نۇرۇزنامە ( مۇكاپاتلىق ئەسەر )

ئارسلان

	نۇرۇزنامە كەلدى نۇرۇز يىلنىڭ بېشى دىلدا زوق ئەيلەپ بۈگۈن ، ھەيدىدى سۇغ-زىمىستاننى جىلۋە بىلەن چەيلەپ بۈگۈن. ياپيېشىل توندىن لىباس كەيدى جاھان گۈلدەككىنە ، كائىناتقا چاچقۇ بولدى نازۇك چىچەكلەر لەيلەپ بۈگۈن. مىھرى-ۋاپا ئۆملۈك بىرلە باشلىنار يىلنىڭ بېشى ، يۇيۇلار ئۆچلۈك ئاداۋەت كۈڭۈللەردىن دىلنىڭ ئىشى. داش قازاندا پۇرۇقلىدى نىمئەت بۇلۇپ نۇرۇز ئېشى ، چوڭ-كىچىك داستىخاندا،ئىچىشمەكتە تەرلەپ بۈگۈن. سەيلىسىنى باشلىۋەتتى توزدەك ياسانغان قىزلار ئەنە، بەللىرىدە قىرىق كۇكۇل يىلان كەبى سويلار ئەنە . خان ئەتلىسى شوخ شامالدا گۇيا رەققاس ئوينار ئەنە، ئوسمىسىنى قويدى مۇمام چىرىغىنى پەرلەپ بۈگۈن. مۇشائىرە مەيدانىدا ئۇقۇلماقتا نۇرۇزنامە ، سۆز ئېچىلىپ تارىخلاردىن جەڭ قىسسسى ئۇغۇزنامە . ئۇقۇلغىنى شىئېر ئەمەس بەلكى ئۇ بىر غۇرۇرنامە ، دىلىغا گۈل چەكتى ئاۋامنىڭ شەرمى ھايا،ئەدەپ بۈگۈن. گاھ ئولتۇرۇپ،ئۇسسۇل ئويناپ سىم تاناپتا ماڭار دارۋاز، شوخ شامالنى باغاش ئىتىپ ھەر سىلجىشى گۇيا پەرۋاز . كۆك ئارا پەرۋازدا ئۇ، كۆك ئەركىسى قۇشقا سەرۋاز ، ئەل ئالقىشى تەڭشىكىدۇر ، شۇڭا غەيۇر دەڭسەپ بۈگۈن. شوخ كۈلكىسى ئۇماقلارنىڭ خەندان ئۇرغان قۇشنىڭ ئۈزى ، تال-چىۋىقلار ئات بۇلۇپتۇ جەڭگە ئۈندەپ مەغرۇر سۈزى ، ئاقساقاللار دۇئا بىرەر، بولغايسىلەر يۇرتنىڭ كۈزى ، چاۋاك ئۇردى ياپراقلارمۇ غەلبىسىگە ھە دەپ بۈگۈن . چاقىپەلەك سارغايدىنىڭ ھەيۋىتىدىن ھەممە مەمنۇن ، قىز-يىگىتلەر ئىلەڭگۈچتە ئوخچىشىدىن كۈڭۈل مەپتۇن ، ئەسكە چۈشكەن ياشلىقىدىن ھۇزۇر سۈرەر چاللار نۇرغۇن. شۇڭغۇدى بۈركۈتمۇ كۆكتىن زوقلىنىپ پەسلەپ بۈگۈن . باشلىدى مەشرىپىنى نەغمىچىلەر ‹‹ ناۋا ›› بىلەن ، چوڭ-كىچىكلەرچۈشتى لەرزان قىزىتىپ ساما بىلەن . يايرىدى غەمكىن كۈڭۈل سۈلكىتىدىن داۋا بىلەن ، بۇۋاممۇ ئەل قاتارى چۈشتى گۈس-گۈس دەسسەپ بۈگۈن. ئوغلاقچىلار تۇلپارىنى كىشنەتمەكتە دالىلاردا ، تۇپا-چاڭغا پەرۋايى يوق شاتلىق كۈلگەن چىرايىدا . ئۇتاركىن كىم چەۋەنداز بوپ سىنالماقتا ئەل رايىدا ، باغلىشىپ چىڭ پۇتىسىنى چاپار ھەريان ھەيۋەت بۈگۈن . نۇرۇزۇمنىڭ سوغىسىدىن گۈلگە تولدى پۈتكۈل يېزام ، ئۇيغۇرۇمنىڭ كۈلكىسىدىن داستان پۈتەر يەنە يازسام . ئۈمىدىم شۇ ئىجادىمدىن يىڭى-يىڭى دۇرلار قازسام ، نۇرۇز بەردى قەلىمىمگە ئىلھام بۇلۇپ مەدەت بۈگۈن . 2013.17.چىرا مەنبە - ئۈزۈم .

kizilgul

	شېئىرنىڭ مەزمۇنى ناھايىتى ياخشى بوپتۇ.بەدئىيلىكىمۇ خېلى يۇقىرى ،پىكىرىمۇ چوڭقۇر.قاپىيە ھەم رادىپلىرى ئىزچىللقىنى ساقلىغان.ئايرىم جايلاردا ئىملا خاتالىقى ساقلانغان .مەسىلەن:   «شېئىر» نى «شىئېر » ؛   «سۆلكەت»نى «سۈلكەت» دەپ يازغان .

ئارسلان

	پىكىر-تەكلىپىڭىزگە مۇھتاجمەن . كۆپرەك تەلىم بەرگەيسىز .

kizilgul

	چىسلانى خاتا قويۇۋاپسىز.2012-يىلىدۇ؟

ئارسلان

	ئەستا ... دىققەت قىلماپتىمەن . بەك خىجىلمەن :$

باتۇرچەۋەنداز

	مۇكاپاتقا ئېرىشكىدەك ئەسەركەن.ئەزىز تەنلىرىگە دەرت كەلمىگەي،ئىشچان قوللىرى ھارمىغاي.

ئارسلان

	باتۇرچەۋەنداز يوللىغان ۋاقتى  2012-يىلى 3-ئاينىڭ 18-كۈنى 20:45 مۇكاپاتقا ئېرىشكىدەك ئەسەركەن.ئەزىز تەنلىرىگە دەرت كە ... رەھمەت ، بەك خىجىل قىلىۋەتتىلە ..

مەرۋەرى

	ۋاي- ۋۇي ماۋۇ تەكەللۇپلەرنى، ئۇنداق تەكەللۇپ قىلىۋەرسىڭىز مۇكاپاتنى بەرمەيمەن ماقما

ئارسلان

	ئاڭلىمىغانما ، تارتىنچاقنىڭ يۈزى قېلىن دىگەننى

باتۇرچەۋەنداز

	ئارسلان يوللىغان ۋاقتى  2012-يىلى 3-ئاينىڭ 18-كۈنى 21:10 رەھمەت ، بەك خىجىل قىلىۋەتتىلە .. خىجىل بولغىدەك گەپ ئەمەسقۇ،مەدەت بېرىۋاتىمەن قۇرۇق بولسىمۇ