توردا تونۇشقان دوستلار

دىلەيسەم

	يەتتە قىزلىرىمدىكى بارلىق بەرنا قىزلارغا، بەردەم يىگىتلىرىمىزنىڭ كەچلىگى خەيرىلىك بولسۇن!!!! دىلەيسەم بۈگۈن ئولتۇرۇپ تۇيۇقسىز ئۆزىنىڭ تور ھاياتىنى توردا تونۇشقان يېقىن دوستلىرنى ئەسلەپ قالدى، مېنىڭ تور ھاياتىم قاينام- تاشقىنلىققا چۆمگەن بىر چايخانىدا باشلانغان، مەن كۈندە ئىشتىن چۈشۈپ ئىشلىرىمنى تۈگۈتۈپ قىلىدىغان تۇنجى ئىشىم شۇ چايخانىغا كىرىش، ئۇ يەردىكى ھەر- خىل بەس- مۇنازىرىلەرنى ئاڭلاش ئىدى. شۇنداق كۈنلەرنىڭ بىرىدە ماڭا بۇ چايخانىنىڭ باشقۇرغۇچىسى بولغان بىرەيلەندىن خەت كەلدى، مەنمۇ ئەدەپ يۈزىسىدىن جاۋاپ قايتۇردۇم، ئۇ ماڭا بىر نومۇر يوللىدى، مەن بۇنىڭ نىمە نومۇرلىقىنى سورىغىنىمدا، ئۇ ماڭا: ــ توۋا !!! سىز مۇشۇ كەمگىچە چ چ ئىشلىتىشنى بىلمەمسىز، دېدى ۋە ماڭا بىر نومۇرنى يوللاپ بۇنى ئىشلىتىڭ، مەخپى شېفىرى ****** دېدى ۋە ماڭا ئۇنى قانداق ئېچىش، قانداق ئىشلىتىش توغۇرلۇق بىر مۇنچە دەرىس ئۆتتى، شۇنداق قىلىپ پېقىر چ چ لىق بولۇپ قالدىم . بۇ مەن توردا تۇنجى تونۇشقان  ئادەم ئىدى، ئۇ ئۆزى بىر ئورگان كادىرى بولۇپ، كۆپىنچە ئىشلىرىنى مۇشۇ توردا بىجىردىغانلىقىنى، چايخانا، مۇنبەر ۋە چ چ قاتارلىق ئالاقە قۇراللىرى ئارقىلىق نۇرغۇن دوستلار بىلەن تونۇشقانلىقىنى ئېيتتى. ئارىدىن بىر يىل ئۆتكەندە بۇ ئاكاش تور دۇنياسىدىن تۇيۇقسىزلا يوقاپ كەتتى، قانداقلا بولمىسۇن مەن تۇنجى تونۇشقان ۋە ماڭا تور توغۇرىسىدا جىق بىلىملەرنى ئۆگەتكەن، ماڭا توردىكى ھەرخىل ئالدامچىلىقلاردىن ساقلىنىشىمنى ئەسكەرتىپ تۇرغان بۇ ئاكاشنى ئەسلەپ تۇردۇم، چ چ سىغا نېمە ئىش بولغانلىقىنى سوراپ ئۇچۇرلارنى قالدۇرۇپ تۇردۇم. ئارىدىن بىر يىل ئۆتكەندە تۇيۇقسىز بۇ تونۇش نومۇردىن خەت كەلدى، مەن شۇنداق خوشال بولدۇمكى، خۇددى ئۇزۇن مەزگىل كۆرۈشمىگەن تۇققىنىمنى تاپقاندەك ھېسياتتا چ چ نى ئاچسام مۇنداق قۇرلار تۇرۇپتۇ: ــ ھۆرمەتلىك سىڭلىم، مەن *** نىڭ ئايالى بولىمەن، مەن بۈگۈن يولدۇشۇمنىڭ چ چ رىنى ئېچىپ ئۇنىڭ تورداشلىرى بىلەن بولغان سۆھبەت خاتىرىلىرىنى كۆرۈپ چىقتىم، چۈنكى يولدۇشۇم يېقىندا چوڭ ئاۋارچىلىققا ئۇچراپ قانۇن ئورۇنلىرى تەرىپىدىن تۇتۇپ تۇرلىۋاتىدۇ، سەۋەبى ئۇنى ئىدارىسىنىڭ (*******) پۇلغا خىيانەت قىلغان دەپ گۇمانلىنىۋاتىدۇ، قانۇن ئورۇنلىرى ئۇنىڭ تور دۇنياسىدا بىرەر قويمىچىغا ئۇچراپ قالغان ياكى قالمىغانلىقىنى ئېنىقلاش ئۈچۈن، ئۇنىڭ بارلىق سۆھبەت خاتىرىلىرىنى كۆرۈپ چىقىشىمنى ئېيتتى. بىراق ئۇنداق ئىش يوقتەك قىلىدۇ، گەرچە بەزى سۆھبەت خاتىرىلىرى مېنىڭ غەزىپىمنى كەلتۈرگەن بولسىمۇ ئۇنىڭ ھازىرقى ھالىتىدە بۇ ئىشلارنى تەگەپ ئولتۇرۇشنى خالىمىدىم، قارىسام ئىككىڭلارنىڭ سۆھبەت خاتىرەڭلارلا ئاكا-سىڭىللاردەك ۋە قېرىنداشلاردەك سۆزلەر بىەلن تولۇپتۇ، سىزنىڭ كىچىككىنە تۇرۇپ ئۇنىڭغا قىلغان بەزىبىر ئورۇنلۇق گەپلىرىڭىزنى ئوقۇپ تولىمۇ تەسىرلەندىم، نەچچە ۋاقىتتىن بېرى ئۇنىڭ دېرىكىنى ئالالماي ئەنسىرەپ قالدۇرغان ئۇچۇرلىرىڭىزنى كۆرۈپ بۇ جاۋاپ خەتنى يېزۋاتىمەن، خالىسىڭىز بىز ئىزدىشىپ ئۆتەيلى، مېنىڭ ئالاقە نومۇرۇم ***********. شۇ ھامانلا بۇ نومۇرغا تېلىفۇن قىلدىم، ئۇ ھەدەش ماڭا ئىشنىڭ جەريانىنى دەپ بەردى ۋە ئەگەر بۇ پۇللارنىڭ ئورنى چىقمىسا ئۇنىڭ ئاز دېگەندىمۇ 15 يىل كېسىلىدىغانلىقىنى ئېيتىپ يىغلاپ كەتتى. مەن شۇنىڭدىن باشلاپ بۇ ھەدەشنى ھېيت بايراملاردا ئىزدەپ تۇردۇم، بىز يېقىنقى ۋاقىتلارغىچە ئالاقە قىلىشىپ تۇردۇق. ئۇ ئاكاش ھازىر تۈرمىدە جازا مۇدىتتى ئۆتەۋېتىپتۇ. مەن تور دۇنياسىدا تونۇشقان بۇ ئاكاشنى ۋە ئۇنىڭ بېشىغا كۈن چۈشكەندە ھەقىقى ئاياللىق بۇرچىنى ئادا قىلغان ۋە ھازىرمۇ قىلىۋاتقان بۇ ھەدىمىزنى ئەسلەپ تۇرىمەن. سىزنىڭمۇ  تور ھاياتىڭىزدا سىزگە تەسىر قىلغان دوستلىرىڭىز بولغانمۇ ؟؟؟

جۇلالىق

	ھەر بىرىمىزنىڭ تور ھاياتىمىزدا نۇرغۇنلىغان ئەسلىمىلەر بولغان. مەنمۇ تور ھاياتىمنى ئەسلىسەم نۇرغۇن ئىشلار بولۇپ ئۆتتى. بەزى خۇشاللىق ئىشلارمۇ، كۆڭۈلنى غەش قىلىدىغان ئىشلارمۇ بولدى. نۇرغۇنلىغان دوستلار بىلەن تۇنۇشتۇم. سىرداش مۇڭداش بولۇپ ئۆتتۇق. سۆزلەپ كەلسەم گەپ ئۇزۇن. قەيەردىن باشلاي؟ يەنىلا دوستلۇق ھاياتىمدىن سۆزلەي. تورغا كىرىپ تونۇشقان ئەڭ يېقىن دوستلىرىم ئۈچ قىز ئىدى. بۇلار بىلەن تۇنۇشۇپ بەك يېقىن دوستلاردىن بولۇپ ئۆتكەنىدۇق. بىر مەزگىل شۇنچە يېقىن ئارلاشتۇق، چ چ دا ياكى تېلېفوندا دىگەندەك، ئالاقىمىز ئۈزۈلۈپ قالمىدى. كۈنلەر ئۆتتى، ئايلار ئۆتتى، بىر كۈنلەردە ئىككىسى بىلەن مەلۇم سەۋەبلەر تۈپەيلى ئىزدەشمەيدىغان بوپ كەتتۇق. سەۋەب مەندىمىدۇ؟ دەپ شۇنچە ئىزدىنىپ باقتىم. مەن دوستلۇقنى شۇنچە قەدىرلەپتىمەن، لېكىن قارشى تەرەپ دوستلۇققا پەرۋاسىز قاراپلا كەپتۇ. سەۋەب مۇشۇ يەردە ئىدى. بىرسى بىلەن تا ھازىرغىچە يېقىن دوستلاردىن بولۇپ ئۆتىۋاتىمىز، ئىنشائاللاھ، بۇنىڭىدىن كېيىنمۇ يېقىىن ئۆتكەيمىز!

گۈلسەنەم

	مەن توردا باشقىلارغا قارىغاندا ئالاھىدىرەك دوستقا ئېرىشكەندەك قىلىمەن . كەمىنەمۇ باشقىلاردەك تور دۇنياسىغا قەدەم قويۇپ ئاز ۋاقىت ئۆتكەندىن كېيىن دوستۇمنىڭ تەۋسىيەسى بىلەن بىر  مۇنبەرنى بىلدىم، شۇ كۈندىن باشلاپ مەن مۇنبەرگە باشچە چۆكۈپلا كەتتىم. شۇنداق كۈنلەرنىڭ بىرىدە شۇ مۇنبەردە بىرى بىلەن تونۇشۇپ قالدىم ، ئەلۋەتتە ئۇنىڭ يازمىلىرى مېنىڭ دىققىتىمنى تارتقان ئىدى. مۇنبەرنىڭ قىسقا ئۇچۇر رولىدىن پايدىلىنىپ ئۇنىڭغا قىسقا ئۇچۇر قىلدىم، شۇ ھامانلا ئۇنىڭدىن جاۋاپ كەلدى، بىر نەچچە قىسقا ئۇچۇردىن كېيىن  بىز چ چ نومۇرلىرىمنى دىيىشىپ، ئۆز- ئارا قېتىشتۇق، مانا شۇنىڭدىن ئېتىۋارەن بىز كۈندە دېگۈدەك مۇڭدۇشۇپ  ياخشى دوستلاردىن بولۇپ قالدۇق. بارا-بارا بىز كۈننى تۈنگە ئۇلاپ پاراڭلىشىدىغان، توختىماي پىكىرلىشىدىغان، تۇرمۇشتىكى ئۇچرىغان قىيىنچىلىقلىرىمىزنى دىيىشىپ ئۆز- ئارا تەسەللىلەرنى بېرىشىدىغان بولۇشتۇق،  ئاخىرى بىر كۈنى بىز يۈز تۇرانە ئۇچرىشىشقا كېلىشىپ كۆرۈشتۇق، بىز دەسلىپىدە يۈز كۆرۈشسەك ئەركىن ئازادە بولالماي قۇرۇنۇپ قالارمىزمۇ دەپ ئەنسىرىگەن ئىدۇق، ئەمما كۆرۈشكەندىن كېيىن ئارىمىزدىكى قورۇنۇشلار ئاللا قاياقلارغا يوقۇلۇپ، خۇددى كونا دوستلاردەك تولىمۇ ئەركىن -ئازادە غىزالىنىپ قايتىشتۇق، مانا شۇ قېتىملىق ئۇچۇرشىشتىن كېيىن ھەر ئىككىلىمىزنىڭ تۇرمۇشىدا يېڭى بىر باشلىنىش بولدى. بىز مۇھەببەتلەشتۇق، بىر يېرىم يىلدەك مۇھەببەتلىشىپ ئاخىرى توي قىلىشتۇق، تا بۈگۈنگە قەدەر بىز باشقىلارنىڭ ھەۋىسى كەلگۈدەك بەخىتلىك بىر جۈپلەردىن بولۇپ قېلىشتۇق.

جۇلالىق

	سەنەمجان توردا تونۇشۇپ بەختىنى تاپقانلاردىن ئىكەن. كۆز ئالدىڭىزدىكى بەخىتنى تېخىمۇ قەدىرلەڭ.

dilroh

	مۇنۇ كومپىيۇتىر بىلەن ھەپىلەشكىلى ئۆيگە تۇنجى كومپىيۇتىر سېتىۋالغىلى 13 يىللارچە بولغان بولسىمۇ  قورامىغا يەتمىگەنلەر تورغا چىقماسلىق تورخانىغا كىرمەسلىك دېگەن تۈزۈملەرگە ئاجايىپ رىئايە قىلۋېتىپتىكەنمەنكى ````   ئالىي مەكتەپكە بارغاندا ئاندىن تورغا چىقىشنى ئۆگەندىم كەسپىم تۈپەيلى ``` ئاكام دائىم  تەرجىمە قىلغان كارتونلىرىنى مۇنبەرلەرگە يوللاپ ماڭا كۆر دەپ ئەۋەتسە ئوقۇتقۇچۇم بىلەن كۆرۈپ مەن ، كۆرۈشتىن باشقىنى بىلمەيتتىم بىر تەتىل بولغاندا ئاكام ئۆگەتتى ئۆزى ئەزا بولغان مۇنبەرگە ئەكىرىپ ```  مەن شۇ مۇنبەردىكى 20 مىدەك مۇنبەرداش بىلەن سىردىشىپ دوست بولۇپ دېگەندەك خىلىلا ياخشى ```  مۇشۇلارنىڭ ئىچىدىكى كۆپىنچىسى بىلەن يۈز تۇرانە كۆرۈشتۇم ئاچاش ئاكاشلار دوستلار بىلەن `` مۇشۇ بىر جۇلالىق ھەدەمنى كۆرۈپ باقماپتىمەن بۇلار ئارىسدا چ چ نى ئاچساملا بۇ لارغا كود كود قىلىپ  زىرىكتۇرۋىتىمەن ```   مەن بىلەن تەڭ بىر قىز بىلەن دوست بولدۇم ``  ئىككىمىزنىڭ دىيىشمەيدىغان گىپى يوق زادى ``  قىسقىسى تور دۇنياسىدىن كۆپ ياخشى دوست تۇتۇۋالدىم ``` `خاپىلىقلارمۇ بولغان بولدى ``كورلىغا كەلسە بۇ دوستلار مېنى ئىزدىمەي قالمايدۇ  بەك جىددى كەلمىگەن بولسىلا``` ئاكام مەندىن كېيىن تونۇشۇپ بۇلار بىلەن ھەجەپ مەندىنمۇ يىقىن بولۇپ كەتتىڭ ھە دەپ قويىدۇ      ئەمدى بۇ 7 قىزلىرىمدىكى مۇنبەرداشلار بىلەن تونۇشقىلى كىردىمغۇ مانا

saye

	كومپىيوتۇر بىلەن تورغا چىققىلى بولىدىغانلىقىنى 1999-يىلى 10-ئايلاردا تۇنجى قېتىم بىلدىم. ئۇ ۋاقىت ئۈرۈمچىدە   ئوقۇۋاتقان ۋاقىتلىرىم ئىدى. مەكتىپىمىزنىڭ يېنىدىكى بىز دايىم كىرىپ بېليارت ئوينايدىغان زالنى ئۆزگەرتىپ نۇرغۇنلىغان كومپىيوتۇرلارنى تىزىۋېتىپتۇ. بىز بۇ يەرنى كومپىيوتۇر تەربىيلەش مەركىزى قىلىدىغان چېغى دەپ ئېرەن قىلماپتىمىز. كېيىن قارىسام چوڭ كىچىك بالىلارنىڭ ھەممىسى كىرىۋاتىدۇ. توۋۋا. ئىشىك تۈۋىدە تۇرۇپ ئىچىگە قاراپ باققىنىم ھازىرغىچە يادىمدا . " بىز كىرسەك بولىدىغان يەرلەرمىدۇ يا؟" دەپ ئىككىلىنىپ تۇرۇپ كەتكەنىدىم. كېيىن بىر دوستۇم مېنى ئەكىردى. ئاندىن كومپىيوتۇرنى ئېچىپ شۇ ۋاقىتتىكى يېڭى يېزىقچە ياسالغان كاككۇك، ماكانىم دىگەن تور بېكەتلەرنى ئېچىپ ئۆزبېكىستانلىق شاھزادنىڭ ناخشىلىرىنى قويۇپ بەردى. توۋۋا. كومپىيوتۇردىن ئەسلى ناخشىمۇ ئاڭلىغىلى بولىدىكەن ھە . مەكتەپتىكى دوس سېستىمىلىق پەقەت يېزىقلا كىرگۈزگىلى بولىدىغان كومپىيوتۇرلار تولىمۇ ئاددىيلىقىنى ھېس قىلدىم. مانا شۇنىڭ بىلەن تورغا كىرىشكە باشلىدىم . ئۇ ۋاقىتلاردا بىر سائەتلىكى 3 يۇەن ئىدى. ئۇزۇن ئۆتمەي بىر چ چ نۇمۇرى ئىلتىماس قىلىۋالدىم، ئۇ ۋاقىتلاردىكى بارلىق چ چ نۇمۇرلىرى 7 خانىلىق ئىدى تېخى .  ( ئۇغۇرلاپ كەتتى ) 2000-يىلى 4-ئايلار چ چ دا پاراڭلىشىپ يۇرۇپ شىنجاڭ ئۇنۋېرسىتىنىڭ سانائەت ئىنىستوتى دەمدۇق (工学院) دە ئوقۇتقۇچىلىق قىلىدىغان بىر قەشقەرلىك قىز بىلەن تونۇشۇپ قالدىم. ئۇ مېنىڭدىن 2،3 ياش چوڭ ئىدى . بۇ قىز بىلەن سۆھبەتلىشىپ ئوبدانلا پىكىر بىردەكلىكى ھاسىل قىلىشىپ قالدۇق. ( مۇھەببەت ئەمەس، دوستلۇق جۇمۇ، ئۆزۈمگىمۇ شۇنداق ئەسكەرتىش بېرىپ تۇراتتىمچۇ) . 4-ئاينىڭ ئاخىرلىرى بۇ قىز بىر يۇز كۆرىشىشنى تەلەپ قىلدى . مەن تورداشلار بىلەن يۇز كۆرىشىپ باقمىغاچقا بەكمۇ ھودۇقۇپ كەتتىم. ئوغۇل بالا تۇرۇپمۇ شۇنداق ھودۇققان بارمۇ ھە . ئەمما ئالدامچى بوپ قالسا ياكى مەن بىلەن يۈز كۆرىشىپ مەن ئۇ ئويلىغاندەك چىقماي قالسام ماڭا كېيىن گەپ قىلماي قالارمۇ دىگەنلەرنى ئويلىدىم. كېيىن بىر غەيرەت قىلىپ كۆرۈشۈپ باقاي دەپ ئويلىدىم. ئۇ قىز ماڭا چاقىرغۇ نۇمۇرىنى بەردى. ئۇ ۋاقىتلاردا يانفۇنلار ئانچە ئومۇملاشمىغان، چاقىرغۇسى بارلار كۆز كۆز قىلىدىغان، چاقىرغۇ ئېلىپ قويۇپ بىكارچىلىقتا ئۆز ئۆزىگە چاقىرغۇ قىلىپ باشقىلار ئالدىدا داڭلىنىۋاتلىدىغان ۋاقىتلار ئىدى.    گەپنىڭ ئۆزىگە كىلەيلى. شۇنىڭ بىلەن ئۇ قىزغا چاقىرغۇ قىلدىم. تېزلا قايتۇردى . ئاۋازى شۇنداق يېقىملىق ئاڭلىنىپ كەتتى، ھېچ بولمىغاندا مېنىڭ سىنىپىمدىكى قىزلارنىڭكىدىن يېقىملىقكەن.   ، ئۇ قىز بىلەن 101-يول كوچا ئابتوبۇسىنىڭ يەنئەن يولى بېكىتىدە كۆرۈشمەكچى بولۇپ پۈتۈشتۇق. ئۇ قىز ئۇچىدىغا ئاق مايكا، سىرتىغا قارا رەڭلىك جىلىتكە كىيىۋالدىغان بولدى، ئۇ ۋاقىتلاردا ئۈرۈمچىدە مۇشۇنداق ئاق - قارا كىيىنىش مودا بولۇپ كەتكەن. مەن كاستيۇم چاپاننى قولۇمغا تۇتىۋالىدىغان بولدۇم. ( قانداق، شاڭخەينىڭ جاسوس فىلىملىرىدىكىدەك بوپتىمۇ؟ ). بىسمىللاھ دەپ يولغا چىقتىم. نىمە ئۈچۈن كېتىپ بارغىنىمنىمۇ بىلمەيمەن. كۆرىشىپ بولۇپلا قايتىپ كىلەي دىگەننى ئويلىدىم. ئەمما ئۇ ۋاقىتلاردا قىزلارغىمۇ يوشۇرۇن دىققەت قىلىدىغان ۋاقىتلىرىمىزكەن، بۇ قىزغىمۇ قىزىقىپ قالغانىدىم. چىرايلىقمىدۇ؟ ئورۇقمىدۇ سىمىزمىدۇ؟ شۇ خىياللار بىلەن يەنئەن يولى بېكىتىگە كېلىپ قاپتىمەن. مېنى ئاۋال تونىۋالمىسۇن دەپ چاپاننى كىيىپلا چۈشتۈم ۋە ناھايىتى ئالدىراش ئادەمدەك بېكەتتىن پىيادە ئۆتۈپ كەتتىم. ئاندىن بۇ قىزنى ئىزلەشكە باشلىدىم، ئاق مايكا، قارا جىلىتكە قىز.... ئالە شەنى! بۇنداق كىيىۋالغان قىزدىن بېكەتتىلا 4سى تۇرۇپتۇ. قايسىسى شۇدۇ؟ بىرى شۇنداق سىمىزرەك قىزكەن، چىرايىدىن ئاچچىقى يامان ، ئىچىمدە مۇشۇ قىز شۇمۇ نىمە؟ ئاۋازىغۇ زىل چىققان ئەمما، مېنى تولا ساقلاپ ئاچچىقى كېلىپ كېتىپتۇ دە. بېرىپلا گۇناھىمنى توناي دەپ ئويلىدىم، ئەمما ياندىكى چىرايلىق زىلۋا قىزمۇ سائىتىگە قاراپ يا ئابتۇبۇسقا چىقماي تۇراتتى، شۇ قىزمىدۇ يا. ئەستا! تەس بولدىغۇ ئەمدى . شۇ ۋاقىتتا نەدىن كەلگەن ئەقىلكىن. چاقىرغۇ بارتى ئەمەسمۇ راست . دەپلا بىر دۇكانغا كىرىپلا چاقىرغۇ قىلدىم. ئېۋۇ سىمىز قىز بالا چاقىرغۇغا قارىسا بولدى، ئاستالا كېتەي. ئېۋۇ زىلۋا چىرايلىق قىز بالا چاقىرغۇغا قارىسا كۆرىشەي ( ھەي! ياشلىق، ھەي بالاڭزا چاغلاردىكى گۆدەك خىيال دە). چاقىرغۇ قىلىپ 3 مىنۇتتەك ئۆتتى ئىككىسىلا قارىمايدۇ چاقىرغۇغا . قانداق ئىش بوپ كەتتى دەپ تۇرسام تېلفۇن سايراۋاتماسما. ئوھ. ما ئىشنى دەپلا تېلفۇننى ئالدىم. " ۋەي " دىسەم " ھە كەلدىڭىزما ، مەن ئاز قالدىم ، ئىككى مىنۇتتىلا بارىمەن" دەپلا تېلفۇننى قويدى. دۇكاندىن چىقىپ تۇرىشىمغىلا ياندىن بىر قىز بالا " ھەي" دەپلا مۈرەمگە ئۇردى . كەينىمگە بۇرۇلۇپ قاراپ تۇرۇپ قاپتىمەن. شۇنداق چىرايلىق ئەمما تېرىسى سەل چوكىلى رەڭ قىز كەن. ھە بوپتۇ. كۆڭلى ياخشى بولسىلا بولمىدىمۇ . "يۇرۇڭ" دەپلا ئالدىمدا ماڭدى. ئىچىمدە " ۋوي نىمە ئىش بوپ كەتتى. سىز شۇمۇ. كېچىكىپ قالدىم سەت بولدى " دىگەن گەپ يوق. يۇرۇڭ دەپلا باشلاپ كەتتىغۇ. بۇ قىز سەل چاتاقمۇ قانداق دەپ ئويلاپ تۇرۇپ قالدىم . ئۇ قىز كەينىگە بۇرۇلۇپ:" ئەنسىرىمەڭ، سىزنى باشقا بىر يەرگە ئاپارمايمەن، سىز ياقتۇرىدىغان بىر جايغا بارىمىز" . ئىچىمدە تېخىمۇ گۇمانلاندىم " چاتاق" . تۇنجى توردىشىم بىلەن كۆرىشىپلا بۇنداق بوپ كەتسە نىمە بولغىنى . ئەمما ئوغۇل بالا بولغاندىكىن بېرىپ باقاي. ئەگەر بولمىغۇر ئىشلار بوپ قالسا قېچىپلا چىقمامدىم. ئەگەر مېنى بۇلايمەن دىسىمۇ بەرىبىر مەندەك نامرات بىر ئوقۇغۇچىدا پۇل نىمە قىلسۇن. يېنىمدا 10 يۈەنلا بارشۇ. ئۇنى ئېلىۋالسا مەكتەپكە  پىيادە كىتىمەن . ماڭمىغان يولمۇ بۇ ھىم ! شۇنىڭ بىلەن بۇ قىزغا ئەگىشىپ ماڭدىم . ئۇ قىز مېنى كونسۇل كوچىسى تەرەپتىن ئەكىرىپ شۇ يەردىكى بىر ئولتۇراق بىنا بار يەرگە باشلىدى. ئالتىنچى قەۋەتكە چىقتۇق. ئىچىمدە گۇمان كۈچىيىپ مۇقىملىشىپ بولدى. ئىسىت سىزنىڭ ئوقۇتقۇچى بوپ قالغىنىڭىز دەپلا كەينىمگە ئۆرۈلۈپ ماڭماقچى بولۇپ پەلەمپەيدىن چۈشۈشكە باشلىدىم. ئۇ قىز :" ھەي، سىز خاتا چۈشۈنۈپ قالدىڭىز، بۇ يەردە بىر تەربىيلەش سىنىپى بار، كۆپچىلىك بىزنى ساقلاپ قالدى" دىدى . " ھە!" دەپلا ئۇ قىز بىلەن كىردىم. قارىسام كاتەكتەك بىر ئۆيدە 30 دەك ئوقۇغۇچى كىچىك ئورۇندۇقنى قويۇپ ئولتۇرۇپتۇ. بىرەيلەن ئۈستەلدە ئولتۇرۇپ كەينىدىكى ئاق دوسكىغا توم قەلەم بىلەن بىرنىمىلەرنى سىزىپ چۈشەندۈرۋېتىپتۇ. ئۇ قىز بىلەن ئاستا كىرىپ ئولتۇردۇم. ھېلىقى دەرس سۆزلەيدىغان كىشى قانداقتۇر بىر مەھسۇلاتنىڭ گىپىنى قىلىپ، مانچىدىن سېتىپ ياكى مانچىلىك ئادەمنى بۇ سودىغا قاتناشتۇرساڭلار پايدىسى مانچىلىك سىلەرگە كېلىدىغان نەپ مانچىلىك دەپ يېرىم سائەت ئىچىدە بىزنى مىليونىر قىلىۋەتتى. ئەتراپتىكىلەر دەپتەرلەرگە يېزىۋاتاتتى. كۆزلىرىدىن پۇل تېپىش ئىستىكى چاقناپ تۇرغان بۇ ئوقۇغۇچى بالىلار شۇ كىشىنىڭ ئاغزىغا قاراپلا ئولتۇراتتى. مەن بەرداشلىق بېرەلمەي ئاستا يېنىپ چىقتىم، ئۇ قىزغا مەن ماڭاي خوش دەپلا چىقىپ كەتتىم، ئۇ قىزمۇ كەينىمدىن چىقمىدى . تويە! ساراڭ سايە. قىز بالا بىلەن كۆرۈشكىلى چىققانغا . مانا بۇ مېنىڭ 11يىل بۇرۇن تۇنجى توردىشىم بىلەن كۆرىشىشىم. خۇددى تۆنۈگۈنكىدەكلا يادىمدا تۇرۇپتۇ . شۇندىن كېيىن تورداشلار بىلەن ئانچە ئۇچراشمايدىغان بولدۇم ، ئەلۋەتتە ئىشەنچىلىك تورداشلار بىلەن ئۇچرىشىپ تېخىمۇ چوڭقۇر تونۇش ھاسىل قىلغاندىن كېيىن ئوبدان دوستلاردىن بولۇپ كېتىپ بارىمىز. ئىشقىلىپ تورداشلار مۇمكىنقەدەر ئىشەنچىلىك دەپ قارىمىسا كۆرۈشۈشتىن ساقلىنىش كېرەك ئىكەن.

esil

	مەن مۇنبەردە تونوشقۇنلاردىن  پەقەت بىر قىز بىلەن كۈرۈشۈپ باقتىم ،ئۇنىڭ  بىلەن مىجەزىمىز بەك چىقىشدىكەن ، ئامراق دوستلاردىن بۇلۇپ قالدۇق  ،لىكىن بۇ تىخى  يىقىنقى ئىش ئاقىۋىتىنىڭ  قانداق  بولىدىغانلىقىنى بىلمەيمەن  .

Aychiwer

	بۇ نەچچە يىل ئاۋۋالقى ئىش ..... غۇلجىدىن بىر ئايال توردىشىمىزنىڭ قارامايغا كېلىش سەۋەبى بىلەن ، توردا يېقىن ئۆتىدىغان ھەدە - سىڭىللار  يىغىلماقچى بولۇشتۇق . توردىكى ئەڭ يېقىن << ھەدەم >> ماڭا تېلفۇن قىلىپ  ، "" يىغىلىشتىن ئاۋۋال ئىككىمىز تونۇشۇۋالايلى ، بىزنىڭ ئۆيگە كېلىڭ ، تاكسىدىلا " دېدى . مەن كىيگەن كىيمىم ، بوي تۇرقۇمنى قىسقىچىلا دەپ بەردىم . ئۇ ھەدەممۇ ئۆزىنىڭ قارا كىيىم كىيىپ يول بويىدا ساقلاۋاتقانلىقىنى ئېيتتى . تاكسىدىن چۈشسەم توردىكى <<ھەدەم>> كۈلۈمسىرەپ مېنى قارشى ئالدى ، كۆرۈشتۇق . ئۆيىگە باشلىدى . سەل قورۇنۇپ ئولتۇردۇم . تونۇشلا چىراي.... نەدە كۆرگەن بولغىيدىم بۇ ھەدەمنى ؟ ... ھەدەممۇ ماڭا پات-پات سىنچىلاپ قاراپ قويدى-يۇ، چاي دەملەي ، دەپ ئاشخانىغا كىرىپ كەتتى . ئىككىمىز چاي ئىچكەچ پاراڭلاشقاچ ، بىر- بىرىمىزگە قاراپ  تۇرۇپ قېلىشتۇق-تە ،  كۈلۈشىپ كېتىشتۇق . ۋاي ئاللا ، ۋاي ئاللا ، جاھان نېمانچە تاردۇ ؟  ئەسلىدە ئىككىمىز  توي قىلماستىن بۇرۇن بويتاقلار ياتىقىدا يېتىشقان ياتاقداشلاركەنمىز ..... بىردەمدىن  كېيىن بىز توردىكى يەنە بىر ھەدىمىزنىڭ ئۆيىگە ھېلىقى غۇلجىدىن كەلگەن سىڭىلچاق بىلەن كۆرۈشۈش ئۈچۈن بارماقچى بولۇپ ، تېلفۇن قىلىشتۇق . توردىكى بۇ ھۆرمەتكە سازاۋەر ھەدىمىز بىنا ئالدىدا بىزنى ساقلاپ تۇرۇپتىكەن ،تاكسىدىن چۈشۈپ يەنە كۈلكە باشلاندى . ئۇ ھەدەمممۇ تونۇش دۈشمەنلەردىنكەن ئەمەسمۇ ؟ مېنىڭ يېقىن دوستۇمنىڭ نەۋرە ھەدىسى ھەم مەكتەپداشلاردىنكەنمىز ....... كۈلكە بىلەن تۆتىنچى قەۋەتكە ئاران چىقىشتۇق ، ئۆيگە كىرىپ  غۇلجىدىن مېھمان بولۇپ كەلگەن ھېلىقى تورداش سىڭلىل بىلەن كۆرۈشتۇق . تور دېگەن  تور، رېئاللىق ھامىنى رېئاللىق ئىكەن ! توردىكى ھېلىقى سىڭلىم بەستلىك ،  ئېگىز بوي قىزكەن ، مەن بولسام ئەكسىچە ، ئورۇق ، ۋىجىككىنە ......    شۇ كۈنى بىز  يەنە بىرنەچچە تورداش قىز - ئاياللار بىلەن بۇ ھەدىمىزنىڭ ئۆيىدە كۆرۈشتۇق . ئارىمىزدىكىلەرنىڭ تولىسى بەش ناماز بەزىلىرى ئورىنىدىغان قىزلاركەن . ئۇلارنىڭ كۆزلىرى كۆينىكىمنىڭ كالتە يەڭلىرىگە ۋە قويۇۋەتكەن تۈز چېچىمغا قاراپمۇ ئۈلگۈردى ..... مەن سەل بىئەپ ھەم خىجىللىق ھېس قىلىپ ، باھانىلەر بىلەن ئاستا  ئۆيگە قايتتىم ..... بۇ 2007 - يىلغۇ دەيمەن خاتالاشمىساملا . شۇندىن بېرى توردىكى بۇ ھەدە - سىڭىللارنىڭ بەزىلىرى بىلەن ئالاقە ئۈزۈلۈپ قالدى . تونۇش ، يېقىنلارنىڭ كۈتۈلمىگەندە ~ << تورداش >> بولۇپ قېلىشى ھەم ھەممىمىزنىڭ ئالدىراش تۇرمۇش ھەلەكچىلىگى بىلەن ئالدىراش يۈرىشىمىز ،  سەۋەب بولغان بولۇشىمۇ مۈمكىن .

قەھۋە

	مەن بۇ ھەقتە ئايرىم توختىلاي.

jahandar

	كومپىيوتىر بىلەن دەسلەپ 98-يىلى ئۈرۈمچىدە ئۇقۇۋاتقان ۋاقتىمدا ئۇچىراشقان،بىر يىلدەك دوس مەشغۇلات سىسىتىمىسىنى ئۈگەندۇق،كېيىكى يىلىسى كومپىيوتىر ئىمتاخانىغا قاتنىشىپ لاياقەتلىك گۇۋاھنامىسى ئالدىم.99-يىللىرى پىداگوگىكا ئۇنۋېرسىتىنىڭ كومپىيوتىرخانىلىرىغا كىرىپ سائىتىگە 2يۈئەندىن تۈلەپ ئويۇن ئويناپ يۈردۇق،ئۇ چاغدىكى ئۇيۇنلارنىڭ ھەممىسى دوس ھالىتىدە بۇيرۇق بىرىپ ئىېچىلىدىغان تانكا ئۇيۇنى دىگەندەك ئۇيۇنلار ئىدى.2000-يىلى يەنى بىز ئۇقۇش پۈتتۈرىدىغان يىلى مەكتەپنىڭ ئالدىغا تورخانا ئېچىپتىكەن،شۇ يەرگە كىرسەك "قىزىل تېرۋىگا"ئۇيۇنىنى ئويناۋېتىپتىكەن،قىزىقىپ قېلىپ بىر قانچە يىلغىچە شۇنى ئويناپ يۈردۈم،2002-يىلى ناھىيىمىزدە ئاچقان تورغانىدا تۇنجى قېتىم تورغا چىقىپ باقتىم. 2003-يىللىرىغۇ دەيمەن "مەيىن شامال "تورىنىڭ چايخانىسىدا پاراڭلىشىپ يۈرۈپ بىر قىز 8خانىلىق چ چ نۇمۇردىن بىرنى بەرگەن،ئۇنى 2يىلدەك ئىشلىتىپ ئەزا قىلىمەن دەپ رەھمەتلىك بولدى،كېيىن مۇنبەرلەردە يۈردۈم،مۇنبەرلەرنىڭ ئىچىدە رەھمەتلىك "شىنجاڭ لىنىيەسى"مۇنبىرى مىنى ئۈزىگە قاتتىق رام قىلىۋالغان ئىدى،ئۇ يەردە كۆپلىگەن تورداشلار بىلەن تۇنۇشتۇم،تاكى ھازىرھىچە بىر-بىرىمىزنى توردا تاشلىۋەتمەي كەپتىمىز.خۇتۇنۇمنىمۇ چ چ دا تولا كوتىلداپ تۈرۈپ كەلتۈرىۋالغان،توي قىلىپ ئوغلىمىزمۇ 7ئايلىق بولۇپ قالدى،لىكىن ھازىر ئۆيدە كومپىيوتىر تالىشىپ قېلىش كىرزىسىغا دۇچ كەلدۇق.