ئاتاقلىق كومپوزىتور ئىسكەندەر سەيپۇللا 1937 - يىلى تۇرپان شەھىرىدە تۇغۇلغان. باشلانغۇچ ۋە تولۇقسىز ئوتتۇرا مەكتەپلەرنى ئۈرۈمچى، تۇرپانلاردا ئوقۇغان؛ ئۇ بالىلىق چاغلىرىدىلا سەنئەتكە ئالاھىدە مۇھەببەت باغلىغان بولۇپ، توي - تۆكۈنلەر بولغاندا ناغرا - سونايچىلارغا ئەگىشىپ، يىراق - يىراقلارغا بارىدۇ. ئۈرۈمچىدە ئوقۇۋاتقان چاغلىرىدا بارابان، گارمون، ناغرا قاتارلىق سازلارنى چېلىشنى ئۆگىنىشكە باشلايدۇ. كېيىن ئۈرۈمچى 2 - دارىلمۇئەللىمىنگە ئوقۇشقا كىرىپ ئۇزاق ئۆتمەي يەنى 1951 - يىلى مەكتەپ ئۇنى غەربىي شىمال سەنئەت ئىنىستىتوتىنىڭ  مۇزىكا فاكولتېتىغا ئوقۇشقا ئەۋەتىدۇ.

       ئىسكەندەر سەيپۇللا ئۆزىنىڭ ناخشا - ئۇسسۇل ئىجادىيىتىنى 1952 - يىلى مەكتەپتە ئوقۇۋاتقان مەزگىلدىلا باشلايدۇ. ئۇ، 1954 - يىلى ئوقۇشنى تاماملاپ، شىنجاڭ ناخشا - ئۇسسۇل ئۆمىكىگە تەقسىم قىلىنىدۇ .

       ئىسكەندەر سەيپۇللا خىزمەتكە چىققاندىن كېيىن ياشلىق جاسارىتىنى ئۇرغۇتۇپ، تالانتىنى نامايان قىلىپ، ناھايتى تېزلا ئاپتونۇم رايونىمىزنىڭ سەنئەت ساھەسىدە تونۇلۇشقا باشلايدۇ. موسكۋادا ئۆتكۈزۈلگەن دۇنيا ياشلار فېستىۋالىغا قاتنىشىپ ياخشى باھاغا ئېرىشىدۇ. شۇنىڭدىن بۇيان ئۇنىڭ ھازىرغىچە 600 پارچىدىن ئارتۇق ناخشا - مۇزىكا ئەسىرى ئېلان قىلىنىپ، بۈگۈنكى دەۋر ئۇيغۇر سەنئىتىنىڭ تەرەققىياتىدا مۇھىم رول ئوينايدۇ. ئۇ ئىجاد قىلغان ‹‹ تارىم ناخشىسى››، ‹‹ سېنى ئەسلەيمەن›› ، ‹‹ كۆڭۈل ئارزۇسى›› ، ‹‹ يار - يار›› قاتارلىق ناخشا - مۇزىكىلار كۆپ يىللاردىن بېرى سەنئەتخۇمار خەلقىمىزنىڭ قەلبىنى ھاياجانغا سالغان.

       ئىسكەندەر سەيپۇللا دراما، ئوپېرا، خور قاتارلىق كۆپلىگەن سەھنە ئەسەرلىرىنىڭ ۋە ‹‹ بەخت ناخشىسى›› ناملىق كىنونىڭ مۇزىكىلىرىنى ئىجاد قىلىشقا قاتنىشىدۇ . ‹‹تارىم ناخشىسى›› ، ‹‹بەختىيار ئەۋلاد›› ، ‹‹باغچا بالىلىرى ناخشىسى›› ، ‹‹بالىلار ناخشا – ئۇسسۇللىرى›› ، ‹‹سۆيگۈ ناخشىسى›› قاتارلىق بەش پارچە كىتابنى نەشىر قىلدۇرۇپ جامائەتچىلىككە سۇنىدۇ. ئۇنىڭ 50 پارچىدىن ئارتۇق بالىلار ناخشىلىرى مىنىستىرلىك تەرىپىدىن تەستىقلانغان رايونلۇق ئوتتۇرا، باشلانغۇچ ۋە باغچا بالىلىرى مۇزىكا ئوقۇتۇشى كىتابلىرىغا كىرگۈزىلىدۇ. ‹‹ تارىم ناخشىسى››، ‹‹ سېنى ئەسلەيمەن››، ‹‹ ئورمان ناخشىسى››، ‹‹ مىھرىبان ئانا›› ، ‹‹مېھرىم ھەمرايىڭ بولسۇن››، ‹‹ بوغدا كۆلى›› ، ‹‹دەريا بويىدا ›› ، ‹‹ يۇرتقا قايتىش›› قاتارلىق ئەسەرلىرى مەركىزىي مۇزىكا ئىنىستىتوتى ۋە شىنجاڭ سەنئەت ئىنىستىتوتى قاتارلىق مەكتەپلەرنىڭ مۇزىكا ئوقۇتۇش دەرسلىكىگە كىرگۈزۈلىدۇ.

        تالانتلىق كومپوزىتور ئىسكەندەر سەيپۇللانىڭ سەككىز پارچە ئەسىرى مەملىكەت بويىچە ئۆتكۈزۈلگەن مۇسابىقىلەردە 1- ، 2- ، 3- دەرىجىلىك مۇكاپاتلارغا ئېرىشىدۇ.  ‹‹بەختىيار ئەۋلاد›› ناملىق ناخىشلار توپلىمى  1982 - يىلى مۇسكۋادا ئۆتكۈزۈلگەن جۇڭگو كىتابلىرى كۆرگەزمىسىگە قويىلىدۇ ۋە شۇ يىلى مەملىكەت بويىچە مۇنەۋۋەر ئوقۇشلۇق كىتابى بولۇپ باھالىنىدۇ .

      ئۆزىگە خاس ئىجادىيەت ئۇسلوبىغا ئىگە ئىقتىدارلىق كومپوزىتور ئىسكەندەر سەيپۇللا سەنئەت ساھەسىدە قولغا كەلتۈرگەن يۇقىرىقىدەك بىر قاتار ياخشى نەتىجىلىرى بىلەن خەلق قەلبىدىن چوڭقۇر ئورۇن ئېلىپ، ئىككى قېتىم مەملىكەت بويىچە، ئىككى قېتىم شىنجاڭ ئۇيغۇر ئاپتونوم رايونىمىز بويىچە ‹‹ ئىلغار خىزمەتچى›› بولۇپ باھالىنىپ مۇكاپاتلىنىدۇ .

       دۆلەتلىك بىرىنچى دەرىجىلىك كومپوزىتور ئىسكەندە سەيپۇللا جۇڭگو مۇزىكانتلار جەمئىيىتىنىڭ ۋە شىنجاڭ مۇزىكانتلار جەمئىيىتىنىڭ ئەزاسى ، ئاپتونوم رايونلۇق مۇقام تەتقىقات ئىلمىي جەمئىيىتىنىڭ ئەزاسى، ئاپتونوم رايونلۇق ئوتتۇرا، باشلانغۇچ ۋە باغچا بالىلىرى مۇزىكا ئوقۇتۇش ئىلمىي جەمئىيىتىنىڭ مۇدىرىيەت ئەزاسى، ئاپتونوم رايونلۇق مەدەنىيەت نازارىتى بالىلار سەنئەت كومىتېتىنىڭ ئەزاسى، غۇنچە مۇكاپاتى ئىلمىي جەمئىيىتىنىڭ دائىمىي ئەزاسى قاتارلىق ۋەزىپىلەردە بولغان.