مۇنبەردىكى تۇنجى پائالىيەتكە ئىشتراك قىلىڭ.

saye

	ئالدى بىلەن يەتتەقىزلىرىم مۇنبىرىنىڭ مۇشۇنداق ياخشى سورۇن ھازىرلاپ كونا يېڭى تورداشلارنى دىدارلاشتۇرغانلىقىغا تەشەككۈرلەر بولسۇن. مەقسەت، مۇنبەردىكى تورداشلار ئۆزئارا چۈشۈنۈشنى چوڭقۇرلاشتۇرۇش ۋە ئۆزىمىزنىڭ تۇرمۇش كۆزىتىش، پىكىر قىلىش جەھەتتىكى ئىقتىدارىمىزنى چېنىقتۇرۇش مەقسىتىدە مۇۋاپىق بولغان مەنىلىك پائالىيەتنى ئورۇنلاشتۇرۇپ تۇرۇش مېنىڭچە ھەممىمىز قۇبۇل قىلىدىغان ئىش. كەمىنە مۇنداق بىر پائالىيەت قىلىپ باقساق دىگەن ئۈمۈدتىمەن. پائالىيىتىمىزنىڭ باش تېمىسى : ۋاقىت ۋە پۇرسەت پائالىيەت مەقسىتىدى: بىزنىڭ ئۆزىمىزگە تەۋە  بولغان ۋاقىتلىرىمىزنى چىڭ تۇتۇپ قايسى ئىشلىرىمىزنى قىلىۋېلىشىمىز زۆرۈر، قايسى ئىشلاردا سەل قاراپ ۋاقىت جەھەتتىن ۋە پۇرسەت جەھەتتىن مەھرۇم بولدۇق، يەنە قايسى ئىشلارنى قىلىشقا تىگىشلىك ئىكەنلىكىنى بىلمەي يۈرىۋاتىمىز.دىگەندەك سۇئاللار ئۈستىدە ئىزدىنىش. پائالىيەت ئۇسۇلى: مۇنبەردىكى تورداشلار، ئۆزىمىزنىڭ ئەتراپىدىكى يېشى چوڭ مويىسپىت كىشلەر بىلەن بىر قېتىملىق ئەتراپلىق پىكىر ئالماشتۇرۇش ئېلىپ باقايلى. ئۇلار زادى ھازىرغىچە ياشاپ كەلگەن بۇ ھاياتىدا ئۆكۈنگىدەك ياكى تېخى قىلىپ بولالمىغان ئىشلىرى بارمۇ؟  ( ئۇلارنىڭ بۈگۈنى دەل بىزنىڭ ئەتىمىز بولىدۇ دوستلار). پەقەت ۋە پەقەت مۇشۇ بىرلا سۇئال ئۈستىدە پىكىرلىشىپ كېلىپ، مۇنبىرىمىزنىڭ مەزكۇر تېمىسىدا پىكىر ئورتاقلاشتۇرۇپ باقايلى. پايدىلىنىش سۇئاللىرى : سىلىنىڭ ھازىرغىچە ياشاپ كەلگەن مۇشۇ يىللاردىن بېرى قىلىپ بولالمىغان ياكى ئۆكۈنگىدەك ئىشلىرى بارمۇ؟ ھازىر ... ياشقا كىرىپتىلا، ئەگەر ۋاقىتنى 30 يىل ياكى 20 يىل بۇرۇنقى ۋاقىتقا قايتۇرغىلى بولسا، ئۆزلىرى قايسى ئىشلارنى قىلۋالغان بولاتتىلا؟ ۋە باشقا مۇشۇنداق مۇۋاپىق دەپ قارىغان سۇئاللار بولسا سۆھبەتلىشىپ باقايلى. دىققەت: چوڭلارنى ھۆرمەتلەش جەھەتتىن سۆز ئىپادىلەشكە ۋەپىكىرلىشىشكە دىققەت قىلايلى. شەرت: شۇ مويىسپىت كىشلەرنىڭ پىكىر ئۆزئەينەن بولىشى كېرەك، پىكىرلەرنىڭ راۋانلىقىغا ۋە چىنلىقىغا كاپالەتلىك قىلايلى. بىر ياكى بىردىن ئارتۇق كىشلەر بىلەن سۆھبەتلىشىپ پىكىر قالدۇرساق تېخىمۇ ياخشى. شۇ كىشلەر بىلەن سۆھبەتلىشىپ كەلگەندىن كېيىن، ئىگەللىگەن پىكىرلەرنى تۆۋەندىكىدەك شەكىلدە قالدۇرايلى: 1. پائالىيەت ئوبيىكتى : بوۋاي (موماي) ، 2. يېشى : ... ياش ( تەخمىنەن بولسىمۇ بولىدۇ) 3. كەسپى : دېھقان ياكى پېنسىيونىر ، ھۈنەرۋەن ۋە باشقىلار 4. ھاياتىدا قىلىپ بولالمىغان ياكى ئۆكۈنىدىغان ئىشى : . . . . بۇ يەرگە ئۇلاردىن ئىگەللىگەن ئەھۋاللارنى يېزىپ باقايلى. 5. ئۆزىمىزنىڭ ئويلىغانلىرى بىلەن دوكلاتىمىزنى ئاخىرلاشتۇرۇپ باقايلى. كۆپچىلىكنىڭ مۇنبەرنىڭ تۇنجى قېتىملىق پائالىيىتىنى ئاكتىپ قوللاپ بېرىشىنى ئۈمۈد قىلىمەن. پائالىيەتنىڭ ۋاقتى توختىمايدۇ. ئېھتىرام كامالى بىلەن : سايە 2010 - يىلى 9 -ئاينىڭ  3 -كۈنى بەندارى كۈيلىرىدىن " بالىلىق"

Jidelxor

	قوش كىشىلىك كىرىسلونى ئىگىلەپ قوياي ئانارىم بىرگە ئولتۇرۇپ،قىرىغاندا نىمە ئىش قىلىىش توغۇرلۇق ياخشى مەسلىھەتلىشىپ،ئاندىن بىر نەرسە دەيلۇق.مۇشۇ خوتۇندىن قورققانمۇ ياخشى ئىش ئىكەن جۇمۇ،بولمىسا سايەكتەك بويتاق ئۆتۈپلا كىتىدىغان گەپ ئىكەن. [ Jidelxor بۇ يازمىنى  2010-يىلى 9-ئاينىڭ 3-كۈنى 10:34  دە تەھرىرلىگەن. ]

قەھۋە

	قىززىقچىكەنسىزغۇ جىدەلخور ئەپەندىم! تاس قالدىم ئىشخانىدىلا ئاۋازىمنى چىقىرىپ كۈلۈپ تاشلىغىلى.   سايە ئەپەندىمنىڭ مۇنبىرىمىزدە بۇ خىل ئەھمىيەتلىك ھەم مەنىلىك پائالىيەت ئېلىپ بېرىشقا تەكلىپ بەرگىنىگە كۆپ تەشەككۈر!!! بارلىق كونا-يېڭى ئەزالارنىڭ بۇ پائالىيەتكە ئەستايىدىل مۇئامىلە قىلىپ، بىرلىكتە ئورتاقلىشىشىنى ئۈمت قىلىمىز! ياشانغانلارنى ھۆرمەتلەش ئېسىل پەزىلەت، ئۇلارغا كۆڭۈل بۆلگەنلىك- ئۆزىمىزنىڭ ئەتىسىگە كۆڭۈل بۆلگەنلىكتۇر!

جۇلالىق

	سايەنىڭ قىممەتلىك تېما يوللىغىنىغا ئالقىش.........(چاۋاك) ئەمىسە مۇنبەردىكى چوڭ-كىچىك،توڭ-پىششىق ھەممەيلەن بۇ تېمىغا ئېتىبار بىلەن قاراپ، مويسىپىتلار بىلەن سۆھبەتلىشىپ تۇرمۇش ھەققىدىكى پىكىرلىرىنى بۇ تېمىغا يوللايلى.

Aydar

	نەۋرەمگە نىمە دەي       چىن سۆيگۈنىڭ ئىتىقادىدا   بوۋام بوۋىسىنىڭ كۆرگەن كۆزىدە   دۇتار چالاتتى كۈندە ئۆزىدە.   ئۈزۈلمەس تارلار   ئەركەكلەرنى بەيگىگە چىللاپ   مىندۈرسە ئاتقا،   ئاياللارنىڭ قاقاس قەلبىدە،   بەردەم سۆيگۈلەردىن گۈللەرنى ئېچىپ   قىلاتتى تارىخنى شەپەق رەڭگىدە.       تەۋەررۇك دۇتار   (بۇۋامنىڭ شۇ بار-يوق بىساتى)   ئەسىرلەرنىڭ قالماي چېڭىدا   كۈيلىرىدە يۇيۇپ روھلارنى   يەتكىنىدە بۈگۈنگە تەستە   نەۋرەم قولىدا ئۈزۈلۈپ تارى   تاشلاندى يەرگە،             بولدى مىڭ پارە...       دۇتار كۆزلىرىدە لىغىرلايدۇ ياش،   نەۋرەمگە نىمە دەي، ئېيتقىنا سىرداش... بۇ بىر بۇۋاينىڭ ئۆكۈنۈشى ئىكەن

جۇلالىق

	دۇتارىنىڭ تارىسى ئۈزۈلۈپ كېتىۋاتقان بوۋايلاردىن ھازىرقى جەمئىيىتىمىزدە قانچىلىكى باردۇ؟

مەرۋەرى

	ئاۋال سايەنىڭ ئېسىل تېمىسىغا تەشەككۈرىمنى بىلدۈرىمەن! مەن 61 ياشقا كىرگەن ئاشۇ كارۋاتتا بىزنىڭ كۈتىشىمىزگە ئاددىيسى سىرتتىكى ئىللىق قۇياش نۇرىدىن ھوزۇر ئېلىش ئۈچۈنمۇ بىزنىڭ ياردىمىمىزگە تاينىپ كۆزلىرىمىزگە تەلمۈرۈپ قاراپ تۇرىدىغان جاپاكەش ئاتامنىڭ كۆزلىرىدىن چىقىپ تۇرغان پۇشايمانلىرىنى يازغۇم كېلىپ قالدى. مەن ئاتامنىڭ كېسەلدىن غالىپ كېلىپ قايتا بىز بىلەن ياشاۋاتقانلىقىدىن ئاللاھقا مىڭ مەرتىۋە رەھمەتلەر ئېيتىمەن! مەن بۇ ياققا يۇرتقا قايتىپ كەلگەندىن كېيىن دوستۇم رىسالەت مەرداننىڭ <مەن شۇنداق بىر ئايالنى تونۇيمەن > نامىلىق ئەسىرىنى ئوقۇپ شۇنچىلىك يىغلاپ كەتكەن ئىدىم ، دەسلىۋىدە ناتونۇش ئىسىمدا يېزىلغان بۇ ئەسەردىكى باش پېرسۇناژنىڭ ئۆزۈم ئىكەنلىگىنى بىلمەي قىسمەتلىرى ماڭا ئوخشاش بىر ئايال ئىكەن دەپ ئويلاپتىكەنمەن، شۇ تېمىدا دوستۇمنىڭ ئاتامنىڭ دەرۋازا ئالدىدا ئۆتكەن كەچكەنلەرگە قاراپ ئولتۇرۇپ مېنىڭ يولۇمغا قاراىغانلىقىنى تولىمۇ ئاددىي تىللار بىلەن ئىپادىلىگەن ئىدى، بولسا شۇ تېمىنى يەنە بىر ئوقۇشقا مۇيەسسەر بولالىسام ئىدىم ئۆزۈمنى تولىمۇ بەخىتلىك ھېس قىلغان بولاتتىم. ئاتام ئېسىمنى بىلسەم تولىمۇ خۇشخۇي، سازخۇمار، تىرىشچان بىر ئادەم ئىكەن، ئۇ بىر بەش بالىنى قاتارغا قېتىش ئۈچۈن ئەتىدىن كەچكىچە ھاردىم دىمەي ئىشلەپ، ئۆيگە كەلگەندە بولسا بىر بالىلارنى ئەتتىراپىغا يىغىۋېلىپ دۇتتار چېلىپ، ناخشا ئېيتىپ بىزگە ھەقىقى بەخىتلىك ئائىلىنىڭ تەمىنى تېتىتقۇزغان مېھرىبان بىر ئاتا ئىدى. تەقدىرنىڭ ئورۇنلاشتۇرىشى بىلەن مېنىڭ ئالدىمدىكى ئۈچ ئاكام تۈگەپ كەتتى، ئاتا-ئانام ۋاقىتسىز قېرىپ، چېكىلىرىنى ئاق ئارىلىغان شۇ كۈنلەردە مەن  ئوقۇشقا ئۆتۈپ ئۇلارنى بەك خۇش قىلۋەتتىم، مەن ئوقۇشنى تاماملاپ بولغاندىن كېيىن مېنى چوڭ شەھەرلەردە ئىشلىسۇن دەپ بىر مۇنچە پۇل خەجلەپ مېنى شەھەردە قالدۇرۇپ قويغان ئىدى. بۇ چوڭ شەھەردە  بۇ ئاددى خىزمەت ئورنۇمدا ئىشلەپ ئائىلە قۇرۇپ، بالىلىق بولۇپ ئەمدى ئاتا- ئانىنىڭ قەدرىگە يەتكەن ۋاقتىمدا تەقدىر بىزنىڭ ئائىلىگە ئېغىر چاقچاق قىلىپ ئاتامنى كېسەل ھازىرقىدەك ئەھۋالغا كەلتۈرۈپ قويدى، ئۇنىڭ ئاشۇ نۇرسىز كۆزلىرىدىن نۇرغۇن پۇشايمانلىرىنى، نۇرغۇن قىلىپ بولالمىغان ئىشلىرىنىڭ بارلىقىنى ھېس قىلىمەن. ئۇنىڭ پۇشايمانلىرىنى ئاڭلاش نىسىپ بولمىسىمۇ ئۇنىڭ ئارزۇسىنىڭ جىقلىقى ماڭا ئايان ئەڭ ئاددىيسى: ئورنىدىن تۇرۇپ بىر مېڭىپ كەتسە، قوللىرىدا بۇرۇنقىدەك دۇتتار تارلىرىنى زۇۋانغا كەلتۈرۋەتسە، ياڭراق ئاۋازلىرى بىلەن <ئىلى خەلىق ناخشىلىرى>نى ئېيتىپ كەتسە، ئاشۇ قاملاشقان بەستى بىلەن سورۇننىڭ ئوتتۇرسىغا چۈشۈپ غۇلاچ تاشلاپ ئۇسۇللارنى ئويناپ كەتسە، ئاپامنى، مېنى، قېرىنداشلىرىمنى ئېلىپ بۇرۇنقىدەك ئائىلە يىغىلىشلىرىنى قىلسا.................... مانا مۇشۇنداق ئاددى ئارزۇلىرىنىڭ بارلىقىنى ھېس قىلىمەن، ئەمما بۇنىڭ مۆمكىن ئەمەسلىكىنى مەنمۇ ، ئاتامۇ ھېس قىلىپ تۇرىمىز، مەن ئاتامغا قاراپ ساغلاملىقنىڭ قانچە مۇھىملىقىنى چوڭقۇر ھېس قىلىپ يەتتىم، مانا ئاتام يىقىلغىنىغا بەش يىل بوپتۇ، مەن ئەمدى بولسىمۇ ئاتا- ئانام ئالدىدا پەرزەنتلىك بۇرچۇمنى ئادا قىلىش ئۈچۈن تىرىشىۋاتىمەن. ئاللاھ دۇنيادىكى بارلىق ئاتا- ئانىلارنىڭ تېنىنى ساق قىلسۇن! ئۆمۈرىنى ئۇزۇن قىلسۇن! ئانامنىڭ پۇشايمىنى:شارائىت بولمىغاچقا ئوقۇيالماي قالغانلىقى، شۇڭا بىز پەرزەنت ۋە نەۋرىلەرنى ياخشى ئوقۇتۇپ ياراملىق ئادەم قىلىش. گەرچە ئىنكاسىم تېمىنىڭ شەرتىدىن جىق يىراق بولسىمۇ ئەمما ئاتا-ئانامنىڭ ئارزۇسىنى بولسىمۇ يېزىپ قويۇشنى لايىق تاپتىم، چۈنكى ئاتامنىڭ پۇشايمىنى ئىچىدە، تېشىغا چىقىرىشقا ئامالسىز!

جۇلالىق

	بالىلىرىنى جاپا-مۇشەققەت بىلەن بېقىپ چوڭ قىلغان ئېسىل پەزىلەتلىك ئانا بىلەن سۆھبەت: موماي بۇ يىل 63 ياشقا كىردى، ھاياتنىڭ ئەگرى-توقاي يوللىرىدا نۇرغۇنلىغان قىيىنچىلىقلارنى بېشىدىن ئۆتكۈزۈپ 63-يىلىغا قەدەم قويدى. تېمىنىڭ مەزمۇنىغا ئاساسەن بىز شۇ بوۋاي-مومايلار بىلەن يۈز-تۇرانە پىكىرلىشىپ شۇنى ئەينەن يوللاش كىرەكتى، مەن بۇ ئانىدىن مۇشۇ ھەقتە سوئال سورىغىنىمدا ئۇ ئۆزىنىڭ 63 يىللىق ھاياتىدىكى كەچمىشلىرىنى سۆزلەپ بەردى. مەنمۇ جىمجىت ئولتۇرۇپ ئۇنىڭ سۆزلىرىنى تىڭشىدىم ھەمدە ئارتۇقچە سوئالمۇ سورىمىدىم. ئانا سۆزىنى باشلىدى: ئەقلىمنى تاپقان ۋاقىتلىرىم ، بىزلەرنى تۇڭگانلار باشقۇرىدىكەن، تۇڭگانلار شەھەرنى ئۇزاق تۇتالمىدى. شۇنداق قىلىپ بىزلەرنى كومپارتىيە باشقۇرىدىغان بولدى.كومپارتىيەنىڭ زامانىدا شاد-خۇرام ياشايمىز دىگەن ناخشىنى توۋلىغاچ، بالىلىق ۋاقىتلىرىمدىن ياشلىق دەۋرىمگە قەدەم قويدۇم. 15 ياشقا كىرگەن يىلى بوۋايغا تويۇمنى قىلىپ بەردى. ھازىرقى سىلەرنىڭ دەۋرىڭلاردا 15 ياشتا توي قىلدى دىسە ھەيرانلا قالىسىلەر. بالىسىنى باقالماي قالدىمۇ نىمە؟ نىمانچە كىچىك توي قىلىپ بېرىدۇ دىگەندەك بىر تالاي گەپلەر بولىدۇ. ئۇ زامانلاردا ئاشۇنداق كىچىك توي قىلىپ بېرىدىكەنتۇق. مەنمۇ شۇ دەۋرىگە ماسلىشىپ كىچىك توي قىلىپ بىر ئۆيگە باش بوپ قالدىم. بوۋاي بىلەن شۇنداق ياخشى ئۆي تۇتۇۋاتقان ۋاقىتلاردا كوممۇنا قۇرۇلدى. ھاياتىمدىكى ئەڭ ئېغىر كۈنلەرنى مۇشۇ كوممۇنادا ئىشلەپ ئۆتكۈزگەن كۈنلىرىم دەپ ئويلايمەن. ئەتتىگەن تاڭ ئاتماستىلا تاغارنى كۆتۈرۈپ ئىشقا چىقىپ كەچكىچە ئىشلىسەك ئاران نەچچىلا نومۇر بېرەتتى. ئىشلىگەن نومۇرىمىزغا قاراپ ئاشلىق ئېلىپ يەيتتۇق.بەزى كۈنلىرى تاغارلارغا قىغلارنى ئۇسۇپ يۈدۈپ خېلى ئۇزاق يەرلەرگە ئاپارغىلى سالاتتى. بۇنداق كۈنلىرى كەچ بوپ كەلسە ھالىمىز قالمايىتتى. ياز كۈنلىرى ئىشنىڭ جىقلىقىدا ئارامچىلىق يوق. قىش كىرسە ئارام ئالامدىمىزكىن دېسە يەنە قىلىدىغانغا ئىش تېپىپلا تۇرغان. قىش كۈنلىرى كۈزگە(بوغداي مايسىسى) توپىلاتقۇزاتتى. ھەممەيلەننىڭ ئۆگزىسىدىكى توپىلارنى قىرىپ يىغقۇزۇپ شۇنى ئېتىزلارغا ئاپىرىپ كۈزگىگە چاچقۇزاتتى. شۇنداق جاپالىق ئىشلىگەچ ئالتە بالىنى تۇغۇپ چوڭ قىلدىم.بوۋاي كوممۇنانىڭ گۇرۇپپىسىدا ئىشلىگەچكە بەكمۇ جاپادا قالمىدۇق. پەقەتلا جاپا يوق دېگىلى بولمايدۇ.يەتتىنجى بالامنى تۇغقاندىن كېىيىن كوممۇنا ئەمەلدىن قېلىپ يەرلەرنى دېھقانلارغا بۈلۈپ بەردى. شۇندىن كېيىن ئازراق راھەت كۆرۈش نىسىپ بوپتۇ. سەككىز بالا تۇغۇپ چوڭ قىلىپتىمەن. ئاللاغا شۈكرى، بىرەرسىنى مېيىپ قىلىپ سالماي بېجىرىم ساق-سالامەت چوڭ قىلدىم. چوڭ ئوغلۇم تۇرمۇشنىڭ قىيىنچىلىقىدا مەكتەپتىمۇ ئوقۇيالمىدى. قالغانلىرىنى ئوقۇتتۇم. ئوقۇتۇپ خىزمەتچى قىلالمىغان بولساممۇ ئوقۇپ ئۆزىگە لازىملىق نەرسىلەرنى چۈشەنگىدەك بىلىمگە ئېرىشتى. بوۋاي تۈگەپ كەتكىلى ئون يىلدىن ئېشىپتۇ. بالىلىرىمنىڭ ماڭا بولغان مىھرىبانلىقلىرى بىلەن خۇشال ياشاپ كېلىۋاتىمەن. بالىلىرىمنى ئىنساپ-دىيانەتلىك، ئاللاھنىڭ بارلىق-بىرلىكىنى تۇنۇيدىغان قىلىپ تەربىيلەپ چىقتىم. مېنىڭ ئەڭ ئۆكۈنىدىغان ئىشىم كوممۇنا ۋاقتىدا ئېغىر كۈنلەرنى ئۆتكۈزگەن ئەشۇ نەچچە يىللىق ھاياتىم. شۇ ۋاقىتلاردىكى جاپا، ئاچارچىلىق دەردى ھېلىھەم يادىمدىن چىقىپ كەتمەيدۇ. شۇ يىللىرى بۇنچە ئازاپ تارتمىغان بولسام شۇنىڭ ئورنىغا بىلىم ئالار ئىدىم ياكى تەقدىرىمدە باشقىچە ئۆزگىرىشلەر بوپ قالار ئىدى. بۇنىڭدىن كېيىنكى ئارزۇيۇم، ئاللاھتىن ئۆزۈمگە ۋە بالىلىرىمغا ئىمان تىلەيمەن. ئاللاھنىڭ ئالدىغا كامىل ئىمانىم بىلەن بېرىشقا نىسىپ بولغاي! شۇنداق قىلىپ سۆھبەت ئاياغلاشتى.تامام!

saye

	زىيارەت ئوبيىكتى : 72 ياشلىق موزدۇز بوۋاي . بۈگۈن ئىدارىدىن قايتىپ ۋېلىسپىتىمنىڭ بولتىسىنىڭ بوشاپ قالغانلىقىنى بىلىپ، ۋەلىسپىت رىمونت قىلىدىغان جايغا كېلىپ، ئۇستامنىڭ ئامبۇرىنى ئېلىپ بىلگنىمچە بۇراشقا باشلىدىم. شۇ ئارىلىقتا ئۇدۇلۇمدا موزدۇزچىلىق قىلىپ ئولتۇرغان بىر بوۋايغا كۆزۈم چۈشتى. قوللىرى قاداق بېسىپ يېرىلىپ قارىداپ كەتكەن بولۇپ، ئالقىنى بىلەن دۈمبىسىنى پەرق ئەتكىلى بولمىغۇدەك دەرىجىدە ئىدى. بىر ياقتىن چاقچاق قىلىپ خېرىدارنى كۈلدۈرسە، بىر ياقتىن يىپقا تۈكۈرۈپ ئاياقنىڭ خۇرۇمىغا سانجىيتتى. بۇ موزدۇز ئۇستامغا قاراپ كاللامدا " دەل ئەشۇ بوۋاي " دىگەن ئوي خىيالىمدىن كەچتى. خىزمەت سومكامنىڭ سىيرتمىسى ئانچە ياخشى ئىشلىمەس بوپ قالغان ئىدى. شۇنى باھانە قىلىپ بوۋاينىڭ يېنىغا كەلدىم. نۆۋەت ماڭا كەلگەندە بوۋاي سۆز ئاچتى: - كەلسىلا كادىر بالام، سىلىگە نىمە قىلىپ بېرەي. ئاياقلىرىنى ئوڭشىتاملا؟ - ياق، ئاكا، مونۇ سومكامنىڭ سيېرتمىسى ياخشى ئىشلىمەس بوپ قالدى. شۇنى ئالماشتۇرۋېتەي دىگەنىدىم. (سومكامنى سۇندۇم). بوۋاي ئەپچىللىك بىلەن بىردەمدىلا سىيرتما بېشىنى ئالماشتۇرۇپ بەردى. بۇ كىچىك مەسىلە بولسىمۇ ئەمما ماڭا بەكلا قولايسىزلىق ئېلىپ كەلگەن ئىدى. بوۋاينىڭ ياساپ بەرگىنىگە خۇش بولۇپ، كۆڭلۇمدە ھېچ بولمىغاندا 3 يۈەن ئالىدۇ دەپ ئويلاپ، پۇلنى ئۇنىڭغا تەڭلىدىم. ئەمما بوۋاي ئارانلا 5 مو ئالدى. ( توۋۋا مۇشۇ كۈنلەردىمۇ 5 مونىڭ كۈچى باركەن جۇمۇ) . مەن رەھىمىتىمنى بىلدۈرۈپ قالغان پۇلنى ئالمايمەن دىدىم، ئەمما بوۋاي ئۇنمىغىنىمغا قارىماي پۇلنى سومكامنىڭ ئىچىگىلا تىقىۋەتتى. - ئەجرىمگىچىلىكلا ھەق ئالىمەن. بالام ئىشلىرى بولسا يەنە ئۇدۇل مۇشۇ يەرگىلا كەلسىلە. مەن يانفۇنۇمنى چىقىرىپ بىركىملەرگە تېلفۇن قىلغان قىياپەتتە ئەتراپىمغا قارىدىم. - ئاكا، مەن بىرىنى مۇشۇ يەردە ساقلىماقچى ئىدىم، سودىلىرىغا تەسىرى بولمىسا مۇشۇ ئورۇندۇقلىرىدىلا ئولتۇرۇپ ساقلاي دىگەن. سىلىچە بولامۇ؟ - ئولتۇرسىلا بالام. ھاجەتمەنلەر كېلىپ قالىدۇ دەپ بىر ئورۇندۇقنى ئارتۇق ئېلىپ چىقىمەن. شۇنىڭ بىلەن سۆھبىتىمىز باشلاندى . بوۋاينىڭ تىگى قەشقەردىن ئىكەن. موزدۇزلۇق كەسپىنى كىچىكىدە ئاتىسىدىن ئۆگەنگەن ئىكەن. بەزىدە تامچىلىقمۇ قىلىدىكەن. ( دىگەن بىلەن ئەزىزانە قەشقەر قول ھۈنەرۋەننىڭ ماكانى جۇمۇ) . بوۋاي بىز مەزگىل ئۈرۈمچىدە موزدۇزلۇق قىلىپ يۈرگەنىكەن. بىر قانچە يىلدىن بېرى يۇرتىمىز تۇرپانغا كېلىپ مۇقىم ئولتۇراقلىشىپ قاپتۇ. ئەمما يېقىندا تۇققانلىرىنىڭ كۆپ چاقىرتىشى بىلەن بىز مەزگىلدىن كېيىن يۇرتىغا قايتماقچى بولىۋېتىپتۇ. - ئاكا، سالامەتلىكلىرى شۇنداق ياخشىكەن. سۆزلىرى شۇنداق ئېنىق. سىلىنىڭ ياشلىرىغا كىرگەن نۇرغۇن بوۋايلار بۇنچىلىك ھەركەت قىلالماي باشقىلارنىڭ ياردىمىگە ئېھتىياجلىق بوپ قېلىۋاتىدۇ جۇمۇ. - بالام ھەركەت بەركەت دەپتىكەن خۇدايىم. ھەركەت بولمىسا پوككىدە چۇشۇپ ئاغرىيدىغان گەپ. - خۇدايىم سالامەتلىكلىرىنى ياخشى قىلسۇن. ھېلىمۇ 50كە ئولاشقان كىشلەردەكلا قۇۋەتلىك ئولتۇرۇپلا دەيمەن. - 50 ياش ۋاقىتلىرىمىز قالمىدى بالام. ئۇ ۋاقىتلاردا چېلىشىشلارغا چۈشەتتۇق. ھازىر قېرىدۇق. ئاللا خالىسا ھاجىتىمىزدىن چىقىپ كېتىۋاتىمىز. - شۇ ۋاقىتلاردىلا موزدۇزچىلىق قىلىپ كەپتىكەنلا ھا ئاكا.  ئەگەر شۇ ۋاقىتلىرى قايتىدىن كېلىپ قالغان بولسا يەنە قوشۇمچە ئىشمۇ قىلاتتىلا ھەقىچان . - شۇنداق بالام. ئادەم دىگەنمۇ ئەقىلگىچۇ كېچىكىپ تولىدىكەن. ئۇ ۋاقىتلاردا بىر ھۈنەرنىڭ ھاجىتىدىن چىقساقلا جان بېقىش دىگەن شۇ ئىدى. ئۇ ۋاقىتلاردا خەققە خار بوپ قالمىساق بولدى دەپلا ئويلايتتۇق. مانا ئەمدى ئەقىل توشۇپ قوشۇمچە ھۈنەرلەرنى قىلىپ، مۇقىم بىر جايدا ئىگىلىك تىكلەشنى ئويلاشقان ۋاقتىمىزدا ماغدۇرىمىزدىن كەتتۇق. قىلىمەن دىسەك خىيال تولا. ئەمما ئۇنتۇغاق بوپ قالىمىزكەن، بۇرۇنقىدەك كۈچەپ ئىشلىگىلى بولمايدىكەن. . . . بوۋاي بىلەن قىسقىغىنە سۆھبەتلىشىشتىن كېيىن، ئۇنىڭ ھازىر ئۆكۈنىدىغان ئىشىنىڭ يوقلىقى، بار دىيىلسە، بىرلا ھۈنەرگە تايىنىۋالماي بىر قانچە قوشۇمچە كەسىپ قىلىدىغانلىقىنى، شەھەر ئايلىنىپ تىجارەت قىلماي، مۇقىم بىر شەھەردە تۇرۇپ، دۇكان ئېلىپ ئىگىلىك تىكلەيدىغانلىقىنى بىلدۈردى. " يىللار سېخى قۇرۇق كەلمەيدۇ، ئاياللارغا قورۇق، ئەرلەرگە ساقال" دىگەن شۇدە . قالغان تورداشلارنىڭ زىيارەت مېۋىلىرىنى كۆرۈپ باقايلى .

جۇلالىق

	سايە، زامان تەرەققى قىلىپ ماشىنىلار ئاسماندا ئۇچاي دەۋاتقان تۇرسا سىز تېخىچە شۇ شەيتانچاقنى مىنىپ يۈرەمسىز؟ مۇنداق زامانغا ماسلىشىپ ئالىي ماشىنىلارنى ھەيدەڭ دەيمەن.