فارۇخ پەرھات ئامېرىكا دۆلەتلىك پەن-تېخنىكا مۇسابىقىسىدە ئالتۇن مېدال ئالدى

Jewlaniy

	ئامېرىكا قوشما شتاتلىرىنىڭ ۋىرگىنىيە شتاتى فەيىرفاكس شەھەرلىك تولۇق ئوتتۇرا مەكتەپنىڭ 11-يىللىق سىنىپ ئوقۇغۇچىسى، ئۇيغۇر پەرزەنتى فارۇخ پەرھات پۈتۈن ئامېرىكا بويىچە ئۆتكۈزۈلگەن باشلانغۇچ، ئوتتۇرا ۋە تولۇق ئوتتۇرا مەكتەپ ئوقۇغۇچىلىرىنىڭ پەن-تېخنىكا مۇسابىقىسىدە ئالتۇن مېدالغا ئېرىشىپ چېمپىيون بولدى. فارۇخ بۇ يىل تولۇق ئوتتۇرا مەكتەپنىڭ 11-يىللىقىنى پۈتتۈرۈش ئالدىدا تۇرماقتا ئىدى. پەن-تېخنىكا يېڭىلىقلىرىغا ئالاھىدە قىزىقىدىغان 17 ياشلىق فارۇخ بۇ يىل 2-ئايدا پۈتۈن ۋىرگىنىيە شتاتى بويىچە ئۆتكۈزۈلگەن مەكتەپ ئوقۇغۇچىلىرىنىڭ پەن-تېخنىكا مۇسابىقىسىگە قاتنىشىپ، ئۆزى ياسىغان كىچىك ئايروپىلاننى ئۇچۇرۇش بويىچە ئالتۇن مېدال ئالغان ھەمدە پۈتۈن ئامېرىكا بويىچە ئۆتكۈزۈلىدىغان مۇسابىقىگە قاتنىشىشقا تاللانغان. فارۇخنىڭ ئوقۇتقۇچىسى ۋە مەشقاۋۇلى كاتېرىنا ۋىليامسنىڭ فارۇخنى مەملىكەتلىك مۇسابىقىسىگە تەشەببۇس قىلىپ يازغان خېتىدە ئۇنىڭ تالانتىغا يۇقىرى باھا بەرگەن. ئۇ خېتىدە ئۇنىڭ ۋىرگىنىيە شتاتىنىڭ مەملىكەتلىك مۇسابىقىسىگە قاتنىشىش گۇرۇپپىسى تەركىبىدە ئۆزى ياسىغان ماشىنا ئادەمنىڭ قولىنىڭ ھەرىكىتى بويىچە ماھارەت كۆرسىتىدىغانلىقىنى بىلدۈرگەن. فارۇخنىڭ دادىسى پەرھات ئەپەندىنىڭ ئۇچۇر بېرىشىچە، فارۇخ 21-ماي كۈنى ۋىسكونسىن ئۇنىۋېرسىتېتىدا ئۆتكۈزۈلگەن مەزكۇر مۇسابىقىدە "س" گۇرۇپپىسى بويىچە، ئۆزى ياسىغان ماشىنا ئادەمنىڭ قولىنىڭ خىزمىتىنى كۆرسەتكەن بولۇپ، ئۈچ مىنۇت ئىچىدە ماشىنا قولنىڭ كۆپ تۈرلۈك خىزمىتىنى ئورۇنداپ، باشقىلار ياسىغان ماشىنا قوللارنىڭ ھەرىكىتىدىن بۇرۇن مەشغۇلاتىنى تاماملاپ، ئالتۇن مېدالغا ئېرىشكەن. فارۇخنىڭ ياسىغان ماشىنا ئادەم قولىنىڭ خىزمىتى ئەڭ تېز ۋە ئەڭ ئۈنۈملۈك ھېسابلانغان. فارۇخ ئۆز نەتىجىلىرى بىلەن بۇ يىل 6-ئايدا ئامېرىكا ھاۋا قاتناش ۋە ئالەم بوشلۇقى تېخنىكىسىنى باشقۇرۇش ئىدارىسىنىڭ لاڭلېي تەتقىقات ئىنستىتۇتىدا پراكتىكا قىلىش ۋە ئۆگىنىشكە قاتنىشىدىغان 100 قابىلىيەتلىك بالىلار قاتارىغا كىرگۈزۈلگەن. مەنبە: ئەركىن سىدىق مەرىپەت تورى

sarsan@axik

	نىمانداق  ئىقىدارلىق  بالا  ئۇ

7YIGIT

	كۈندىن-كۈنگە بۈيۈك ئارزۇلىرى ئۈچۈن توختىماي ئىزدىنىۋاتقان شۇ يىراقتىكى قەدىناسلىرىمىزنىڭ ئىشلىرىنى ئاسانلىق قىلغۇسى ئىلاھىم ..

anar

	شۇنچە بالىلار ئىچىدە ئۇتۇق قازىنىۋاتقان بۇ ئوماق ساقامنىڭ ھەممە ئىشلىرى خەيرلىك بولغاي !

iltebir107

	بەك كاتتا ئىش بوپتۇ.بۇ بالا ئۆزىنىڭ تىلىنى بىلەمدىغاندۇ؟

leyli

	بىر ساۋاقدىشىم بىلەن كېتىۋېتىپ قارىسام بىر بىنانى چاققان يەردە جىق بىزنىڭ ياش بالىلار خارابىنىڭ ئىچىدىن ماتىرياللارنى تۈرى بويىچە رەتلەۋېتىپتىكەن ، دوستۇمغا : مۇشۇ بالىلارمۇ بىنا سېلىشنى ئۆگىنىۋالسا بوپتىكەن ،كەچكىچە بىنا چاققان يەردە توپا-چاڭ يىمەي دىسەم ، دوستۇم : بىز شۇنداق ئۇنى بۇنى كولاپ تېپىشقا ئۇستا شۇڭا مۇشۇ ئىش لايىقراق دىگەن ...گەرچە چاقچاق بولسىمۇ ئىچىم ئاچچىق بوپ قالغان ئۇھ !!!! تىلىنى بىلمىسە ئالدىرىماي ئۆگىنىۋالار ئايروپىلان ياسىغاچ

peacelife212

	فارۇققا ئۇتۇق ۋە مۇۋەپپەقىيەت تىلەيمىز. بولسا سۈرىتىنى چىقىرىپ قويغان بولسا ھە، كۈرۈپ باقساق، باشقىلارغىمۇ تەشۋىق قىلساق، باللىرىمىزغا ئۈلگە قىلساق.