ئالدىرىغان نەگە بارار - ھېكايەت
ئالىمجان ئاخنىياز
ناشتا قىلىۋىلىپ ماڭغىن بالام ، دىگەن سۆزلەرگىمۇ ، ئالدىرايمەن ئانا ، بۈگۈن قىلىدىغان ئىشىم بەك كۆپ ،سىرتتا قىلاي ، دەپ قويۇپ ئالدىراشلا ئۆيدىن چىققان ئالىمجان مانا ئەمدىلىكتە ئالدىدىكى پويىزدەك قاتىرىسىغا تىزىلىپ ، سىگنالنى توي كۈنى كىلىن يۆتكىگەندە ناغرا ــــ سوناي چالغاندەك كوچىنى بېشىغا كىيىپ تازا بېرىۋاتقان ماشىنىلارغا قاراپ بېشى پىررىدە قايغاندەك بولدىدە ، تاكسىدىن چۈشۈپ، ئالدىراش يېقىن دوستى شىرزات يېتىۋاتقان دوختۇرخانىغا قاراپ يۈرۈپ كەتتى .
تۆت كوچىدىكى قىزىل چىراق پات يانمىغاچ، ئالدىراپ يولنى كېسىپ ئۆتۈپ بىر ماشىنا پۇتىنى ئۇرىۋەتكەچكە ، ئۇ دوختۇرخانا ئامبۇلاتۇرىيەسىگە بايىقى شوپۇرنى بولىشچە قارغىغىنىچە، ھېلىھەم ئاغرىۋاتقان پۇتىدا ئاقساپ دىگۈدەك كىرىپ كەلدى .
ئامبۇلاتۇرىيە لېفىتىنىڭ بىرسىنىڭ ئالدىدا، 《لېفىت رىمۇنىت قىلىنىۋاتىدۇ 》دىگەن ئەسكەرتىش بولغاچقا يەنە بىر لېفىتنى ساقلاۋاتقىلى ئىككى مىنۇتچە بولغان بولسىمۇ ، لېفىتنىڭ قەۋەت كۆرسەتكۈچىدىكى سان ئون بەشتىن ئۆزگەرمەيۋاتاتتى .
ـــ تازىمۇ بىر ، دەپ غۇدۇڭشىدى ئالىمجان ئىچدە ، ئالدىرىغانسىرى ماۋۇ ئەبجەق لىفىتنىڭمۇ چۈشمەيۋاتقىنىنى ، شىرزاتنىڭ قېشىدىن چىقىپ ئەنۋەرنىڭ ئالدىغا چىقمىسام بولمايتتى. ئەنۋەرگە <باشقىلارغا خەۋەر قىلما ، ئالدىڭغا ئۆزەم چىقىمەن> دەپ قويۇپ ، ئويلاشمايلا شىرزاتقىمۇ <بۈگۈن قېشىڭغا چوقۇم بارىمەن> دەپ ۋەدە بېرىپتىمەن دىسە ، ئەنۋەر روسىيەدىن ئاران كەلگەندە ئۇنى ساقلاتسام سەت ئەمەسمۇ !!
ئۇ لېفىتنىڭ تېخىغىچە چۈشمىگىنىگە ئاچچىقلاپ پەلەمپەيدىن چىقىش ئۈچۈن ماڭدى . شىرزات ئون بىرىنجى قەۋەتتىكى كىسەلخانىدا ئىدى. ئالىمجان دەسلىپىدە ئۈچ پەلەمپەينى بىر تاقلاپ ماڭغان بولسا بەشىنجى قەۋەتكە چىققاندا پۇتلىرى تېلىپ بىر بالداقتىن ئاتلاپ ئاران تەسلىكتە شىرزات بار كىسەلخانىغا كىردى .
ـــ شىرغىمۇ كىسەل تىگىدىكەن ھە !؟ دېدى ئۇ كىسەلخانىغا كىرىپ ئېلىپ كەلگەن مېۋىلىرىنى ئۈستەلگە قۇيۇپ شىرزات بىلەن قول ئېلىشىپ كۆرۈشۈۋەتكەندىن كېيىن .
ـــ كېسەللەر تەرەققىي قىلىپ شىر ـــ يولۋاسلاردىن قورقمايدىغان بولۇپ كەتكەن چېغىۋا ، دېدى شىرزاتمۇ چاقچاققا چاقچاق بىلەن جاۋاپ قايتۇرۇپ، خۇنۇك كۆزلىرىنى ھېسابقا ئالمىغاندا ئۇنىڭ ھېچ بىر يېرى كىسەلگە ئوخشىمايتتى .
ـــ قانداقراق ، شىر پادىشاھنىڭ قەيىرى كىسەلكەن ؟ دەپ سورىدى ئالىمجان يان تەرەپتە ئىككىسىنىڭ چاقچىقىدىن ھۇزۇرلىنىپ ئولتۇرغان شىرزاتنىڭ ئايالىغا قاراپ .
ـــ شۇ يۈرەك ــ مىڭىگە قان يىتىشمەيدىكەن ، بەك قۇۋەتسىزلىنىپ كېتىپتۇ دەيدۇ دوختۇرلار ، يېقىندىن تامىقىمۇ ئازلاپ ، ئۇيقۇسىمۇ يوقلا دىيەرلىك ئىدى. مەلۇم سەۋەبلەر تۈپەيلى ، شۇنىڭ تەسىرى بولسا كېرەك ، ھازىر خېلىلا ياخشى بولۇپ قالدى دېدى ئايال . ئايالنىڭ گېپى تۈگىشى بىلەن تەڭلا ئالىمجاننىڭ تېلفۇنى جىرىڭلىدى .
ــــ شىرزات ئاداش ، دېدى ئۇ تېلفۇننى قۇيۇپلا ، بىر ساۋاقدىشىم رۇسىيەدىن كەلمەكچىدى ، ئالدىغا چىقماقچىدىم، ھازىر يەنە بىر ساۋاقدىشىم مەنمۇ چىقىمەن، بىللە چىقايلى دىگەنىدى. ئالدىمغا كەلمەكچى ، سېنى كېيىن يوقلاپ كېلەي .
ــ چاتاق يوق ، بېرىۋەرگىن .
ئالىمجان شىرزاتلار بىلەن خوشلىشىپ چىقىپ، لېفىتنى باستى. ئەمدىلىكتە لىفىت بىر دىگەن ساننى كۆرسىتىپ قىمىرلىماي تۇراتتى. بىر نەچچە مىنۇت ساقلىغان بولسىمۇ بىر دىگەن سان ئۆزگىرىدىغاندەك قىلمايتتى ، ئۇنىڭ ئىچى سىقىلىپ :
ــــ لېفىتمۇ مۇشۇ ، پەستە ساقلىسا چىقىۋىلىپ چۈشمىگەن ، ئۈستىگە چىقسا چۈشىۋىلىپ چىقمىغان ، بولدىلا ، پەلەمپەيدىن چۈشەي ، چىقماقتىن چۈشمەك ئاسانغۇ ، دىگىنىچە پەلەمپەيدىن چۈشۈپ سىرتقا چىقتى .
ئۇ دوختۇرخانا ئالدىغا ماشىنىسنى توختاتقان ساۋاقدىشى بىلەن سالاملىشىپ تۇراتتى ، تېلفۇنىنىڭ شىرزاتنىڭ قېشىدا ئۇنتۇلۇپ قالغانلىقىنى سەزدى دە ، تېلفۇننى ئېلىۋالمىسا ساۋاقدىشى بىلەن تېپىشالمايدىغانلىقى كۆڭلىگە كېچىپ ، ئالدىرىغاندا نىمە ئىش بۇ !؟ دىگىنىچە ساۋاقدىشىغا ساقلاپ تۇرۇشنى جىكىلەپ قۇيۇپ يەنە كىسەلخانىغا قاراپ ماڭدى. ئۇ لىفىت ئالدىغا كېلىپ قارىۋىدى، لېفىت ئەمدى يەنە ئون بەشىنجى قەۋەتتە مىدىرلىماي تۇراتتى ، ئۇ ئاچچىقىدا 《ئالدىرىغان نەگە بارار ، ئالدىرىمىغاننىڭ كەينىگە 》دىگەن شۇ دەپ غودۇڭشۇپ، لېفىت ئىشىكىگە نەچچىنى قاتتىق تېپىۋەتكەندىن كېيىن ، تېلفۇنىنىمۇ ئالماسلىق قارارىغا كېلىپ دەسلەپتە كىرگەن چېغىدىكىدەك ئاقسىغىنىچە ئامبۇلاتۇرىيە بىناسىدىن چىقىپ كەتتى.
1355 قېتىم كۆرۈلدى | shaydayi | ئەسەر يوللىغۇچى : | |
2016-1-23 2:25:05 | :يوللانغان ۋاقتى |
بۇ تېمىغا تېخى ئىنكاس يېزىلماپتۇ
تور بىكىتىمىزدىكى ئەسەرلەرنىڭ ئىشلىتىش ھوقۇقى تور بىكىتىمىزگە ۋە ئاپتورغا تەۋە بولۇپ، قالايمىقان كۆچۈرۈپ تارقاتقۇچىلارنىڭ مەسئۇلىيتى قاتتىق سۈرۈشتە قىلىنىدۇ. ئەمگىكىمىزگە ھۆرمەت قىلىڭ! باشقىلارنىڭ ئەمگىكىنى قەدىرلەش گۈزەل ئەخلاقتۇر!!!! بىكەت مەسئۇلى: نۇرمۇھەممەت ئالاقە تېلېفۇن - ئۈندىدار: 18999843588
www.yazghuqilar.com
新ICP备15002323号
|