ئۇيغۇر قىزى

dilroh

	ئۇيغۇر قىزى روزى سايىت كۆر ، ئەنە بىر قىزكى ، چېھرى ، مېھرى نۇر ، ئاتەش ئۆزى ، زىلۋا بوي ، سەرۋى بەدەن ، چولپان كەبى پارلار كۆزى . قاشلىرى قىيغان قەلەمدەك ، كىرپىكى تال - تال يىپەك ، مەڭزى ئانار ، لېۋى ياقۇت ، خۇددى ئاي رۇخسار - يۈزى . قاڭشىرى چىمداپ چىقارغاندەك گويا ، چىشى سەدەپ ، ھەم ئۇزۇن ، ھەم توم ، قارا سۇمبۇل چېچىنىڭ ئەڭگىزى . چامدىشى ئوخشار كېيىككە ، كۈلكىسى بۇلبۇل مىسال ، شەرم - ھايالىق باقمىشى ، شۇنچە ئەدەپلىك گەپ - سۆزى . سۆيگۈگە سادىق ، ۋاپالىق ، قەلبى ئاپتەپتەك تازا ، ئاچقۇزار خۇش ھىد چېچەكنى گۈل قولى ، باسقان ئىزى . ناخشا ئېيتسا ، تاڭ ساباسى ئۇيقۇسىدىن ۋاز كېچەر ، چالسا دۇتار ، شوخ ئۇسسۇلغا دەسسىگەي كۆك يۇلتۇزى . كۆڭلىكى توزنىڭ قاناتى ، دوپپىسى - رەڭدار چىمەن ، چىگكىنى ياغلىق دېمەڭ ، ئىپپەت - نومۇسنىڭ ئەندىزى . <<پاھ ، ئايالنى ئاي تۇغامدۇ ؟ ...>> دەيدۇ كۆرگەنلەر ئۇنى ، جەننەتۇل - فىردەۋسمۇ يوق بۇ كەبى ئۇزنىڭ ئۇزى ! <<سىرت سىياقى شۇنچە ، ئەمما كۆڭلى قانداق ؟>> دەرسىلەر ، ئۇ - ئەقىل ، ئەخلاق ، لاتەپەتتە جاھاننىڭ يالغۇزى ! ئىچ - تېشى ئوخشاش گۈزەلنىڭ تەرىپى بولدى زىكىر ، كىم دېسەڭ ، ئۇ مەرد ، غۇرۇرلۇق شەرق گۈلى - ئۇيغۇر قىزى ! 1984 - يىل مارت ، خوتەن ئاپتۇرنىڭ <<ئانا تىلىم - زەر تىلىم >>  ناملىق شىئىرلار توپلىمىدىن ئېلىندى .

قەھۋە

	ئاپىرىن، دىلروھ خانقىز! شېئىرلىرىڭىز بىلەن بۇ ناخشا بەك ماسلىشىپتۇ. بۇ ناخشا ئېسىل جۇمۇ.

xakilat

	دېلروھنىڭ ئەمگىكىگە بارىكاللا، ئۇسۇلنى قاس چىقىرىپ ئوينىغاچ ئوقۇۋەتتىم