جۇڭ شيۇلىڭنىڭ ئاپتونوم رايونلۇق تەرەققىيات ۋە ئىسلاھات كومىتېتىدىن ئىگىلىشىچە، دۆلەت 2013 – يىلى ئاپتونوم رايونىمىزنىڭ پوچتا مۇلازىمەت ئۇل ئەسلىھەلىرىنى ئۆلچەملەشتۈرۈپ ئۆزگەرتىشى ۋە ئۈسكۈنە سېتىۋېلىشى ئۈچۈن، 135 مىليون 540 مىڭ يۈەن مەبلەغ ئورۇنلاشتۇرىدىكەن. بۇنىڭ ئىچىدە مەركەزنىڭ خامچوت ئىچىدىكى سېلىنمىسى 40 مىليون 660 مىڭ يۈەن، يەرلىك ھەرىكەتچان مالىيە كۈچى 13 مىليون 550 مىڭ يۈەن، پوچتا شىركىتىنىڭ سېلىنمىسى 81 مىليون 330 مىڭ يۈەن ئىكەن.

    ئىگىلىنىشىچە، شىنجاڭ پوچتىسىنىڭ مۇھىم ئالاقە ئۇل ئەسلىھەلىرى شارائىتىنى ياخشىلاش ئۈچۈن، دۆلەت تەرەققىيات ۋە ئىسلاھات كومىتېتى ‹‹غەربىي رايون ۋە يېزا پوچتىلىرىنىڭ مۇلازىمەت ئۇل ئەسلىھەلىرى قۇرۇلۇشى تۈرىگە 2013 – يىلى مەركەز خامچوتىدىن مەبلەغ سېلىش پىلانى توغرىسىدىكى ئۇقتۇرۇش››نى چۈشۈرگەن ھەم شىنجاڭنىڭ 172 پوچتا مۇلازىمەت تور نۇقتىسى (قايتا سېلىنغان 84 ئورۇننى ئۆز ئىچىگە ئالىدۇ)نى، ناھىيە دەرىجىلىك پوچتا ئىدارىسىنىڭ 18 جايدىكى ئۆيلىرىنى ئۆزگەرتىشىگە، پوچتا يوللانمىسى يەتكۈزۈش ئاپتوموبىلىدىن 137نى سېتىۋېلىشىغا 135 مىليون يۈەندىن ئارتۇق مەبلەغ ئورۇنلاشتۇرىدىكەن.

    ئاپتونوم رايونلۇق تەرەققىيات ۋە ئىسلاھات كومىتېتىنىڭ ئالاقىدار مەسئۇلى مۇنداق دېدى: بۇ تۈرلەر تاماملانسا، ئاپتونوم رايونىمىزنىڭ پوچتا مۇلازىمەت ئۇل ئەسلىھەلىرىنىڭ كاپالەتلەندۈرۈش ئىقتىدارى ۋە پوچتا مۇلازىمەت سەۋىيەسى يوقىرى كۆتۈرۈلىدۇ، پوچتا ئىشلىرىنىڭ سىجىل، ساغلام تەرەققىياتى ئىلگىرى سۈرۈلىدۇ.

    