ئابدۇكېرىمكا، سىزمۇ مەندەك قىلالامسىز؟

Qismet

	ئوقۇرمەن، تور، رادىيو -تېلېۋىزور، گېزىت-ژۇرناللارنى ئاۋات قىلىپ تۇرىدىغان ھەر ساھە ئەربابلىرىنى، چولپانلارنى (بۇ يەردە نوقۇل سەنئەت ساھەسىدىكى چولپانلار كۆزدە تۇتۇلمىدى) كۆرگەن چېغىڭىزدا، شۇلارنىڭ قانداق قۇربانلىقلارنى بېرىپ، بۈگۈنگە كەلگەنلىكىنى پەرەز قىلغانسىزمۇ؟      ئەگەر سىز چولپان بولسىڭىز، ئائىلىڭىزدىكىلەرنىڭ، ئەتراپىڭىزدىكى سىزگە مۇھتاج قېرىنداشلىرىڭىزنىڭ سىزگە قانداق يۈرەك سۆزى بارلىقىنى، ھەپتە-ھەپتىلەپ ئۆيگە كېلەلمەي، بىر كۈنلەردە كۆزلىرىڭىزدىن ئۇيقۇ تۆكۈلۈپ ئۆيگە كىرگىنىڭىزدە، چىرايىڭىزغا قاراپ يۈرەك سۆزلىرىنى ئىچىگە يۈتۈۋېتىدىغانلىقىنى ئويلاپ باققانسىزمۇ؟      مەن چولپان ئەمەس، لېكىن، ئۆز كەسپىمدە ئاز-تولا بىر ئىش قىلىپ، رادىيو -تېلېۋىزور، گېزىت-ژۇرناللاردا ئايدا بىرەر قېتىم چىقىپ قويىدىغان كىشىمەن.      شىركەتتە، مەكتەپتە ئىشلىرىم بىر قەدەر كۆپ، شىركىتىمىز قىلىۋاتقان تور، يۇمشاق دېتال قۇرۇلۇشلىرى، دۆلەت ۋە ئاپتونوم رايون دەرىجىلىك تۈرلەر خېلى بار. ئوقۇغۇچىلىرىم «مۇئەللىم، مۇئەللىم» دەپ ئانىسىنىڭ ئاغزىغا تەلمۈرگەن قۇش بالىسىدەك ماڭا تەشنا. شۇ سەۋەبلەرگە كۆرە، پات-پات ئۆيگە كەچ قايتىمەن، ئۆيدىكىلەر مېنى ساقلاپ، تاماقمۇ يېمەي ئولتۇرغان بولىدۇ. قىزلىرىمنىڭ چاڭقىغان يۈرىكىگە بىر-ئىككى ئېغىز تاتلىق گەپ قىلسام قىلدىم، قىلمىسام يوق تاماقنى ئالدىراپ يەپ، چالا-پۇچۇق دۇئا قىلىپلا خاس خانەمگە كىرىپ كېتىمەن. كىتاب كۆرىمەن، يازىمەن، كومپيۇتېر ئالدىدا ئولتۇرۇپ ئاللىقانداق ئىجىر-مىجىر كود دۆۋىسىگە چۆكىمەن.      بەزىدە قىزلىرىمنى مۇزېيغا، كىتابخانىغا، باغچىلارغا ئېلىپ بارىمەن. ئۇلار بىلەن نەچچە يۈز يىل ئىلگىرىكى دەۋرلەرگە قايتىپ مۇڭلىنىمەن، چۆچەكلەرنىڭ ساماۋى تۇيغۇلىرىدا ئەللەيلىنىمەن، لەگلەك ئۇچۇرىمەن، بىلەن يۈگۈرەيمەن، ئىشقىلىپ بىردەم بولسىمۇ، بالىلىرىمنىڭ دۇنياسىغا سىڭىپ كېتىمەن.      چارچاپ ھالىمىز قالمىغاندا مىنېرال سۇ بىلەن يۈز-كۆزىمىزنى يۇيۇپ، يېقىن ئەتراپتىكى ئاشخانىغا ماڭىمىز. قاش قارايغاندا ئۆيگە قايتقاچ قىزلىرىم بىلەن مۇڭدىشىپ قالىمەن. نەچچە ۋاقىتتىن بېرى مەندىن ئەيمىنىپ، جىددىيلىكىمگە دەخلى قىلماي دەپ ئويلىغان قىزلىرىم مۇشۇ ۋاقىتلاردا يۈرەك سۆزىنى ئويلىمايلا تۆكۈپ تاشلايدۇ.      -قىزلىرىم، خۇش بولدۇڭلارمۇ؟      ئۇلار چۇرقىرىشىدۇ:      -خۇش بولدۇق!!!      گەپنى سەرلەپ، مىسقاللاپ، لېكىن يۈرەككە تەگكۈدەك قىلىدىغان كىچىك قىزىم پوسۇققىدە دەپ سالىدۇ:      -پات-پات ئوينىغىلى كەلگەن بولساق ياخشى بولاتتى      -ماقۇل، قىزىم.      -كەچتە بىز بىلەن بىللە تاماق يېگەن بولسىڭىز، تاماقتىن كېيىن بىردەم بىزگە ئۆگىنىش قىلىشىپ بەرسىڭىز، بىللە ئوينىسىڭىز…      مەن تۇرۇپ قالىمەن، نېمانچە ئاددىي تەلەپلەر بۇ؟!      -بولىدۇ قىزىم، شۇنداق قىلىمەن.      كۈنلەر ئۆتىدۇ، قىزىمنىڭ «بىزگە ئۆگىنىش قىلىشىپ بەرسىڭىز، بىللە ئوينىسىڭىز» دېگەن تەلىپىنى ئورۇنلاشنىڭ ئاددىي ئىش ئەمەسلىكىنى، ھەدېگەندە ئۇنداق قىلالمايۋاتقانلىقىم ئارقىلىق ئىسپاتلاپ قويىمەن.      لېكىن، ئاخىر ئۆزۈمدىن خۇش بولدۇم، قىزلىرىمنى خۇش قىلدىم. چۈنكى، ئارىدىن نەچچە ئاي ئۆتكەندىكى بۈگۈنكى كۈندە مەن خىزمەت ۋە ئائىلىنى توقۇنۇشتۇرماي ياشاشنى ئۆگىنىۋالغان ئىدىم، خىزمەتنى تېخىمۇ ياخشى قىلىۋاتقان، قىزلىرىمنى تېخىمۇ ياخشى تەربىيەلەۋاتقان ئىدىم.      ئۇچتۇرپاندىكى ئوقۇشىنى ئۈرۈمچىگە يۆتكىگەندە، مەكتەپ رەھبەرلىكىنىڭ «مەكتىپىمىز نۇقتىلىق مەكتەپ، قىزىڭىزدىن بىر ئايدىن كېيىن سىناق ئالىمىز، ئۆتەلمىسە بىزدىمۇ ئامال يوق» دېگەن قارشى ئېلىش سۆزىنى ئاڭلىغان قىزىم، مەكتەپتە كېلىپ ئۈچ ئاي بولغاندىلا ئەخلاق، ئۆگىنىش جەھەتتە ھەممىنىڭ ئالدىغا ئۆتۈپ سىنىپ باشلىقى بولۇپ سايلانغان، ساۋاقداشلىرىغا ھەر جەھەتتە ياردەم بېرىپ، ئۈلگە بولۇپ مەكتەپ مۇدىرىنى ھېلىقى سۆزى ئۈچۈن خىجىل قىلىپ قويغان ئىدى.      شۇنداق، مەن ياخشى ياشاشنى، ياخشى خىزمەت قىلىشنى ئۆگىنىۋالدىم، ئابدۇكېرىمكا، سىزمۇ مەندەك قىلالامسىز؟      ھۆرمەتلىك ئوقۇرمەن، يازمىنىڭ ئاخىرىنى ئوقۇپ، گاڭگىراپ قالدىڭىزغۇ دەيمەن، «ئابدۇكېرىم ئابلىز بىلەن سۆھبەت»نىڭ 59:25 لۇق يېرىدىن باشلاپ كۆرۈپ چىقىڭ، ئاندىن تەسىراتىڭىزنى بۇ يەردە ئورتاقلىشىشنى ئۇنتۇماڭ.      مەنبەسى: قىسمەت بلوگى      يازما مەنزىلى: http://www.qismet.me/abdukerimka.html

باتۇرچەۋەنداز

	بۇ سۇئالنى ئابدۇكىرىم ئابلىز قويسا توغرا بۇلاتتىغۇ

مايسىخان

	ئابدۇكېرىم ئابلىز ئايالىنىڭ ۋە بالىلىرىنىڭ يۈرەك سۆزلىرىدىن چوقۇم بەك سۆيۈندى. مېنىڭچە ھەقىقىي بىر نەتىجە قازانغان ئەر كىشىنىڭ ئارقىسىدا قوللايدىغان، زور قۇربانلىق بېرەلەيدىغان بىر ئايالنىڭ بولىدىغانلىقى بۇ بىر ھەقىقەت، ئەمما يەنە شۇنداق بىر بىلىمسىز ئەرلىرىمىزمۇ باركىن، ئازراق نەتىجە قازىنىپلا ئۆزىنىڭ ئۆتمىشىنى، بۇ نەتىجىلەرگە ئېرىشىش جەريانىدا ئۆزىنىڭ جاپاسى ۋە تىرىشچانلىقلىرى بىلەن بىرگە يەنە كىملەرنىڭ يېنىدا بولغانلىقىنى پاك- پاكىز ئۇنۇتۇپ ئانىسىنىڭ قورسىقىدىن ئەشۇنداق چۈشكەندەكلا ھەممىنى ئۇنتۇپ، ۋاقتى كەلسە شۇ بىچارە ئايالدىن تېنىپمۇ ئۈلگىرىدۇ. ئابدۇكېرىم ئابلىزنىڭ چوڭ ئوغلىنىڭ يۈرەك سۆزلىرىنى ئاڭلاپ كۆزلىرىمدىن ياش چىقىپ كەتتى، ھەر قېتىم رۇقىيەنى ئاپام، ئاپام دېگەندە شۇنداق سۆيۈندۈم. سەۋەبىنى ئوچۇق دىمىدىم، چۈنكى بۇ ئۇلارنىڭ شەخسى تۇرمۇشىغا تاقاشقانلىقى ئۈچۈن. قانداقلا بولمىسۇن رۇقىيەنىڭ جاپاسى يەردە قالماپتۇ. ئاخىردا ئابدۇكېرىم ئابلىز باشچىلىقىدىكى بارلىق ئاتىلارغا، ئەرلەرگە سىلەرنىڭ زىممەڭلاردىكى يۈكنىڭ ئېغىرلىقىنى، بېسىمىڭلارنىڭ ئېغىرلىقىنى ھېس قىلىپ، بىز ئاياللار قولىمىزدىن كېلىشىچە قوللاپ، يولى كەلسە قۇربانلىقلارنى بېرىپ سىلەرنىڭ نىشانىڭلارغا يېتىش جەريانىدىكى سۇلماس ھاسساڭلار بولۇشقا رازىبىز، لېكىن شۇنداق بىر كۈنلەر كەلگەندە بۇ ئەقىدىنى يەر قىلمىساڭلارلا،  بىز ئاياللار ھەر قانداق جاپاغا چىداشقا، بىر ئائىلە كىشىلىرىنىڭ چىرايىدىكى كۈلكە ۋە خاتىرجەملىكنى كۆرۈش ئۈچۈن چېچىمىزنى سۈپۈرگە، قولىمىز كۆسەي قىلىشقا ھەر ۋاقىت تەيياربىز، بۇ بارلىق ئاياللارنىڭ قەلىب نىداسى.

مايسىخان

	باتۇرچەۋەنداز يوللىغان ۋاقتى  2012-يىلى 8-ئاينىڭ 14-كۈنى 04:51 بۇ سۇئالنى ئابدۇكىرىم ئابلىز قويسا توغرا بۇلاتتىغۇ{:slee ... مەيلى كىملا قويسۇن، ئىشقىلىپ مېنىڭ يۈرەك سۆزۈم، كەسىپمۇ مۇھىم، ئائىلە ۋە بالىلارمۇ مۇھىم. سىز گەرچە ئاجايىپ نەتىجىلەرنى قازىنىپ دۇنياغا تونۇلۇپ، مىليۇنىر بوپ كېتىپ بالىلار ياخشى تەربىيە ئالالمىسا، سىزگە قانمىسا، ئائىلىنىڭ مېھرىنى ھېس قىلالمىسا ئۇ چاغدا ئۇ نەتىجە نۆل بولىدۇ.

مەرىپەت

	تېما بىلەن ئىنكاسنىڭ خۇلاسسىسى بىرگە قارشى ئىككى نەتىجە بىلەن تامام.

مايسىخان

	مەرىپەت يوللىغان ۋاقتى  2012-يىلى 8-ئاينىڭ 15-كۈنى 19:20 تېما بىلەن ئىنكاسنىڭ خۇلاسسىسى بىرگە قارشى ئىككى نەتى ... مەرىپەتكە كۆپ رەھمەت، كىم نەتىجىسىنى ئېلان قىلاركىن دەپ تەققازا بوپ ئولتۇرغان بىزمۇ

anar

	مايسىخان يوللىغان ۋاقتى  2012-يىلى 8-ئاينىڭ 16-كۈنى 16:33 مەرىپەتكە كۆپ رەھمەت، كىم نەتىجىسىنى ئېلان قىلاركىن  ... ‏شۇ ، ئوقۇغان ئادەم ئوخشىمايدىكەنلا

مايسىخان

	anar يوللىغان ۋاقتى  2012-يىلى 8-ئاينىڭ 16-كۈنى 16:37 ‏شۇ ، ئوقۇغان ئادەم ئوخشىمايدىكەنلا  مەنمۇ مانا ئەمدى چوڭقۇر ھېس قىلىۋاتىمەن

Aydar

	مەرىپەتگۈل: خۇلاسىنى چىقىرىشقا ئالدىرىمىسىلا، ئابدىكىرىم ئابلىز ئۆزى كىرىپ چىقىرىپ بىرىدۇ مانداق.

مايسىخان

	Aydar يوللىغان ۋاقتى  2012-يىلى 8-ئاينىڭ 16-كۈنى 16:46 مەرىپەتگۈل: خۇلاسىنى چىقىرىشقا ئالدىرىمىسىلا، ئابدىك ... جېنىم خۇلاسىنى مەن ئەمەس مەرىپەت دوستىمىز چىقىرىپ بېرىپتۇ، مەن قارا قوساقلىقىمغا باقماي ئازراق جۆلۈپ ساپتىكەنمەن، قارىغاندا مەرىپەت دوستىمىزنىڭ كۆڭلىگە قاتتىق كەلگەن ئوخشايدۇ