مۇھەممەتئېلى زۇنۇن تەشنائى 73 يېشىدا بىز بىلەن ۋىدالاشتى

ئەسمەتۇللاھ

	ئابدۇللا ئابدۇرېھىمنىڭ شىنلاڭ مىكرو بىلوگىدىكى ئۇچۇرغا ئاساسلانغاندا، بۈگۈنكى دەۋر ئۇيغۇر ئەدەبىياتىمىزنىڭ مۇھىم ۋەكىللىرىدىن بىرى، ئاتاقلىق شائىر، دراماتورگ، ئۇستاز ئەدىب مۇھەممەتئېلى زۇنۇن تەشنايى 2012-يىلى 9-ئاينىڭ 6-كۈنى كېچە سائەت 1 دە ئۈرۈمچىدە كېسەللىك سەۋەبىدىن بىز بىلەن ۋاقىتسىز ۋىدالاشتى! ئۇلۇغ ئاللاھ مەرھۇمنىڭ ياتقان جايىنى جەننەتتە قىلسۇن! ھەرھۇم ھەققىدە: مۇھەممەتئېلى زۇنۇن تەشنائى 1939-يىلى قەشقەردە تۇغۇلغان. 1958-يىلى شىنجاڭ ئۇنىۋېرسىتېتىنىڭ ئەدەبىيات فاكۇلتېتىنى پۈتتۈرگەن. ئۈرۈمچى، يېڭىشەھەر قاتارلىق جايلاردا ئوقۇتقۇچى، قەشقەر ۋىلايەتلىك سەنئەت ئۆمىكى، شىنجاڭ ناخشا ئۇسۇل ئۆمىكى قاتارلىق جايلاردا كەسپىي ئىجادىيەتچى بولۇپ ئىشلىگەن. 1955-يىلى ئەسەرلىرى ئېلان قىلىنىشقا باشلىغان. 1982-يىلى جۇڭگو يازغۇچىلار جەمئىيىتىگە ئەزا بولۇپ كىرگەن. ئاساسلىق ئەسەرلىرىدىن:«گۈلمېھرى»، «سەھەردىكى ئۇچرىشىش»، «ئاچا سىڭىل»، «جەنۇبتىكى جەڭ مارىشى» قاتارلىق شېئىر، ھېكايە، دراما توپلاملىرى بار. «قۇچاقلا ئۇ سېنىڭ داداڭ» ناملىق شېئىرى تۇنجى نۆۋەتلىك مەملىكەتلىك ئاز سانلىق مىللەت ئەسەرلىرىنى باھالاشتا 1-دەرىجىلىك مۇكاپاتقا، «گۈلمېھرى» داستانى ئاپتونوم رايون بويىچە 2-دەرىجىلىك ئىجادىيەت مۇكاپاتىغا، «ئۈچ دوست» غەربىي شىمال بويىچە مۇنەۋۋەر تېلېۋىزىيە تىياتىرى سېنارىيىسى مۇكاپاتىغا ئېرىشكەن. مۇھەممەتئېلى زۇنۇن تەشنائى ھاياتىنىڭ كۆپ قىسمىنى خەلقىمىزنىڭ ئەدەبىيات-سەنئەت ئىشلىرىغا بېغىشلىغان تۆھپىكارلىرىمىزنىڭ بىرى ئىدى، ئۇنىڭ شېئىرلىرى ناخشا قىلىپ ئېيتىلىپ، خەلقىمىزنىڭ قەلب تۆرىدىن چوڭقۇر ئورۇن ئالغان بولسا، نادىر دراما ئەسەرلىرى پۈتۈن شىنجاڭ دىيارىدا ئوينىلىپ، كەڭ خەلقىمىزگە بەدىئىي زوق ئاتا قىلغان ئىدى. مەرھۇمنىڭ ۋاپاتى ئۇيغۇر ئەدەبىيات-سەنئىتى ئۈچۈن زور يوقىتىش، تور بېكىتىمىزنىڭ نامىدىن مەرھۇمنىڭ ۋاپاتىغا چوڭقۇر قايغۇرىمىز. مەنبە - نۇر تورى

مودەن

	مەرھۇمنىڭ ياتقان يېرى جەننەتتە بولغاي....

زۆھرە

	ياتقان يېرى جەننەتتە بولسۇن!!!

ئاھۇ

	مەرھۇم شۇنداق مىھرىبان كىشى ئىدى...

مايسىخان

	مەشھۇر دراماتورگ، شائىر، يازغۇچى مۇھەممەتئېلى زۇنۇن (تەشنائىي) 1939 – يىلى قەشقەر شەھىرىدە دۇنياغا كەلگەن. 1953 – يىلىدىن 1955 – يىلىغىچە قەشقەر شەھەرلىك 1 – ئوتتۇرا مەكتەپتە، 1955 – يىلىدىن 1958 – يىلىغىچە سابىق شىنجاڭ ئىنىستىتۇتى (ھازىرقى شىنجاڭ ئۇنىۋېرسىتېتى) نىڭ ئۇيغۇر تىل – ئەدەبىيات كەسپىدە ئوقۇغان. 1958 – يىلىدىن 1978 – يىلىغىچە ئۈرۈمچى ۋە قەشقەردە ئوقۇتقۇچىلىق خىزمىتى بىلەن شوغۇللانغان. 1978 – يىلىدىن 1990 – يىلىغىچە قەشقەر ۋىلايەتلىك دراما - ناخشا – ئۇسسۇل ئۆمىكىدە، 1990 – يىلىدىن 2000 – يىلىغىچە شىنجاڭ ئوپېرا ئۆمىكى (ھازىرقى شىنجاڭ سەنئەت يۇرتى ئوپېرا تىياتىرى) دە كەسپىي ئىجادىيەتچى بولۇپ ئىشلىگەن. 2000 – يىلى پېنسىيەگە چىققان. 2012 – يىلى 9 – ئاينىڭ 6 – كۈنى 73 يېشىدا كېسەل سەۋەبى بىلەن ئۈرۈمچىدە ئالەمدىن ئۆتكەن.     مۇھەممەتئېلى زۇنۇن 1951 – يىلى ئېلان قىلغان تۇنجى شېئىرى بىلەن ئەدەبىي ئىجادىيەت سېپىگە قەدەم قويغان. ئەدەبىي ئىجادىيەتنىڭ شېئىر (ناخشا تېكستى) ، دراما، پروزا قاتارلىق ھەر قايسى تۈرلىرىدە نۇرغۇن سەرخىل ئەسەرلەرنى قالدۇرغان. ئۇ ھاياتىدا «ۋىسال سەھىرى»، «كارۋان ناخشىسى»، «گۈلمېھرى»، «ئائىلە ناخشىسى»، «مەشرەپ»، «قەدىردان ئاتا» (نەشردىن چىقىش ئالدىدا) قاتارلىق ئالتە پارچە شېئىرلار توپلىمىنى نەشر قىلدۇرغان بولۇپ، «چالا تەككەن ئوق»، «قۇچاقلا، ئۇ سېنىڭ داداڭ» قاتارلىق شېئىرلىرى ئۇيغۇر بۈگۈنكى زامان شېئىرىيىتىدە سالماقلىق تەسىر قوزغىغان. «بادام دوپپا» (رابىيە مۇھەممەت ئورۇنلىغان)، «كارۋان ناخشىسى» (رابىيە مۇھەممەت ئورۇنلىغان)، «ئەخلاق - ئادەم زىننىتى» (ئايشەم قېيۇم ئورۇنلىغان)، «قەدىردان ئاتا» (مۇھەممەتئىمىن ئەمەت ئورۇنلىغان)، «مەشرەپ» (ئابدۇللا ئابدۇرېھىم ئورۇنلىغان)، «ئايال قەلبى» (دىلنار ئابدۇللا ئورۇنلىغان)، «تۇنجى سۆيگۈ» (ئابدۇللا ئابدۇرېھىم ئورۇنلىغان)، «راست» (ئابدۇللا ئابدۇرېھىم ئورۇنلىغان)، «مەن دولان» (ئابلەت ئابلىكىم ئورۇنلىغان) قاتارلىق كۈي نەزمىلىرى (ناخشا تېكىستلىرى) نى يېزىپ ئۇيغۇر بۈگۈنكى زامان ناخشا - مۇزىكا سەنئىتىگە ئۆچمەس تۆھپىلەرنى قوشقان.     ئۇ يازغان «ھەسىنىكام ئاچچىق، ئامۇتى تاتلىق»، «كېچىككەن توي»، «مۇقام ئۇستازى»، «كۆمۈلمەس ئىزلار»، «قايچا قۇدا»، «ئەزىزە»، «رابىيە – سەئدىن»، «مەسلىھەت چېيى»، «جەنۇبتىكى جەڭ مارشى» ... قاتارلىق نەچچە ئون درامىلىرى تەڭرىتاغنىڭ جەنۇب – شىمالىدا كەڭ كۆلەمدە ئوينىلىپ زور تەسىر قوزغىغان. «جەنۇبتىكى جەڭ مارشى»، «ئەزىزە» قاتارلىق درامىلار توپلىمى نەشر قىلىنغان. «شىكەر شەنبە خۇمارى» قاتارلىق ئېتوتلىرى جەمئىيىتىمىزدە مۇئەييەن دەرىجىدە ئېتوت قىزغىنلىقىنى قوزغىغان. ئۇنىڭ «قوش مەسچىد» (ئوتتۇرا مەكتەپ ئەدەبىيات دەرسلىكىگە كىرگۈزۈلگەن) قاتارلىق ھېكايىلىرى، «مۇناپىقنىڭ ئۆلۈمى» قاتارلىق پوۋستلىرى ئۇيغۇر بۈگۈنكى زامان پروزىچىلىقىدا مۆتىۋەر ئورۇن تۇرىدۇ.     بۈگۈنكى زامان ئۇيغۇر ئەدەبىياتىنىڭ ئەھمەد زىيائى، ئابدۇرېھىم ئۆتكۈردىن كېيىنكى تەسىركار تىل ئۇستازلىرىدىن سانىلىدىغان مۇھەممەتئېلى زۇنۇن (تەشنائىي) ئەدەبىياتىمىزنىڭ شېئىر (ناخشا تېكستى)، دراما، پروزا ژانېرلىرىدا سەرخىل ئەسەرلەرنى ۋۇجۇدقا چىقارغانلىقى بىلەن كەسىپداشلىرىنىڭ ئورتاق ئېتىرابىغا، ئەل - ئاۋامنىڭ زور ئالقىشىغا سازاۋەر بولغان يېتۈك ئەدىبتۇر.

Aydar

	مەشرەپ دىگەن ناخشىنىڭ تېكىستىغا كۆيەتتىم جۇمۇ...

گۇلخان

	يەنە بىر ئۇستازدىن ئايرىلىپتۇق-دە. ياراتقۇچىمىز ئۆز مەرھەمىتىنى ئايىمىغاي!

رەھمەتۇللاھ

	بىر گىپىم كەلگەنتى ئەسمەتۇللاھ بۇرادىرىمنى رەنجىتىپ قويماي دەپ دىمىدىم

ئەسمەتۇللاھ

	رەھمەتۇللاھ يوللىغان ۋاقتى  2012-يىلى 9-ئاينىڭ 6-كۈنى 22:10 بىر گىپىم كەلگەنتى ئەسمەتۇللاھ بۇرادىرىمنى رەنجىتىپ ق ... نىمە گىپىڭىز بولسا دەڭە . مەنچۇ ئوڭ مەڭزىمگە ئۇرسا سول مەڭزىمنى تۇتۇپ بىرىدىغانلاردىن ، سىزدىن رەنجىگەن كۈڭۈلنىچۇ ئىتقا تاشلاپ بىرىمەن ئاداش .

رەھمەتۇللاھ

	ئەسمەتۇللاھ يوللىغان ۋاقتى  2012-يىلى 9-ئاينىڭ 7-كۈنى 06:27 نىمە گىپىڭىز بولسا دەڭە . مەنچۇ ئوڭ مەڭزىمگە ئۇرسا سو ... باشقا گەپقۇ ئەمەس ئاداش  شۇ ھەممە مۇنبەردە ئېقىپ يۈرگەن تىمىلارنى بۇ مۇنبەرگە يۆتكىمىسەك ئۇبدان بۇلامدىكىن دىگەنتىم. بەزى تىمىلار چەكلىك مۇنبەرلەردىلا تۇرۇپ قالىدىكەن ئۇنداق تىمىلارنى ئەھمىيتى باردەپ قارىساق تەۋسىيە قىلساق ئەمما بەزى تىمىلار قايسى مۇنبەرگە قارىسا شۇنىڭغا ئۈنۈپ بولغان  بۇ پەقەت شەخسى قارىشىم