شىياۋمى بۈگۈن چۈشتىن كىيىن شىياۋمى ئېكولوگىيە زەنجىرى 2016-يىللىق سۆھبەت يىغىنىنى ئېچىپ، ئۆز بايرىقى ئاستىدىكى يېڭى ماركا «MIJIA مىجىيا» (شىياۋمى ئائىلىسى) نى ئېلان قىلغان، لېيجۈن يىغىندا شىياۋمى ئېكولوگىيە زەنجىرىگە ئالاقىدار بىر قاتار سانلىق مەلۇماتلارنى ئاشكارىلىغان. سانلىق مەلۇماتقا ئاساسلانغاندا، شىياۋمى ئۆتكەن ئىككى يىلدا جەمئىي 55 يېڭىدىن ئىگىلىك تىكلىگەن شىركەتكە مەبلەغ سالغان.
دۆلىتىمىزدىكى باشقا يانفون كارخانىلىرىغا ئوخشىمايدىغان يېرى، شىياۋمى يانفوندىن باشقا ئۈسكۈنىلەرگە چېتىلىدىغان ئېكولوگىيە زەنجىرىنى تەرەققىي قىلدۇرۇشقا زور ئەھمىيەت بەرگەن، بۇ ئۆز نۆۋىتىدە شىياۋمىنىڭ خىلمۇ-خىل ئەقلىي ئىقتىدارلىق ئائىلە ئۈسكۈنىلىرىنى تەتقىق قىلىشىغا ئاساس سېلىپ بەرگەن، ئەلۋەتتە، بەزى تورداشلار شىياۋمىنى مەسخىرە قىلىپ، ئۇنى «مىلىچمال دۇكىنى» غا ئوخشاپ قالدى دېيىشكەن. ھازىر شىياۋمى ئېكولوگىيە زەنجىرىدە زادى قانچىلىك كارخانا بارلىقى ئېنىق ئەمەس، بۈگۈنكى سۆھبەت يىغىنىدا، لېيجۈن كۆپچىلىككە شىياۋمىنىڭ ئۆتكەن ئىككى يىل ئىچىدە جەمئىي 55 شىركەتنى مەبلەغ بىلەن تەمىنلىگەنلىكىنى ئاشكارىلىغان، بۇنىڭ ئىچىدە 29 شىركەت بولسا شىياۋمى ئاساسىدا يوقتىن بارلىققا كەلگەن. 29 شىركەتنىڭ ئىچىدىكى 20 سى ئۆزىنىڭ مەھسۇلاتىنى ئېلان قىلغان، بۇنىڭ ئىچىدىكى يەتتە شىركەتنىڭ يىللىق كىرىمى 100 مىليون يۈەندىن ئاشقان، ئىككى شىركەتنىڭ يىللىق كىرىمى ھەتتا بىر مىليارد يۈەنگە يەتكەن.
لېي جۈننىڭ دېيىشىچە، كەسپى ساھەدىكىلەرنىڭ باھالاش ئۆلچىمىگە ئاساسلانغاندا، بازار قىممىتى بىر مىليارد دوللاردىن ئاشىدىغان شىركەتلەر «كەركىدان كارخانا» (独角兽企业) دەپ ئاتىلىدىكەن، بۇ بويىچە ئېيتقاندا، شىياۋمى ئېكولوگىيە زەنجىرىدە ھازىرغىچە تۆت-بەش شىركەت بۇ ئۆلچەمگە چۈشىدىكەن.
