توخۇ ئوغرىسى- ھىكايە
metro
ئۇ ئۆگۈنىشتىلا ھەممىنىڭ ئالدى بولۇپ قالماي باشقا جەھەتلەردىنمۇ ھەممىسىنىڭ ئۈلگىسى ئىدى ، ئوغۇل ساۋاقداشلىرى ئۇنى ئالاھىدە چوڭ كۆرسە ، قىز ساۋاقداشلىرىنىڭ كۆڭلىدە مەبۇد ئىدى ، لېكىن ئۇ سىنىپىدىكى بىرلا قىزغا ئۆزىمۇ بىلىپ - بىلمەي ئاشىق بولۇپ قالغان ئىدى ،ئۇنىڭ نەزىرىدە ئۇ قىز ھېچقانداق ئىۋەنسىز ، گۈزەللىكتە تەڭداشسىز ، بىر پەرىشتە ، بىر ئاققۇ مەلىكە ئىدى ،ئۇ قىزنى كۆرسە بەك ھۇدۇقۇپ قالاتتى ، شۇڭا داۋاملىق قىزنىڭ جامالىنى ئوغۇرلىقچە كۆرۋالاتتى ، ئاۋازىغا ، گەپ - سۆزلىرىگە چاندۇرماي قۇلاق سالاتتى ، ئۇ ئۇنى كۆرۈپ تۇرمىسا ئۆزىنى يالغۇز قالغاندەك ، بىرەر نەرسىسىنى يۈتۈرۈپ قويغاندەك ھېس قىلىپ بىئارام بولاتتى ، ئۇ ئۇنى ھەقىقەتەن بەكلا ياخشى كۆرۈپ قالغان ئىدى ، قىزنىڭ ئالدىدا يۈزى تۆكۈلۈپ قىلىشتىن ئەنسىرەپ بولسىمۇ دەرسلەردە ئالدىنى بەرمەسلىككە تىرىشاتتى، ئەلىۋەتتە قىزمۇ باشقا قىز ساۋاقداشلىرىدەك ئۇنىڭغا ئاستىرىتتىن قىزىقىپ يۈرەتتى ، لېكىن يىگىتنىڭ ئۆزىنى ياخشى كۆرىدىغىنىنى بىلمەيتتى ، دەرسلەرنى بىلسىمۇ چۈشەنمىگىنىنى سەۋەپ قىلىپ يىگىتنىڭ يېنىغا بېرىپ ياردەم تەلەپ قىلىپ تۇرۋالاتتى ، يىگىتنىڭ چۈشەندۈرىشى ئۇنىڭ كاللىسىغاكىرمەي ئۇنىڭ ئاۋازىدىن غايىبانە شىرىن خىياللارغا كىرىپ كىتەتتى.
كۈنلەرنىڭ ئۆتىشى بىلەن ئۇلار كۆزى بىلەن بىر- بىرنى ئىزدەيدىغان ، بىر - بىرىنى ئوغۇرلىقچە كۆرۈپ تۇرىدىغان ، دەرستىن چۈشكەندە بىر - بىرىنى قىيمىغان ھالدا ئۈن - تىنسىز ئۇزۇتۇپ قويىدىغان ھالەتكە كەلدى. بىر كۈنى ئاخشىمى يىگىت سۈتتەك ئايدىڭدا ھويلىسىدا تۇرۇپ تۇيۇقسىزلا ئۇنى شۇنداق سېغىندى ، شۇنداق كۆرىۋالغۇسى كەلدى ،ھەمدە ئۆزىمۇ بىلمەي ئىختىيارسىز قىزنىڭ مەھەللىسى تەرەپكە ماڭدى ، ئۇ قىزنىڭ ئۆيىگە يىقىنلاشقانچە ھاياجانلىنىپ ،چىرايىدا كۈلكە، يۈرىگىدە بىرخىل سىزىم مەۋج ئۇرۇشقا باشلىدى. كاللىسىدا ئۇنى دەرىزىسىدىن بىر كۆرىۋالساملا بولاتتى دىگەن ئۇقۇملا بار ئىدى …
ئۇ قىزنىڭ مەھەللىسىگە يىتىپ كىردى، كۆڭلىدە « بۇ ، ئۇ داۋاملىق ماڭىدىغان يول ، ئۇنىڭ ئاياق ئىزلىرى قالىدىغان يول،بۇ ھاۋا ئۇ نەپەس ئېلىۋاتقان ھاۋا بۇ ئۇنىڭ مەھەللىسىدىكى دەرەخلەر ، بۇ ئۆستەڭدىكى ئاڭلىنىۋاتقان سۇنىڭ ئاۋازى ، چوقۇم ئۇ ھويلىسىغا موشۇ سۇنى توشۇپ سىپىدۇ ، ھازىر بۇ ئاۋازنى ئۇمۇ ئاڭلاۋاتقانمىدۇ ، مانا ئۇنىڭ يولى ، مانائۇنىڭ مەھەللىسى ئارلىقىم ناھايتى قىسقىلا قالدى ،بۇ مەھەللە ئۇنىڭدەكلا گۈزەلكەن ، ئۇنىڭدەكلا يېقىملىقكەن» دىگەن ھاياجانلىق خىياللار ئەكىس ئىتەتتى، مانا ئۇ قىزنىڭ دەرۋازىسىنىڭ ئالدىغا كەلگەندە يۈرىگى دۈپۈرلەپ سوقۇپ كەتتى شۇنىڭ بىلەن تەمتىرەپ توختاشتىن قورقۇپ ئۆتۈپ كەتتى ، لېكىن كۆزى بىر قانىتى ئوچۇق تۇرغان ھويلىغا قاراشقا ئۈلگەردى، ھويلىدا قىز كۆرۈنمەيتتى. لېكىن ئۆيلەرنىڭ چىرىغى دەرىزىدىن ھويلىنى تېخىمۇ يورۇتۇپ تۇراتتى، ئۇ بىر ئاز مېڭىپ كەينىگە قايرىلىپ دەرۋازىنىڭ ئالدىدىن يەنە ئۆتتى ، بۇ قېتىم ئۇ ئۆيلەرنىڭ ئىچىگە سەپسالدى ، قىز يەنىلا كۆرىنمەيتتى ، ئۇ مەھەللىنىڭ دوقمىشىغا بىرىپ بىر ئاز ئۆزىنى بېسىپ ھۇدۇقۇشلىرىنى پەسلەتتى، ھەمدە ئەتىراپنى ياخشى كۈزۈتۈپ كۆڭلىنى توختاتقاندىن كىيىن قىزنىڭ دەرۋازىسى ئالدىدىكى ئۈژمىنى نىشانلاپ كەلدى ، ئۇ ئادەم يوقلىغىدىن پايدىلىنىپ دەرەخكە تىزلىك بىلەن ياماشتى ، ئۇ ھەر بىر شاخقا چىققاندا قىزنىڭ دەرىزىسىدىن ئىچىگە قارايتتى ، قىز يەنىلا كۆرۈنمەيتتى ، ئۇ شاختىن - شاخقا يۆتكەلدى قىز يەنىلا كۆرەنمەيتتى ، ئۇ دەرىزىگە بويۇنداپ يېپىشىپ كىتىۋېتىپ پۇتى تېيىلىپ شاخقا ئېسىلىپ قالدى ، شاخنىڭ قاتتىق سىلكىنىشى بىلەن بىر نەچچە توخونىڭ قاقىلداپ كىتىشى جىمجىتلىقنى بۇزدى ، ئۇ چۆچۈپ دەرەخ شېخىدىكى توخولارنى كۆردى - دە يۈرىگى ئېغىزىغا تىقىلىپلا قالدى ، دەل شۇ چاغدا قىزنىڭ ئۈيىدىن بىر نەچچەيلەن يۈگۈرۈپ چىقىشتى :
- ۋۇ ئوغۇرى ، چۈشە پەسكە ، ئەمدى نەگە قاچىسەن ، نائىنساپ ، يۈزى قېلىن ئوغىرى ، سەندەكلەرنىڭ شورىدا موشۇ نەچچە تال توخويۇم قالغانتى ، موشۇمۇ ئامان قالمىسۇنمۇ ، چۈشە مەن سېنى بىر كۆرۈپ باقاي،- بۇ بىر ئەر كىشىنىڭ ئاۋازى ئىدى ، ئۇ غەزەپتىن ۋاقىراۋاتاتتى ، ئۇ بۇ كىشىنى قىزنىڭ دادىسى دەپ ھۆكۈم قىلدى ،
- ۋۇ ھارام يەيدىغان چۈشە ، كىمنىڭ بالىسى سەن ، خىجىل بولىشنى بىلمەيدىغان،- ۋۇ ئاچچىق ۋاقىراۋاتقان قىزنىڭ ئانىسى ئىدى ، يەنە بىرۈيلەن جىمجىت قاراپ تۇراتتى ، ئۇ بۇ چوقۇم قىز دەپ ئويلىدى ، ئۇ چۈشتى ، يەر قاتتىق ، ئاسمان ئىگىز بولۇپ چۈشتى ، دادا ئۇنىڭ ياقىسىدىن ئالغان ، ئانا قوللىرىنى سانجىپ تىللاش ھالىتىدە ئوتتۇرغاچۈشتى ، قىز ئۇنى كۆرۈپ چۆچۈپ كەتتى ، نىمە دىيىشىنى بىلەلمەي قاققان قوزۇقتەك تۇرۇپلا قالدى، ئۇنىڭ قۇلىقىغا ئاۋازلار كىرمەيتتى ، كۆزلىرىدە قىزنىڭ ئۈمۈتسىزلىق ، ئاچچىق ، نەپىرەت ، گاڭگىراشتا قالغان چىرايى قېتىپ قالدى…
ئەتىسى قىزنىڭ دادىسى مەكتەپ مۈدىرى، سىنىپ مەسئۇللىرىنى ئىزدىدى ، ھەتتا بىر نەچچە ئوقوغۇچىلارغىمۇ بۇ ئىشنى داتلىدى ، بۇ ئىشنى مەكتەپ رەھبەرلىگى مەخپىي تۇتقان بولسىمۇ يەنىلا مەكتەپكە يېيىلدى ،ئۇ بۇ ئىشلاردىن بېشىنى يەردىن كۆتۈرەلمەي سۈكۈت بىلەن جاۋاپ قايتۇردى. بىر كۈنى ئۇ جىمجىت يوقاپ كەتتى ، قىزنىڭ كۆزلىرى يەنىلا ئۇنى ئىزدىدى ، لېكىن ئۇ يوق…
ئون بەش يىلدىن كىيىن قىز شەھەردە ئۆي - ئوچاقلىق بولدى ،بىر يامغۇر ياققان كۈنى ئىككىسى بىر لەپمىنىڭ ئاستىنىدا تاساددىپى ئۇچۇرشۇپ قالدى ،قىز ئۇنى كۆرۈپ ھۆپپىدە قىزاردى ، ئۇمۇ قىزنى كۆرۈپ بىر ھازا تۇرۇپ قالدى ، قارىماققا ئۇنىڭ تۇرقى خېلى پىشقان كارخانىچىلارغا ئوخشاپ تۇراتتى، ئۇلار بىر ئورۇنغا بېرىپ يامغۇرغا قاراپ ئۈن- تىنسىز ئولتۇرۇشتى، قىز ئېغىز ئاچتى :
- ھېلقى كۈنى راستىنلا بىزنىڭ ھويلىغا توخو ئوغۇرلىغىلى باردىڭىزما؟
يىگىت قىزنىڭ قولىدىكى ئۈزۈكنى كۆردى ، ھەمدە ئوماق قىزنىڭ تۇغۇلغان كۈنىگە ئالغان قونچاققا قاراپ قويغاچ :
- ھەئە ، توخو ئوغۇرلىغىلى بارغان.
قىز ئۈن - تىنسىز سۈكۈتكە چۆمدى ، ئۇ بۇ جاۋاپنى كۈتمىگەن ئىدى ، يامغۇر توختىماي يېغىۋاتاتتى ، بىر ئىسىل ماشىنا يىگىتنى ئالغىلى كەلدى ،يىگىت قىزنى ئاپىرىپ قويۇشنى ئېيتتى ، لېكىن قىز كۆزىدىكى ياشنى سۈرتكەچ باشقا ياققا قارىۋالدى ، يىگىتنىڭ ماشىنىسى يامغۇر ئىچىدە غۇۋالىشىپ يوقىدى…
2015-9-20
1322 قېتىم كۆرۈلدى | metro | ئەسەر يوللىغۇچى : | |
2015-9-20 12:57:17 | :يوللانغان ۋاقتى |
بۇ تېمىغا تېخى ئىنكاس يېزىلماپتۇ
تور بىكىتىمىزدىكى ئەسەرلەرنىڭ ئىشلىتىش ھوقۇقى تور بىكىتىمىزگە ۋە ئاپتورغا تەۋە بولۇپ، قالايمىقان كۆچۈرۈپ تارقاتقۇچىلارنىڭ مەسئۇلىيتى قاتتىق سۈرۈشتە قىلىنىدۇ. ئەمگىكىمىزگە ھۆرمەت قىلىڭ! باشقىلارنىڭ ئەمگىكىنى قەدىرلەش گۈزەل ئەخلاقتۇر!!!! بىكەت مەسئۇلى: نۇرمۇھەممەت ئالاقە تېلېفۇن - ئۈندىدار: 18999843588
www.yazghuqilar.com
新ICP备15002323号
|