يۈرىكىم يىغلايدۇ!

مەرۋەرى

	<<ئالدىرىغان نەدە دېسە، ئالدىرىمىغاننىڭ كەينىدە>> دەپ بۈگۈن بىر دوستلار بىلەن كۆرۈشۈپ بىر دەم ھال مۇڭ بولۇشقا دىيىشىپ ئىشتىن ناھايتى ئالدىراش چۈشۈپ كىيىم ئالماشتۇرۋاتاتتىم. تۇيۇقسىز زالدىن دوختۇر...دوختۇر دېگەن ئەنسىز ئاۋاز ئاڭلاندى، مەن يۈگۈرۈپ چىقىپ، بىر نەچچەيلەننىڭ چىرايلىرى كۆكۈرۈپ كەتكەن بىر ئايالنى كۆتۈرۈپ ئەكىرگەنلىكىنى كۆرۈپ، قولۇمدىكى خالاتنى يەنە قايتا كىيىپ قۇتقۇزۇش خىزمىتىگە ياردەملەشكىلى كىردىم. بىز بارلىق دوختۇر سېستىرالار پۈتۈن كۈچىمىز بىلەن شۇنچە تىرىشقان بولساقمۇ ئاللاھتىن كەلگەن بۇ ئەجەلگە ئامال قىلالماي، قاراشتىنلا چېچەنلىكى، تېتىكلىكى، پاكىزلىقى چىقىپ تۇرغان بۇ ياش ئانىنىڭ ئىڭكىنى بالىلىرى، قەدىناسى كەلگۈچە چېتىپ قويدۇق. مەن 16 يىللىق سېستىرالىق خىزمەتنى ئىشلەپ تالاي كېسەللەرنى، تالاي ئۆلۈملەرنى كۆرگەن بىلمەيمەن، بۈگۈن نىمە بولدۇمكىن خۇددى ئۆز قېرىندىشىمدىن ئايرىلغاندەك كۆڭلۈم يېرىم بولۇپ كۆز ياشلىرىمنى توختىتالماي قالدىم. ئاپا.... سىرتتىن ئىككى قىز ئېتىلىپلا كىرىپ ئۆزىنى ئانىغا ئاتتى. ئاپا...بىزنى يالغۇز تاشلاپ كەتتىڭىزغۇ ئاپا، ئاپا دادامغا نىمە دەيمىز ئاپا، تۈنۈگۈن كەچ تېخى تېلىفۇندا پاراڭلاشقانتۇققۇ ئاپا.......................................... يۈزلىرىم ياش بىلەن يۇيۇلدى، بىچارە قىزلارنىڭ ئاھۇ-زارى پۈتۈن دوختۇرخانىنى بىر ئالغان ئىدى. تېخى تۈنۈگۈن كەچ قىزلىرىنىڭ چىرايلىق ئاۋازلىرىنى ئاڭلاپ قەدىناسىغا: - قىزلىرىمىزنى تالالىق قىلىپ خاتىرجەم بولدۇق، ئاللاھ ئۇ پەرىشلىرىمنىڭ بەختىنى بەرسۇن! ئەمدى بىر ئارام ئالايلى ھە دادىسى دەپ ئىللىق كۈلۈمسىرىگەندە بۇ ئارامنىڭ مەڭگۈلۈك بولۇشىنى شۇ قەدىناسى ئويلىغانمۇ؟ ئەمدىلا تۇرمۇشنىڭ نىمىلىكىنى، ئانىنىڭ نىمىلىكىنى ھېس قىلىۋاتقان قىزلىرى ئانىسىنىڭ ئۆزلىرىنى بۇنداق تۇيۇقسىز تاشلاپ كېتىشىنى خىيالىغىمۇ كەلتۈرمىگەن بولغۇيتتى. شۇنداق ئادەم بەندىچىلىكتە ھېچنەرسىنى ئويلىمايدىكەن، ھەممە نەرسىگە تويمايدىكەنمىز ئەمەسمۇ؟ ئەنە ئۇنىڭ قەدىناسى ئايالىنىڭ ئۈستىگە ئۆزىنى ئېتىپ، ئەتتىگەندىلا ئۆزىگە چاي بېرىپ يولغا سالغانلىقىنى ئېيتىپ يىغلاۋاتىدۇ، ئەنە قىزلىرى ئانىسىنى تېخى ئەتە يوقلاپ كېلىشنى پىلان قىلغانلىقىنى، ئەمما ئۆزلىرىنىڭ ئانىسىنىڭ مۇزلىغان بەدىنىگە ئۆزىنى ئېتىپ يىغلاپ قېلىشىنى ئويلاپمۇ باقمىغانلىقىنى ئېيتىپ ئاھ ئۇرۇپ، ياق توغرىسى پۇشايمان قىلىپ يىغلاۋاتىدۇ. بۇ بىر جۈپ قىز ئەتتىراپتىكى ھەممە ئادەمگە، تونىسۇن، تونىمىسۇن ئۇچرىغانلىكى ئادەمگە ئېسىلىپ يىغلاۋاتىدۇ، ئۇلار ئانىسىنىڭ ئۆلۈمىگە ئىشەنمىگەنلىكىنى، بۇ ئىشنىڭ ئۆزلىرىنىڭ چۈشى بولۇپ قېلىشىنى، يالغان بولۇپ قېلىشىنى قانچىلىك ئارزۇ قىلىدىغانلىقىنى ئېيتىپ يىغلاۋاتىدۇ. لېكىن بۇ يالغان ئەمەس، ئانىسى ئۇلاردىن مەڭگۈلۈك ئايرىلدى، ئانا كەلمەس مەھەللىسىگە كەتتى، ئانا مەڭگۈلۈك ئارام ئالغىلى كەتتى، ئانا بۇ دۇنيانىڭ تۈگىمەس ئىشلىرىنى يېرىم يولدا تاشلاپ قويۇپ كېتىپ قالدى، ئۇنىڭ كۆزلىرى يېرىم يۇمۇلغان ئىدى، بەلكىم سەھەردە ئاستا ئويغۇتۇپ، ئۆز قولى بىلەن چاي بەرمىسە ئىشقا ماڭمايدىغان شۇ قەدىناسى ئۈچۈن تارتىشۋاتقاندۇ، ئەمدىلا تۇرمۇشقا قەدەم قويغان، تۇرمۇشتا تېڭىرقىسا كىملەرگە يالۋۇرار دەپ شۇ بىر جۈپ قىزىغا تارتىشىۋاتقاندۇ؟ ئۆزى قىلىپ بولالمىغان ئىشلىرى ئۈچۈن تارتىشىۋاتقاندۇ؟ كىم ئويلىغان، ھېلىلا بىللە تاماق يىيىشكەن دوستلىرى بۇ دوستىنىڭ ئۆزلىرىنى تېلىفۇن ئۇرۇپ تاماققا چاقىرىپ ئۆزلىرى بىلەن مەڭگۈلۈك خوشلىشىنى ئويلىغانمۇ؟ ئەنە ئۇنىڭ دوستلىرى باياملا ئۈچىنىڭ قىزغىن پاراڭلار بىلەن بىللە غىزالانغانلىقىنى ئېيتىپ يىغلاۋاتىدۇ. بۇ ئانا مانا مۇشۇنداق تۇيۇقسىز ھەممە يېقىنلىرىنى، قېرىنداشلىرىنى ھەسىرەتتە قالدۇرۇپ قويۇپ كېتىپ قالدى، سىزمۇ، مەنمۇ ھامان بىر كۈنى يورۇق دۇنيا بىلەن خوشلىشىمىز، بۇنىسى سىزگىمۇ ماڭىمۇ ئايان، ئەمما نېمىشقا، زادى نېمىشقا ئادەملەر بىر- بىرى بىلەن ئازارلىشىپ ياشايدىغاندۇ؟ مەن كىيىملىرىمنى ئالماشتۇرۇپ دوستلىرىمنىڭ يېنىغا ماڭدىم ، كۆز ئالدىمدا بايامقى كۆرۈنۈشلەر، قىزلارنىڭ ئاپا دېگەن ئاۋازى قۇلاق تۈۋۈمدە جاراڭلاپ تۇراتتى. قايتىپ كېلىپ ئىختىيارسىز كۇنۇپكا تاختىسىغا قول ئۇزاتتىم، كۆڭلۈمدىكى غەشلىكنى مۇشۇ خىل ئۇسۇلدا يەشمەكچى بولدۇم. ئۇلۇغ ئاللاھ بارلىق ئانىلارنىڭ ئۆمۈرىنى ئۇزۇن قىلسۇن! ئاتا- ئانىمىز ھايات ۋاقتىدا ئۇلارنى قەدىرلەيلى، ئۇلارنىڭ خىزمىتىنى قىلايلى! پەرزەنتلىك بۇرچىمىزنى ئاتا قىلايلى!

سامسىپەز

	ھېچكىم ئۆزىزنىڭ ۋە ياكى بىراۋنىڭ  قاچان بۇ جاھان بىلەن ۋىدالىشىدىغىنىنى بىلمەيدىكەن... بۇ جاھاننىڭ ئىشى شۇ...   يازمىنى ئوقۇۋېتىپ، گې يوۋ باش رول ئالغان "سەمىمىي بولمىسىڭىز ئاۋارە قىلماڭ 2" دېگەن كىنودىكى داغدۇغىلىق "ۋىدالىشىش مۇراسىمى" خىيالىمدىن كەچتى... ئۇ كىنونى كۆرگەن چېغىمدا،  شۇنداق داغدۇغىلىق بولمىسىمۇ، ئاددىي بىر" خوشلىشىش چېيى" ئۆتكۈزىۋېلىش پۇرسىتى بولسا بەكمۇ ئەھمىيەتلىك بولغۇدەك دەپ ئويلاپ قالغان ئىدىم... بىراق ئۇ مۈمكىنمۇ؟   ئەڭ ياخشىسى كېتىدىغان چاغدا تارتىشماي، ئارمانسىز، كۈلۈمسىرەپ كەتكۈدەك ياشاش نېسىب بولغاي.... ئىنكاسىمنى قىززىقچىلىق دەپ چۈشۈنۈپ قالماڭلار....

tiwix

	ھەقىقەتەن سامسىپەز ئۇستام  ئېيتىپ  ئۆتكىنىدەك ، كىشى  ئۆزى  قايسى  ۋاقىتتا  كېتىدىغىنىنى  بىلسە  ئىدى كاشكى ......... مەرىم بۇ ئىشلارنى  ئېيىتقىنىدا كۆڭلۈم  شۇنچىلىك  يېرىم بولدى ، ئىختىيارىم  ئەمەس تۇنجى  بولۇپ  ئاپام  خىيالىمغا  كەچتى!! ئەتتىگەن   خوشال ئۆيدىن  چىقىپ كەچتە مۇسىبەت  خەۋىرى  كەلدى  دىگەن  بىر  قاباھەت ~ھەر قانچە  خۇدايىم  ئۆزى  ياخشى  كۆرگەن كىشىلىرىنى ئاۋىلى  ئەكىتىدىگەن  دىگەن  بىلەن بۇنى قوبۇل  قىلىش  نەقەدەر  مۈشكۈل ھە ..... خۇدايىم ، بارلىق ئانىلارنىڭ ئۆمۈرىنى ئۇزۇن قىلسۇن! ئاتا  ئانىلىرىمىزغا كۆپرەك  ھەمراھ   بولايلى ، قەدىرلەيلى ، ئاسرايلى ...... بىزنىڭ  بەختىمىزگە  ئۇلار  ياشىسۇن !!!!

قەھۋە

	ئەتىگەندىلا بۇ تېمىنى كۆرۈپ قاپتىمەن. مەنمۇ تىۋىشقا ئوخشاشلا ئىختىيارسىز ئاپامنى ئويلىدىم. تۈنۈگۈن بىر كۈن بارماي قويغىنىمغا ئىچىم تىتىلداپ تۇراتتى، تېلغۇندىغۇ كۆرۈشىمىز. شۇنداقتىمۇ بۇ نەق مەيدان خاتىرىسى ماڭا بەك تەسىر قىلدى. كۈندىلا بېرىۋالاي دېسىڭىز ئەر، بالا تۇرغان. بىللە بارسىڭىز بالا كەپسىزلىك قىلىپ  ئۇلارنى چارچىتىپ قويارمىزمىكىن، دەپ ئەنسىرىگەن. لېكىن ئاتا-ئانا دېگەنغۇ مەڭگۈ چارچىدىم دېمەيدۇ. ..    ئادەم ئۆزىنىڭ قايسى ۋاقىتتا كېتىدىغانلىقىنى بىلسە ھە. ئابدۇللا ئابدۇرېھىمنىڭ ”يوقلاپ تۇرغىن ئاتا-ئاناڭنى“ دېگەن ناخشىسى ئېسىمگە كېلىۋاتىدۇ..... ئاتا-ئانىمىزغا  كۆپرەك ھەمراھ بولايلى!

dilroh

	ئۇلۇغ ئاللاھ بارلىق ئانىلارنىڭ ئۆمۈرىنى ئۇزۇن قىلسۇن!

月花

	مىنىڭ ئاناممۇ كېسەل ئدى ئۇنى يوقلاپ كەلسەم بولغىدەك ئەگەر دۇنيادا ھەقىقى مۇھاببەت بار دىسەك ،ئۇ دەل ئانىنىڭ بالىغا بولغان مۇھابىتى. مەن بۇسوزنى بەكمۇ ياخشى كورىمەن .پەقەت ئانىلارلا بالىلىرىغا مىھنەتسىز ھەم چەكسىز مىھرى -مۇھابەت بېغىشلىيالايدۇ........................... [ Jinasta بۇ يازمىنى  2011-يىلى 2-ئاينىڭ 13-كۈنى 00:42  دە تەھرىرلىگەن. ]

Jinasta

	ھەي!!! شۇ تاپتا بوغۇزۇم بۇغۇلۇپ قالدى. نېمە دېيىشنى بىلەلمىدىم. يۈرۈكۈم ئۈن-تىنسىز يىغلاۋاتىدۇ، ئاللا ئىگەم ھەر بەندىسىنى ئۆز پاناھىيىدا ساقلىغاي!!!رېسقىنى زىيادە قىلغاي!!!! بەندىنىڭ قولىدىن نېمە كېلىدۇ دەيسىز؟! مەرھۇمە قېرىندىشىمىزنىڭ ياتقان يېرى جەننەتتە بولسۇن!!!!خۇدايىم ئىمان ئادا قىلسۇن!!! [ Jinasta بۇ يازمىنى  2011-يىلى 2-ئاينىڭ 13-كۈنى 00:44  دە تەھرىرلىگەن. ]

جۇلالىق

	ئاتا-ئانىمىز ھايات ۋاقتىدا ئۇلارنىڭ خىزمىتىنى قىلىۋالايلى دېمەك ئېغىزدا شۇنداق ئاسان تۇيۇلىدىكەن. ئەر كىشىغۇ دائىم ئاتا-ئانىسىنىڭ يېنىدا بولغاندىكىن ئۇلارنىڭ ئەھۋالىدىن خەۋەر ئېلىپ كۈندە كۆرۈشۈپ تۇرىدىكەن. بىز ئايال بولغۇچىلارغا بۇنداق پۇرسەت دائىم بولمايدۇ، بىر ئائىلىگە باش بولغاندىن كېيىن ۋاقتىدا بېرىپ ئۇلارنى يوقلاپ كېلەلمەيدىكەنمىز، ئاتا-ئانىنىڭ كۆزلىرى بولسا ئىشىكتە بالا قاچان كېلەركىن؟ بەكلا كۆرگۈم كەلدى دەپ بالىلىرىنى سېغىنىشلار......... ئاللاھ، دادامنى مەن ئۇنىڭ ئالدىدىكى بالىلىق بۇرچۇمنى ئازراق بولسىمۇ ئادا قىلىپ بولغىچە دەرگاھىغا ئېلىپ كەتتى. ئانامنىڭ خىزمىتىنى بولسىمۇ قىلىۋالاي.