800 يېمەك–ئىچمەك كارخانىسى 1000 خىلدىن ئارتۇق مۇسۇلمانچە يېمەكلىكنى كۆرگەزمىگە قاتناشتۇردى

    ئابدۇشۈكۈر ئابدۇكېرىم، ئىمىنجان داۋۇت خەۋەر قىلىدۇ: مەركىزىي شەھەر ئۈرۈمچىدە ئۈچ كۈن ئۆتكۈزۈلۈدىغان 2 – نۆۋەتلىك جۇڭگو مۇسۇلمانچە تائام مەدەنىيىتى بايرىمى ۋە شىنجاڭ ئۆزگىچە يېمەك – ئىچمەك يەرمەنكىسى(تۆۋەندە قىسقارتىلىپ بايرام دېيىلدى) 20 – ماي چۈشتىن بۇرۇن شىنجاڭ خەلقئارا يىغىن – يەرمەنكە مەركىزىدە باشلاندى. بايرامغا قاتناشقان 800 يېمەك – ئىچمەك كارخانىسى يەرمەنكە مەركىزىنىڭ ئىچى – سىرتىغا ئورۇنلاشتۇرۇلغان 1200 يايما ئورنىدا ئۆزگىچەمۇسۇلمانچە يېمەكلىكلىرىنى كۆرەك قىلدى.

   ئاپتونوم رايونلۇق خەلق قۇرۇلتىيى دائىمىي كومىتېتىنىڭ مۇدىرى ئەركىن ئىمىرباقى مۇسۇلمانچە تائام مەدەنىيىتى بايرىمىنىڭ باشلانغانلىقىنى جاكارلىدى.

   ئاپتونوم رايونلۇق پارتكوم دائىمىي كومىتېتىنىڭ ئەزاسى، ئۈرۈمچى – سانجى پارتكومىنىڭ شۇجىسى، ئۈرۈمچى شەھەرلىك پارتكومنىڭ شۇجىسى جۇ خەيلۇن ئېچىلىش مۇراسىمىدا مۇنداق دېدى: بۇ قېتىمقى تائام مەدەنىيىتى بايرىمىنىڭ ئۆتكۈزۈلۈشىمەملىكىتىمىزدىكى تائام مەدەنىيىتى ساھەسىنىڭ شىنجاڭنىڭ ئالاھىدە تائاملىرى ۋە مۇسۇلمانچە تائام مەدەنىيىتىگە يۈكسەك ئەھمىيەت بەرگەنلىكى ۋە مۇئەيەنلەشتۈرگەنلىكىنى تولۇق ئىپادىلەپ بەردى، بۇ ھەم مۇسۇلمانچە تائام مەدەنىيىتىنى كۆرگەزمە قىلىش، چەت ئەل بىلەن بولغان مەدەنىيەت ئالماشتۇرۇشنىكېڭەيتىش، شەھەر ئوبرازىنى نامايان قىلىشتا كەم ئۇچۇرايدىغان پۇرسەت. بۇنىڭدىن كېيىن چوقۇم مۇسۇلمانچە تائام مەدەنىيىتى بايرىمىنى شىنجاڭنىڭ ئۆزگىچە يېمەك – ئىچمەك مەدەنىيىتى روھىنى جارى قىلدۇرىدىغان، دۆلەت ئىچى – سىرتىدىكى مۇسۇلمانچە تائام مەدەنىيىتىنى ئالماشتۇرۇدىغان ۋە ھەمكارلىشىدىغان مۇھىم سەھنىگە ئايلاندۇرۇشىمىز كېرەك.

   بۇ قېتىمقى مۇسۇلمانچە تائام مەدەنىيىتى بايرىمىدا ‹‹شىنجاڭنىڭ ئۆزگىچە يېمەك – ئىچمەك مەدەنىيىتىنى جۇلالاندۇرۇپ، مۇسۇلمانچە تائاملارنىڭ جەۋھىرىنى نامايان قىلىش›› باش تېما قىلىنغان بولۇپ، بايرام يەرمەنكە، ماھارەت مۇسابىقىسى، مۇنبەرسۆھبىتى ۋە يۈرۈشلۈك پائالىيەتلەردىن ئىبارەت تۆت چوڭ مەزمۇن بويىچە ئۆتكۈزۈلىدۇ.

   ئىگىلىشىمىزچە، بۇ قېتىمقى بايرام ئالدىنقى نۆۋەتلىكىگە قارىغاندا كۆلەم، مەدەنىيەت قاتلىمى، مىللىي ئالاھىدىلىك قاتارلىق جەھەتلەردىن روشەن پەرقلىنىدىغانبولۇپ، يەرمەنكە تەشكىلىي كومىتېتى ئېلىمىزنىڭ ئىچى – سىرتىدىكى مۇسۇلمانچە تائام كارخانىلىرى ۋە ئاپتونوم رايونىمىزنىڭ يەرلىك مۇسۇلمانچە يېمەك – ئىچمەك كارخانىلىرىنى تەكلىپ بىلەن قاتناشتۇرغان. بولۇپمۇ، ئاپتونوم رايونىمىزدىكى 14 ۋىلايەت، ئوبلاست، شەھەرنىڭ يېمەك – ئىچمەك كارخانىلىرى تۇنجى قېتىم بۇ بايرامغا قاتناشقان. بايرام مەزگىلىدە يەنە، بىر قىسىم يېمەك – ئىچمەك كارخانىلىرى يەرمەنكىگە ئەڭ چوڭ ساڭزا، ئەڭ چوڭ تەخسىلىك لەڭمەن، ئەڭ چوڭ قازاندا پىشۇرۇلغان پولو قاتارلىق 13 تۈرلۈك مۇسۇلمانچە تاماقنى قاتناشتۇرۇپ، شاڭخەي دۇنيا جېننىس رېكورتىغا جەڭ ئېلان قىلىدىكەن.

   ئاپتونوم رايوننىڭ مۇئاۋىن رەئىسى جىن نو، ئاپتونوم رايونلۇق سىياسى كېڭەشنىڭ مۇئاۋىن رەئىسى، شىنجاڭ ئۆزگىچە يېمەك – ئىچمەك كەسپىنى تەرەققىي قىلدۇرۇش خىزمىتىگە يېتەكچىلىك قىلىش گۇرۇپپىسىنىڭ باشلىقى خۇاڭ چاڭيۈەن قاتارلىقلار ئېچىلىش مۇراسىمىغا قاتناشتى.