي، خۇدايا، قانات بەرسەڭ ئۇچسام ھاۋاغا،
قوي ئۈستىدە ھۇزۇرىڭغا چىقسام دەۋاغا.
شۇ خىيالدا ئىشان بولدۇم بېشىمدا سەللە،
مەدەت بەرگىن چىقالمىدىم ئېگىزكەن پەللە.
ھەمراھ قىلغىن ماڭا ئوخشاش ئېشەكتىن بىرنى،
گاھى يىغلاپ، گاھى كۈلۈپ، ساقلىدىم سىرنى."
ئېشەكۋاينىڭ پەريادىنى ئاڭلاپتۇ ئاللا،
كۆك قەرىدىن مۇنداق سادا كەپتۇ شۇئانلا:
" ئېشەك دېگەن نامىڭ بىلەن مەشھۇر سەن ئەلگە،
مۈڭگۈز بەرسەم ھاياتلىقتىن قالمايىتتى بەلگە.
ئۆتسۇن كۈنۈڭ ئاتاڭ بىلەن ئاناڭنى بىلمەي،
جىمى مەخلۇق ئۇرۇپ-تىللاپ كۆزىگە ئىلماي.
بىر قوزۇققا باغلىنىپ سەن قۇللۇقتا ئۆتكىن،
ئۇرۇق-تۇغقان، دوست-يارەنسىز تۇللۇقتا ئۆتكىن!"
شول ۋەجىدىن ئېشەكۋاينىڭ مۈڭگۈزى يوقمىش،
مۈڭگۈزى يوق ئېشەكۋايدىن قوي كۆڭلى توقمىش.
ئېشەكۋايمۇ ئۈمۈد باغلاپ ئەشۇ دەۋاغا،
ھاڭرارئىمىش دائىم قاراپ كۆككە-ھاۋاغا.
1973-يىل مارت، ئۈرۈمچى
