ئاقيول تورىنىڭ خەۋىرى:
جۇڭيى تېبابەت ئۆسۈملۈكى ئاق سەركىچۆپ يىلتىزى (قىسقارتىلىىپ سەركىچۆپ يىلتىزى دەپ ئاتىلىدۇ) نىڭ تەمى تاتلىق، تەبىئىتى سوغۇق بولسىمۇ ئاشقازان – تالغا زىيان يەتكۈزمەيدۇ، كىچىك تەرەتنى راۋانلاشتۇرىدىغان بىر خىل ئىسسىقنى ھەيدەپ زەھەر قايتۇرىدىغان، ھەر خىل قان چىقىش كېسەللىكلىرىنى داۋالايدىغان ياخشى دورا، ئۇ قىزىتمىلىق بىمارلار ئىستېمال قىلىشقا ئەڭ مۇۋاپىق كېلىدۇ.
دانىخورەك، ئەسۋە چىقسا، ئازراق سەركىچۆپ يىلتىزى سۈيى ئىچىپ بېرىڭ
چۇڭچىڭ شەھەرلىك جۇڭيى تېبابەت دوختۇرخانىسى ئىچكى كېسەللىكلەر بۆلۈمىنىڭ مۇئاۋىن مۇدىر ۋىراچى ساۋ لياڭيۈ مۇنداق دېدى، ئەتىياز – ياز پەسلىدە يۈزىگە دائىم دانىخورەك ۋە ئەسۋە چىقىدىغان كىشىلەرنىڭ ئىچى ئىسسىق بولۇپ، سەركىچۆپ ئستېمال قىلسا، كىچىك تەرەتنى راۋانلاشتۇرۇپ، قاننى سوۋۇتىدىغان بولغاچقا، ئۇلارغا تازا ماس كېلىدۇ. ئىچىش ئۇسۇلىمۇ ناھايىتى ئاددىي: يېڭى سەركىچۆپ يىلتىزىدىن 50 گرامنى كىسىپ پارچىلىغاندىن كېيىن، ئىستاكانغا سېلىپ، قايناق سۇدا قاينىتىپ، چاي دەملەپ ئىچسە بولىدۇ. ئىچىشتىن ئىلگىرى ئۆزىنىڭ تىلىغا قاراپ بېقىش كېرەك، تىلى قىزىل، تىل گېزى سارغايغان كىشىلەرنىڭ ئىچىشىگە مۇۋاپىق كېلىدۇ؛ ئەگەر تىلى قىزىرىپ، تىل گېزىدا سارغىيىش بولمىسا، 30 گرام شىمال شىقىلدىقى قوشۇپ ئىچسە، ئۈنۈمى تېخىمۇ ياخشى بولىدۇ.
قان تۈكۈرۈش، بۇرۇندىن قان چىقىش، قان سىيىشتىمۇ سەركىچۆپ سۈيى ئىچىپ بەرسە بولىدۇ
سەركىچۆپ يىلتىزىنىڭ ناھايىتى ياخشى بولغان قان سوۋۇتۇش، قان توختىتىش، ئىسسىقنى ھەيدەپ، سۈيدۈكنى راۋانلاشتۇرۇش ئۈنۈمى بولغاچقا، يۇقارقى قان كېسەللىكلىرى يۈز بەرگەندە، سەركىچۆپ يىلتىزنى ئىستېمال قىلسا بولىدۇ.
1. قان تۈكۈرۈش: سەركىچۆپ يىلتىزىدىن 30 گرام، گىنتىئانا ئوت- چۆپىدىن 10 گرام، شاتارىدىن 15 گرام، غاز ئوتىدىن 30 گىرامنى قاينىتىپ ئىستېمال قىلسا بولىدۇ؛ ناۋادا قوشۇمچە يۆتەلىش ئەھۋالىمۇ بولسا، قالقانگۈلدىن 12 گرام، ئۈجمە يىلتىزىدىن 15 گىرام، چارتال يۇپۇرمىقىدىن 30 گرام قوشۇپ ئىستېمال قىلسا بولىدۇ.
2. بۇرۇنى قاناش: سەركىچۆپ يىلتىزىدىن 36 گرام، ئۈچقاتتىن 12 گرام، خام ئەگرىسۇنايدىن 15 گرامنى چىلاپ ئىچسە ياكى قاينىتىپ ئىستېمال قىلسا بولىدۇ.
3. قان سىيىش: سەركىچۆپتىن 30 گرام، پاقا يۇپۇرمىقىدىن 30 گرام، فېللودوندروندىن 12 گىرامنى سۇدا قايناتقاندىن كېيىن ئىچسە بولىدۇ.
بۇنىڭدىن باشقا، سەركىچۆپ بىلەن شېكەر قۇمۇچىنى قاينىتىپ ئىچسە، ئۆپكىنى تازىلاپ، ئاشقازاننى ئىللىتىدۇ، ھۆللۈكنى قايتۇرۇپ، زەھەر ياندۇرىدۇ، ئېغىز پۇرايدىغان، قەۋزىيەت، تىل گېزى سارغايغان كىشىلەرنىڭ ئسىتېمال قىلىشغا تازا ماس كېلىدۇ.(تامام)
