مانا تاماشا

dilroh

	مانا تاماشا ئەخمەت ئىمىن مەن ئىشرەت بەزمىسىدە ئولتۇرۇۋاتىمەن ............................ ئەي ، دۇنيا كەل ! بىلللە ئىچىشەيلى ! كۆتۈرەلىسەڭ ماڭا ئوخشاش ئاقنى ئىچ . يېنىڭ توم بولسا ئىلى چەمبىرەكنى ئىچ . يېلىڭداپ قالغان بولساڭ شاگاڭ داچۈ نى ئىچ . ئىستاكانغا لىق تولدۇراي ، قوۋزۇڭنى تولدۇرۇپ - تولدۇرۇپ ئىچ . « يۈرۈگۈم چىلاشسۇن » دېسەڭ بوتولكىسى بىلەن ئىچ . ساندۇقلاپ ئىچ . ھە ! ..... ئەنە شۇ چاغدا ماڭا ئۈلپەت بولالايسەن . شۇ چاغدا « ئەكەل قولۇڭنى ! » دەيمەن . بىز دوست بولىمىز . « مەس بولۇپ قالىمەن » دەمسەن ؟ قورقما ! مۇزدەك پىۋا ئىچىمىز . كەيپىڭمۇ كۆپۈكتەك يوقاپ كېتىدۇ . لېكىن كەيپنىڭ يوقۇلۇپ كېتىشى ياخشى ئىش ئەمەس . خاتىرجەم بول ! مەن كەيپنىڭ ئەھلى . مۇسەللەسلىرىمىز بار ، مەيزاتلىرىمىز بار . پاتېنت ھوقوقى بىزنىڭ ، ئۇنىڭدا بىزنىڭ مىللىي روھىمىز قىزىرىپ تۇرىدۇ . خۇددى خورازنىڭ تاجىسىدەك ، خۇددى ھۆسن تۈزەش دۇكانلىرىدىكى يالاڭ پاچاق خېنىملارنىڭ لەۋ سۇرۇقىدەك . ھا ھا ھا ھا ھا ....... ئۇ چاغدا كۆر مەستلىك دېگەننى . مېڭىشلىرىڭ غالداڭ - غۇلدۇڭ ، يېتىشلىرىڭ ئىرماش - چىرماش . ئاڭلاشلىرىڭ ئاھ ! ، ۋاھ ! . ئەتىسى قوپساڭ يانچۇقلىرىڭ تەتۈر ئۆرۈلگەن . خوجايىننىڭ قاپىقى تۈرۈلگەن ، كىملىكىڭنى گۆرۆگە قويۇپ ، پۇل ئەكىلىشكە ئۆيگە يۈگۈرگەن . مانا كەيپچىلىك ، مانا تاماشا !!!!! كەل دۇنيا ، كەل ! ئىشرەت بەزمەمگە كەل ! كەيپنىڭ ھوزورىنى بىللە سۈرەيلى ! بىر تالدىن چېكىشىۋالامدۇق ؟ سىگارتىڭنى قوي ، ئېغىزنى بەتتام قىلىدىغان . شىياڭيەننى كۆتەر ، مەيدىنى چىڭىتىدىغان . بىر بىنەڭ ئوراپ بېرەي ، بەلغەمنى ھەيدەيدۇ . مېغىزدەك سېلىپ بېرەي ، پەيزىڭنى قوزغايدۇ . ئاسمانغا چىقىپ ئەرشنى كۆرىسەن ، يەرگە چۈشۈپ كەشىڭنى كۆرىسەن . جىسمىڭ قايناڭ بازارلاردا ، روھىڭ مىسكىن مازارلاردا . يۈرەك ھالدى بولۇپ كېتىدىكەنمەن دەپ قورقىۋاتامسەن ؟ ئەمىسە ، يۈرەكنى قاپتەك قىلىۋېتىدىغىنىدىن بىر چىمدىم سېلىپ بېرەي . ناسىۋال قاپاقنى قېقىپ بېرەمدىكىن دەپ قالما . بىزمۇ زامانىۋىلىشىپ كەتتۇق . ئىچىشىمىز ئاق ، چېكىشىمىزمۇ ئاق . كۈمۈش قەغەزگە ئاقنى قويىۋېلىپ ، سەرەڭگىگە ئوتنى يېقىۋېلىپ ، يۈز سوملۇقنى كاناي قىلىۋېلىپ ئاق يىلاندەك مەستخۇش تۈتۈننى ئەجدىھادەك ھاپلا يۇتىمىز . ئاقنىڭ كەيپى نازىنىڭ قىزىدەك ۋۇجۇدىمىزنى قىلغاندا ئەسىر ، قولىمىز بوشاپ ، پۇتىمىز بوشاپ ، شامدەك يۇمشاپ ، لايدەك ياتىمىز . بۇ جەھەتتە ياۋروپادىن ئۆتۈپ كەتسەك كېتىمىزكى ھەرگىز كەينىدە قالمايمىز . ئاۋال ئىشلەپ تاپقان پۇلىمىزغا چېكىمىز ئاندىن ئاتا - ئانىمىزنىڭ پۇلىغا چېكىمىز كېيىن كۆزىمىزنى خەقنىڭ يانچۇقىغا تىكىمىز . ياكى ئالداپ ئالىمىز ياكى بۇلاپ ئالىمىز ياكى تىلەپ ئالىمىز ياكى چەيلەپ ئالىمىز ....... ئىشقىلىپ ئالىمىز ، چېكىمىز . ئاق چېكىش ئۈچۈن بەزىدە خەقنىڭ بوينى باغلانغان ئىتىغا ئايلىنىمىز . « ئال كۈچۈكۈم ! » دېسە ، ئاتا - ئانىمىزغىمۇ « ھاۋ » دەپ ئېتىلىمىز . ئاشۇ ئاق ئۈچۈن بەزىدە مادا ئېشەككىمۇ ئايلىنىمىز . ئىپپەت - نومۇستىن ، غوروردىنمۇ بىراقلا ئايرىلىمىز . ئاشۇ ئاق ئۈچۈن بەزىدە ئوقى بار مىشەككىمۇ ئايلىنىمىز . چاچراپ چىقىپ گۇناھسىزنىڭ يۇرىكىگە سانجىلىمىز . ئاشۇ ئاق ئۈچۈن ئوت بولۇپ يانىمىز . ئاشۇ ئاق ئۈچۈن ئىس بولۇپ ئۇچىمىز . ئاشۇ ئاق ئۈچۈن كۈل بولۇپ ئۆچىمىز . كەل دۇنيا كەل ! سەنمۇ چەك ، ئۇچايلى بىز بىللە سامادا . مانا كەيپ ! مانا تاماشا !!! مەن ئىشرەت بەزمىسىدە ئويناۋاتىمەن . كەل دۇنيا كەل ! بىللە ئوينايلى ! بىزدە ھەممە ئويۇن بار . خالىساڭ باشلىرىمىزنى ئىككى يانغا تاشلاپ ساما ئوينايمىز . خالىساڭ بېلىمىزنى تولغاپ تۇرۇپ دېسكو ئوينايمىز . كەل دۇنيا كەل ! سەن ئايال بول ، مەن ئەركەك بولاي . سەن بوينۇمغا گىرە سال ، مەن بېلىڭدىن قۇچاقلاي . چاپلىشىپ تۇرۇپ ، چىرمىشىپ تۇرۇپ ئەڭ زامانىۋى تانسا ئوينايمىز ! ئاجايىپ نوچى بايلىرىمىز بار . قوللىرىنى يۈز سوملۇق پۇلدا سۇرتىدىغان . بېشىمىزدىن شاراق - شۇرۇق دوللار ئۆرۈيدىغان . يەنە ئاجايىپ ئاياللىرىمىز بار . ئۇسۇل ئويناپ بەرسەك خۇددى شەھەر ئېلىپ بەرگەندەك بوينىمىزغا شايىلار ئارتىپ ، بېلىمىزگە نەچچە كىيىملىك بەقەسەملەردىن بەلباغ باغلايدىغان . قارا دۇنيا قارا ! ئۇياقتىمۇ توي ، بۇياقتىمۇ توي . ئۆز زامانىسىدا پادىشاھلىرىمىز ئوغۇل - قىزلىرىنىڭ تويىغىلا پۈتۈن ئەلگە ئاش تارتىدىكەن . بىز بۈشۈك تويلىرىمىزغىمۇ ، سۈننەت تويلىرىمىزغىمۇ ، چوكان تويلىرىمىزغىمۇ پۇتۇن شەھەرگە ئاش تارتىمىز . ھەتتا شەھەردىن شەھەرگە يۆتكىلىپ يۈرۈپمۇ ئاش تارتىمىز . شەھەردىن شەھەرگە چاقىرىپ يۈرۈپمۇ ئاش تارتىمىز . بىز كىتاپ ساتمايمىز ، باغاق ساتىمىز . كىتاپ ئالمايمىز باغاق ئالىمىز . بىز ھەمكارلىشىپ كارخانا قۇرمايمىز بەلكى ھەمكارلىشىپ سورۇن قۇرىمىز . بۈگۈن ھەممىڭلار بىرلىشىپ ماڭا بېرىسىلەر ، ئەتە ھەممىمىز بىرلىشىپ ساڭا بېرىمىز . مەنمۇ ھەممىنى رېستۇرانغا تۆكىمەن ، سەنمۇ ھەممىنى رېستۇرانغا تۆكىسەن . سورۇندا ھەممىمىز ئوقۇرى ئېگىز باي بالىسىدەك ئولتۇرىمىز . ئۆيگە قايتقاندا قۇرۇق ناننى غاجىلاپ ، بېشىمىزنى قاشلاپ غەمگە چۆكىمىز . ئۆيلىرىمىزگە خۇدانىڭ رەھمىتى ياغمايدۇ باغاق ياغىدۇ . كۆڭلىمىزدە باغاقلارغا ئالقىش ياغمايدۇ قاغىش ياغىدۇ . لېكىن چاندۇرمايمىز ، سورۇنلاردا چىرايىمىزدىن راست كۈلكە ئەمەس ھىجاق ياغىدۇ . ئېغىزىمىزدىن راست گەپ ئەمەس يالغان ياغىدۇ . بەزىدە زارلىنىپ ، غۇتۇلدىشىپمۇ قويىمىز . بەزمە - بالاسى توغرىلىق پىكرىمىز بىر يەردىن چىقىدۇ . پىكرىمىزنىڭ بىر يەردىن چىققانلىقى ئۈچۈن ، بىر - بىرىمىزنىڭ ھالىغا يەتكەنلىكىمىز ئۈچۈن ، بىر - بىرىمىزنىڭ كۆڭلىنى چۈشەنگەنلىكىمىز ئۈچۈن ، كۆڭلىمىز ئۈچۈن ، يەنە شۇ كۆڭلىمىز ئۈچۈن ، ئەقىلنى تەرك قىلغان ، ئەتىنى ئويلىمايدىغان ئەشۇ ئاپئاق كۆڭلىمىز ئۈچۈن ، ئۆزىنى ئۇنتىغان ئۆزگىنىنى ئويلايدىغان ، ئاشۇ ئۆزگىمۇ ئۆز نۆۋىتىدە ئۆزىنى ئۇنتۇيدىغان ئاشۇ كۆڭۈلچەك كۆڭلىمىز ئۈچۈن قەدەھ سوقۇشتۇرۇپ ئەتىسى يەنە يېڭى مەنىدىكى بەزمە قۇرۇش ئۈچۈن ۋەدىلىشىمز . « ئىچمەيمەن » دىگەن كۆڭلىمىز ئۈچۈن ئىچىمىز . چەكمەيمەن دىگەن كۆڭلىمىز ئۈچۈن چېكىمىز . قىلمايمەن دىگەن كۆڭلىمىز ئۈچۈن قىلىمىز . بارمايمەن دىگەن كۆڭلىمىز ئۈچۈنمۇ بارىمىز . ئىچمەيمەن دېيىشمۇ بىزنىڭ كۆڭلىمىز . بىر قېتىمدىن كېيىن ئاخىرقى قېتىم ، ئۇنىڭدىن كېيىن يەنە ئاخىرقى قېتىم ، ئۇنىڭدىن كېيىنكىسى ئەڭ ئاخىرقى قېتىم ، ئۇنىڭدىن كېيىنكى توختىماس رېتىم . مانا ! بىزنىڭ توختىمايدىغان تۇرمۇش رېتىمىمىز . مانا ! بىزنىڭ ناغرا - سۇناي تەڭكەش قىلىنغان ھايات رېتىمىمىز . كەل دۇنيا كەل ! ناخشىمىزغا جۆر بول . ئۇسۇلىمىزغا تەڭ سەكرە . ساما سال ، دېسكو ئوينا . تولغان ، تولغان . ئاتا - ئانىلىرى رېستۇراندا يۈرگەن شەنبە - يەكشەنبە ئىسسىق تاماقسىز ، قۇرۇق ناننى غاجىلاپ يۈرگەن كىتاپقا « پۇل » دىسە دەشنامنى ئىششىتىپ ، يېلىنىپ - يىغلاپ قاپاق ئىششىتىپ ، بۇلۇڭ - بۇلۇڭدا شۈمشۈيۈپ يۈرگەن سەبىي بالىدەك دەرت بىلەن تولغان . كەل دۇنيا كەل ! زامان بىزنىڭ . دەۋر بىزنىڭ . سېنىڭ دەۋرىڭ ئۇچۇر دەۋرى بولسا بىزنىڭ دەۋرىمىزمۇ ئۇچۇر دەۋرى . سەن ئۆز - ئارا ئىلىم - بىلىمنىڭ ئۇچۇرىنى يەتكۈزسەڭ بىز ئۆز - ئارا توي - بەزمىنىڭ ئۇچۇرىنى يەتكۈزىمىز . سەن پەن - تېخنىكا ئىجاد قىلساڭ ، بىز توي - بەزمە ئىجاد قىلىمىز . كەل دۇنيا كەل ! ئىشرەت بەزمىسىگە كەل . قىرانلار بەزمىسىگە كەل . چوكانلار بەزمىسىگە كەل . بالىلار بەزمىسىگە كەل . ئەپەندىلەر بەزمىسىگە كەل . ھاجىملار بەزمىسىگە كەل . تۇغۇلغانلار شەرىپىنىڭ بەزمىسىگە كەل . ئۆلگەنلەرنىڭ بەزمىسىگە كەل ................. كەل ! كەل ! كېلىۋەر ! ئەمما قورسىقىڭنى توقلاپ كەل ، يانچۇقىڭنى لىقلاپ كەل . رېستۇرانلار ئارا پۇلىڭنى چاچ ! بايۋەتچىلىك بىلەن كۆڭلۈڭنى ئاچ ! بولىسەن شۇندا سەنمۇ باي - پادىشاھ ! مانا تاماشا ! مانا تاماشا !!!!!! (ئاپتورنىڭ "جۇلدۇر كېپەن خوتۇننىڭ ساداسى" ناملىق نەسىرلەر توپلىمىدىن ئېلىندى.)

MARS-500

	ھاراق- تاماكا ئادەمنىڭ ئەڭ چوڭ دۈشمىنى.بۇ دۈشمەن يەر شارىدىكى تاجاۋۇزچى دۆلەتلەردىنمۇ ۋەھشى،دەھشەتتۇر.بۇ دۈشمەن شۇ ئادەم ۋە شۇ مىللەتنى خار -زەبۇ،خانا-ۋەيران،تىلەمچى قىلىپ دۇنيا خەلقى سەسكىنىپ قاچىدىغان كېرەكسىز ئەخلەتكە ئايلاندۇرۇپ قويىدۇ.

PINHAN

	مۇشۇ كىشىلەرنىڭ ھاراقنى جىنىنى قىيناپ تۇرۇپ ئىچىشلىرىنى كۆرسەم شۇنداق ھەيران قالىمەن! كىچىك چىغىمدا بىزنىڭ بىر خوشنا بولىدىغان، دائىم ھاراق ئىچەتتى، ساق ۋاقتىدىمۇ مەستەك يۈرەتتى، ھازىر پالەچ بولۇپ قالدى، ھاراق ھەقىقەتەنمۇ نۇرغۇن ياشلىرىمىزنى ئازغۇنلۇق يولىغا باشلاپ كەتتى! تېمىڭىزغا رەھمەت!

مەرۋەرى

	ئەمما ئابدۇقىيىم ئىمىننىڭ ئاۋازنى بەك چۈشكەن، بەزى يەرلىرى ئادەمنىڭ يۈرىكىنى تىتىرتىۋېتىدۇ زادى ، دېلروھنىڭ ئەمگىكىگە تەشەككۈر!!

neyime

	بۇنى ئاڭلاپ ھەجەپ ئىچىم ئىچىشىپ كىتىپ بارىدۇ ،مۇشۇ ئاق تاماكا نۇرغۇنلىغان ئىسل باللرىمزنى چىقىپ بولمايدىغان ھاڭغا چۇشۇرۋەتتى ،ھازىر ئۇ ئىسل بالىلىرىمىز  شۇ ھاڭدىن چىقىش ئۇياقتا تۇرسۇن بارغانچە چوڭقۇرلىشىپ كىتىپ بارىدۇ ...... ئاللاھ ئىگەم شۇ بالىلارنىڭ كۆڭلىگە ئىنساپ بەرگەيسەن !

زىلال

	بۇتېمىنى يوللاپ تېخىمۇ كۆپ تورداشلارنى ئاڭلاش شەرىپىگە مۇيەسسەر قىلغىنىڭىزغا تەشەككۇر.... بۇتېمىنىڭ ئاڭلىغانلىكى ئادەمنى ئويغا سېلىشىنى ۋە ئويغۇتىشىنى ئۈمىد قىلىمەن ....ھارمىغايسىز....

timtas

	مەن بۇ نەسىرنى ئىلگىرىمۇ  ئاڭلىغان،شۇ ۋاقىتتمۇ ماڭا شۇنداق تەسىر قىلغان ،ھازىرمۇ ھە م: ..............................                                                                       بولسا مۇشۇنداق ئادەمگە تەسىر كىلدىغان،تەربىيۋى ئەھمىيتى بار تىمىلانى كوپرەك يوللىشىڭىزنى ئۇمىد قىلىمەن.