شەپەرەڭ

جۇلالىق

	(مەسەل) تاشتۆمۈر توختى ، ئەھمەد تاشتۆمۈر ئۇزاق زامانلار ئىلگىرى قۇشلار بىلەن ھايۋانلار ئوتتۇرىسىدا بىر مەيدان قاتتىق جەڭ بولۇپتۇ. ئۇلارنىڭ بىر – بىرى بىلەن نېمە ئۈچۈن ئۇرىشىدىغانلىقىنىڭ سەۋەبىنى ھېچكىم ئۇقمايدىكەن. شەپەرەڭ قايسى تەرەپكە يان بېسىشنى بىلەلمەپتۇ. ئۇ ئويلا – ئويلا ئاخىر كىم كۈچلۈك كەلسە، شۇ تەرەپتە تۇرۇشنى قارار قىلىپتۇ. شەپەرەڭ بىر مەزگىل كۆزەتكەندىن كېيىن، ئۇنىڭغا قۇشلار غالىب كېلىدىغاندەك كۆرۈنۈپتۇ. شۇنىڭ بىلەن ئۇ ئۇچۇپ بېرىپ قۇشلارغا قوشۇلماقچى بوپتۇ. — سەن بۇ يەردە نېمە قىلىسەن؟ – دەپ ۋارقىراپتۇ بىر قۇش. — كۆرمىدىڭمۇ، مەنمۇ بىر قۇش. قارا، قانىتىممۇ سېنىڭكىگە ئوخشاش، – دەپتۇ شەپەرەڭ. — ئۇنداق بولسا، بىز بىلەن ماڭ، مۆكۈپ يۈرمە جۇمۇ! – دەپتۇ قۇش. بىراق، ئۇزاق ئۆتمەي ئەھۋال ئۆزگىرىپتۇ، ئەمدى ھايۋانلار غالىب كېلىدىغاندەك قىلىپتۇ. بۇ چاغدا شەپەرەڭ قۇشلاردىن ئايرىلىپ ھايۋانلار تەرەپكە قاراپ ئۇچۇپتۇ. — سەن بىز تەرەپتە نېمە قىلىپ يۈرىسەن؟ – دەپ ۋارقىراپتۇ بىر ھايۋان. — سەن پايلاقچىلىق قىلغىلى كەلگەن ئوخشىمامسەن؟ – دەپتۇ يەنە بىر ھايۋان. — بىلمەمسىلەر، مەنمۇ سىلەرنىڭ بىر خىلىڭلارغۇ، – دەپتۇ شەپەرەڭ چىشىنى كۆرسىتىپ. — سەن كىمنى ئەخمەق قىلماقچى؟ – دەپتۇ ھايۋانلار، – بىز سېنى ھېلىلا قۇشلار تەرەپتە كۆرگەن تۇرساق! شۇنداق قىلىپ، ھايۋانلار شەپەرەڭنى قوغلىۋېتىپتۇ، قۇشلارمۇ شەپەرەڭنى ئۆز توپىغا قوشۇشنى رەت قىلىپتۇ. ئۇلار بىر – بىرىنى يېڭەلمەي، ئاخىر ئۇرۇشنى توختىتىپ يارىشىپتۇ. بىراق، ھەممە كەلگۈلۈك شەپەرەڭگە كەپتۇ. يا قۇشلار، يا ھايۋانلار ئۇنى ئارىغا ئالمىغاچقا، ئۇ كۈندۈزى سىرتقا چىقىشتىن نومۇس قىلىپ، كېچىسىلا سىرتقا چىقىدىغان بولۇپ قاپتۇ.

nazinin

	مەسەلنىڭ تەربىيىۋى ئەھمىيىتى چوڭقۇر . رىياللىقتىمۇ خۇددى شەپەرەڭگە ئوخشاش دومۇلاق تاۋۇز ئادەملەر بار .

hilal

	شەپەرەڭغۇ جاجىسىنى يەپتۇ ..... تۇرمۇشتا ئىككى يۈزلىمىچى ، يۇمىلاق تاۋۇزلار ئەكسىچە تېخىمۇ ياخشى كۈن كۈرىۋاتىدۇ .... [ hilal بۇ يازمىنى  2011-يىلى 3-ئاينىڭ 4-كۈنى 18:14  دە تەھرىرلىگەن. ]

جۇلالىق

	كىم ھىلىگەرلىك بىلەن باشقىلارغا خۇشامەت قىلسا ياخشى كۈن كۆرىدۇ. ۋىجدان-غۇرۇرى بىلەن قەددىنى تىك تۇتۇپ ياشىسا شۇ زىيان تارتىدۇ.تەخسىكەشلەرنىڭ زامانى بوپ كېتىۋاتىدۇ.

دىلەيسەم

	ئۆز مەيدانى ۋە ئۆز قارىشى ئېنىق بولمىغان بۇنداق شەپەرەڭ مىجەز كىشىلەر ئەتتىراپىمىزدا خېلىلا نۇرغۇن. جۇلالىقنىڭ تەربىيىۋى ئەھمىيىتى بار تېمىلارنى يوللىغانلىقىغا رەھمەت!

月花

	ھەي..... ھازىرقى ئادەملەر نىڭ ئاشۇ ھايۋانلارچىلىكمۇ ئاق قارىنى پەرىقلەندۇرۇگىدەك يۇرىگى ھەم ۋىجدانى بولمىسا ،نەدە شۇنداق ئادەملەر ئۇستۇنلىكنى ئگەللەۋاتمامدۇ .