باش ئەگىم

dilroh

	باش ئەگىم (نەسىر) ئابدۇرېھىم ئۆتكۈر   ئەجەپمۇ ياراشقان بۇ ئىسمىڭ ساڭا ، زاتىغا قاراپ ئېتى بولۇر دېگەندەك ، زۆھرانىڭ ئىشىكىدىن كۈندە مىڭ ئەگىپ ئۆتكەن كەبى ھەر دوقمۇشتا يۈز قېتىپ ئەگىپ ئاقىسەن ، خۇددى كىمنىڭدۇر ئارقىسىدىن يەتمەك بولۇپ قوغلاشقاندەك تاشتىن - تاشقا ئۇرۇلۇپ ، شىددەت بىلەن چاپىسەن ...   نېمە بۇنچىۋالا تەشۋىشتە قالدىڭ ؟   بىرلا قاراپلا بىلدىم ، چېھرىڭدە چوڭقۇر بىر قايغۇنىڭ ، ئاچچىق بىر ئەلەمنىڭ ئىزى بار . خۇددى يىلاندەك تولغىنىشلىرىڭمۇ مەنىسىز ئەمەس ... تاپتايىنلىق ئوبدان بىلىمەنكى ، ئۇ بىر جان ئاچچىقىدۇر ...   ئايدىڭ كېچىلەردە بولسا ، مۇڭلىنىپ ئېيتقان قوشاقلىرىڭ خۇددى قاناتلانغان قۇشلاردەك ئۇچۇپ بېرىپ ، ئالەمنى قاپلار ، ئۇزاقلاردا تۇرۇپ ، بۇ مۇڭلۇق قوشاقلىرىڭنى ئاڭلىغان كىشنىڭ يۈرەك - باغرى خۇددى سىمابتەك تىتىرەر ، ئۇ ئۆزىنى ئۇنتار ؛ يېقىن كەلگەنسېرى ، ھېچ تاقىتى قالماس ، چىداپ تۇرالماي ، مۇڭلىرىڭغا قوشۇلۇپ ، تاھىر ئاققان جىلغىلىرىڭدا كۆز ياشلىرى بىلەن ئاققۇسى كېلەر ...   ئاي ، باش ئەگىم ! دىمىغىڭدىن ھامان بىر ھىجران پۇرىقى پۇرار ، بۇنىڭغا قاراپ ، پەقەت كۆز ياشلىرىم بىلەن كۆمۈلۈپ قالىمەن . سەنچۇ ؟ ھامان ئۆز غېمىڭ بىلەن ... قىلچىلىكمۇ پەرۋا قىلمايسەن ، ئېيتقىغا ، نېمە بۇنچىۋالا دەردلىكسەن ؟ قاچاندىن بېرى شۇنداق مۇڭلۇقسەن ؟   ئەي مۇڭلۇق باش ئەگىم ! ئېيتمىساڭمۇ ئوبدان بىلىمەن نېچۈن غەمكىن ، نېچۈن مۇڭلۇقلۇقىڭنى ......ئەگەر بىلمىسەم دەردىڭگە ئورتاقلاشمىسام ، قاپقارا ۋاپاسىزلىق ، ئۇياتسىزلىق ، توغرىسى خائىنلىق قىلغان بولىمەن ، چۈنكى ، سۆيگۈ ، ۋاپا ، نومۇس ۋە ئەزگۈلۈك سېنىڭ ئۇلۇغلۇقۇڭدىن ، يۈكسەكلىكىڭدىن يارقىن بىر نەمۇنە ئەمەسمىدى ؟ سەن ئەزەلدىن بىزگە شۇنى - سۆيگۈ ، ۋاپا ، نومۇس ۋە ئەزگۈلۈكنى ئۆگەتمىگەنمىدىڭ ؟   سۆيگۈ تۇتقۇنى تاھىر تاغدىن تاشلانغاندا ، سېنىڭ سۈرلۈك قاتتىق ۋە قىلىچتەك ئۆتكۈر تاشلىرىڭ مامۇق بولۇپ قارشى ئالغان ئەمەسمىدى ؟ تاھىرنىڭ ساندۇق بىلەن بىر ئەگمىدە ئۈچ كېچە - كۈندۇز تۇرالىشى سېنىڭ ئەزگۈلۈك ۋە ۋاپادارلىقىڭ ئەمەسمۇ ؟ كىم بىلمەيدۇ تاھىر ساندۇقنىڭ ئىسسىق قوينۇڭدا نەچچە يىللار كۆز قارىچۇقۇڭدەك ئاسرالغىنىنى ! بۇ ، كىمنىڭ قولىدىن كېلىدىغان ئەزگۈلۈك ؟ بۇ ساڭا ۋە << پەرىشتە >> لەرگىلا خاس ئەزگۈلۈك ۋە يۈكسەكلىكتۇر ...   ئەمدىلىكتە بولسا ، دەردلىك كۆزلىرىڭ بىلەن ئېگىز تاغ بېشىغا قارايسەن ؛ ياش ئۈنچىلىرى بىلەن تولغان غەمكىن كۆزلىرىڭنى بىر نەپەسمۇ ئۈزەلمەيسەن .   نېمە كۆرۈنەر ؟   تۇغ قادالغان كونا بىر مازار ... ئۇزاق ئەسىرلەرنىڭ ، ئېغىر يىللارنىڭ ، قارا كۈنلەرنىڭ قانلىق يەكۈنى ...   نە سۆيگۈ ، نە ھايات ، نە تەنتەنە !   بىر جۈپ قىزىلگۈل ئارىسىدا ھامان بىر تال ياۋۇز تىكەننىڭ ئىپلاس ۋە تەكەببۇر گەۋدىسى ياتار ... مانا ، سەن شۇنى كۆرىسەن ، ئوبدان بىلىمەن ، ئۇ ئىپلاس ، تەكەببۇر تىكەننىڭ يىرتقۇچلارچە  قىچقارغان ئۆلۈم كۈلكىسى . قۇلىقىڭغا  خۇددى نەشتەردەك سانجىلار ... قارا كۈنلەرنىڭ ئۇ بىر جۈپ مەسۇم قۇربانى سېنى قانچە ئاچچىق ھەسرەتكە ، چوڭقۇر مەيۈسلۈككە ، چەكسىز قايغۇغا سالسا ، ئۇلارنىڭ قاتىلى شۇ ئىپلاس تىكەن سېنى شۇنچە تىنچلانسىزلاندۇرار ، غەزەپلەندۈرەر ، كايىتار ... ناھايەت ، ئىنتقام ئۈچۈن قوزغار !   ھەممە دەردىڭ ، ھەممە قايغۇڭ ، ھەممە تەشۋىشىڭ ، ھەممە ئاچچىقىڭ شۇنىڭ ئۈچۈندۇر .   ئەي مەسۈم قۇربانلارنىڭ مازارى ، سۆيگۈ دەرياسى ھەسرەتلىك باش ئەگىم ! ھامان سېنىڭ ئۈستۈڭنى بىر قارا ھىجران تۇمانى باسقان ، سەن شۇنىڭ ئۈچۈن دەردلىنىسەن ، شۇنىڭ ئۈچۈن مۇڭلىنىسەن ، شۇنىڭ ئۈچۈن ئاچچىقلىنىسەن ، غەزەپلىنىسەن ، ئاچچىقىڭدىن تاشتىن - تاشقا ئۇرۇلۇپ ، ئاپئاق كۆپۈكلەر چاچرىتىسەن ، جان ئاچچىقىڭدىن دېڭىزدەك دولقۇنلىنىپ ، شىردەك ھۇۋلايسەن .   ھەققىڭ بار !   ھەر نېمە قىلماققا ھەققىڭ بار !   يەنە دەردلەن ، يەنە مۇڭلان ، يەنە ئاچچىقلان !   تاشتىن - تاشقا ئۇرۇل ، دولقۇنۇڭ بىلەن كۆتۈرۈل ... يەنە تاش !   تاھىر بىلەن زۆھرانىڭ ياناق كۆزلىرى ھامان ساڭا تىكىلىپ تۇرماقتا . سۆيگۈ ، ۋاپا ، نومۇس ۋە ئەزگۈلۈك ئۈچۈن ئۇلارنىڭ روھىنى يادلان ! تاھىر داستانى بىلەن دولقۇنلان ! ئۇنىڭ ئۈچۈن چەككەن ئەلىمىڭ ، تارتقان دەردىڭ ، جاپا - ئەمگىكىڭ مەڭگۈلۈك راھەت ، مەڭگۈلۈك سائادەت !   << ... بېشىمغا ھەر بالا كەلسە ،   ئۆزۈڭنىڭ شورى دەڭلار ! >> 1948 - يىلى 27 - يانۋار ، ئۈرۈمچى

گۈلسەنەم

	مۇشۇ دىلروھنىڭ ھەر قانداق تېمىسىغا كىرسە ئېسىل ناخشىدىن ھوزۇر ئالماي قالمايدۇ كىشى، قوللىرىڭىزغا دەرت كەلمىسۇن !

مەرۋەرى

	باش ئەگىم توغرىسىدا ناخشا تاپالمايۋاتىمەن دەپ قاقشاپ يۈرۈپ، ئاخىرى بۇ ناخشىنى تېپىپسىزدە، شۇنداق ماس كەپتۇ، نەسىرىمۇ ئېسىل، ناخشىسى ئاندىن ئېسىل، يارايسىز ساقام

قەھۋە

	باش ئەگىم! بەك ئېسىل تارىخى باردە ئۇ جاينىڭ. توي قىلىشتىن بۇرۇن بىر قانچە بالىلار بىللە بېرىپ كۆرۈپ ئويناپ كەلگىنىمىز بار، ئەمما ئۇنىڭدىن كېيىن بېرىپمۇ باقماپتىمەن. ئەمما كۆپ ئەسلىمە قالغانتى. باش ئەگىم توغرىسىدا ئىشلەنگەن فىلىملارمۇ بەك ياخىشى چىقىپتىكەن. شۇ تاپتا كۆز ئالدىمدا قاملاشقان  بىر جۇپ مۇھەببەت ئىگىللىرى_تاھىر-زۆھرە جەۋلان قىلماقتا.   دائىم تاھىر رولىنى ئالىدىغان ئادىلجان تاغىمىز ھازىر قېرىشقا قاراپ ماڭغاندەك ھېس قىلدىم، ئەمما «زۆھرە» بارغانسېرى گۈزەللىشىپ كېتىپتۇ، بىللە ئوينايتۇق كىچىك چاغلاردا...

بەگزات

	ئاياللارنىڭ دەۋرىمۇ  بۇ قىرغانسرى  گۇزللشىپ كىتىدكەنيا ھى ھى ھى  چاق چاق ھە ،، باش  ئەگىم قەدمى ئېسىل جاي شۇڭا  ھازىرغچە تللاردا  داستان بوپ ئۇلۇغلنىپ كەلمەكتە... تاھىر زوھرە ھىكايسىغا مەنمۇ  بەك ئامراق  ھارمغايسىز  قەھۋە....