ئالاتاۋ پورتى – شىنجاڭ ئۇيغۇر ئاپتونوم رايونىدىن قازاقىستان جۇمھۇرىيىتىگە ئۆتۈشىدىغان چېگرا پورتلىرىدىن بىرى ، شۇنداقلا جۇڭگونىڭ غەربىي قىسىمىدىكى ئەڭ چوڭ چېگرا سودا ئېغىزى ھېسابلىنىدۇ . ئالاتاۋ پورتى بۆرتالا شەھىرىنىڭ سەرقىي شىمال قىسىمىغا جايلاشقان بولۇپ ، قارشى تەرىپىدە قازاقىستان جۇمھۇرىيىتى تالدىقۇرغان ئوبلاستىنىڭ دىروژبا ( دوستلۇق ) پورتى بار . ئالاتاۋ پورتى جۇڭگودىن قازاقىستان جۇمھۇرىيىتىگە ئۆتۈشىدىغان تۆمۈر يول ، تاشيول پورتى ، شۇنداقلا ئاسىيا – ياۋروپا 2 – چوڭ قۇرۇقلۇق كۆۋرۈكىدىكى جۇڭگو تەرەپنىڭ دەرۋازىسى ھېسابلىنىدۇ . بۆرتالا شەھىرىگىچە بولغان ئارلىقى 73 كىلومېتىر . قازاقىستان تەرەپنىڭ دىروژبا پورتىغىچە بولغان ئارلىقى 12 كىلومېتىر كېلىدىغان بولۇپ ، 1990 – يىلى 6 – ئاينىڭ 27 – كۈنى رەسمىي ئېچىۋېتىلگەن . 1990 – يىلى 9 – ئاينىڭ 12 – كۈنى جۇڭگو بىلەن سوۋېت ئىتتىپاقى جۇڭگو لەنجۇ – شىنجاڭ تۆمۈر يولى بىلەن سوۋېت ئىتتىپاقىنىڭ تۈركسىب ( تۈركىستان – سىبىرىيە ) تۆمۈر يول تۇتاشتۇرۇش ۋەزىپىسىنى ئورۇنلىدى . شۇنىڭ بىلەن ئاسىيا – ياۋروپا 2– چوڭ قۇرۇقلۇق كۆۋرۈكى ئومۇميۈزلۈك تۇتاشتۇرۇلدى . ئۇزۇن ئۆتمەي تۆمۈر يول يۈك ترانسپورتى ، خەلقئارا يولۇچىلار پويىزى ۋە تاشيول يولۇچى – يۈك ترانسپورتى كەسىپلىرى باشلاندى . (تامام)