يۇلتۇزۇم، مەڭگۈ يۇلتۇزدەك چاقنىغىن

مايسىخان

	سالام قىزىم! ئاچچىقى يامان ئاناڭ سېنىڭ ئەتىكى تەۋەللۇت كۈنىڭگە  دوستلىرى بىلەن،  بۇ سىرداش ماكاندا ساڭا تىلەكلەرنى تىلىمەكتە! ئوماق قىزىم ئەتە سېنىڭ ئون ياشقا كىرگەن قۇتلۇق تۇغۇلغان كۈنۈڭ، ئاتاڭنىڭ تۇنجى پەرزەنتىنى قولىغا ئېلىپ شاتلىقتىن كۈلگەن كۈنى، ئۆزىنىڭ ئاتا بولغانلىقىدىن سۆيۈنگەن، بەختكە چۆمگەن كۈنى، ئاتىلىق مېھىرنى تۇنجى قېتىم ھېس قىلغان كۈنى! يۇلتۇزۇم، ئۈچ يىل بۇرۇن، ئۆيگە كەلگەن تۇنجى كۈنى ھېلىمۇ ئېسىمدە، زالدىن چۇڭ- چۇڭ سۆزلەپ كىرۋاتقان سەن، ئىشىكنى ئېچىشىمغىلا داداڭنىڭ ئارقىسىغا ئۆتۈۋالدىڭ، ئەمما ئارىدىكى ئۇ تەڭقىسلىقنى يەنىلا ئۆزۈم بىر تەرەپ قىلىپ سېنى قۇچۇقۇمغا ئالغان ئىدىم، شۇ مىنۇتتا ساڭا چوقۇم ياخشى بىر ئانا بولىمەن دەپ ئۆز- ئۆزۈمگە ۋەدە بەرگەن ئىدىم. ئاللاھ خالىسا ۋەدەمنى ئورۇنلاۋاتىمەن، ھەم ئورۇنلايمەن قىزىم! قىزىم، مانا ئۈچ يىل ئۆتۈپتۇ، ھازىر سەن شۇ چاغدىكى ھەممە نەرسىگە ھەيران قالىدىغان، تىنماي سوئال سورايدىغان ئۇ كىچىك قىز ئەمەس، ھازىر سەن ئارقاڭدىكى ئۇكاڭنىڭ ياخشى بىر ئاچىسى، ئاچاڭنىڭ ئوماق سىڭلىسى، مۇئەللىمىڭنىڭ ياخشى بىر ئوقۇغۇچىسى، داداڭ ئىككىمىزنىڭ ئەقىللىق بىر قىزىسەن. بۇ ئۈچ يىل جەريانىدا مېنىڭ دېگەن يېرىمدىن چىقىپ كەلدىڭ، يۈرىگىڭدىن چوڭقۇر يېرىدىن ماڭا ئورۇن بەردىڭ، نەدىلا بول مېنىڭدىن سۆيۈنۈپ، مېنى ماختاپ، مەندەك بىر ئاچچىقى يامان ئاپاڭنىڭ بارلىقىدىن پەخىرلىنىپ كەلدىڭ. مەن مەكتەپ ئالدىدا پەيدا بولسام خوشاللىقتىن جايىڭدا سەكرەپ كېتىسەن، ساۋاقداشلىرىڭغا، ئوقۇتقۇچىلىرىڭغا <ئاپام> كەپتۇ، دەپ مېنى كۆرسۈتۈپ كېتىسەن، ھەر قېتىم  كۆزۈڭدىكى شۇ بالىلارچە خوشاللىقىڭنى، بەختلىك كۈلكەڭنى كۆرۈپ، ئۆزۈمنىڭ ئۈچ يىلدىن بېرىقى تارتقان جاپالىرىمنى ئۇنتۇپ، ئاللاھتىن ساڭا، ئاچا- سىڭىللىرىڭغا ئالەمچە خوشاللىق ۋە بەخت تىلەپ كېتىمەن. يۇلتۇزۇم، سېنڭ ئاشۇ كۆزلىرىڭ راستىنلا بىر چولپان يۇلتۇزغا ئوخشايدۇ، مەن سېنىڭ كۈلگەندىكى ئاشۇ بۇلاقتەك ئاۋازىڭغا بەك ئامراق، مەڭگۈ شۇنداق ئېچىلىپ كۈلگىن قىزىم، بۇلاقتەك ئاۋازىڭغا، قانداقلا ئىش بولسۇن كۈلۈپ تۇرىدىغان شۇ خۇش- خۇي مىجەزىڭگە كۆز تەگمىسۇن قىزىم! قىزىم، دۇنيادا ھېچقانداق بىر ئانا ئۆز پەرزەنتىنىڭ يارامسىز بولۇشىنى خالىمايدۇ، ئۈمىد قىلمايدۇ، مەنمۇ شۇ. شۇڭا قىزىم سەن مېنىڭ ئالدىمغا كەلگەن شۇ مىنۇتتىن باشلاپ، ئۆزۈمگە بەرگەن شۇ ۋەدەمنى ياخشى ئورۇنداش ئۈچۈن،  ساڭا ھەر جەھەتتىن تولىمۇ قاتتىق تەلەپ قويۇپ كېلىۋاتىمەن، بۇ ھەرگىزمۇ سېنى ياخشى كۆرمىگەنلىكىمدىن ئەمەس، بەلكى سېنىڭ كەلگۈسۈڭ ئۈچۈن. كەلگۈسىدە نەتىجىلەر قازىنىپ،  شەرەپ قۇچقىنىڭدا ئاشۇ چىرايلىق ئىسمىڭنىڭ ئارقىسىغا داداڭنىڭ ئىسمىنىمۇ قوشۇپ ئاتايدۇ ئەمەسمۇ، قىزىم؟! ئوماق قىزىم، ئاتا- ئانىنىڭ مېھىر- مۇھەببىتى پەقەت پەرزەنت ئۈچۈن، داداڭ ئىككىمىزنىڭمۇ بارلىقىمىز سىلەر ئاچا- سىڭىللار ئۈچۈن، سېنىڭ بۇنىڭدىن كېيىنكى ھاياتلىق سەپىرىڭدە جاپاغا چىدايدىغان، ھەممىمىزنىڭ پەخىرلەندۈردىغان، مەڭگۈ چاقناپ تۇرىدىغان چولپان يۇلتۇز بولۇشىڭنى ئۇلۇغ ئاللاھتىن تىلەيمەن!! خەيرى قىزىم، ئاپاڭ بىر ئاددى ئايال، ئادەتتىكى بىر ئانا خالاس. ئۇ نە يازغۇچى، شائىرلاردەك پاساھەتلىك قۇرلارنى تىزالمايدۇ، ئەمما قەلبىدە سەن ئۈچۈن تولىمۇ ئاجايىپ- ئاجايىپ تىلەكلەرنى تىلەيدۇ، بۇنى پەقەت ئانا بولغان شۇ قەلىب ھېس قىلالايدۇ! قىزىم، مېنىڭ تىلەكلىرىم مەڭگۈ، مەڭگۈ تۈگىمەيدۇ، بۈگۈن بۇ يەردە پەقەت ئەتىكى شۇ قۇتلۇق كۈنۈڭ ئۈچۈن سوۋغا سۈپىتىدە بۇ يازمىنى تەييارلىدىم، قۇبۇل ئەتكىن، تۇغۇلغان كۈنىڭگە يەنە بىر قېتىم مۇبارەك بولسۇن! ئۇلۇغ ئاللاھ ساڭا چەكسىز ئىمان، ئىنساپ ۋە دىيانەت ئاتا قىلسۇن! ھاياتلىق يولۇڭ كەڭ ھەم نۇرلۇق بولسۇن! بەخت، خوشاللىق ساڭا مەڭگۈ يار بولسۇن!!! ئاپاڭدىن: 2012-يىلى 10-ئاينىڭ 6- كۈنى

غۇنچەقىز

	ئالدى بىلەن ئۇماق سىڭلىم يۇلتۇزنىڭ تۇغۇلغان كۈنىنى چىن قەلبىمدىن تەبرىكلەيمەن،سىڭلىم تۇغۇلغان كۈنىڭىزگە مۇبارەك بولسۇن،ھەدىڭىز بەك يىراقتا تۇرۇپ سىزگە بۇ ئۆزى ئەڭ ياقتۇرىدىغان ھېكمەتنى تۇغۇلغان كۈن سوۋغىتى سۈپىتىدە تەقدىم ئەتمەكچى،قوبۇل قىلىڭ! ‹‹ئەي قىز!سۆزى،كۈلكىسى،يىغىسى ئەرزان قىز بولۇشتىن ساقلىنىڭ›› ‹‹سىز گۈللەر ئىچىدىكى ئەڭ چىرايلىقى بولمىسىڭىزمۇ پەقەت ۋە پەقەت بىردىنبىرى،سىز تۇغۇلىشىڭىزدىنلا ياراتقۇچى تەرىپىدىن مۇكەممەل ئەسەر بولۇپ يارىتىلغان،شائىر بولالمىسىڭىز شېئىىر بولۇڭ،يازغۇچى بولالمىسىڭىز يېزىلغۇچى بولۇڭ...›› بەك كۆپ ئىدى ،ئاپىڭىز دائىم شۇنداق ياشلىرىمنى ئېقىتىۋېتىدۇ،مەنغۇ بىر يىغلىغاق،يېرىم كېچىدە ئويغىنىپ كېتىشىم بىكار ئەمەسكەندە مېنىڭ،ئاپىڭىزنىڭ ئوتلۇق تىلەكلېرى مۇنبەرگە بىر كېلىپتۇ مانا،ئۇماق سىڭلىم يۇلتۇزقىز  ئىمان-ئىنساپلىق،سەرۋى-قامەتلىك،چىۋەر-چاققان چوڭ بولغايسىز، توغۇلغان كۆنىڭىزگە مۇبارەككككك ھەدىڭىز غۇنچە قىز

ئەسمەتۇللاھ

	مەرىم . قىزىڭىزنىڭ ئەتىكى قۇتلۇق كۈنىنى چىن دىلىمدىن تەبرىكلەيمەن . ئۇنى مۇنبەردىكى بارلىق دوستلار ئۈچۈن سۈيۈپ قۇيۇڭ . جاپا تارتتىڭىز . جاپايىڭىز بەدىلىگە ئۈچ ئۇماقنىڭ ھۆرمىتىگە ، سۈيىشىگە ئىرىشتىڭىز . مانا بۇ سىزنىڭ بەختىڭىز ھەم خۇشاللىقىڭىز . بەختىڭىز ئۈچۈن چۇقۇم غەيرەت قىلىڭ .

anar

	‏ۋاقىت نىمە دىگەن تېز ئۆتكەن  ،تۇنجى قېتىم يۇلتۇز بىلەن ئۇچراشقىنىمدا مەرىم ۋاي بۇ قىزىم پەقەت يات كۆرمەيدۇ ھىچكىمنى ،تولا گېپىڭىزنى قىلىپ تونۇپ كەتتى سىزنىمۇ دىگەنىدى ،كۆرۈشكىنىمىزدە دىگەندەكلا يىراقتىن ئانار ئاپا دەپ يۈگۈرۈپ كېلىپ سۆيۈپ شۇنداق ئامراقلىقىمنى كەلتۈرگەن ،مانا شۇ كۈنلەرگىمۇ ئۈچ يىل بولۇپتۇ .گەرچە بۈگۈن كۆرۈشسەكمۇ بۇ يەردە يەنىلا ئاۋال تۇغۇلغان كۈنىڭىزنى تەبرىكلەيمەن ،ئاللاھ دىن  بەخت تەلىيىڭىزنى،ئىنسابىڭىزنى تىلەيمەن قىزىم ! خوشاللىق ھەر ۋاقىت سىزگە يار بولسۇن !

گۇلخان

	يۇلتۇز قىز.مۇشۇ تاپتا ئائىلىدىكىلەر بىللە ئولتۇرۇپ ئولتۇرۇپ خۇشال ھالداتۇغۇلغان كۈنىڭىزنى تەبرىكلەۋاتقانسىز،مەنمۇ قۇرۇق بولسىمۇ ئەڭ خەيىرلىك تىلەكلىرىم بىلەن سىزنى تەبرىكلەۋاتىمەن، مەڭگۈ ئەڭ ئىللىق مىھرى -مۇھەببەت ئىچىدە ياشىغايسىز. مىھرى مۇھەببەت ئىچىدە چوڭ بولغان ئادەم باشقىلارغىمۇ مىھرى-مۇھەببەت بىرەلەيدۇ ھەم ئۆزىمۇ بەھرىمەن بۇلالايدۇ.بۇنداق ئادەم ئەڭ بەخىتلىك ئادەم.

قىسمەت

	قادىر ئاللاھتىن قىزلىرىمنىڭ بەختىنى تىلەيمەن! قىزلىرىم ئۈچۈن بارلىقىنى ئاتاۋاتقان قەدىردانىمنىڭ جاپاسىدىن گۈللەر ئۈنگەي! تەڭ ياشاپ، تەڭ قېرىغايمىز!

گۇلخان

	ئانار سىزنىمۇ چۇقۇم بار دەپ ئويلىۋىدىم شۇ يەردە،سىزمۇ ئويناپ كەتتىڭىزغۇ دەيمەن شۇنداق

گۈلئايىم

	يۇلتۇز قىز تۇغۇلغان كۇنىڭىزگە مۇبارەك بولسۇن ئوماق قىز  ئاللاھ بەختىڭىزنى بەرسۇن! سىزنىڭ شۇنداق ئاق كۆڭۈل مىھرىبان كۆيۇمچان ئاپىڭىز باركەن، جاھاندىكى نۇرغۇن ئاپىلار بىرەلمەيدىغان قۇربانلىقلارنى بىرەلەيدىغان بىر ئۇلۇغ ئاپىڭىز باركەن ، بۇ ئاپىڭىز سىلەرنىڭ خۇشاللىقىڭلار ئۇچۇن كۆپ بەدەل تۆلىدى ، ئاپىڭىزنىڭ ئۇمۇدىنى يەردە قويمىغايسىلەر مەڭگۈ بەخىتلىك بولغايسىلەر!

مايسىخان

	گۇلخان يوللىغان ۋاقتى  2012-يىلى 10-ئاينىڭ 7-كۈنى 20:44 ئانار سىزنىمۇ چۇقۇم بار دەپ ئويلىۋىدىم  ... ئۇنى بىر دېمەڭ، 12 كىچىك بالا قىلمىغان جىدەلنى مۇشۇ ئانار قىلدى ئۇرۋېتەي دېسەم مېھمان بوپ قالدى

peacelife212

	ئاللاھ، بەختىنى، ئۆمرىنى، ئىنساۋىنى، ئىمانىنى ، ئەقىل-پاراسىتى ۋە گۈزەل ئەدەب-خۇلقىنى بەرسۇن.ئامىن!!! بەختلىك بولۇڭ، سالامەت بۇلۇڭ. سىلەرگە خۇشاللىق يار بولسۇن.  تۇغۇلغان كۈنىڭىزگە مۇبارەك بولسۇن، مەرىم بىلەن قىسمەتنىڭ ئۈمىدىنى ئاقلىغايسىز،  يەردە قويمىغايسىز.