ئەركەك بىز، بەيگىدە تۇلپارغا مىنگەن،
ئەركەك بىز،ۋەتەننىڭ باغرىغا سىڭگەن.
ئەركەك بىز،بۇغرادەك ياۋغا ئوق ئۈزگەن،
ئەركەك بىز،ھاتەمدەك تاغلارنى تەشكەن.

ئەركەك بىز،قوللاردا ۋىجدان قالقىنى،
ئەركەك بىز،يۈرەكتە سۆيگۈ يالقۇنى.
ئەركەك بىز،مېھىرلىك نۇرلار چاچقۇنى،
ئەركەك بىز،چۆللەرنى بوستان ئەيلگەن.

ئەركەك بىز، زېمىننىڭ نەۋقىران ئوغلى،
ئەركەك بىز،چىن تۆمۈر،سادىرنىڭ نەسلى.
ئەركەك بىز،كۆكتىكى قوياشنىڭ ۋەسلى،
ئەركەك بىز،مەلئۇننى پايخان ئەيلىگەن.