يەتتە قىزلىرىم تورى قانداق قۇرۇلدى؟

Qismet

	يەتتە قىزلىرىم تورى قانداق قۇرۇلدى؟       بىلوگىم قۇرۇلۇپ ئەتىسى (2009-يىلى 2-ئاينىڭ 11–كۈنى) مەرھۇم ئانام ۋاپاتىنىڭ 5 يىللىق خاتىرە كۈنى ئىدى. ياقا يۇرتتا ياشاۋاتقان، يۈرىكى پۇچۇلانغان قارا يېتىم بولمىش مەن بۇ كۈننى ياتاقتا يالغۇز ئۆتكۈزدۈم. ئانام بىلەن بىللە ئۆتكۈزگەن 26 يىل، ئانامدىن كېيىن قالغاندىن كېيىنكى قىسمەتلەرگە تويۇنغان 5 يىل كۆز ئالدىمدىن غۇۋا ئۆتۈشكە باشلىدى. ياق، چاناقلىرىمدا لىغىرلاۋاتقان ياش ئەسلىمىنى ئېنىق كۆرۈشكە يول قويمىدى.       ئانامغا دۇئا قىلدىم، پانىيدا بىز ئۈچۈنلا، بىزنىڭ غېمىمىزنى يەپلا ياشىغان شۇ ئۇلۇغ ئىنسانغا ئاللاھنىڭ رەھمىتىنى تىلەپ دۇئا قىلدىم. يىغلاپ تۇرۇپ «بۈگۈن دۇنيادىكى ئەڭ ئۇلۇغ ئانا ۋاپات بولغان كۈن» دېگەن يازمىنى يازدىم.       ئانام رەھمىتى ئۈچۈن، يەنە بىر ئىش قىلماقچى بولۇپ، تولۇق 10 كۈن تەييارلىق قىلدىم.       شۇنداق قىلىپ، 2009-يىلى 3-ئاينىڭ 20-كۈنى تۈركىي مىللەتلەرنىڭ كاتتا مەرىكىسى نورۇز ھارپىسىدا «يەتتە قىزلىرىم خانىم-قىزلار تورى» ئىشقا كىرىشتى.       ئۆزۈم چوڭ بولغان ئۇچتۇرپانغا، ئۇچتۇرپاندىكى ئوتيۈرەك قىزلارنىڭ سەردارلىرى بولغان يەتتە قىزغا، تېخىمۇ مۇھىمى ئانام رەھمىتىگە بېغىشلانغان بۇ تور بېكەت شۇنداق دۇنياغا كەلدى.       بېكەت قۇرۇلغاندىكى تور نامى yetteqiz.com ئىدى. تور بېكەت قۇرۇلۇپلا تورداشلارنىڭ قىزغىن قوللىشىغا مۇيەسسەر بولدى. كۈندىن-كۈنگە مۇكەممەللىشىشكە باشلىدى.       تور بېكەتنىڭ شوئار مۇنداق ئىدى: خانىم–قىزلىرىمىزغا ئاز–تولا سىرداش بولالىساق، ئۇلار بىلەن مۇڭدىشالىساق، بىزنىڭ مەقسىتىمىز شۇ ئىدى.       قېنى بۇياققا كېلىڭ، سىردىشايلى!       بېكەت قۇرۇلۇپ نەچچە ئايدىن، شىنجاڭنىڭ تورى تاقىلىپ قالدى. بىر يىلدىن كېيىن، تور ئېچىلغاندىن كېيىن، تور نامىنىڭ تېخىمۇ قىسقا بولۇشى كۆزدە تۇتۇلۇپ، 7qiz.com نامى ئىشلىتىلدى. لېكىن، ئۇ چاغلاردا مۇنبەر قۇرۇشقا يول قويۇلمىغاچ، CMS سىستېمىسىدىن پايدىلىنىپ بېكەتنى ئېچىۋالدۇق. نەچچە ئايدىن كېيىن، ئەسلىدىكى مۇنبەر سىستېمىسىنى قايتا ئىشقا كىرىشتۈردۇق.       ئىلگىرى تور بېكەتنى ئۆزۈم بىر قوللۇق باشقۇرۇپ كەلگەن ئىدىم. تور بېكەت قايتا ئېچىۋېتىلگەندىن كېيىن، ئانچە-مۇنچە تېما يېزىپ يۈرگەننى ھېسابقا ئالمىغاندا بېكەتنىڭ ئىشلىرىغا كۆپ ئارىلاشمىدىم. ئىشلىرىمنىڭ كۆپىيىپ كېتىشى، توغرىسى بېكىتىمىزدىكى بۇرادەرلەرگە «بېكەتنى مەن كۆرگەن كۆزدە كۆرىدۇ» دەپ ئىشەنگەنلىكىم ئۈچۈن، شۇنداق بولدى.       شۇ تاپتا «بېكەت تېخنىكى» دېگەن سالاھىيەتتە ياشاپ تۇرۇپتىمەن.

peacelife212

	شۇنداق، بىر توربەتنى روياپقا چىقارماق، روياپقا چىقارغاندىن كېيىن، ئۇنى تەرەققى قىلدۇرماق، راۋاجلاندۇرماق، مەۋجۇتلۇقىنى ساقلىماقنىڭ ئۆزىمۇ بىر مۇشكۈل ئىش، بۇنىڭغا يۈكسەك  مەسئۇلىيەتچانلىق، ئىنچىكىلىك، تېخنىكا، روھى بېسىمغا بەداشلىق بىرەلەيدىغان جاسارەت،  يەنە تېخى ئىختىساد بولمىسا بولمايدۇ، زېھىن قۇۋۋەت چەكسىز خورايدۇ، مۇنبەرنى باشقۇرماق تېخىمۇ ئاسان ئەمەس، چۈنكى، مۇنبەردىكى ئەسەرلەرنىڭ سۈپىتى، ئۇنىڭ قانۇنغا ئۇيغۇن ياكى ئۇيغۇن ئەمەسلىكى، دىنى ماقالىلارنىڭ توغرا ياكى قانداقلىقىنى ئايرىشتا ئېھتىياتچان بولماي  بولمايدۇ.       سىزدەك جاپاكەشلەرنىڭ تىنى سالامەت، تۇرمۇشى خاتىرجەم بولسۇن!!!ئىشلىرىڭلار قۇتلۇق بولسۇن.

مەرۋەرى

	بۈگۈن دەرت تۆكىشىدىغان كۈن ئىكەن-دە مەن بۇ تور بەتنى ئانىرىمنىڭ تەۋسىيىسى بىلەن تونۇغان ئىدىم، ئانىرىم بىلەن كىرىپ تېمىلارغا ئىنكاسلارنى يېزىشقان بولدۇق. بىر چاغدا قىسمەت ئاتلىق مۇنبەر مەسئۇلى مېنىڭ بىر ئىنكاسىمغا: - ئۇكىلىرىم، مېنىڭ سىلەر بىلەن تەڭتۇش قىزىم بار جۇمۇ، دەپتۇ. ئانار ئىككىمىز، ئاللا چوڭ بىر كىشىگە چاقچاق قىلىپ قويدۇقمۇ قانداق- دىيىشىپ، بىر ئىككى كۈن كىرىپ قويۇپ، گەپ قىلماي چىقىپ كەتتۇق. لېكىن بىر كۈنى بۇ قارىينىڭ بىر يازمىسىنى ئوقۇپ، قىسمەتنىڭ بىز ئويلىغاندەك ئۇنداق مويسىپىت ئەمەس، كىچىك بىر بالاڭزا ئىكەنلىكىنى بىلدۇق، شۇنىڭ بىلەن ،مۇنبەردە يەنە ئىنكاسلارنى يېزىشقان بولدۇق. مانا شۇ يازما، شۇ كۈندىكى بىر ئۇچۇر بىزنىڭ تەقدىرىمىزنى ئۆزگەرتىپ، ھازىرقى بىر ئائىلە كىشىلىرىگە ئايلاندۇردى. بەزىدە تۇرۇپ- تۇرۇپ: - ئېسسىت، شۇ ئۇچۇرنى يازمىسامچۇ، دەپ قويىمەن شۇنداق قىلىپ، يەنە بىر يازمىدا ئېيتقاندەك بۇ مۇنبەرگە ھېچقانداق كۈچ چىقارمايلا، بىر كېچىدە مۇنبەر مەسئۇلى بولۇپ قالدىم، لېكىن بۇرۇنقى كونا دوستلار ۋە ئۇلارنىڭ مۇنبەرگە چىقارغان مىننەتسىز ئەجىرىنى كۆزدە تۇتۇپ، جۇلالىقنىمۇ مۇنبەر مەسئۇلى قىلىشنى لايىق كۆردۇق. مانا، مۇنبەر سىلەر كۆرگەندەك ھازىرقى ھالەتتە كېتىپ بارىدۇ، < مۇنبەر مەسئۇلى> دېگەن چوڭ قالپاقنى كىيگەنگە چۇشلۇق، چوڭ ئىش قىلىپ بېرەلمىسەممۇ، نادىر يازمىلارنى يوللىمىساممۇ، ئۆتكۈر ئىنكاسلارنى يازمىساممۇ، ئەمما قىسمەتنىڭ ئىشىنىپ تاپشۇرغان بۇ ۋەزىپىسىنى كۈچۈمنىڭ بېرىچە ئورۇنداشقا تىرىشىپ كېلىۋاتىمەن، ۋەزىپە دېگەندىن كۆرە مېنىڭ ھازىرقى بىردىن- بىر ئىشىم مۇشۇ مۇنبەرگە كىرىپ دوستلار بىلەن ھال- مۇڭ بولۇش دېسەممۇ بولىدۇ. قىسمەتنىڭ ئىشەنگەن بۇرادەرلىرىنىڭ ياردىمىدە، ئىشىنىمەنكى مۇنبەر بۇنىڭدىن كېيىن تېخىمۇ گۈللەنگۈسى! قىسمەت، سىزنىڭ ئەمدى بۇ مۇنبەرلەرگە بۇرۇنقىدەك ۋاقىت چىقىرىپ ئولتۇرۇغىدەك ۋاقتىڭىز، زېھنىڭىز يوق. سىز قىلىدىغان نى نى چوڭ ئىشلار سىزنى كۈتۈپ تۇرۇپتۇ، ئەڭ ئاۋال سالامەتلىكىڭىزنى ئاسىراپ كەلگۈسىدىكى شۇ پىلانلىرىڭىزغا، نىشانىڭىزغا تېزرەك يېتىشىڭىزگە تىلەكداشمەن! گەرچە، بۇنداق تىلەكلەرنى كۈندە نەچچە قېتىم دېسەممۇ، يەنە بۇ يەردە دېگۈم كەلدى! ئاللاھ بالىلىرىمىزنىڭ تەلىيى ئۈچۈن سىز ئامان بولۇڭ!

ياپراق520

	ۋاي ئاللاھ بەختىڭلارنى بەرسۇن ئەزىزلەر ،،،،،،، بەك تەسىرلەندىم مەن،  بۇ ھايات يولىدا ھەركىم ئوخشىمىغان قىسمەتلەرگە دۇچار بولىدىكەن ،  تەدبىرىڭ قانداق بولسا تەقدىرىڭ شۇنداق بولىدۇ دەپ،  ھەركىملەرنىڭ ئوخشىمىغان - پوزىسىيە- ئوخشىمىغان كۆز قاراشلىرى بىلەن،  ھەرخىل تەقدىر- قىسمەتلەرنى يارتىدىكەن،،،،،،،،،  قىسمەت بىلەن- مەرۋەرىدەك،،،،،،،،،،  مەڭگۈ بەخىتلىك بولغايسىلەر

مەرۋەرى

	ياپراق520 يوللىغان ۋاقتى  2012-يىلى 6-ئاينىڭ 2-كۈنى 12:31 ۋاي ئاللاھ بەختىڭلارنى بەرسۇن ئەزىزلەر ،،،،،،، بەك تە ... رەھمەت جېنىم، ئاللاھ يامان كۆزلەردىن ساقلىسۇن، تىلى شېكەر، دىلى زەھەرلەرنىڭ ياغلىمىلىرىدىن ساقلىسۇن!

ياپراق520

	مەرۋەرى يوللىغان ۋاقتى  2012-يىلى 6-ئاينىڭ 2-كۈنى 12:33 رەھمەت جېنىم، ئاللاھ يامان كۆزلەردىن ساقلىسۇن، تىلى  ... شۇنداق ئۇلۇغ ئاللاھ يامان كۆزلەردىن ساقلىسۇن! بەختىڭلارغا كۆز تەگمىسۇن!   مەرىم پات-پات ئىسرىق سەپ قويۇڭ جۇمۇ ،،،،،،،،،،،،،،،   ئاخىردا بىزلەرنى مۇشۇنداق ئەكىن پاراڭلىشالايدىغان بىر ياخشى سورۇن راسلاپ بەرگىنىڭلارغا چىن كۆڭلۇمدىن رەھمەت ئىيتىمەن،،،،،،،،،، ھەم بۇ مۇنبەرنىڭ تېخىمۇ بەك تەرەققىي قىلىشىنى ئۇمۇت قىلىمەن.

مەرۋەرى

	ياپراق520 يوللىغان ۋاقتى  2012-يىلى 6-ئاينىڭ 2-كۈنى 12:49 شۇنداق ئۇلۇغ ئاللاھ يامان كۆزلەردىن ساقلىسۇن! بەختىڭ ... كۈندە كىرىپ، دوستلار بىلەن سىردىشىپ، مۇڭدىشىپ تۇرسىڭىز، ئۆزىڭىزنى ئازادە ھېس قىلالىسىڭىز بىز شۇنىڭدىن خوش. ئاللاھ ھەممىمىزگە ئىنساپ ئاتا قىلسۇن! مۇشۇ ئالدىمىزدىكى قارا كۆزلەرنىڭ خوشاللىقىنى تەڭ كۆرۈشكە نىسىپ قىلسۇن!

ياپراق520

	مەرۋەرى يوللىغان ۋاقتى  2012-يىلى 6-ئاينىڭ 2-كۈنى 13:16 كۈندە كىرىپ، دوستلار بىلەن سىردىشىپ، مۇڭدىشىپ تۇرسىڭ ... رەھمەت سزگە مەرۋەرى، مەن بۇ مۇنبەرگە دەسلەپ كىرگەن ۋاقتىمدا ئەھۋالىم پەقەت ياخشى ئەمەستى،  بۇدۇنيادىكى بىردىن- بىر يۆلەنچۇگۈم ھەم ئەڭ يىقىن قوللىغۇچۇم بولغان دادامدىن ئايرىلىپ قېلىپ، ھۇشۇمنى تاپالماي يۇرگەن كۇنلەردە ئانام بىز- يەتتە قېرىنداشقا ھەم ئانا- ھەم دادا بولۇپ بۇ يۇرەك يارىسىنى داۋالاپ كەلگەن ئىدى،،،،، توۋا ھازىرمۇ ئويلىسام ھەيران بولىمەن،،،،،،،،،  ئانام قاچانلاردا بولسا بىزگە كۇلىمسىرەپ قارايتى،  مەن بەزىدە باشقىلاردىن ئانىڭىز بەك يىغلايدۇ  داداڭلاردىن ئايرىلىپ بەك ئېغىر كەپتۇ كۆپرەك يوقلاپ تۇرۇڭلا دىگەن سۆزلەرنى ئاڭلاپ شۇنداق قورقۇپ دەرھاللا قىشىغا بارسام يەنە كۇلىمسىرەپ تۇرغان ھالىتىنى، كۆرۇپ كۆڭلۇم تەسكىن تېپىپ قالاتتى،،،،،،،،، ئانامنى بىزنى بۇنداق بالدۇرلا تاشلاپ كىتىدۇ پەقەت ئويلىمىغانكەنمەن  روزا ھېيىتقا دەل بىر ھەپتە بولغان بۇ كۇن مەڭگۈ ئىسىمدىن چىقمايدۇ!!   تۇرمۇشۇمدا يۇزبەرگەن كۆڭۈلسىزلىك- ھەم بۇ شۇم خەۋەر بىلەن تەڭلا ئۆزۈمنى پۇتۇنلەي يوقىتىپ قويغان ئىدىم. مەن بۇ مۇنبەرگە ئەزا بولغان ۋاقتىم دەل ئۇرۇمچىدە داۋالىنىۋاتقان مەزگىل ئىدى. شۇندىن بۇيان كۆپ ياخشى بوپ كەتتىم، كۇنبويى يىغلاپ ئۆزۈمنى يوقىتىپ قويىدىغان ھالەتلەرگە خاتىمە بېرىلدى.           ھازىر سىلەربىلەن مۇڭدۇشۇپ كۇنلىرىم ھەرھالدا ياخشى ئۆتىۋاتىدۇ،،،،،،،،، سىزگە رەھمەت ئىيتىمەن مەرۋەرى!   مەن دەسلەپتە كىرگەن ۋاقتىمدىلا سىز مەندە بەك ياخشى تەسىر قالدۇرغان ، قەلبىم جارھەتلەنگەن، ئىغىر چۇشكۇنلەشكەن ۋاقتىمدا مەن بىلەن شۇنداق ياخشى پاراڭلاشقان ئىدىڭىز

مەرۋەرى

	ياپراق520 يوللىغان ۋاقتى  2012-يىلى 6-ئاينىڭ 2-كۈنى 16:42 رەھمەت سزگە مەرۋەرى، مەن بۇ مۇنبەرگە دەسلەپ كىرگەن ۋا ... كۆڭلىڭىزنى يېرىم قىلماڭ، دۇنيادا ئاتا- ئانىدىن، قېرىنداشتىن، بالا-چاقىدىن ۋاقىتسىز ئايرىلىش تەبىئەتنىڭ قانۇنيىتى ئىكەن، بىز ياخشى كۆرگەن ۋە بىزنى ياخشى كۆرگەن كىشىلىرىمىز ئەنە ئاشۇنداق بىزنى ھەسىرەتتە قالدۇرۇپ كەلمەسكە كېتىپ قالىدىكەن. بۇ دۇنيادا يۈرىكى پۈتۈن كىم بار دەيسىز؟ مۇنبەردىكى ھەممەيلەن سىزنىڭ ياخشى دوستىڭىز، ھەر قانداق چاغدا كىرىپ دوستلار بىلەن سىردىشىشىڭىزنى قارىشى ئالىمىز!

Aydar

	داۋامىنى يېزىڭ.  قاراپ قالدۇق....