ناۋادا

مەرۋەرى

	مەرۋەرى ئۇزۇن بوپتىكەن تورنىڭ ئالدىدا بۇنداق ئېچىلىپ يېيىلىپ ئولتۇرۇپ باقمىغىلى، ياق تورنىڭ ئالدىدىلا ئەمەس، تاماق ئۈستىلى ئالدىدىمۇ شۇنداق. يىلنىڭ بېشىدا چاپلاشقان بۇ بىر كىچىككىنە بىئارامچىلىق تا ھازىرغىچە قىيناۋاتىدۇ، ئائىلەمدىكىلەر بىلەن بىللە بىر يەرگە چىقىش، بالىلارنى سىرتلارغا ئەپچىقىپ ئوينىتىش، دوستلىرىم بىلەن يىغىلىشىپ ئولتۇرۇش دېگەنلەرنىڭ ھوزۇرنى سۈرۈپ باقمىغىلى دەل يېرىم يىل بوپتۇ، قىسمەتنىڭ گېپى بويىچە< ھاياتنىڭ خوۋلىقىنى كۆرمىگىلى يېرىم يىل بوپتۇ>. تۈنۈگۈن قىسمەتنىڭ يېڭى يازمىسىنى كۆرۈپ شۇنداق خوش بولۇپ ئۆتمۈشلىرىمگە قايتقاندەك بولۇپ ھاياجاندا بىر نەرسىلەرنى يازغان ئىدىم، ئەپسۇس بىر قېتىملىق ئىس- تۈتەك تازلاشتا ئۇ يازما يوق بولدى. يازمىلا يوق بولسا مەيلىتى، مەرۋەرىنىڭ خوشاللىقىمۇ تەڭ يوق بولدى، ئەسلىمىلىرى يوق بولدى، يېرىم يىلدىن بۇيان ئورنىدىن دەس تۇرۇپ يازغان ئىنكاسلىرى رەھىمسىزلەرچە يوق بولدى. بوپتۇ-، ھاياتلىقتا نىمىلەرنى يوقاتمايدۇ كىشى، مەرۋەرى نىمىلىرىنى يوقاتمىغان، يەنە تىك تۇرۇپ ياشاپ كېلىۋاتىدۇ، چۈنكى مەرۋەرى شۇنداق بىر نەرسىلەرنى ساقلىغانكى،  ئۇ بولسىمۇ ۋىجدان، غورۇر، سەمىمىيەت، ساداقەت. مانا مۇشۇلارنى ساقلىسىلا مەرۋەرى يەنە مەڭگۈ تىك تۇرۇپ ياشىيالايدۇ. مەرۋەرىنىڭ قىسقىغىنە ھاياتىدا نۇرغۇن ئىشلار يۈز بەرگەن، بۇنىڭ ئىچىدە خوشاللىق ئەسلىمىلىرىدىن، ئازاپلىق ئەسلىمىلىرى ناھايتى كۆپ. ئەمما مەرۋەرى شۇ ئازاپلار ئىچىدىن خوشاللىقنى ئۆزى تاپقان، ئۆزىلا خوش بولۇپ قالماي باشقىلارغىمۇ خوشاللىق ئاتا قىلغان. مەرۋەرى 16 يىللىق سېستىرالىق ھاياتىدا قانچىلىغان ئىڭرىغان جانلارنىڭ دۇئاسىنى ئالغان، شۇنداق دۇئالارنى ئاڭلىغىنىدا < ئاللاھ مۇشۇ ساۋاپلارنىڭ ئەجىرىنى ھەممەيلەنگە ئاتا قىل، كېسەل كارۋېتىدىكى دادامغا ئاتا قىل> دەپ يىغلىغان ئىدى، ئاللاھ ياخشى بەندىسىنىڭ دۇئاسىنىمۇ ئاجايىپ تېز ئىجاۋەت قىلىدىكەن، شۇ يېرىم جان دادىسى نەچچە قېتىملىق خەتەرلىك مىنۇتلاردىن ئامان قىلىپ مانا تا ھازىرغا قەدەر ياشاپ كېلىۋاتىدۇ، ئاللاھقا مىڭ شۈكرىلەر بولسۇن! مەرۋەرى ھاياتنى، تۇرمۇشنى سۆيەتتى، باشقىلارنى ھەۋەس قىلغۇزغىدەك ۋە ھەسەت قىلغۇزغىدەك تۇرمۇشلارغا ئېرىشكەن، ئەپسۇس ھايات ئۇنىڭغا كۈلۈپ باقمىدى، ئۇنىڭ ئەقىدىسى يەر بولدى، لېكىن ئۇ تەقدىردىن ۋايسىمىدى، يىغلىمىدى، پەقەت ئوماق قىزىنى يېتىلىگەن ھالدا مۇشۇ قوينى كەڭ رەھىمسىز شەھەردىكى كىشىلەر توپىغا قېتىلدى. مەرۋەرى ئاجايىپ جاپالار ئىچىدە ياشىماقتا ئىدى، لېكىن ئۇنىڭ جاسارىتى ئالدىدا بۇ جاپالار مەرۋەرىگە باش ئەگمەي ئامالى يوق ئىدى. مەرۋەرى مانا شۇنداق ياشاپ بۇ رەھىمسىز شەھەردە ئۆز ئورنىنى تاپتى، ئېسىل دوستلارنى تاپتى. مەرۋەرى يەنە نۇرغۇن خورلۇقلارنىمۇ تارتتى، ئىزالارغا ئۇچرىدى، ئۇ شۇنچە قىيىنچىلىق ئالدىدا يىغلىمىغان ئىدى، ئەمما ئەرزىمەس كىشىلەر تەرىپىدىن ئىزاغا ئۇچرىغاندا قىزىدىن يوشۇرۇن تازا يىغلىدى. ئەسلىدىمۇ يىغلايدىغان ۋاقتى كېلىپ قالغان ئىدى، مەرۋەرى ھېلىمۇ يىغلىمايدىكەن، تاغدەك دادىسى يىقىلسا يىغلىمىدى، سەككىز يىللىق ئەقىدىسى خارلانغاندا يىغلىمىدى، زەيكەش ئۆيلەردە بىرەر ئىككى كۈن ئاچ قالغاندىمۇ يىغلىمىدى، چۈنكى ئۇ بۇ قىيىنچىلىقلارنىڭ ھامان ئۆتۈپ كېتىدىغانلىقىنى بىلەتتى، ئۆزىگە ئىشىنەتتى. راست ئۇ دىگىنىنى قىلدى، زەيكەش ئۆيدىن چىرايلىق بىنا ئۆيلەرگە كۆچتى، تۆۋەن مۇئاشلىق ئىش ئورنىدىن نوپۇزلۇق بىر دوختۇرخانىغا تەكلىپ بىلەن باردى، قىزى ئۇنىڭ جاپاسىغا چۇشلۇق ناھايتى ئەقىللىق ئىش ئۇقىدىغان چوڭ بولىۋاتاتتى، ئەمدى مەرۋەرى كۈلمەي كىم كۈلسۇن! كۈل مەرۋەرى كۈل، مەڭگۈ مۇشۇنداق قاقاھلاپ، باشقىلارنى ھەيرەتتە قالدۇرغىدەك كۈل! تاققا- تۇققىدا يېزىلغاندەك، مەرۋەرىنىڭ تۇرمىشىدا چوڭ ئۆزگۈرۈش بولدى، بىر قېتىملىق مەغلۇبىيەتتىن كېيىن ئۇ يەنە بىر قېتىم ئۆزىگە تەشنا قارا كۆزلەر ئۈچۈن بۇ تەۋەكۈلچىلىكنى قىلدى، مەرۋەرى مۇھەببەت ئۈچۈن دېگەندىن كۆرە، قىسمەتنى ياخشى كۆرگەندىن كۆرە، ئاتا- ئانا مېھرىگە تەشنا يۈرەكلەرنى، ئاتا- ئانا مېھرى ئىزدەپ يۈرگەن شۇ گۆدەكلەرنى، شۇلارنىڭ كۈلكىسىنى دەپ بۇ تۇرمۇشقا قەدەم قويدى دىگىنى تۈزۈك، بۇ ھەقىقەت.  قىسمەتنىڭ شۇنچە ئىزدەشلىرى، شۇنچە سۆزلىرى تەسىر قىلمىغان،  بىر قىزچاقنىڭ ئوماق، تاتلىق، چۈچۈك ئاۋازى بىلەن مەرۋەرىنىڭ مۇزلىغان قەلبى ئويغاندى، مۇزلار ئېرىدى، شۇ سەۋەپلىك مەرۋەرى  بۈگۈنكى بۇ ئۈچ يىللىق تارىخى بار تۇرمۇشنىڭ ئېگىسى بولدى. مەرۋەرى ئىككى كۈندىن بۇيان ئۆتمۈشلىرىگە غەرىق بولىۋاتىدۇ، بەلكىم بۇ ياخشىلىقتۇر ئىنشائاللا! بۈگۈن تۇرۇپ شۇنى ئويلاپ قالدىم، ناۋادا مەرۋەرى تۇيۇقسىز كىشىلەر توپىدىن يۈتۈپ كەتسە قانداق بولار؟ ناۋادا مەرۋەرى يەتتە قىزلىرىمدىكى دوستلار خوش ئېيتىپ چىقىپ كەتسە قانداق بولار؟ ناۋادا مەرۋەرى يۈزسىزرەك بولسا قانداق بولار؟ ناۋادا مەرۋەرىنىڭ باغرى سەل قاتتىق بولۇپ قالسا قانداق بولار؟ ناۋادا مەرۋەرى.......................... شۇنداق بىر تەۋەكۈلچىلىك قىلىپ قالسا ئۇنىڭ تەقدىرى قانداق بولار؟

بۇلاق

	مەرۋەرى ھەدىسى ناۋادا يوقاپ كەتسە،ناۋادا....بولۇپ كەتسە بۇلاق قۇرۇپ كېتىدۇ جۇمۇ!!!

باتۇرچەۋەنداز

	نىماندا جىق ناۋادا  ئۇ،قىلاي دەپلا  قىلغىلى بولدىغان ناۋادىلا ئەمەستۇ

ياپراق520

	ئوفففف  نىمانچە كۆپ ناۋادا بۇ؟؟؟   جىنىم تولا ئادەم قورقۇتماڭە

Aydar

	مەرۋەرى يەتتە قىزدىن چىقىپ كەتسە، چاپاننى دولىسىغا سېلىپ يەتتە قىزدىن يۈتىدىغىنىنىڭ بىرىنچىسى مەن جۇمۇ ...

Qismet

	Aydar يوللىغان ۋاقتى  2012-يىلى 6-ئاينىڭ 3-كۈنى 21:34 مەرۋەرى يەتتە قىزدىن چىقىپ كەتسە، چاپاننى دولىسىغا سې ... ۋاي، ۋاي، نەگە كېتىدىكەن بۇ؟ شۇ تاپتا يېنىمدا تۇرۇپ، بۇ ئىنكاسنى ئوقۇپ كۈلۈۋاتىدۇ بۇ ئاداش

Qismet

	مەرۋەرى ئۇزۇن بوپتىكەن تورنىڭ ئالدىدا بۇنداق ئېچىلىپ يېيىلىپ ئولتۇرۇپ باقمىغىلى، ياق تورنىڭ ئالدىدىلا ئەمەس، تاماق ئۈستىلى ئالدىدىمۇ شۇنداق. يىلنىڭ بېشىدا چاپلاشقان بۇ بىر كىچىككىنە بىئارامچىلىق تا ھازىرغىچە قىيناۋاتىدۇ، ئائىلەمدىكىلەر بىلەن بىللە بىر يەرگە چىقىش، بالىلارنى سىرتلارغا ئەپچىقىپ ئوينىتىش، دوستلىرىم بىلەن يىغىلىشىپ ئولتۇرۇش دېگەنلەرنىڭ ھوزۇرنى سۈرۈپ باقمىغىلى دەل يېرىم يىل بوپتۇ، قىسمەتنىڭ گېپى بويىچە< ھاياتنىڭ خوۋلىقىنى كۆرمىگىلى يېرىم يىل بوپتۇ>. جىڭ گەپ بولدى ماۋۇ، دېمىسىمۇ 2011-نىڭ ئاخىرىدىن تا ھازىرغىچە تېتىپ بىر تاماق يېمىدى بۇ . ئۇنىڭ ئۈستىگە مەن تاماق ئېتىشنى ئۇنتۇپ قالغىلى خېلى بوپتىكەن، قەتئىي ئەسلىيەلمىدىم دېسە ... تۈنۈگۈن قىسمەتنىڭ يېڭى يازمىسىنى كۆرۈپ شۇنداق خوش بولۇپ ئۆتمۈشلىرىمگە قايتقاندەك بولۇپ ھاياجاندا بىر نەرسىلەرنى يازغان ئىدىم، ئەپسۇس بىر قېتىملىق ئىس- تۈتەك تازلاشتا ئۇ يازما يوق بولدى. يازمىلا يوق بولسا مەيلىتى، مەرۋەرىنىڭ خوشاللىقىمۇ تەڭ يوق بولدى، ئەسلىمىلىرى يوق بولدى، يېرىم يىلدىن بۇيان ئورنىدىن دەس تۇرۇپ يازغان ئىنكاسلىرى رەھىمسىزلەرچە يوق بولدى. يوق بولمىدى، تېمىنى رەتلەش زۆرۈرىيىتى تۇغۇلغان، لېكىن بۈگۈن شىركەتتە ھېسابات بوغىمىز دەپ، باش قاشلىغىلى چول يوق، شۇڭا ۋاقىتلىق تاقاپ قويۇپ تۇردۇم، مانا ئېچىۋەتتىم. مېنى قاچان چۈشىنەرسەن سەن مەرۋەرى ئىككى كۈندىن بۇيان ئۆتمۈشلىرىگە غەرىق بولىۋاتىدۇ، بەلكىم بۇ ياخشىلىقتۇر ئىنشائاللا! بۈگۈن تۇرۇپ شۇنى ئويلاپ قالدىم، ناۋادا مەرۋەرى تۇيۇقسىز كىشىلەر توپىدىن يۈتۈپ كەتسە قانداق بولار؟ ناۋادا مەرۋەرى يەتتە قىزلىرىمدىكى دوستلار خوش ئېيتىپ چىقىپ كەتسە قانداق بولار؟ ناۋادا مەرۋەرى يۈزسىزرەك بولسا قانداق بولار؟ ناۋادا مەرۋەرىنىڭ باغرى سەل قاتتىق بولۇپ قالسا قانداق بولار؟ ناۋادا مەرۋەرى.......................... شۇنداق بىر تەۋەكۈلچىلىك قىلىپ قالسا ئۇنىڭ تەقدىرى قانداق بولار؟ بەزىلەرگە جان لازىم ئەمەسمۇ نېمە؟ بىر كۈن ئۆيدە بولمىسام، يازغان نەرسىسىنى قارا!

روھچىن

	مەرۋەرى  نەچچە يىللىق ھاياتىدا نەچچەمىڭ يىللىق تۇرمۇشنىڭ كۆرەشلىرىگە قاتناشقان، كۈلكىلەرنىڭ ساختا ساپلىقىنى بىلەلەيدىغان، قۇشۇقتىكىنىڭ ھەسەل ياكى زەھەرلىكىنى بىلەلەيدىغان، چىقىپ كەتمەكچى بولسا نىمىشقا چىقىپ كىتىشنى، قېلىپ قالسا نىمىشقا قېلىپ قالىدىغانلىقىنى بىلەلەيدىغان، چىقىپ كەتكەندىن كىيىن تۈلەيدىغان،بەدەل بىلەن چىداشلىق بەرگەندىن كىيىن تۈلەيدىغان بەدەلنىڭ قايسىنىڭ ئېغىرلىقىنى بىلەلەيدىغان بىر ئايال. ئۇ قىز بۇلۇپ باققان، ئانا بۇلۇپ باققان، بالا بۇلۇپ باققان، ئاچا بۇلۇپ باققان، سىرداش بۇلۇپ باققان، يىلانغا ھېس داشلىق قىلغۇچى بۇلۇپ باققان بىر ئايال  دىمەكچى مەنكى تۇرمۇشتىكى ھەربىر ئىسىمنىڭ قانداق مەسئۇلىيەتلەرنى يۈكلەيدىغانلىقىنى بىلەلەيدىغان بىر ئايال ! شادلىقنىڭ ئۆمۈرى قايغۇنىڭكىدىن ئۇزۇن كۈلۈپ ياشا ! قۇيۇن ئاسمان پەلەك كۆتۈرلۈپ كەلسىمۇ 10 مىنۇت چىدىساڭ غايىپ بۇلىدۇ. سۈيۈملۈك ئائىلىڭىزنىڭ رۈجەكلىرىدىن قىزىل كۆزلىرى بىلەن ماراپ ھالال كۈمپۈتىڭىزگە تىل ئۇزارتقان ناتىۋانلارنىڭ كۆزى ئۇزۇنغا بارماي كۆر بۇلىدۇدە ھاجەتخانىنىمۇ تاپالماي ئىشتانغا سۈزمە قىلىدىغان كۈنگە قالىدۇ. چۈنكى مارىغان كۆزلەر تىز كاردىن چىقىدۇ. بۇيەردىكى مەسىلە مەرۋەرى شۇ كۈنلەرگىچە سەۋىر قىلىپ چىداشلىق بىرىشتە . . .  مەرۋەرى ئويلاپ بېقىشى كىرەككى  بۇنداق قۇيۇندا قېلىشى مەرۋەرىنىڭ تۇنجى قېتىملىقى ئەمەس ئۈستىدە ئۈزى دەپ ئۆتكەندەك ئاسماننى تىشىۋەتكۈدەك قۇيۇنلارمۇ يۇقالدىيۇ يەنە مەرۋەرى تەبەسسۇمى بىلەن ياشاۋاتىدۇ. ئەگەر يۇقاپ كەتمەكچى بولسا مەرۋەرىگە ھەرۋاقىت يول ئۇچۇق ! يەتتە قىزلىرىم مەرۋەرىسىزمۇ يۈرىشىۋىرىدۇ  بىركىملەرنىڭ رىزقى مەرۋەرىنىڭ قۇلىدا ئەمەس ھېچكىم ھېچنىمە بۇلۇپ قالمايدۇ . جاھان يەنە بۇرۇنقىدەك ئايلىنىۋىرىدۇ كىملەر يۇقاپ كەتمىگەن جاھان بۇ  ئەمما ھەقىقەت شۇكى كىم قەيدىسا چوڭ زىياننى شۇ تارتىدۇ چۇنكى تۇرمۇشنىڭ تۈگمىسنى قەيدىغانلار ئەمەس قەيسەر تۇرغانلار يىشەلەيدۇ.

ئارسلان

	ناۋادا سىز كىشىلەر توپىدىن يۈتۈپ كەتسىڭز ... نەچچە كۈنگىچە ئىز-دىرىكىڭىزنى قىلىمىز ، ئەسلەيمىز ، لېكىن ۋاقىت يەنىلا ئونتۇلدۇرىدۇ . ناۋادا سىز يەتتە قىزلىرىمدىكى دوسلىرىڭىزغا خوش ئېيتىپ چىقىپ كەتسىڭىز .... ھەيرانلىقتىن بىر-بىرىمىزگە سۇئال قۇيىمىز . ناۋادا سىز يۈزسىزرەك بولسىڭىز .... توۋا ، روھچىن ئۈچۈن غەم يىگەن ، يەتتە قىزدىكىلەرنىڭ يىغىسىنى يىغلاپ ، كۈلكىسىگە بىللە جۈر بولغان ، مۇنبەر ئۈچۈن مىھنەت قىلغان مەرىم زادى مۇشۇمىدۇ دەپ ئويلاپ كىتىمىز. ناۋادا باغرى تاشلىق قىلسىڭىز ... يائاللا ، قۇرسىقىدىكىنى ئۇمىقى ئۈچۈن بولسىمۇ بۇرۇنقى خۇشخۇي خۇشچاقچاقلىقىنى ، ئەڭ مۇھىمى ئۈزىنىڭ مىھرىبان ئانا ئىكەنلىكىنى  ئۇنتۇپ قالمىسىچۇ ، ئۈزىگە ئوخشىماي قاپتۇ دەپ ئەپسۇسلىنىمىز . ناۋادا سىز تەۋەككۈلچىلىك قىلسىڭىز .... مۇنبەر ئۈچۈن بولسىغۇ ھۇررا دەپ مەدەت بىرىمىز ، ئەگەر تۇرمۇشنىڭ كىچىككىنە داۋالغۇشلىرى ئۈچۈن بولسا ، روھچىن دىگەندەك قېيدىغان ھابدالنىڭ خۇرجۇنىغا زىيان دەپ ئولتۇرماقتىن باشقا ئامالىمىز يوق . قىسقىسى بۇ ناۋادالارنىڭ ھېچقايسىسىنى ياختۇرمىدىم . ئەگەر يۇقاپ كەتمەكچى بولسا مەرۋەرىگە ھەرۋاقىت يول ئۇچۇق ! يەتتە قىزلىرىم مەرۋەرىسىزمۇ يۈرىشىۋىرىدۇ  بىركىملەرنىڭ رىزقى مەرۋەرىنىڭ قۇلىدا ئەمەس ھېچكىم ھېچنىمە بۇلۇپ قالمايدۇ . جاھان يەنە بۇرۇنقىدەك ئايلىنىۋىرىدۇ كىملەر يۇقاپ كەتمىگەن جاھان بۇ  ئەمما ھەقىقەت شۇكى كىم قەيدىسا چوڭ زىياننى شۇ تارتىدۇ چۇنكى تۇرمۇشنىڭ تۈگمىسنى قەيدىغانلار ئەمەس قەيسەر تۇرغانلار يىشەلەيدۇ. ( روھچىن ھىكمەتلىرىدىن )

مەرۋەرى

	بىلمىدىم، ئىككى ئۈچ كۈندىن بېرى ئۆتمۈشلىرىم كۆز ئالدىمدا كىنو لېنتىسىدەك تىزىلىپ، توغرا قىلغانلىرىم، خاتا قىلغانلىرىم ئۈستىدە كۆپ ئويلىنىۋاتىمەن. يۇقۇردا ئېيتقاندەك مەن يېرىم يىلدىن بۇيان شۇنداق نىمجان بولۇپ قالدىم، چوڭ كېسەلمۇ ئەمەس، پەقەت خەيرىلىك ئىشلارنىڭ ئازراق جاپاسى، ئەلۋەتتە ئانىلار شۇنىڭ ئۈچۈن ئۇلۇغلىنىدۇ، شۇنىڭ ئۈچۈن بىر ئۆمۈر مەدىھيىلىنىۋاتىدۇ. پېقىرمۇ ئىككىنچى قېتىم ئانا بولۇش شەرىپىگە مۇيەسسەر بولدۇم، لېكىن ياشنىڭ چوڭ بولۇشى، سالامەتلىكنىڭ ياخشى بولماسلىقى سەۋەپلىك بۇ قېتىم بەكلا بىر نىمجان بولۇپ قالدىم، ئۇشۇق بولۇپ قالدىم. بەزىدە قىسمەت مېنىڭ مەرۋەرى ياكى ئەڭ كىچىك قىزىم ئىكەنلىكىمنىمۇ پەرىق ئەتمىگىدەك غەلۋە قىلىمەن، ئەمما راستىنلا مەيلىم ئەمەس، بەزىدە قىسمەتنى بىئارام قىلىپمۇ قويىمەن، ئارقىدىن ئۆز- ئۆزۈمنى تىللايمەن، مانا مۇشۇنداق ئۇششاق ئىشلار تۈپەيلى كەيپىياتىمنى زادىلا كونتۇرۇل قىلالماي قېلىۋاتقان پۈرسەتلەردە، ئۆزۈمنىڭ تۇرمۇشۇمنىڭ بىر قىسمى، خوشھاللىقىمنىڭ بىر قىسمى بولغان بۇ مۇنبەردە ئازراق سۈركۈلۈش بولۇشى مېنىڭ كەيپىياتىمنى بەكلا ئاستىن- ئۈستۈن قىلىۋەتتى، ئەلۋەتتە مېنىڭ ھازىرقى تۇرمۇشۇم، بەختلىك، خاتىرجەم ئائىلەم ئۈچۈن بۇنداق ئىشلار بىر ئەرزىمەس ئىشلار ئىدى، ئۇنداق ئىشلار ئۈچۈن ئۆزۈمنى ۋە يورۇق دۇنياغا كۆز ئېچىش ئالدىدىكى ئاشۇ كىچىك جاننى بۇنچە قىينىماسلىقىم كېرەك ئىدى، ئەمما دەمالىققا ئادەم بۇنى ھېس قىلالمايدىكەن. تېمىنى يوللاپ بولۇپ ئىچىم بوشىغاندەك بولدى، كۆڭلۈم يورىدى. بىر ئىككى ئىنكاسمۇ چۈشكەن بولدى، بىر ئۇخلاپ قوپقاندىن كېيىن تېمىنى قايتا ئوقۇپ ئارقىدىكى شۇ ناۋادىلارنى ئوقۇپ ئۆزۈممۇ ھەيران قالدىم، ئۆزۈمدىن مۇشۇ ناۋادىلاردىن قايسىسىنى قىلالايدىغانلىقىمنى سوراپ باقتىم. كىشىلەر توپىدىن يوقاپ كەتسەم، يەنە بىر ناتونۇش كىشىلەر توپىغا قېتىلىپ ياشايدىكەنمەن، بىراقلا يۈتۈپ كېتىش مېنىڭ تاللىشىم ئەمەس، ئاللاھنىڭ قولىدىكى ئىش تۇرسا، مەن بۇنىڭغا قانداقمۇ قارىشى تۇراي، قانداق بولۇپ بۇنى ئويلىدىم؟ ناۋادا يەتتە قىزلىرىمدىن يوقاپ كەتسەم، مەن قەدىرلىگەن، مېنى قەدىرلىگەن دوستلىرىمغا نىمە دەيمەن؟ بىراقلا يوقاپ كېتىپ چىدامدۇ بۇ يۈرەك؟ بىر كۈن، ئىككى كۈن.... بىر ئاي، ئىككى ئاي......ھەتتا بىر يىل، ھامان بىر كۈنى كىرىسەن، يىراقلاردىن تونۇش يازمىلارنى ئوقۇيسەن، كۆزلىرىڭگە ياش كېلىدۇ. شۇ چاغدا < پىتنىڭ ئاچچىققىدا چاپاننى ئوتقا سال>غىنىڭنى ھېس قىلىسەن. ياق مەرۋەرى سېنىڭ قېنىڭدا، سېنىڭ ھاياتلىق لوغىتىڭدە <يۈزسىزلىك> دېگەن بۇ سۆز يوق تۇرسا يۈزسىزلىكنى قانداق قىلالايسەن، يۈزسىزلىكنى قىلغان بولساڭ، بۈگۈنكىدەك شۇ كۆڭۈلسىزلىك ئۇرىقلىرى مۇنبەرگىچە يامىرارمىدى، ئەخمەق؟! سېنىڭ باغرىڭ قاتتىق بولغان بولسا، بۈگۈنكى كۈندە سەن يالغۇز ئولتۇرغان بولاتتىڭ، سېنىڭ باغرىڭ قاتتىق بولغان بولسا بالىلىرىڭ يىراقلاردىن يۇرتلىرىنى، باققانلارنى، ئاچچىق تولغاق يەپ تۇغقانلارنى تاشلاپ سېنىڭ ئەتتىراپىڭدا < ئاپوي، ئاپوي> دېمىگەن بولاتتى، ئەگەر سېنىڭ باغرىڭ قاتتىق بولغان بولسا، قىسمەت تەنھالىقىغا خاتىمە بېرىپ بۇ تۇرمۇشنى قۇرمىغان بولاتتى. سېنىڭ باغرىڭ قاتتىق بولسا.................. سەن يولۋاس قىزىسەن، ئەمما سەندە باغرى تاشلىقتىن، ياۋايىلىقتىن ئەسەر يوق. داداڭنىڭ < مېنىڭ قىزىم بىر پارچە ئوت، نەدە پەيدا بولسا شۇ يەر ئىللىيدۇ> دېگەن شۇ سۆزىنى ئۇنۇتما! شۇڭا سەن ئۆزۈڭدە يوق نەرسىلەرنى ئىزدىمە! ئۆزۈڭنى قىينىما، ساڭا ئىشەنگەنلەرنى ئۈمىدسىز قويما! ساڭا تەلمۈرگەنلەرنى مېھىرسىز قويما! ناۋادا، سەن يەنە بىر قېتىم تەۋەكۈلچىلىك قىلساڭ ئەڭ ئاۋال بەختلىك بىر ئۇۋىنى ئۆز قولۇڭ بىلەن ۋەيران قىلىسەن، قارا كۆزلەرنى يەنە بىر قېتىم يېتىملىك كوچىسىغا تاشلايسەن، ئۇلار ھاياتتىن، تۇرمۇشتىن، ئاتا- ئانا دېگەن بۇ نامدىن شۇنداق ئۈمىدسىزلىندۇكى سەن بۇنى تەسەۋۋۇر قىلالمايسەن. يىقىلغان يېرىدىن دەس تۇرۇپ، بىر قەدەم، بىر قەدەمدىن ئىلگىرلەپ، نىشانى ئۈچۈن، سىزلەر ئۈچۈن كۈرەش قىلۋاتقان بىرىنى يېرىم يولدا يەنە بىر قېتىم ئۆز قولۇڭ بىلەن يىقىتىسەن. ئەرزىمدۇ؟ مۇشۇ ناۋادىلار سېنىڭ ھازىرقى مۇشۇ بەختلىك تۇرمۇشىڭنى، شۇ ئوماقلارنى، شۇ ۋاپادارىڭنى تېگىشىشىڭگە ئەرزىمدۇ؟؟؟ مەرۋەرى سوئاللارغا يىغىنچاقلاپ شۇنداق جاۋاپ بەردى. ياق....ھەممىسىگىلا ياق، مەرۋەرى ھاياتنى ئۇنداق سۆيمەيدۇ، مەرۋەرى ئۆزى سۆيگەن ۋە ئۆزىنى سۆيگەنلەرگە بۇنداق جاۋاپ قايتۇرمايدۇ، چۈنكى مەرۋەرىدە ھاياتقا، تۇرمۇشقا شۇنداق بىر ئىشەنچ باركى، ئۇ ئىشەنچ ئوت بولۇپ ھەر دائىم ئۇنىڭ يۈرىكىدە لاۋۇلداپ تۇرىدۇ. ئەرزىمەس ئىشلار ئۈچۈن يېزىلىپ سىلەرنى بىئارام قىلغىنىم ئۈچۈن بەك سەت كەچۈرۈم سورايمەن! كەتكۈم بار، بەك يىراق- يىراق بىر جايغا، كەتكۈم بار يىراقلاپ ئۆزۈمدىن ھەتتا. تارتىشىپ قالىمەن كىمگىدۇر بىراق، كۆزۈمگە ياش تولۇپ غەمكىن سىياقتا. نۇرىيە ئابدۇكېرىم قەلىمىدىن.