ئالدامچىلىق

Ayberchin

	شەخسىي رازۋىدچىكلار ئورنىنى قۇرۇپ قويۇپ ھىچ ئىش قىلماي يۈرگىنىمگە ئىككى يىل بولۇپ قالغان ئىدى. بىر كۈنى يېرىم كېچىدە ناتونۇش بىرەيلەننىڭ تېلىفونىنى تاپشۇرۇپ ئالدىم. -سىز سىرلىق رازۋېدچىكقۇ دەيمەن، سىرتتا تۇرغان ماشىنىغا چىقىپ ئۆيۈمگە كېلىپ كەتسىڭىز بوپتىكەن،- قارشى تەرەپ ياشانغان ئايالدەك قىلاتتى. دېرىزىدىن سىرتقا قارىسام ماشىنا توختىتىش مەيدانىدا بېنتىس ماركىلىق بىر ماشىنا تۇرۇپتۇ. مەن ئۆيدىن چىقىپ ماشىنا يېنىغا كېلىشىمگە ئۇ يەردە ساقلاپ تۇرغان شوپۇر ماڭا ئېھتىرام بىلەن تازىم قىلىپ ئەھۋاللاشقاندىن كېيىن، ماشىنا ئىشىكىنى ئېچىپ چىقىشقا تەكلىپ قىلدى. ئادەمنى قورۇندۇرىدىغان سۈكۈت ئىچىدە ماشىنا ئالاھەزەل 30 مىنوت ماڭغاندىن كېيىن، بىر داچا ئالدىغا كېلىپ توختىدى. ئىشىك ئالدىدا مەرتىۋىلىك ياشانغان بىر خانىم تۇراتتى. - سىزگە مالاللىق يەتكۈزۈپ قويدۇم، بۇياققا مەرھەمەت،- دىدى خانىم. مەن ئۇنىڭغا ئەگىشىپ داچا ئىچىگە كىردىم، كارىدوردىكى تۇتۇق چىراق يورىغىدىن باشقا ھەممە ئۆيلەر قاپقاراڭغۇ ئىدى. بىر ئازدىن كېيىن تورۇسى تولىمۇ ئىگىز مىھمان كۈتۈش ئۆيىگە كىرىپ كەلدۇق. ياشانغان خانىم قولىدىكى لىپاپنى ئۈستەلگە قويۇپ: - بۇ زاكالەت پۇلى،-دىدى. مەن چاندۇرماستىن لىپاپ ئىچىگە قاراپ ئۈلگۈردۈم، ھەممىسى قەغەز پۇل ئىدى. - ھىچنىمىنى باشلىماي تۇرۇپ بۇنداق قىلىشىڭىزنى پەقەت ئويلىماپتىمەن، ئۇنىڭ ئۈستىگە بۇ قائىدىگە ئۇيغۇن ئەمەس. پۇل تاپشۇرۇش ئۇقتۇرۇشى تەكشۈرۈش ئاياقلاشقاندا يەتكۈزىلەتتى،-دىگىنىمچە لىپاپنى خانىم ئالدىغا سۈرۈپ قويدۇم. خانىم: - بۇ پەقەت ئالدىن تاپشۇرۇلغان پۇل،-دىدى. - ئۇنداق بولسا، زادى نىمىنى تەكشۈرىمەن،-دىدىم مەن، بۇ مېنىڭ بىرىنچى قېتىملىق چوڭ سودام ئىدى. - ئالدامچىلىق قىلمىشى،-دىدى خانىم. - پۇل ئاغدۇرۇش ئالدامچىلىقىمۇ؟ بۇنداق ئىشقا ساقچى چاقىرسىڭىز بولاتتى،- دىدىم سەل ھاياجانلانغان ھالدا. خانىم دۇدۇقلىغىنىچە بوش ئاۋازدا سۆزلەشكە باشلىدى. -ساقچىلار بۇ ئەھۋالنى ئالدامچىلىق دەپ قارىماسلىقى مۇمكىن، ئۇنىڭ ئۈستىگە مەن شۇ ئالدامچى ئارقىلىق جېنىمنى ساقلاپ قالماقچى. خانىم ئۆز ئەھۋالىنى تەپسىلى بايان قىلىشقا باشلىدى. ئۇ 60 يىلنىڭ ئالدىدا بۇ يەرگە ياتلىق بولغىنىدا، دوختۇر قېيىنئاتىسى ئۇچىغا چىققان پاھىشىۋاز ئىكەن. دائىم سىرتلاردا ناشايان ئىشلارنى قىلىپ يۈرىدىكەن. خانىمنىڭ قېيىنئاپىسى بۇ ئىشلارغا چىداپ بولالماي، كۈنبويى چېچىلىپلا يۈرىدىكەن ۋە ئاچچىقىنى خانىمدىن ئالىدىكەن، شۇڭا ئۇ بەك يامان كۈنگە قاپتۇ. ئۇ بارلىق جەبىر-جاپالارغا پەقەت ئۈچ بالىسىنى بېقىپ قاتارغا قوشۇش ئۈچۈنلا چىداپ كېتىپتۇ، چۈنكى بالىلار ئۇنىڭ ھاياتىدىكى بىردىنبىر ئۈمىدى ئىكەن. 20 يىلدىن كېيىن قېيىنئاتىسى كېسەل بىلەن ئالەمدىن ئۆتۈپتۇ. ئۇزۇن ئۆتمەي خانىمنىڭ ئېرىمۇ تالاغا قاراپ قېلىپ،  باشقا ئايالدىن بىر قىز بالىلىق بوپتۇ. ئەمما ئۇ قىز يەتتە ياشقا كىرگەن يىلى ئېرىنىڭ ئاشنىسى ئۆلۈپ كېتىپ، ئامالسىز قالغان ئەر ھېلىقى قىزىنى ئائىلىسىگە ئېلىپ كەپتۇ. كېيىن ئەر خۇجايىن سىرتتا يەنە بىرسىنى تېپىۋېلىپ، ئۆيگىمۇ كەلمەس بولىۋاپتۇ. ئامالسىز قالغان خانىم بارلىق زىھنىنى بالىلارنى تەربىيىلەشكە سەرپ قىپتۇ، ئۇنىڭ بارلىق خوشاللىقىمۇ ھەم شۇ بالىلار ئىكەن. بالىلارمۇ ئالدى –كەينى چوڭ بولۇپ ئۆيدىن ئايرىلىپتۇ، خانىم يەنە يالغۇز قاپتۇ. خانىمنىڭ سەۋر قاچىسىمۇ توشۇپ تۇرغىنىدا، يېرىم يىل ئىلگىرى ئېرىمۇ تاساددىبىي ۋەقەدە ئۆلۈپ كېتىپتۇ. - سىزنىڭ ماڭا دىمەكچى بولغان ئىشىڭىز مۇشىمىدى؟- دەپ سورىدىم. - ياق، ئۇ ئاشنىسىنىڭ ئۆيىدە پەلەمپەيدىن تېيىلىپ كېتىپ يىقىلىپ ئۆلگەن، سىز بۇلارنى كۆرۈپ بېقىڭ،- خانىم شۇنداق دىگەچ ماڭا تۆت پارچە خەتنى تۇتقۇزۇپ قويدى، خەت ئۇنىڭ تۆت بالىسىدىن كەلگەن ئىدى. چوڭ ئوغلى خېتىدە« مەن چەتئەلدە بولغاچقا ئۆيگە قايتالمايمەن، ئانا سىز ئىنىمنىڭ ئۆيىگە بېرىپ تۇرسىڭىز» دىيىلگەن بولۇپ، ئىككىنچى پارچە خەت قىزىنىڭ ئىدى. « يولدۇشۇمنىڭ كەسپى ئىشلىرى بىر ئىزغا چۈشمىگۈچە ھالىڭىزدىن خەۋەر ئالالمايدىغان بولدۇم. ئانا ئەگەر پۇلىڭىز بولسا، مال-دۇنيانى بالدۇرراق تەقسىملىۋەتكەيسىز». خانىمنىڭ كىچىك ئوغلى ئىشى ئوڭدىن كەلمەيۋاتقان رەسسام بولۇپ خېتىدە « قىلغۇدەك ئىشمۇ يوق، يىگۈدەك نەرسىمۇ يوق. مال-دۇنيانى تېزرەك تەقسىملەپ بەرگىن» دىگەن ئىدى. ئەڭ ئاخىرقى بىر پارچە خەت خانىمنىڭ بېقىۋالغان ھېلىقى قىزىدىن كەلگەن بولۇپ، خەتتە«ئاكا-ھەدىلىرىم دائىم مېنى ھارامدىن بولغان دەپ غورورىمغا تېگەتتى، مېنى ئۆز كۆرمەيتتى. شۇڭا ئۆيدىن ئايرىلىپ ياشاشنى لايىق كۆردۈم. ئەمما مىراسنى قېرىنداشلىرىم بىلەن ئوخشاش ئۈلۈشتە ئالىمەن» دىيىلگەن ئىدى. قارىمامدىغان بۇ شەخسىيەتچى ئەبلەخلەرنى، ئىچىمدە شۇنداق دىدىم. ئەمما موماينىڭ جېنىنى قۇتۇلدۇرۇش دىگەن قانداق گەپ ئەمدى. ئەجىبا بالىلارنىڭ مەۋجۇتلىقى ئۇنىڭ ياشاش سەۋەبىمىدۇ؟ ئالدامچىلىق دىگىنى نىمىسىدۇ؟ ئەجىبا بالىلارنىڭ ئۇنى تاشلاپ كەتكىنىنى، ئۆز مۇھەببىتىنى ئالداپ كەتتى دىمەكچىمىدۇ؟ ئۇ ماڭا زادى نېمە قىلدۇرماقچىدۇ؟ - مەن ئۆلۈپ كېتىشتىن بۇرۇن، بالىلىرىمنى تېپىپ، بۇ سۈرەتلەرنى بېرىپ قويسىڭىز. مەن ساقايماس كېسەلگە گىرىپتار بولۇپ قالدىم، بەلكىم ئۇزاققا قالماي بۇ دۇنيا بىلەن ۋىدالىشىمەن،- خانىم شۇ گەپلەرنى قىلغاچ لىپاپقا لىق سېلىنغان سۈرەتلەرنى قولۇمغا تۇتقۇزدى ۋە«بۇ ئالدامچى جىنايەتچىلەرنىڭ سۈرىتى» دەپ قوشۇپ قويدى. مەن بۇ پەۋقۇلاددە « ئالدامچىلىق» دىلوسىنى تەكشۈرۈش ئىشىنى قۇبۇل قىلدىم. ھەر قانچە تىرىشچانلىق كۆرسەتسەممۇ، خانىمنىڭ پەرزەنتلىرىدىن جاۋاب كەلمىدى. ئامالسىزلىقتىن خانىمنىڭ ئالدىن بەرگەن پۇلىنى ئاپىرىپ بەرمەكچى بولۇپ بارغىنىمدا، خوشنىلىرى ئۇنىڭ ئاللىبۇرۇن ئۆلۈپ كەتكەنلىكىنى ئېيتتى. ئۆلۈپ كېتىش ئالدىدا تۇرغان بۇ ئانا ئۆز پەرزەنتلىرىنىڭ ئۆيگە قايتىپ كېلىشىنى ئارزۇ قىلىپ، ئۇلارنى تۆت كۆزى بىلەن كۈتكەن ئىدى. بىر نەچچە كۈندىن كېيىن، مەن خانىمنىڭ قەبرىسى ئالدىغا بېرىپ ھېلىقى سۈرەتلەرنى قەبرىنىڭ بىر چېتىگە كۆمۈپ قويدۇم. «يەر شارى ۋاقتى گېزىتى» دىن تەرجىمە قىلىپ ئېلىندى

مەرۋەرى

	ئايبەرچىننىڭ يەتتە قىزلىرىمغا قەدەم تەشرىپ قىلغانلىقىنى ۋە ئېسىل تەرجىمە ئەسەرلەرنى سۇنغانلىقىدىن خوش بولدۇم، نادىر يازمىلىرىڭىز ئۈزۈلمىگەي!

xakilat

	ئۆلۈپ كېتىش ئالدىدا تۇرغان بۇ ئانا ئۆز پەرزەنتلىرىنىڭ ئۆيگە قايتىپ كېلىشىنى ئارزۇ قىلىپ، ئۇلارنى تۆت كۆزى بىلەن كۈتكەن ئىدى. -------- كۆڭلۈم بىر قىسمىلا بوپ قالدا

anar

	پۈتۇن ياشلىقىنى  قېيىن ئاپىسنىڭ زۇلۇمى ، ئېرىنىڭ ساتقىنلىق قىلشىغا سەۋر قىلىش  ، قالغان ھاياتىنى بىر تۈركۈم ۋاپاسزلارنى تەربىيلەشكە سەرپ قىلىپ يالغۇز ئۆلۈپ كەتسە ...........يەنە ئويلىنىپ قالدىم ....

زىلال

	شۇڭا دەيمەن،بالىلىرىمىزنىڭ ئۇزۇن ئۆمرىنى ۋە بەخـتىنىلا تىلىمەي ئىنسابىنى تىلەيلى!

دىلەيسەم

	شۇڭا پەرزەنتلەرگە بەخت ئەمەس ئەڭ ئاۋال ئىمان، ئىنساپ، ھايا، دىيانەت، تەۋپىق تىلىگۈلۈك، مۇشۇلار بولسىلا بەخت دېگەن شۇ!

جۇلالىق

	بالىلىرىمىزنىڭ ئىنسابىنى ئاللاھدىن تىلەيلى!