شېئىر ۋە شائىر

dilroh

	شېئىر ۋە شائىر ئابدۇرېھىم ئۆتكۈر (نەسىر)   شېئىر - مارجان ئەمەس ، يىپقا تىزىپ قويسا تۇرىۋېرىدىغان ياكى ئەزان ئەمەس ، قۇلاقنى تۇتۇپ ئېيتسا بولىۋېرىدىغان .   شېئىر - "ئاپەت" ئەمەس ، مەنسىنى ئۇقماي ئوقۇسىلا بولىۋېرىدىغان ياكى ماتا ئەمەس، دۇكان قۇرۇپ توقۇسىلا چىقىۋېرىدىغان .   شېئىر - كەشتە ئەمەسس ، رەڭدار مەشۇت بىلەن لاتىغا تىكىپ قويىدىغان ياكى سۈرەت ئەمەس ، قەغەزگە سىزىپ قويسىلا بولىۋېرىدىغان .   شېئىر ھەم ھۆسنى ، ھەم پۇرىقى ، ھەم تىكىنى ، ھەم يوپۇرمىقى بار گۈلگە ئوخشىشىپ كېتىدۇكى ، ھۆسنى بىلەن دىلنى ئۆزىگە مەپتۇن قىلار ؛ پۇرىقى بىلەن جانغا راھەت ۋە ھۇزۇر بەخىش ئېتەر ؛ ئىشىق ئەھلى ئۇنى قۇلاققا قىسار ياكى گۈل دەستە ياساپ جانانىغا تۇتار ؛ ياۋا توڭگۇز تۇمشۇقىنى تەگكۇزسە ، تىكىنى ئۇنىڭ بۇرنىغا سانجىلار ، ھەتتا بۇرنىنى قانىتار .   شېئىر - ئاسماندىكى يۇلتۇز ئەمەس ، كېچىسى پارقىراپ كۆرۈنگەن بىلەن نە ئىسسىقى ، نە يورۇقى تەگمەيدىغان ، شېئىر خۇددى  بىر مەشئەلدۇركى ، كېچە زۇلمىتىدە ئىنسانغا يول كۆرسەتكۈچى ياكى بىر گۈلخاندۇردىكى ، پايانىز دەشتلەرنى يورۇتۇپ ، سوغدىن تېترىگەن تەنلەرگە ئارام بەرگۈچى .   شېئىر - چۆلدىكى ئالۋۇن (ۋىل - ۋىل) ئەمەس ، گاھى كۆك ، گاھى دەريا ، گاھى شەھەر ، گاھى گىياھ بولۇپ كۆرۈنگەن بىلەن قوغلاپ يەتكىلى بولمايدىغان .   شېئىر - بىر قاينام بۇلاققا ئوخشىشىدۇكى ، تەشنالارغا ئارام ، دەردمەنلەرگە داۋا ، بىمارلارغا شىپا ، غەمكىنلەرگە شادلىق ، ئاجىزلارغا ئۈمىد  ۋە كۈچ بەخىش ئەتكۈچى .   شېئىر - ھاپىزنى ناخشىسى ئەمەسكى ، ئاڭلىغانسېرى كىشىنى مۈگدەك باسىدىغان ، شېئىر - بىر گۈلدۈرمامىدۇركى ، ئۇنىڭ ئاۋازى جاھاننى تىتىرىتىپ ، خامۇش كۆڭۈللەرنى ئويغاتقاي ؛ كىشىنى سەگەك قىلىپ جەڭگە ئۈندىگەي ، ئەبەدىي ھاياتقا چاقىرغاي !   شائىر - قاغا ئەمەس ، كۆرۈنگەن دەرەخقە قونۇۋېلىپ قاقىلداۋېرىدىغان . شائىر - خۇددى تاڭ توخۇسىدۇركى ، كېچىچە تاڭنى تىللاپ تىنماس ؛ تاڭ ئاتقاندا ، ئەلنى ئىشقا ، ھاياتقا ، ئەمگەك ۋە ئىجادقا ئۈندەر . شۇڭا ، كىشلەرنىڭ "ئالتۇن خوراز" ھەققدە قىسسە - رىۋايەتلەر توقۇشى ، شەھەر دەرۋازىلىرى بىلەن قەسىر ئايۋان مۇنارلىرىنىڭ ئۈستىگە ئۇنىڭ ھەيكىلىنى ئورنىتىشى ھەرگىز تاساددىپىي ئەمەس ، ھالبۇكى ، جاھان - جاھان بولغاندىن  بۇيان ھېچكىم تېخى قاغىنىڭ ھەيكىلىنى ئورناتقىنى يوق .   شائىر - تۇتىقۇش ئەمەس ، نېمىنى ئۆگەتسە شۇنى دورايدىغان ياكى ئۆمۈر بويى دوراشتىن بۆلەكنى بىلمەيدىغان ، بۇ يەردە ئۇلۇغ ئەزەربەيجان شائىرى فۇزۇلنىڭ مۇنى بېيىتىنى ئەسلەپ ئۆتۈش ئورۇنسىز بولماس :                      "قارا تاشتىن ئەگەر قان بىرلە رەڭگىن ئەيلىسەڭ ،                       رەڭگى تەغيىر بولۇر ، ئەمما لەئلى بەدەخشان ئولماس .                       تۇتىغا تەلىمى ئادايى كەلىمات ئەيلىسەڭ ،                       نۇتقى ئىنسان بولۇر ، ئەمما ئۆزى ئىنسان ئولماس . "   شائىر - چىن مەنىسى بىلەن بۇلبۇلدۇر ، بۇلبۇل ھېچقاچان باشقا قۇشلارنى دورىمايدۇ ، باشقا قۇشلارمۇ بۇلبۇلنى ھەرگىز دورىيالمايدۇ . چۈنكى ، بۇلبۇلنىڭ ئۆز تىلى ، ئۆز سۆيگۈسى ، ئۆز تەپەككۇرى ۋە ئۆز تۇيغۇسى بار .   شائىر - كېپىنەك ئەمەس ، كۆرۈنگەن گۈلنىڭ ھەممىسىگە پەرقىسىز قونۇپ ، ھۇزۇر - ھالاۋەت ئېلىشنىلا بىلىدىغان ، شائىر - چىراغ پەرۋانىسىدۇركى ، ھالاك بولۇشنى بىلىپ تۇرۇپ ، ئۆزىنى ئوتقا ئۇرغۇچى ....   شائىر - شاھ ۋە سۇلتانلارنىڭ نازۇ نېمەتكە تولغان داستىخانلىرى ئەتىراپىدا چۆرگىلەپ يۈرىدىغان ياكى زاھىتلارنىڭ ئېتىكىدە خورۇلداپ ياتىدىغان مۈشۈك ئەمەس ، بەلكى پايانسىز دەشىتلەردە ئەركىن كېزىپ يۈرىدىغان تەمەسىز ئارسلاندۇركى ، ئۇنىڭ بىر ھۆركىرىشى بىلەن تاغۇ تاشلار زىلزىلىگە كېلىپ ، تۈلكە - بۆرىلەر ھوشىنى يىغماي ، "پادىشاھ نېكولاي ئۈستەلگە بىر مۇشت ئۇرغاندا ، پۈتۈن ئوردا ئىچى تىتىرەپ كېتەتتى ؛ لىف تولىستوي ئۈستەلگە بىر ئۇرسا ، پۈتكۈل روسىيە زىلزىلىگە كېلەتتى " دېگەن رىۋايەت مۇبالىغە بولمىسا كېرەك . چۈنكى ، لىف تولىستوي شېئىر يازمىغان بىلەن چىن شائىر ئىدى .   شائىر پەقەت خەلق بىلەن ، پەقەت خەلق بىلەنلا شائىردۇر ۋە مەڭگۈ ئۆلمەستۇر . مەسىلەن ، چۈي يۈەن بىلەن ئەلىشىر ناۋايى ؛ لى بەي بىلەن پوشكىن ؛ بايرۇن بىلەن لۇتپۇللا مۇتەللىپكە ئوخشاش . 1980 - يىل 23 - ئۆكتەبىر ، ئۈرۈمچى ئاپتورنىڭ شېئىرلار توپلىمىدىن ئېلىندى.

قەھۋە

	شېئىر ئاشىق-مەشۇقلارنى بىر-بىرىگە باغلايدىغان، ئاشىقىسز مەشۇقلارنى ھىجران ئازاۋىدىن قۇتۇلدۇرىدىغان، مەشۇقسىز ئاشىقلارنى ۋىسالغا يەتكۈزىدىغان پۇراقلىق گۈل!

مەرۋەرى

	چوڭ قىزىمنىڭ دەرىسلىكىدە بار چېغى، يادلاپ يۈرەتتى، ھەقىقەتەن ئېسىل ئەسەر جۇمۇ بۇ

dilroh

	مەرۋەرى يوللىغان ۋاقتى  2012-يىلى 1-ئاينىڭ 7-كۈنى 19:30 چوڭ قىزىمنىڭ دەرىسلىكىدە بار چېغى، يادلاپ يۈرەتتى، ھە ... ھازىرقى باشلانغۇچنىڭ بالىلىرى بىز تولۇقسىزدا ئۆگەن نەرسىلەرنى،  تولۇقسىزدىكىلەر تولۇقتا ئۆگەن نەرسىلەرنى ئۆگىنىدىكەن جۇمۇ ۋۇيجۇن`` تەھرىردىن: ئۆگەنگەن....دېسەك توغرا بولامدۇ قانداق؟

جۇلالىق

	شېئىر ئۇ ئويۇن ئەمەس، سىز نەچچە ئېغىز قاپىيە بىلسىڭىزلا يازدىم دەپ يېزىۋېرىدىغان...

ياۋاگۈل

	شېئىر - مارجان ئەمەس ، يىپقا تىزىپ قويسا تۇرىۋېرىدىغان ياكى ئەزان ئەمەس ، قۇلاقنى تۇتۇپ ئېيتسا بولىۋېرىدىغان .....

gulbargi24

	شائىر - چىن مەنىسى بىلەن بۇلبۇلدۇر ، بۇلبۇل ھېچقاچان باشقا قۇشلارنى دورىمايدۇ ، باشقا قۇشلارمۇ بۇلبۇلنى ھەرگىز دورىيالمايدۇ . چۈنكى ، بۇلبۇلنىڭ ئۆز تىلى ، ئۆز سۆيگۈسى ، ئۆز تەپەككۇرى ۋە ئۆز تۇيغۇسى بار .