تەڭرىتاغ تورىنىڭ مۇخبىرى شىنجاڭ ئۇيغۇر ئاپتونوم رايونلۇق ئورگان ئىشتاتى خىزمەت يىغىنىدىن ئىگىلىشىچە، 2014-يىلى ئېلىپ بېرىلغان ئورگان ئىشتاتىنى ئىسلاھ قىلىش ۋە باشقۇرۇش خىزمىتى كۆرۈنەرلىك نەتىجىگە ئېرىشكەن بولۇپ، بۇنىڭدا «ئاپتونوم رايونلۇق ھۆكۈمەت فۇنكسىيە ئۆزگەرتىش ۋە ئورگان ئىسلاھ قىلىش لايىھەسى» بويىچە، ئاپتونوم رايونلۇق يېمەكلىك دورا نازارەت قىلىپ باشقۇرۇش ئىدارىسىنى قايتا تەشكىللەش خىزمىتىنى تاماملىغان. تەتقىق قىلىش ئارقىلىق سودا سانائەت مەمۇرىي باشقۇرۇش، سۈپەت تەكشۈرۈش تۈزۈلمىسىنى تەڭشەش دەسلەپكى پىكرىنى ئوتتۇرىغا قويغان.

بۇنىڭدىن باشقا، ئىچكىرىلەپ تەكشۈرۈش ۋە رەتلەش ئارقىلىق كەسپىي ئورگانلارنى تۈرگە ئايرىش خىزمىتى ئاساسىي جەھەتتىن تاماملانغان ۋە بۇنى ئاساس قىلغان ھالدا كەسپىي ئورگانلارنى ئەمەلدىن قالدۇرۇش، بىرلەشتۈرۈش، تەرتىپكە سېلىش خىزمەتلىرىنى كۈچەيتكەن. بۇنىڭ ئىچىدە ئاپتونوم رايون بىۋاسىتە قىسقارتىش ئېلىپ بارغان كەسپىي ئورگان 101 بولۇپ، 4388 كەسپىي ئورگان ئىشتاتى، 124 رەھبەرلىك ئورنى بىكار قىلىنغان.