دەرىزىنىڭ سىرتىغا بىر پىيالە گۈرۈچ چېچىپ قويۇڭ

peacelife212

	قىش كەلدى. ھاۋا بەكمۇ سوغاق، ئىسسىق ئۈيۈمدە، پارنىڭ ئىسسىقىدا، كالتە يەڭ ئولتۇرغان ۋاقتىمدا، سىرتتىكى نۇرغۇن يايمىچىلارنىڭ بىر كويلۇق ياكى ئىككى كويلۇق نەرسىلەرنى ھارۋىسىغا تىزىپ قويۇپ، كۈندىلىك تىرىكچىلىكى ئۈچۈن، ئۆتكەن كەچكەنلەرگە ئىلتىجالىق بىلەن تىكىلگەن كۆزلىرىنى كۆرگەندەك بولىمەن. مۇمكىن بولسا، ئېشىنالىسام، شۇ نەرسىلەردىن كۈندە دىگۈدەك سېتىۋالسام، ئۈزەم يىمىسەممۇ، ئېھتىياجلىقلارغا بەرسەم دەپ  ئويلاپ كېتىمەن. بەزىدە ئاپتۇۋۇزدىن چۈشكەن ۋاقتىمدا، ئۈتۈپ كېتىپ بۇلۇپ، يەنە ھەي توختا دىگەن نىدا بىلەن كەينىمگە قايتىپ، بىر كويلۇق ماتاڭ، بىر ئىككى كويلۇق قوناق، نان ، سامسا ياكى باشقا نەرسىلەرنى سېتىۋالىمەن، كوچىدىلا مەززە قىلىپ يەپ كېتىمەن.مەن بىرنى ئالسام، باشقىلارمۇ بىرنى ئالسا، شۇنداق قىلىپ، ئۇلار ئىتتىكرەك سېتىپ، ئۆيلىرىگە قايتىپ، باللىرى بىلەن جەم بولسا، تۇرمۇش بېسىمى بولمىسا، بۇ نۆلدىن تۆۋەن يىگىرمە ئوتتۇز گىرادۇسلۇق بۇ سوغاقتا، كىممۇ سىرتتا شۇ نەرسىلەرنى ساتىمەن دەپ ئولتۇرسۇن. قايسى بىر يىلى رامىزاندا ئىپتارغا يېقىن بىر جايغا بارىدىغان ئىش چىقتى، ئاپتۇۋۇزدا ئىپتار ۋاقتى بوپ كەتكۈدەك، يانچۇقۇمدا يەيدىغان نەرسە يوق ئىدى، شۇ چاغدا، قارىسام، يىراق بولمىغان بىر جايدا بىر ئاپاش ماتاڭ سېتىپ ئولتۇرۇپتۇ، ئۈچنى ئالدىم، 10 كوي بەرسەم قايتۇرىدىغان پاچە پۇل تاپالمىدى، سورىسام، بۈگۈن بەش كويلۇقمۇ سودا قىلالمىغانتىم، ھەم كېچىكىپرەك چىقىپ قاپتىمەن بازاغا دىدى، بوغۇزۇمغا بىر نەرسە كەپلىشىپ قالغاندەك بولدى، ئويلىدىم، ئەگەر مەن شۇ ئاپاش بولغان بولسام، ئۆيدە ماڭا قاراشلىق باللىرىم بولسا، مەن قانداق قىلار بولغىتىم، ھەي تۇرمۇش. ....  بىر چاغدا يازدا يۇرتتا ئىسسىقنىڭ دەستىدىن ئۆيدىن چىقماي ئۆيدە ئارام ئېلىپ ئولتۇرغان ئىدۇق، دادام بىر چاغدا بىر داس قېتىق كۈتۈرۈپ كىرىپتۇ، ھەممىمىز ھەيران قالدۇق،« دادا نىمانداق جىق ئالدىڭىز، بۈگۈنچە ئىككى -ئۈچ قاچا ئېلىپ، ئەتە يەنە ئالساق بولاتتى ئەمەسمۇ، يېڭىنى يىسەك،...» دىسەم، دادام، « شۇ قارىسام، بىر شۇ ئايال قاپتۇ قېتىق ساتىدىغان، قالغانلار كىتىپ بوپتۇ، ئىككى ئۈچ چىنە ئالسام، قالغانلىرىنى ساتىمەن دەپ يەنە ئىسسىقتا ئولتۇرغۇدەك، شۇنىڭغا ئىچىم ئاغرىپ، بۇ ئىسسىقتا ئىتتىك ئۆيىگە كېتىۋالسۇن دەپ، ھەممىنى سېتىۋالدىم، بىر قاچا ئىچىدىغانلار ئىككى قاچىدىن ئىچىپ، جىقراق ئىچەرسىلەر قېتىقنى، ئىسسىق ئاپتاپتا پايدا قىلىدۇ ... » دىگەن ئىدى، كۆڭلۈم شۇنداق بىر ئىللىق سېزىمغا تولغان ئىدى.      بەزىدە ئويلاپ قالىمەن، مۇشۇ تىلەمچىلەرگە پۇل بەرمىسە قانداق بولار دەپ ، لېكىن، پۇل بەرمەي ئامال يوقتە، چۈنكى،بىز دىگەن شۇنداق كۆڭلى يۇمشاق، ئاقكۆڭۈل خەق تۇرساق..لېكىن، ئويلاپ قالىمەن، مۇشۇ پۇل بىرىشنى مۇنداق باشقا بىر ھالەتكە ئۆزگەرتىپ باقساق دەپ، مەسىلەن : ئاۋال بىر نان ياكى بىر كويلۇق ماتاڭ ياكى بىر كويلۇق گېزىت ياكى ئىشقىلىپ، بىر كويغا كېلىدىغان بىر ئۇيغۇرنىڭ تاۋىرى، ئاۋال شۇنى سېتىۋېلىپ، ئاندىن تىلەمچىگە بەرسەك، بۇنداق بولغاندا، شۇ كوچىدا ھالال مېھنىتى بىلەن سودا قىلىۋاتقانلارغا سودا قىلىپ بېرىپ، ئۇلارنىڭ ھاجىتىدىن چىقىدىكەنمىز، شۇنداقلا، تىلەمچىمۇ شۇنى يىسە قوسىغى تويىدىكەن، ھەم سودا قىلىدىكەنمىز، ھەم ساۋاب تاپىدىكەنمىز، ھەم پۇل ئوبۇرۇتقىمۇ ياخشى بولىدىكەن، تىلەمچىلەرنى مانچە خۇتۇنى بار، ئۇلار تاپقان پۇلىغا قىمار ئوينايدۇ دەپ ئۇلارغا تاپا تەنىمۇ قىلمايدىكەنمىز. ئىشقىلىپ، كۆپ جەھەتلەردىن پايدىسى بولىدىكەن.سىلەرچە قانداق ؟؟؟؟        بۇرۇن كىتاپلاردا ئاق قۇشقاچلەر ئۈرۈمچىدە قىش ۋاقتىسى قارا قۇشقاچقا ئايلىنىدۇ، ئىس تۈتەكنىڭ دەستىدىن دەيدىغان، دىمىسىمۇ ئۈرۈمچىگە كەلگەندىن بىرى، بۇلۇپمۇ ئۈرۈمچىدە ئۆي-ئۇچاقلىق بۇلۇپ ياشاۋاتقاندىن بىرى شۇنىڭ راست ئىكەنلىكىنى ھىس قىلدىم. كۈندە دىگۈدەك نەچچە قۇشقاچلار نە نەلەردىن ئۇچۇپ كېلىپ، بەزىدە كەپتەرلەرمۇ بار، دەرىزەمنىڭ رىشاتكىسىغا، تۈمۈر توسۇقلارنىڭ ئارىسىدىن كېلىپ قونىدۇ،  چۈنكى، دەرىزەمدە بىر سۇلياۋ تاۋاق قۇيۇلغان، ئۇنىڭغا ئسىمدە بولسىلا، بىر پىيالە گۈرۈچ چېچىپ قويىمەن، بۇرۇن باشلانغۇچتا تەبىئەت دەرسىدە« قۇشلار ئىنسانلارنىڭ دوستى» دىگەن ئىدى، سۈيۈملۈك ئوقۇتقۇچىمىز، دىمىسىمۇ قۇشلارنىڭ يېقىملىق سايراشلىرى ئادەمگە ھۇزۇر بىرىدۇ، شۇنداقلا، بۇ قارا قىشتا، قاتتىق سوغاقتا، جاندىن ئۆتىدىغان بۇ قەھرىتان ھاۋادا، قېلىن قار ئاستىدا قۇشلارنىڭ ئۇزۇق تېپىپ يىيىشى بەكمۇ قىيىن، بەكمۇ تەس،  مېنىڭچە بىر پىيالە گۈرۈچ بىر كوي ياكى بەش موچەن،ئۇنىڭدىن ئارتۇق كەلمەس، دۇنيا مېھرى-مۇھەببەت بىلەن گۈزەل. بىز ئىنسانلار، قۇشلار، ھايۋانلار، دەل دەرەخلەر...ئىشقىلىپ، جاھاندىكى بارلىق نەرسىلەر، كائىناتتىكى پۈتكۈل شەيئىلەر بىر بىرى بىلەن چەمبەرچەس باغلانغان، بىزدە ئاجىزلارنىڭ ھەققى بار، قۇشلارغا كۈيۈنۈش، ھايۋانلارغا كۈيۈنۈشمۇ ئوخشاشلا بىزنى جەننەتكە ئېرىشتۇرىدۇ، بىرەيلەن رىۋايەت قىلۇر: « بىر پاھىشە قۇدۇق بېشىدا ئۇسساپ كەتكەن بىر ئىتنى كۆردى، قۇدۇقتىن سۇ تارتىپ ئىتنىڭ ئۇسسۇزلىقىنى قاندۇردى، ياراتقۇچى ئۇنىڭ مۇشۇ ياخشى ئىشى ئۈچۈن، ئۇنى جەننەتكە كىرگۈزدى » ، بۇ رىۋايەتتە، بىر تەرەپتىن ياراتقۇچىنىڭ بەكمۇ مېھرىبان، شەپقەتلىك ئىكەنلىكى بايان قىلىنسا، يەنە بىر تەرەپتىن، ئىنسانلارنى ياخشى قىلىشقا ئۈندەش، پەقەت ئىنسانلارغىلا ئەمەس، ھايۋانلارغىمۇ ياخشىلىق قىلىش،ئۇلارغا ياخشى مۇئامىلە قىلىش، ئۇلارنى قۇتقۇزۇشنى مەخسەت قىلىدۇ.      سىز بىنادا ياشاڭ ياكى داچىدا ياشاڭ، ياكى بىنا ئەمەس ئۆيدە ياشاڭ، قۇربىتىڭىز يەتسىلا دەرىزىڭىزنىڭ سىرتىغا بىر پىيالە گۈرۈچ چېچىپ قويۇڭ، قۇشلار شۇ گۈرۈچلەرنى يىگەندە، دەرىزىڭىزنىڭ سىرتىدا ۋىچىر-ۋىچىر سايرىغاندا، سىز شۇ سايراشلىرىنى ئاڭلىغان ۋاقتىڭىزدا، كۆڭلىڭىز ۋاللىدە ئېچىلىپ قالىدۇ، ئۆزىڭىزدىن مەمنۇن بوپ قالىسىز، ئۆيدىن چىقماي تۇرۇپمۇ ياخشى ئىش قىلغان ،ساۋابلىق ئىش قىلغان بولىسىز. بۇ ساۋاب سەۋەبلىك، سىز تېخىمۇ كۆپ ياخشىلىقلارغا، كۈتۈلمىگەن خۇشاللىقلارغا، بايلىقلارغا ئېرىشىپ قالسىڭىز ئەجەپ ئەمەس، ئىشلىرىڭىز قۇتلۇق بولسۇن.بەختىيار تۇرمۇش ھەممىمىزگە يار بولسۇن.     مەنبە: ئۆزۈم

مەرۋەرى

	تۇرمۇشتىكى كىچىككىنە مەسىلىلەرگە دىققەت قىلساق، سىز ئېيتقاندەك ئويلىمىغان خوشاللىقلارغا ئېرىشەلەيمىز، ئېسىل يازمىلىرىڭىزغا تەشەككۈر!

Jilwe

	رەھمەتلىك دادام ھايات چېغىدا ، ئۆيدە ئىشىپ قالغان تاماقلارنى  تۆكۈگۈزمەيتى ،(چوڭ ئۆيدە بەزىدە ، بالىلارنىڭ ھەممىسى كەلسە تاماق يەتمەي قالمىسۇن دەپ سەل كۆپ تاماق ئېتىلىپ قالىدۇ ) بىنارىمىزنىڭ ئالدىدىكى دەرەخ يىنىغا توكۈپ قوياتتۇق ، قۇشقاچلار  ۋىچىرلاپ  ئەتراپىمىزدا ئۈچۈپ يۈرەتتى ، مەن دادامنىڭ يىنىغا بېرىپ< دادا ، بالىلىرىڭىز كەپتۇ > دەپ چىقىشىپمۇ قوياتتىم   ، رەھمەتلىك ئۇلارغا شۇنچىلىك مەسلىگى بىلەن قاراپ < ئۇلارغا قارىسام كۆڭلۈم كۆتۇرلۇپ قالىدۇ > دەپ كېتەتتى .

dilroh

	بىزمۇ نەۋرىلەر چىچىۋەتكەن ئاشقان تاماقلارنى بىنانىڭ ئالدىغا قويۇپ قويىمىز پەستىكىلەرنىڭ توخۇ كەپتەرلىرى قۇشقاچلار يەيدۇ  قويى بارلارغا بىرىمىز   دەريادىكى ئاققۇغا ئاپىرىپ بىرەي دەپ ئاچام ئەتىگەن بىر نەچچە كۈن تۇرۇپ قالغان تاماقنى خالتىغا قاچىلاپ قويۇپتىكەن ئانامدىن بىر مۇنچە گەپ ئاڭلىۋالدى ئاچلىقتىن نەچچە ئادەم ئۆلىۋاتىدۇ جاھاندا سىلە نىمە بىزەپ يىگىلى بولىدىغاننىمۇ يىغىشتۇرۇپ دەپ `````

dilroh

	ئانام بىر تال گۈرۇچ قاچىسىدىن چۈشۈپ كەتسە ئۈچ كۈن ئىزدىمەك بار دەپ قەتئىي تاماق ئاشۇرۇپ قويغىلى قويمايدۇ قاچامدىكى

sansiz0903

	بىزنىڭ ئۆي يېزىدا بولمىسىمۇ بۇ دادام قوي باققىلى شۇنچىلىك ئامراق. كادىر خەق دىگەن شۇنداق بولامدىكىن يا؟ شۇنچىلىك ئاددى ساددا، شۇنچىلىك سەبى   ئىسراپچىلىققا شۇنچىلىك ئۆچكى، بىز تاماق ئېشىرۇپ قويىشىمىزنى قەتئى خالىمايدۇ. ئادەتتە كەتەكچىلىك ئېغىلىمىزدا 7، 8 قوي ئۈزۈلمەيدۇ. ھەر يىلى 2، ياكى 3 ئىرىك، ئەكەش يەيمىز. گۆشى ئىسسىق دەپ.. ئاپامنىڭ بۇرۇندىن باشلاپ بىلى ئاغرىغاچ تېرىسىنى دورىلىق قىلىپ ئاپامنىڭ بىلىگە ياپىمىز. دادام ئۆيدىكى قويلارغىمۇ شۇنچىلىك ئامراقكى، تاس قالىدۇ ئۆيگە ئەكىرىپ يەم بەرگىلى.   چوڭلىرىمىز كىچىك ۋاقىتلىرىدا ئاچلىقنىڭ، تەشنالىقنىڭ دەردىنى يەتكۈچە تارتقاندىكىن، ئۇلار ئىسراپچىلىققا جان-جەھلىدىن قارشى تۇرىدىكەن. بىزلەر بەك دىققەت قىلمايدىكەنمىز. ئۆگزىمىزدە قوناقلار بار، قۇشلار، كەپتەرلەر خالىغانچە يەيدۇ تازا

sansiz0903

	بىر تالاي سۆزلەپتىمەنغۇ ئۈستىدىكى ئىنكاسىمدا

Erkman

	شۇنداق قىلىش مېنىڭ ئادىتىم ، نەچچە كۈندە بىر قېتىم چېچىپ قويۇمەن !

جۇلالىق

	تېمىڭىزدا تىلەمچىلەرگە بېرىدىغان بىر كوي پۇلغا ئۇششاق تىجارەتچىلەردىن نەرسە سېتىۋېلىپ ئاندىن تىلەمچىلەرگە بېرىشنى ئېيتىپسىز. مۇشۇ قۇرلارنى ئوقۇۋېتىپ بۇلتۇر بولغان بىر ئىش يادىمغا كەلدى. ئۆيدە بىر ئىشلارنى قىلىپ ئولتۇراتتىم، سىرىتتىن بىر تىلەمچىنىڭ ئاللاھ بايلىقىڭلارغا بەرىكەت ئاتا قىلسۇن! دەپ توۋلىغان ئاۋازى ئاڭلاندى. سىرىتقا چىقمايلا سومكامنىڭ يانچۇقىنى ئاقتۇردۇم پارچە پۇل يوق. ھازىرقى تىلەمچىلەرگە بىر موچەن ياكى بەش موچەننى تەڭلىسەڭ ياراتمايدىكەن. بىر كويلۇق پۇل بولسا دەپ ھەممە يانچۇقلىرىنى ئاقتۇرۇپ چىقتىم. بار يوقى 20 كويلا پۇل بار ئىكەن. ئەمدى قانداق قىلاي؟ قارىسام ئۆيدە يېرىم نان تۇرىدۇ شۇنى ئېلىپ چىقىپ بەردىم، تىلەمچى ناننى كۆرۈپ تازا خوشياقمىغاندەك قىلىپ ئېلىپ كەتتى. بەلكىم بىرەر سائەت ئۆتتىغۇ دەيمەن. سىرىتقا بىر ئىش بىلەن چىقتىم دەۋازىنى ئەمدى ئېتەي دەپ تۇرۇشۇمغا دەرۋازىنىڭ يان تەرىپىدىكى ئازراق كاۋاك يەردە مەن تىلەمچىگە بەرگەن نان تۇرىدۇ. ئىچىمدە تىلەمچىنى مىڭنى تىللىۋەتتىم. شۇڭىمۇ تىلەمچى بولۇپ قاپتىكەنسەن. بىر ئوبدان پاكىزە ناننى ياراتماي قويۇپ كەتكىنى قارا.......... ئاشخانامنىڭ ئۆگىزىسىنىڭ بىر تەرىپىگە توخۇ تورى تۇتۇپ قۇما قىلىۋالغان يەردە جىق ئەمەس ئىككى توخۇ باققانىدىم. ھەر كۈنى توخۇلىرىمغا دان چېچىپ بېرەي دەپ چىقسام ئەنجەن پاختەكلىرى قوشنىمىزنىڭ كەپتەرخانىسىنىڭ لەمپىسىدە مېنى قاچان چۈشۈپ كېتىدىكىن شۇ داننى يەيمىزكىن دەپ قاراپ تۇرىدۇ. مەن شۇنداق چۈشۈپ كەتتىممۇ بۇ پاختەكلەردىن ئاشقىنى توخۇلىرىمغا قالىدۇ. بەزى ۋاقىتلاردا داننى كۆپرەك چېچىپ بېرىمەن. قىش مەزگىلى ئەمەسمۇ بۇ جانىۋارلارغىمۇ دان تېپىش ئاسانغا چۈشمەيدۇ. ياز ۋاقىتلىرى بولسىغۇ ئاسانلا تاپىدۇ. كونىلار دەيدىغان " يەر تېرىغان دېھقانغا كۆپ ساۋاب بېرىلىدۇ، چۈنكى تېرىغان ئاشلىقلىرىدىن ئۇچار-قۇشلارمۇ مەنپەئەتلىنىدۇ" دەپ.

yawgul

	مەن كەپتەرگە ئامراق . بىزنىڭ ئويدە ئۇن تارتىش ماشىنىسى بار . .. قۇشقاچلار كەپتەرلەر بەك كۆپ كىلدۇ