تۇرالغۇ ۋە شەھەر – يېزا قۇرۇلۇشى مىنىستىرلىقى يېقىندا 2013 – يىللىق مەملىكەتلىك يېزا، كەنتلەرنى پىلانلاش سىناق خىزمىتىنى ياخشى ئىشلەشكە ئائىت ئۇقتۇرۇش چىقاردى. ئۇقتۇرۇشتا: پىلانلاش خىزمىتى دېھقانلارنىڭ ئىشلەپچىقىرىش، يەر ئىشلىتىش، تۇرالغۇ، ئۆي ھوقۇقىغا تولۇق ھۆرمەت قىلىنغان ئاساستا ئېلىپ بېرىلىشى كېرەك، دەپ تەكىتلەندى.

    تۇرالغۇ ۋە شەھەر – يېزا قۇرۇلۇشى مىنىستىرلىقى يېزا، كەنتلەرنى پىلانلاش سىناق خىزمىتىنى بۇ يىلدىن باشلاپ يولغا قويۇشنى بېكىتكەن بولۇپ، بۇ ئارقىلىق يېزا، كەنتلەرنىڭ ئەمەلىي ئەھۋالىغا، شۇنداقلا سوتسىيالىستىك يېڭى يېزا قۇرۇش تەلىپىگە ئۇيغۇن كېلىدىغان، ئۈلگىلىك كەنت، مەھەللىلەر بارلىققا كەلتۈرۈلىدىكەن.

    سىناق قىلىنىپ تەرتىپكە سېلىنىدىغان يېزا، كەنتلەر تۆۋەندىكى ئۆلچەم بويىچە تاللىنىدىكەن: بىرىنچى، ئادەم ئولتۇراقلىشىشقا ماس كېلىدىغان، مۇھىتى ياخشى يېزا، كەنتلەر. ئىككىنچى، كەسىپلەرنىڭ راۋاجلىنىشى بىر قەدەر تېز، بىر تۇتاش پىلانلاش زۆرۈر بولغان يېزا، كەنتلەر. مەسىلەن: زامانىۋى يېزا ئىگىلىكى، سانائەت، ساياھەتچىلىك تەرەققىي قىلغان يېزا، كەنتلەر. ئۈچىنچى، كۆپ قۇرۇلۇش قىلىنغان، تەرتىپكە سېلىشقا موھتاج يېزا، كەنتلەر. مەسىلەن: شەھەر – بازارلار تۇتاشقان قىسىمدىكى ياكى مۇھىم قاتناش لىنىيەسى بويىدىكى يېزا، كەنتلەر. تۆتىنچى، جىددىي قوغدىلىشقا موھتاج يېزا، كەنتلەر. مەسىلەن: تارىخىي مەدەنىيەت يادىكارلىقلىرى بار، قوغداش قىممىتىگە ئىگە يېزا، كەنتلەر ياكى ئىپتىدائىي قەبىلىلەر. بەشىنچى، تەبىئىي مەنزىرىسى گۈزەل، ساياھەتچىلىكنى راۋاجلاندۇرۇشقا باپ كېلىدىغان يېزا، كەنتلەر. ئالتىنچى، باشقا قىزىق نۇقتا، قىيىن نۇقتا مەسىلىلىرى كۆپ كۆرۈلىدىغان يېزا، كەنتلەر.

    ئۇقتۇرۇشتا، يېزا، كەنتلەرنى پىلانلاش خىزمىتىدە تەرتىپكە سېلىش ئاساس قىلىنىش ئالاھىدە تەكىتلەندى. يەنى يېزا، كەنتلەرنىڭ ئەسلىدىكى تەبىئىي مۇھىتى بىلەن يېزا ئىگىلىك ئىشلەپچىقىرىشىنىڭ بېقىندىلىق مۇناسىۋىتىگە ھۆرمەت قىلىنىپ، قارىغۇلارچە چوڭ كۆلەمدە ئېچىش، قۇرۇلۇش قىلىشنىڭ ئالدى ئېلىنىدىكەن، شۇنداقلا يېزا، كەنتلەرنىڭ مۇھىتى ۋە ئىشلەپچىقىرىش شارائىتى نۇقتىلىق ياخشىلىنىپ، تارىخىي مەدەنىيەت قىممىتى، رايون ۋە مىللىي ئالاھىدىلىكى گەۋدىلىك يېزا، كەنتلەر قوغدىلىدىكەن. نوقۇل شەھەر پىلانلاشتا قوللىنىلغان ئۇسۇللار قوللىنىلماي، شۇ جاينىڭ ئەمەلىيىتىگە ئۇيغۇن كېلىدىغان ئۆزگەرتىش، راۋاجلاندۇرۇش پىلانى تۈزۈلىدىكەن.

    