ما يىنىڭ خەۋەر قىلىدۇ: شىنجاڭ لوپنۇر كەندىرى ئۆزگىچە يېزا ئىگىلىك كەسپى بىرىكمە تۈرى بوشنۇم لوپنۇر كەندىرى ئىشلەپچىقىرىش بازىسى قۇرۇلۇشى 27 – مارت كورلىدا باشلاندى، بۇ مەملىكەت بويىچە لوپنۇر كەندىرى ماتېرىياللىرى، لوپنۇر كەندىرى ئىلمە توقۇلما بۇيۇمى ئىشلەپچىقىرىشتىكى بىردىنبىر كارخانىنىڭ كورلا توقۇمىچىلىق، كىيىم – كېچەك شەھەرچىسىدە ماكانلاشقانلىقىدىن دېرەك بېرىدۇ.
بۇ تۈرگە 332 مىليون يۈەن مەبلەغ سېلىنىدىغان بولۇپ، ئۈچ قارارغا بۆلۈنىدۇ، تېرىلغۇ كۆلىمى 80 مىڭ مو بولۇپ، پىلاندىكى يىللىق مەھسۇلاتى 310 مىڭ يۈرۈش (كارىۋات بۇيۇملىرى، كىيىم – كېچەك، پايپاق قاتارلىقلار). تۈر تاماملانغاندىن كېيىن، شۇ جاينى 300 ئىش ئورنى بىلەن تەمىنلەيدۇ. 1 – قارارلىق قۇرۇلۇش 9 – ئايدىن ئىلگىرى ئىشلەپچىقىرىشقا كىرىشتۈرۈلىدۇ.
شىنجاڭ بوشنۇم بىيو پەن – تېخنىكا چەكلىك شىركىتىنىڭ باش دىرېكتورى ۋېن شىنخۇي مۇنداق دېدى: بۇ تۈردە لوپنۇر كەندىرىدىن تالا ئىشلەپچىقىرىش، ئارىلاش توقۇمىچىلىق يېڭى تېخنىكىسى، يېڭى ھۈنەر – سەنئىتى قوللىنىلغان بولۇپ، شىنجاڭنىڭ لوپنۇر كەندىرى، پاختا ئارىلاش توقۇمىچىلىق مەھسۇلاتلىرىنى ئېچىش، مەھسۇلات سۈپىتىنى ئۆستۈرۈش ئارقىلىق كارخانىنىڭ بازار رىقابەت كۈچىنى ئاشۇرىدۇ. شىركەت ھازىر مەملىكەتكە يۈزلەنگەن تىجارەت تورى قۇرۇشنى پىلانلاۋاتىدۇ.
مەنبە: تەڭرىتاغ ئۇيغۇرچە تورى
