سۈي يۈنيەننىڭ يېقىندا ئاپتونوم رايونلۇق رايوننى قانۇن بويىچە ئىدارە قىلىش ئىشخانىسىدىن ئۇقۇشىچە: 4 – ئاينىڭ ئاخىرى ئاپتونوم رايوندىكى 300 مىڭدىن ئارتۇق ھۆكۈمەت خادىمى قانۇن ئىمتىھانىغا قاتنىشىدىكەن. ئاپتونوم رايونلۇق رايوننى قانۇن بويىچە ئىدارە قىلىش ئىشخانىسى بۇ قېتىمقى قانۇن ئىمتىھانىدا شەكىلۋازلىق، قۇرۇق رەسمىيەتچىلىك قىلماسلىققا كاپالەتلىك قىلىش ئۈچۈن، بۇ يىللىق قانۇن ئىمتىھانىنى زور دەرىجىدە ئىسلاھ قىلىپ، بىر ئادەم بىر ئۈستەلدە ئولتۇرۇپ، يېپىق ئىمتىھان بېرىش ئۇسۇلىنى قوللىنىپ، ئىمتىھان نەتىجىسىنى بەلگىلىك دائىرىدە ئېلان قىلىدىكەن.

    بۇ يىلقى قانۇن ئىمتىھانى ئاپتونوم رايوننىڭ ھۆكۈمەت خادىملىرىدىن ئېلىنىدىغان تۇنجى قېتىملىق يېپىق ئىمتىھان ھېسابلىنىدۇ. ئىمتىھاندىن ئىلگىرى رايوننى قانۇن بويىچە ئىدارە قىلىش ئىشخانىسى ئىمتىھان بەرگۈچىلەر نومۇرىنى بىر تۇتاش ئورۇنلاشتۇرىدۇ، ئىمتىھانغا قاتناشقۇچىلار كۈچكە ئىگە كىنىشكىسىنى ئېلىپ، نومۇرى بويىچە ئۆز ئورنىدا ئولتۇرىدۇ، ۋاكالىتەن ئىمتىھان بەرگۈچىلەر بايقالسا، ئىمتىھان نەتىجىسى بىكار قىلىنىدۇ. ئىمتىھاندا بىر ئادەم بىر ئۈستەلدە ئولتۇرۇپ، مۇستەقىل جاۋاب بېرىدۇ، كۆچۈرۈش مەنئى قىلىنىدۇ، ئوخشاش جاۋاب بېرىلگەن ئىمتىھان قەغىزى بىكار قىلىنىدۇ.

    22 –، 23 – ئاپرىل ئىككى مەيدان بىر تۇتاش ئىمتىھان ئورۇنلاشتۇرۇلىدۇ، 25 –، 26 – ئاپرىل ئورۇنلار ئۆز ئالدىغا ئىمتىھان تەشكىللەيدۇ. بىر تۇتاش ئىمتىھانغا قاتنىشىدىغانلار ئاپتونوم رايوندىكى بۆلۈم، كومىتېت، نازارەت، ئىدارىلەر، خەلق تەشكىلاتلىرى، ئالىي مەكتەپ، تېخنىكوملار، كارخانا، كەسپىي ئورۇنلار ۋە مەركەزنىڭ شىنجاڭدىكى ئورۇنلىرىنىڭ نازىر دەرىجىلىك بىردىن كادىرى، ئاپتونوم رايون دەرىجىلىك ئورۇنلاردىكى ئىشتاتلىق خادىملار تىزىملىكىدىن ئىختىيارىي تاللانغان %10 خادىمدىن تەركىب تاپىدۇ. بۇنىڭ ئىچىدە باشقارما باشلىقى دەرىجىلىك كادىرلار پىرىنسىپ بويىچە شۇ ئورۇندىكى ئىمتىھانغا قاتنىشىدىغانلارنىڭ %60 تىن ئاز بولمايدۇ. ۋىلايەت، ئوبلاست، شەھەرلەردىكى ئىمتىھانغا قاتناشقۇچىلاردا باشقارما باشلىقى، بۆلۈم باشلىقى دەرىجىلىكلەر ئاساس قىلىنىدۇ، ناھىيە، شەھەر، رايونلاردىكى ئىمتىھانغا قاتناشقۇچىلاردا بۆلۈم باشلىقى دەرىجىلىكلەر ئاساس قىلىنىدۇ.