ئۆزبېك ياش شائىرلىرىنىڭ شېئىرلىرى

ياخشى ئۇچرىشىش بولدى.تېما ئىگىسىنىڭ ئەجرىگە تەشەككۈرلەر بولسۇن!

يۈسۈفىي، ئەنۋەر جۇلا، قارا تېكىنلەرنىڭ ئىنكاسىنىڭ جېنى بار!

بەلكىم بۇ شېئىرلار ئۆزبىك ياش شائىرلىرىنىڭ ئىجادىيەت سەۋىيەسى، مېتودى، بەدىئىي پەللىسى قاتارلىقلارنى بىزگە ئەينەن كۆرسىتىپ بېرەلمەسلىكى مۇمكىن. ئىلھام بېرىش ئۈچۈن ياش ھەۋەسكارلارنىڭ ئەسەرلىرىنى ئىشلىتىدىغان ئىش بىزلەردىمۇ بار. ناۋادا بۇنى ھەقىقەتەن بىزدىكى چاغداش شائىرلارنىڭ ئەسەرلىرى بىلەن سېلىشتۇرغىلى بولسا، بىزدىكى شائىرلارنىڭ ئەسەرلىرى ئۆزگىچە خاسلىقلىرى بىلەن ئالاھىدە گەۋدىلىنىپ تۇرىدۇ. ئەمما  ‹‹ئۆزبىكلەرنىڭ كىلاسسىك شائىرلىرى ئۇيغۇر كىلاسسىك شائىرلىرى ۋە يېڭى دەۋر ئۇيغۇر شائىرلىرىغا تەسىر كۆرسەتكەن›› دېگەن گەپلەرنى قىلغاندا ئالدىراقسانلىق قىلىشقا بولمايدۇ. كىم كىملەرگە تەسىر كۆرسەتكەن بۇنى نۇرغۇنلىرىمىز بىلىمىز. «ئۆزبىك» دېگەن مىللەت نامىنىڭ پەيدا بولغىنىغا تېخى 500 يىل بولمىغانلىقىنىمۇ ئوبدان بىلىمىز. كىلاسسىك ئۇيغۇر شائىرلىرىدىن تارتىپ ھازىرقى دەۋر ئۇيغۇر شائىرلىرىغا قەدەر ھەممىسى لاياقەتلىك شائىرلاردىن دەپ قارالمىسىمۇ، لېكىن بىزدىمۇ چېگرا سىرتىدىكىلەرنىڭ كۆزلىرىنى ئالىچەكمەن قىلالىغۇدەك شائىر ۋە شېئىرلار بار. پەقەت بىزنىڭ تەرجىمىچىلىك قۇربىمىز تازا يار بېرەلمەيۋاتىدۇ، خالاس. بىراق بۇرۇنقىغا سېلىشتۇرغاندا ھازىر زور دەرىجىدە ياخشىلىنىۋاتىدۇ.

مەن بۇ شائىرلارنىڭ ئۆزبېكلەرنىڭ بۈگۈنكى زامان ياش شائىرلىرىغا ۋەكىللىك قىلامدۇ قىلمامدۇ، ئەمەلىي ئەھۋالىنى تازا ئۇقۇپ كەتمىدىم. پەقەت ئۇلارنىڭ شېئىرلىرىنى توردىن تاللاپ ئۇيغۇرچىلاشتۇردۇم. شۇڭا، ھەر قانداق ئىنكاس -تەلەپلەرگە نېسبەتەن ھېچقانداق چۈشەندۈرۈش بېرەلمەيمەن. بەلكىم ئۇلارنىڭمۇ قالتىس ياش شائىرلىرى ۋە مۇنەۋۋەر شېئىرلىرى باردۇر. تاپالىغانلار تېخىمۇ ئېسىللىرىنى تاللاپ يوللاپ قويسا، مەنمۇ بىر ئاددىي ئوقۇرمەنلىك نەزەرىم بىلەن كۆرۈپ باقسام دېگەن ئۈمىدتىمەن....

شېئىرلارنىڭ ئۇيغۇرچىلاشتۇرۇلغان نۇسخىسى ياخشى چىقىپتۇ. شېئىرغا بەك تولا يۈك ئارتىۋەرگەنمۇ، تولا تەبىر بەرگەنمۇ، بولۇپتۇ ، بولماپتۇ دېگەنمۇ بىھۇدىچىلىك. يۇقارقى شېئىرلاردا سۆز ئوينىتىش، شەكىل ئوينىتىشتىن خالى سىدام ھالەتتىكى بىر خىل پاكىزلىق كۆزۈمىزگە چېلىقىدۇ. ئابدۇرۇسۇلجانغا يارىغىنىمۇ دەل مۇشۇ بولسا كىرەك.
   شېئىرنى مۇرەككەپ يازغىلى بولىدۇ، ئاددى يازغىلى بولمايدۇ، بۇنىڭغا ماھارەت كىرەك. پىشقان قەلەم ئىگىسىلا ئاددى مىسرالارنى يازالايدۇ.
       ئاددىيلىق ئىچىدىن ئادەمنىڭ يۈرىكىنى لەرزىگە سالغۇدەك مىسرالار  يالت قىلىپ چاقناپ ئۆتسە شۇ شېئىرنى مەڭگۈلۈك قىممەتكە ئىگە قىلالايدۇ.

ئارتتېكىننىڭ  يۇقىرىقى ئۆزبېك شائىرلىرىنىڭ شېئىرلىرىغا بەرگەن باھاسى خالىس بوپتۇ.

بۇ  بۇ شېئىرلارغىلا بېرىلگەن باھا  بولماستىن ،يەنە شېئىرنىڭ قانداق يېزىلىدىغانغىمۇ بەرگەن باھا.

رەھمەت ئەلتۇغ ئەپەندى ئۆزبېك شائىرلىرىنىڭ بۇ لېرىكىلىرىنى شۇنداق سۆيۈنۈش ئىلكىدە ئوقۇپ چىقتىم. مانا بۇ تىل ۋە مەدەنىيەتتە ئەڭ يېقىن بولغان ئىككى مىللەتنىڭ قەلبلەردە سىردىشىشى ، سىز بۇ سىردىشىشقا كۆۋرۈك بولغۇچى. سىزگە رەھمەت! مەن ئۆزبېك شائىرلىرىنىڭ شېئىرلىرىنى ياقتۇرۇپ ئوقۇيمەن. بولسا بۇندىن كېيىنمۇ پات-پات يوللاپ تۇرۇڭ! ئاللاھىم ئىشلىرىڭىزنى ئوڭۇشلۇق ھەم بەرىكەتلىك قىلسۇن! بۇ يازمىنى ئاخىرىدا   يۇپىتېر تەھرىرلىگەن. ۋاقتى  2015-10-20 19:19  

كاتتا يازمىلارنى يەتكۈچە قان-تەر بەدىلىگە، چۈشنۈشلۈك ئانا تىلمىزغا ئايلاندۇرۇپ، يىتەرسىزلىك ئورنىغا ....ئارتۇقچىلىقلارنى دەسسىتىش ئىمكانىيتىگە، ئېگە قىلغان يىتىشكەن شائىر، ئەدەبىي تەرجىمان ئابدۇرسۇل مۇھەممەت ئەلتۇغ ئەپەندىگە ئالىي ئىھتىرام، ئالىي تەشەككۈر

كەچۈرۈڭ! مەن بۇ شېئىرلارغا ئۈنچىۋالا كۆپ ئەجىر سىڭدۈرۈپمۇ كەتمىدىم ھەم ئۇنداق كاتتا باھالارغا ئەرزىپمۇ كەتمەيمەن! بۇ شېئىرلارنى پەقەت ئۇ يېزىقتىن بۇ يېزىققا ئايلاندۇرۇپ، ئانچە-مۇنچە قاش - قاپاقلىرىنى ياساپ قويدۇم شۇ...

فۇرقەت رەھىموۋ شېئىرلىرى



فۇرقەت رەھىموۋ ئابدۇساتتار ئوغلى 1987-يىلى 22-ئاپرېلدا نەمەنگان ۋىلايىتىدە تۇغۇلغان. ھازىر ئۆزبېكىستان مىللىي ئۇنىۋېرىسىتېتى ئىقتىساد فاكۇلتېتىنىڭ ئوقۇغۇچىسى. ئىجادىيەتلىرى بىر قىسىم مەتبۇئاتلاردا ئېلان قىلىنغان. مۇھەممەد يۈسۈف، شەۋكەت راھمان، ئوسمان ئەزىم، ئەركىن ۋاھىدوۋ، ئىقبال مىرزا، ئۆتكۈر ھاشىموف، سەئىد ئەخمەد ۋە باشقىلارنىڭ ئەسەرلىرىنى ناھايىتى قىزىقىش بىلەن مۇتالىئە قىلغان. ئەڭ كاتتا ئارزۇسى – خەلقنىڭ مۇھەببىتىگە ئېرىشىپ، ئۇنىڭ سۆيۈملۈك پەرزەنتىگە ئايلىنىش.



ئارزۇ


ياپراقتەك تۆكۈلسەم يولۇڭغا،
كۆكسۈمدە قالدۇرساڭ ئىزىمنى.
يېتەتتىم ئەڭ گۈزەل تىلەككە،
بىر كۆرسەم بولاتتى كۆزۈڭنى.


شاماللار تارتقۇشلاپ-تارتقۇشلاپ،
چاچلىرىڭ توسمىسا يۈزۈڭنى.
گۈل ئۆمرۈم كۈل بولسۇن يولۇڭدا
بىر كۆرسەم بولاتتى كۆزۈڭنى...

رەيھانىم، بولسىدى ئىمكانىم،
ھىدلىسام مۇئەتتەر ھىدىڭنى.
قالماستى زەررىچە ئارمىنىم،
بىر كۆرسەم بولاتتى كۆزۈڭنى...

ئۆتەرسەن نازلىنىپ، جىمىرلاپ،
كۆزۈڭگە يوشۇرۇپ ئۆزۈڭنى.
كەتسەممۇ مەيلىتتى ئەگىشىپ،
بىر كۆرسەم بولاتتى كۆزۈڭنى...

قانداق ياخشى


قانداق ياخشى بىپايان قىردا،
ئاۋازىڭنىڭ بارىچە كۈيلەش.
نىگاھىڭنى تىكىپ ئاسمانغا،
ئۆتكەن كۈنلەر ھەققىدە ئويلاش.


قانداق ياخشى ساپ تۇيغۇلارنى،
تۇتماق ئۈچۈن راھەتتىن كەچمەك.
شىلدىر-شىلدىر ئاققان سۇلارنى،
مېھرى ئوتلۇق قەدەھتە ئىچمەك.


قانداق ياخشى ھېچكىم بولمىسا،
قىينالمىساڭ باغرىڭ ئېزىلىپ.
پەقەت ساڭا قوشاقلار ئېيتسا،
قاشقالداقلار قېشى سۈزۈلۈپ...


قانداق ياخشى كۆڭلۈڭ تولدۇرۇپ،
ئويلىرىڭدىن مەنزىلنى كۆزلەش.
يا ھەممىدىن يوشۇرغان سىرىڭ،
ياخشى كۆرگەن قىزىڭنى ئەسلەس...


قانداق ياخشى جەننەتتەك باغدا،
يارىڭ بىلەن ئاھ، سەيلى قىلىش.
ئۆمۈر شامىڭ تۈگىگەن چاغدا،
قىينالماستىن جاندىن ئايرىلىش...

قانداق ياخشى...


ھەممىسى باشقىچە بولاتتى


گەرچە ھالىمىزدىن يالماۋۇز،
چىشلىرىنى كۆرسىتىپ كۈلىدۇ.
ئاخىر ئۇ بىلمەيدۇ، بىلمەيسىز،
ھەممىسى باشقىچە بولىدۇ...

زامانە جار سالار دۇنياغا،
يامغۇر ھەم شىۋىرلاپ قالىدۇ.
سىغمايمىز يەرگە يا ساماغا،
ھەممىسى باشقىچە بولىدۇ...

ياشايدۇ ئويلىنىپ، ئەنسىرەپ،
ئادەملەر نېمىنى بىلىدۇ؟
كۆرەرسىز بىزلەرنى كۈن تۇغار،
ھەممىسى باشقىچە بولىدۇ...

كىملەردۇر قارايدۇ ھومىيىپ،
ئەلەمدىن چېچىنى يۇلىدۇ.
بەس! بىر رەت قويسىڭىز جىلمىيىپ،
ھەممىسى باشقىچە بولىدۇ...


ئۆزبېكچىدىن ئابدۇرۇسۇل مۇھەممەد ئەلتۇغ ئۇيغۇرچىلاشتۇردى
2015-يىلى 11-ئاينىڭ 21-كۈنى. يەكەن
بۇ يازمىنى ئاخىرىدا   ئەلتۇغ تەھرىرلىگەن. ۋاقتى  2015-11-22 18:17  

دوستۇم ئەلتۇغ،ياخشى ئىشقا تۇتۇش قىپسەن. ھەركىم ھەرنېمە دېسە مەيلى،ئالدىڭغا قاراپ مىڭىۋەر!

رەھمەت ئەزىز دوستۇم! قوللىغىنىڭغا، ئىلھام بەرگەنلىكىڭگە كۆپ تەشەككۈر!